KUCHING: Gerempung penerebai di baruh Malaysia Airline di Sarawak enggau Sabah ngemutuska deka nyukung sereta meri kerejasama ngagai Ketuai Pemesai Eksekutif (CEO) baru Malaysia Airlines Bhd (MAB) Christoph Mueller enggau Khazanah Nasional Bhd (KNB).

Sekretari Airlines Workers Union Sarawak, Lim Swee Seng madah, kebuah iya laban dekaka kompeni penerebai kitai ti baru terus terebai, ukai semina bisi juluk baru tang mega patut ngembuan runding sereta pemereti ti menuku.

Gerempung penerebai nya nyengkaum Airlines Workers Union, Sarawak; Sarawak Executive Staff Committee; Airlines Transport Workers Union, Sabah enggau Sabah Executive Staff Committee.

“Kami deka gawa bebendar sereta chakah agi begulai enggau CEO baru awakka ulih betapi sereta mutarka pengelemi tauka penanggul atur ke lama, kelimpah ari ngenukuka pengawa ngatur atur baru pejalai kompeni nya.

“Kami nyukung penuh pengawa nyirika CEO baru Christoph Mueller, ti nyadi ketuai tauka pengiring kompeni penerebai kitai lebih agi maya betapi enggau pemar tauka penanggul diatur.

“Kami minta semua kaban enggau pengereja pengawa Malaysia Airlines Bhd (MAB) maju sereta meri kerejasama ngena chara profesyenal lalu nadai bechiping enggau piak mangku pengawa awakka ulih betapi enggau isu produktiviti, motivasi enggau kerejasama ti nyadi penekul kompeni penerebai tu sebedau tu,” ku iya.

Lim mansutka pekara nya dalam aum pengarang berita begulai entara Airlines Workers Union, Sarawak; Sarawak Executive Staff Committee, Airlines Transport Workers Union, Sabah enggau Kongres Kesatuan Sekerja Malaysia Sarawak (MTUC) ba opis MTUC ditu, kemari.

Bejaku baru Lim madah, deka mayuh pemar tauka penanggul ditapi jemah ila sereta tusah deka ngaga pemutus.

Nya alai kami minta pengereja pengawa ti bisi pekara ke enda ngemuaska ati tau datai mantaika pekara nya nengah kami, ku iya.

“Kami arap bendar kami ulih bejalaika tanggungpengawa kami ba pengawa mutarka isu tu enggau piak pengatur pengawa, ngena chara nadai bechiping sereta manah agi.

“Kebuah iya laban kami deka ngenukuka orang ti pemadu beguna iya nya pelanggan enggau orang tambang ulih ngasaika servis ti kala tebilang – nerebaika rayat Malaysia ke serata dunya sereta mai dunya ngagai Malaysia, kelimpah ari nyukung objektif pemansang menua,” ku iya ti minta rayat Malaysia nyukung sida dalam pekara nya.

Nitihku Lim, semua pengereja pengawa ti diketuka (nyengkaum sida ti dipinta gawa baru) deka nerima pampas ari isda ti diketuka gawa ti setipak enggau undang-undang buruh ti relevan tauka sepenyampau 0.55 kali gaji bulan tiap bulan setaun servis.

Sida ti enda dipinta gawa baru deka nerima sepenyampau 1.5 bulan gaji ke tiap taun servis, ku iya seraya madahka 98 peratus pengereja pengawa udah besetuju deka gawa tauka nerima peminta.

“Semua pengereja pengawa Malaysia Airline di Sabah enggau Sarawak ti nyengkaum piak pengatur pengawa bisi 1,200 iku, lalu ari penyampau nya kurang ari 20 peratus ti badu gawa,” ku iya.

Sama bisi ngulu aum pengarang berita nya kemari, Sekretari MTUC Sarawak Andrew Lo, Chairman MTUC Mohd Ibrahim Hamid, Presiden Airlines Workers Union, Sarawak Haswandy Morshidi; Presiden Sarawak Executive Staff Committe Abdul Rahman Hassan; Presiden Airlines Transport Workers Union, Sabah Awang Musa Awang Kassim enggau ke bukai.

KE PENGINGAT: Danny Lawai (kanan) nyuaka tepa ngagai Jabu seraya dikemataka (ari kiba) Dennis, Wilson, Anyi (dua kanan) sereta sida ke bukai maya atur pengawa nya.

MARUDI: Peranak menua ari Sitak Moh/Lio Mato deka numbuhka Skim Getah Bekualiti Tinggi (Pulut Melaya) ari perintah sereta genap ruang bilik nya deka diberi tanah pemesai 10 ikar endur nanam getah.

Tu nyengkaum peranak rumah panjai ari Long Semiang (52 pintu) Long Tunggan (73 pintu) Lio Mato (74 pintu) Long Selaan (45 pintu) Long Moh (97 pintu) sereta kandang menua ke bukai ti bedau bisi dalam rintai nama.

Nengah projek Getah Bekualiti Tinggi tu deka nguntungka peranak menua ngelingi nya sereta Jabu mega bisi ngelalau sida ngambika enda saru runding enggau pangan diri ketegal pekara politik ti nyadi kemaya hari tu, lebih agi raban bansa Kenyah enggau Kayan, ku iya.

Jaku nya dipansutka Sapit Kepala Menteri ke mega Menteri Pemansang Menua Pesisir, Datuk Patinggi Tan Sri Alfred Jabu Numpang lebuh bejaku bejadika Pengerami Pemesai Begulai enggau Rayat di Long Semiyang, Ulu Baram pagi Hari Minggu tu tadi.

Ku Jabu nambah, iya berasai lantang ati ngagai raban bansa Orang Ulu di Baram ti udah nerima pengawa pemansang ti dipejalaika Perintah sereta sekeda chunto iya, kena bulan Julai 2010, iya udah mujur mai Menteri Besai kitai, Datuk Seri Najib Tun Razak bejalai nemuai ngagai Long Banga di Rumah Panjai Saban sereta di Long Banga mega agih belanja ti pemadu mayuh udah dikemendarka iya nya penyampau RM26 juta dikenan ngaga Sistem Hydro Long Banga.

Diatu peranak Long Banga udah ulih ngasaika bekal kuasa karan 24 jam disambung ari hydro sereta iya udah ngemansangka Long Bruang enggau Long Peluan enggau pengawa Kebun Getah Dandang Besai Bekualiti Tinggi, pia mega agih belanja penyampau RM300 juta kena ngemanahka jalai batang ti tengah raban ari Bario ngagai Pa Daleh.

Kelimpah ari nya, Jabu nusuika, Sapit Menteri Besai, Tan Sri Myhyiddin Yassin udah ngemendarka agih belanja penyampau RM60 juta dikena bejalaika pengawa nyambung empat buah jematan di Long Peluan sereta pengawa ngemanahka jalai ngagai Lio Mato, ku iya.

Perintah mega deka ngadakan Sekula Sekondari K.9 di Bruang diungkupka ngagai raban bansa Penan, Saaban enggau Kelabit di tanah bukit, baka ti udah mujur dipejalaika di K.9 Sekula Primari (SK) Long Bedian, Apoh, urung iya 450 iku nembiak sereta bisi 200 iku nembiak raban bansa Penan mega bisi besekula di sekula K.9 Long Bedian. Mayuh macham pengawa pemansang deka dipejalaika baka Palan Intergrasyen Pengawa Betanam Betupi di Long Bruang.

Berebak enggau pengerami nya, Jabu bisi ngemendarka geran Agih Pemansang Mit Menua Pesisir (MRP) penyampau RM15,000 ngagai Komiti Pemansang enggau Pengelikun Genturung Pendiau (JKKK) Long Semiang dikena ngaga jalai semin nyambung tiga buah rumah panjai nengah pengawa beripai.

Ku Jabu nandu, beri mih sukung ti enda bebagi ngagai Dennis Ngau, Anyi Ngau, iya nya Barisan Ngau. Nya alai enti sema kita bisi minta bantu di rumah panjai tau betemu enggau seduai dua tu.

Bela bisi datai ngulu pengerami iya nya Kaban Parlimen (MP) Baram Anyi Ngau, Kaban Kunsil Nengeri (ADUN) Telang Usan, Dennis Ngau, Sekretari Politik Kepala Menteri, Robert Laing, Tan Sri Datuk Amar Wilson Baya Dandut, Datu Ose Murang, Datu Ngenang Janggu sereta Residen Miri, Anthonio Kathi Galis.

Pengudah pengerami nya, Jabu enggau raban ke bukai bisi dinahka makai tengah hari di Bilik Danny Lawai Kajan sereta Jabu mega bisi bejalai ngabas TK. John Jau Wan.

Dikarang Rengenyan Labang//

KUCHING: Sekretari Kongres Gerempung Pengereja Pengawa (MTUC) Sarawak, Andrew Lo bepenemu orang politik enda patut malut diri ba penanggul tauka atur sekalika dalam kompeni penerebai tauka gerempung korporat di menua tu.

Ku iya, enti dibalut tauka bisi besangkut ba orang politik nya ukai deka ngemuntang tang deka ngenanggulka agi isu dalam kompeni penerebai tauka penanggul dalam gerempung korporat.

“Aku ngasaika lebih agi orang politik patut ngenyauhka diri tauka enda ibuh bekaul enggau gerempung korporat, laban politik tu ngeruga tauka mai penanggul nyengkaum mai penanggul dalam Malaysia Airline.

“Enti orang politik enda malut diri tauka bekaul enggau isu tu, aku ngasaika penerebai Malaysia Airline ulih mutarka penanggul nya sereta meri penguntung ngagai rayat Malaysia,” ku iya.

Lo mansutka pekara nya dalam aum pengarang berita ti diatur begulai entara Airlines Workers Union, Sarawak; Sarawak Executive Staff Committee, Airlines Transport Workers Union, Sabah enggau Kongres Kesatuan Sekerja Malaysia Sarawak (MTUC) ba opis MTUC ditu, kemari.

Bejaku baru iya ngarapka politik nadai dikaul enggau penanggul Malaysia Airline tang meri awakka ngagai penerebai nya empu mutarka penanggul sida.

Nengang pasal penanggul beberapa bulan ke udah iya nya 6,000 iku pengereja pengawa Malaysia Airline ti deka diketu tauka pengawa pensturukturan baru, iya muji union penerebai Malaysia Airline di Sarawak enggau Sabah ti deka mutarka pekara nya enggau manah.

Iya madah, pengawa ti diatur sekeda gerempung penerebai di Semenanjung Malaysia ti begempuru bebala mayuh nya nadai mai pemutus ti manah.

Nambahka nya Lo mega ngarapka rayat Malaysia lebih ari nengeri tu nyungkung pengawa CEO baru Christoph Mueller sereta Khazanah National ti deka ngiring penerebai Malaysia Airline.

“Kitai patut meri peluang ngagai CEO baru tu lalu sida orang politik anang malut diri dalam pekara tu.

“Kitai deka ke penerebai tu meri servis ti manah sereta likun ngagai orang mayuh, lalu sukung raban union Sarawak enggau Sabah mega ngayangka sida meri pengadal ati tauka pengarap ngagai CEO baru nya,” ku iya.

Pupu raban bansa di S’wak ulih begulai enggau manah sereta likun ukai baka di Semenajung Malaysia

Dikarang Jacqueline David //

KUCHING: Tempa Sarawak nyadi menua ti tau nyadika chunto semua rayat Malaysia ti diau di menua tu, laban kaul sereta penyerakup pupu raban bansa semina unik di Sarawak aja, ku Datuk Bandar Opis Kaunsil Majlis Bandaraya Kuching Selatan (MBKS) Datuk James Chan Khai Syn.

Ba opis kunsil nya aja ku iya, bisi lebih 300 iku pengereja pengawa bansa Dayak baka Iban, Bidayuh enggau Orang Ulu.

“Enti di MBKS, pengereja pengawa bansa Dayak mih ti pemadu mayuh gawa di MBKS tang tebal agi sida tu ba renggat ke baruh aja taja pan bisi ke bepangkat besai.

“Kemaya hari tu, kenu ku orang Datuk Bandar MBKS majak popular, ukai ketegal aku empu tang pengereja pengawa opis kaunsil tu ke ngereja pengawa tu, lalu tebal agi ari pengereja pengawa nya bebansa Dayak. Sida tu nyadi chunto orang ke bagas sereta pengawa ke dikereja sida enda mayuh orang deka ngereja,” ku Chan.

Baka pengerami hari besai bukai, pengerami Ngiling Tikai Gawai Dayak udah disambut kenyau ari empat taun tu ke udah, lalu baka nya mega enggau pengerami bukai baka Taun Baru China, Hari Raya, Krismas enggau Gawai Dayak.

“Semina sekali tu maya kitai ngintu pengerami ngiling tikai Gawai Dayak, kitai enda ulih mai bala kaban Melayu laban beserimbai enggau Bulan Ramadan,” ku iya.

Bejaku pasal penyerakup pupu raban bansa di Sarawak, iya madah gaya ke baka tu sigi amat nyelai di Sarawak lalu enda sebaka enggau ke dipeda kitai di semenanjung.

“Nyadi Datuk Bandar MBKS, aku berasai temegah ati nyadi sebagi ari Perintah Menua Sarawak. Nya alai, aku ngelalau mensia mayuh, ngambika penyerakup tu ulih terus dikemujurka belama.

“Enti kitai beratika di Pasar Stutong din, sida ti bejual barang ba markit nya enda ngira bansa Dayak, China tauka Melayu, semua ulih begulai manah enggau pangan diri. Nya alai, enti aku ngagai menua luar, aku sigi seruran temegah ati enggau Kuching,” ku iya.

Sama bisi ngulu atur pengawa nya ensanus, Chairman Gerempung China Kuching/Kota Samarahan, Temenggung Lu Kim Yong enggau Temenggung Datuk James Jimbun.

Rega minyak ti diturun tauka ditiki ditentuka perintah nitihka gaya rega ba markit dunya

Dikarang Rengenyan Labang //

KUCHING: Peniki enggau penurun rega minyak petrol di menua tu ditentuka perintah bepelasarka rega minyak mata makit dunya.

Chairman Petronas Tan Sri Sidek Hassan (gambar) madah, sida nadai kaul enggau pengawa nentuka rega minyak tang semina ngeluarka minyak aja.

“Perintah udah ngemutus sereta nentuka rega ke dipam nitihka markit. Lebuh markit (minyak mata) niki mimit, rega minyak pan ditiki mimit, enti markit (minyak mata) nurun, rega minyak pan sama diturun, nya proses iya.

“Taja pia nya bisi meri pangka ngagai kitai tang kitai tetap stabil laban enda mayuh nurun. Kitai ngarapka deka niki agi laban nya meri pemanah ngagai Petronas enggau menua, taja pan ba  rega minyak ti di pam penguna ditikika,” ku iya ba sebengkah aum pengarang berita.

Sidek mansutka pekara nya lebuh ditanya sentang rega minyak RON95 ditiki taja pan rega minyak mata dunya bisi nurun.

Dulu ari nya Sidek nyuaka RM90 juta ngagai perintah nengeri nengah Kepala Menteri Datuk Patinggi Tan Sri Adenan Satem ngambika bisi dikena bejalaika program tanggungpengawa rama korperat (CSR) di Sarawak ba ‘Majlis Pengumuman Sumbangan Petronas’ ngagai nengeri Sarawak, kemari.

Dalam ripot blog, mantaika mayuh pemansik politik madahka pengirau ati pasal peniki rega petrol RON95 taja pan rega minyak mata dunya nurun mimit enti dibanding enggau bulan sebedau tu.

Dikena nemu penyampau rega minyak dunya udah nurun, Reuters kemari ngeripotka rega minyak mata Malaysia dalam bulan Jun dikira ngena rega US$66.89 (RM251.90) setong, nurun US$2.48 ari bulan ke sebedau tu.

Lebuh bejaku ba pengerami nya, Adenan ti ngenang pasal peminta nambahka royalti minyak Sarawak ari 5 peratus ngagai 20 peratus, iya madahka pekara nya agi mengkang dikeperundingka enggau perintah besai.

Perintah bedau ngayanka chara formula rega makit ninting bulan ke bendar ti dikena nentuka rega pam minyak diitung, tang ba ripot sebedau tu melabaka sekeda ari nya diambi ari rega ti ditetapka Petronas ninting bulan.

Petronas numbuhka pengelai baru berengkah ari bulan Januari 2014 bepelasarka ‘spot differentials’.

BINTANGOR: NGO Iban ditu enda ngarapka geran ari perintah dikena sida ngatur program laban baka ke ditemu semua, sida enda ulih minta nya ari kededua pengari rayat Parlimen enggau Kunsil Nengeri sida ti sama bela ari DAP.

Kaban Parlimen Sarikei iya nya Wong Ling Biu lalu Kaban Kunsil Nengeri sida Ting Tze Fui.

Ku Chairperson Serakup Induk Dayak Sarawak (SIDS) Pampang Bintangor, Mary Amirir, serakup sida semina ngarapka geran ari Indu Opis nya di Kuching meri sukung ngagai sida bejalaika aktiviti.

“Kami baka anak iru laban kededua YB kami sama ari penyakal, nya alai kami enda bulih geran ari perintah,” ku iya madah ngagai BAT V empai lama udah.

Iya madahka SIDS Bintangor chakah bejalaika ‘outreach programmes’ ba bala apai indai Iban bekaul enggau pemesai reti pelajar.

“Naka ke diatu kami jauh tinggal ari sukut pelajar enti dibanding enggau pelilih mit menua bukai. Taun siti nyin tadi, semina siku aja ari semua nembiak kami ti ngambi peresa UPSR, PMR, SPM enggau STPM, bulih GPA 3.5 ba peresa STPM ti ngujungka iya ulih nerima perais ari SIDS. Sida ke bukai nya enda teulihka pemutus ti manah. Pekara tu amat ngirauka ati kami,” ku iya.

Mary mega madahka sida deka suah agi ngatur ‘outreach programmes’ dudi ila ngambika ulih bekempit enggau apai indai sereta nembiak ti deka ngambi peresa.

“Tang kami begunaka mayuh belanja dikena ngatur aktiviti nya. Diatu, kami semina ulih ngatur pengerami makai lemai sechara mit dikena ngulihka belanja,” ku iya.

Setuju enggau penemu Mary, Kaunsilor Michael Sawong madahka diri deka matak diri ari nyukung penyakal ba pengawa bepilih dudi tu ila laban sida begunaka belanja ari perintah.

“Kami deka chakah agi gawa ngambika ulih ngerampas penuduk tu maya PRN dudi ila. Arapka BN milih chalun ti dikearap ulih menang sereta mega ulih gawaka rayat,” ku iya.

Berebak enggau nya, Sekreteri Sarawak Dayak National Union (SDNU) Pampang Bintangor, Dalang Jamba madahka serakup nya nyual plot tanah pendam ngagai bala Dayak dikena ngulihka belanja.

“Kami nyual plot pendam nya RM2,200 siti lot taja pan orang bukai nyual jaul mar ari nya. Kami ngereja tu laban deka meri servis ngagai semua bansa Dayak, nyengkaum Iban, Bidayuh enggau Orang Ulu.

“Taja pia, pendam kami ti mesai tiga ekar nya nyau deka penuh ke alai kami deka ngfambi plot tanah baru ba Lebaan,” ku Dalang.

SRI AMAN: Pengawa ngaga produk asil pengelandik jari ngena ubung, plastik tauka utai bukai ulih ngenataika belanja ngagai orang indu di menua pesisir, pia ku Menteri Muda Pemansang Menua Pesisir enggau Pengawa Berumah Sarawak, Datuk Francis Harden Hollis.

Ku iya, produk asil pengelandik jari tu ukai semina digaga dikena raban diri sebilik sida aja, tang mega ulih dijual ngagai endur bukai dikena ngulihka belanja ngagai orang indu kitai.

“Aku pechaya orang indu kitai kemaya hari tu majak kreatif, sida ukai semina nemu ngaga produk bakul ngena palstik tang mega ulih ngasilka pua kumbu ugena ubung taja pia diatu mayuh orang udah ulih ngaga mayuh macham produk asil pengelandik jari ngena surat kabar,” ku iya.

Iya ke mega Kaban Kunsil Nengeri (ADUN) Simanggang mansutka jaku nya rambau bejaku ba Pengerami Makai Lemai berebak enggau Pengerami Nutup Pekit Kraf Jari sereta Pengerami Ngiling Tikai Gawai diatur Sarakup Indu Dayak Sarawak (SIDS) Pampang Sri Aman bepalan di Dewan Suarah semak ditu, malam ensanus.

Berebak enggau nya, iya mega ngarapka semua raban orang indu di menua pesisir anang muai peluang nyereta sebarang kos tauka pekit ti bansa nya laban asil ari kos nya ulih ngemansangka ruang bilik sereta raban indu nya empu.

“Anang kitai berundingka tetiap asil pengelandik jari kitai nya enda ngemai penguntung tang iya ulih ngasil tauka ngemanahka penatai pemisi kitai empu.

“Perintah ngarapka raban orang indu ti landik ngaga asil pengelandik jari ti baka nya anang nangi nguji nyual produk sida di menua bukai,” ku iya.

Kebuah pia ku iya, tu mih peluang sida (orang indu) mandangka pengelandik sida begagaka produk asil pengelandik jari ngagai raban komuniti luar.

“Giga mih semua peluang chara nyual sereta ngelakuka produk kitai nya lalu enti sema kitai beguna sereta dekaka bantu ari sebarang ejensi perintah, anang sesekali malu betanya laban mayuh ejensi perintah ti bekaul, chunto iya Opis Menteri Dagang Temuai enggau iya ke bukai,” ku iya nampung baru.

Iya mega meri puji ngagai pengawa Gerempung Bansa Dayak Sarawak (SDNU) laban udah ngatur pekit ti bansa nya dalam pengawa mantu raban orang indu di menua pesisir nyungkak penatai pemisi sida.

“Kitai ngarapka pengawa ti baka tu ulih dikerembaika kelebih agi di kandang menua pesisir di Sri Aman tu,” ku iya baru.

Berebak enggau nya, Chairman Pengatur Pekit, Langsing Bansi madahka batang tuju pekit nya diatur dikena mekalka raban penyereta enggau penemu sereta pengelandik dalam bidang pengelandik jari.

“Pekit tu iya nya sebengkah ari pemaik raban orang indu kelebih agi orang indu di menua pesisir sereta dikena nyediaka penerang pasal pengawa dagang dikena meransang sida nguji bejalaika pengawa dalam bidang pengelandik jari udah tu,” ku iya.

Bela bisi datai rambau pekit nya, Chairman SIDS Sri Aman, Roselyn Abunawas, Bini Harden, Datin Simba Nallang, Penghulu Briku Busang enggau ke bukai.

Berebak enggau nya, Harden mega ngemendarka agih belanja RM 5,000 ngagai Sarakup Indu Dayak Sarawak (SIDS) Sri Aman.

Dikarang Judan Bungap //

SIBU: Komiti Pengerami Main Asal Dayak Borneo (BDCF) serak tu berunding deka mantaika mayuh agi main asal raban bansa Dayak seraya ngetanka pengelebih nya kelimpah dikena matak temuai ari menua luar datai.

Chairman BDCF 2015 Kaunsilor Paulus Dandee Banyang madah, komiti sida seruran betanya ngagai orang tuai ngambi ulih mantaika main asal ti enda kala dipeda kelebih agi raban nembiak baru.

“Baka pengawa betabuh enggau ngajat nyangka nyauka semua raban nembiak suah meda.

“Tang serak tu komiti kitai deka nambahka agi program baka mantaika pengawa nebah engkerurai, beramban tauka gendang pampat ti jarang dipeda kitai kemaya hari tu,” pia ku iya maya berandau enggau pengarang berita, lemai kemari.

Iya madah, pengerami baka BDCF patut dikena nyendiaka awak ngagai raban bansa Dayak mantaika main enggau adat asal.

“Bala temuai ari menua tasik ukai gagit datai nemuai ngagai menua tu laban deka meda pengawa belagu (‘live band’, tang sida rindu deka meda penyelai enggau pengelebih main enggau adat asal bansa kitai,” ku iya madah.

Dulu agi ari tu, Paulus udah nyadi ketuai aum komiti BDCF 2015 ti diatur ba Librari Opis Kunsil Sibu ditu.

Sekali tu BDCF diatur begulai enggau Serakup Indu Dayak Sarawak (SIDS) Pampang Sibu, Serakup Orang Ulu (OUNA) Sibu, Serakup Bidayuh Sarawak (DBNA) Sibu, Gerempung Dayak Sarawak (SDNU) Sibu enggau SDNU Sibu Jaya, Gerempung Raban Nembiak Dayak (PEBEDAS) Sarawak enggau PERANAK.

Nambahka nya, ku Paulus, BDCF 2015 bela randaka sukung bala mayuh baka gerempung ukai dikuasa perintah (NGO) enggi Dayak.

“Kitai mega ngarapka mensia mayuh ulih datai maya pengerami tu ila dikena ngayanka sukung sama bela ngetanka pengelebih bansa kitai ti ngembuan macham bengkah main enggau adat asal,” ku iya.

Pengerami Mantaika Main Asal Borneo (BCF) 2015 deka berengkah  30 Julai nyentuk 8 Ogos.

BDCF 2015 ke diatur beserimbai enggau BCF 2015 deka dipenyadi kena lemai 30 Julai lalu deka ditutup kena 5 Ogos.

Macham bengkah main enggau adat asal deka dipandang dalam kandang tujuh lemai berunggu ba panggau tu.

Baka selama mega, panggau BDCF deka chapuh enggau penatai mensia mayuh ti deka meda pekit ke penudi Pekit Keling enggau Kumang BDCF 2015 ti diatur kena lemai 5 Ogos.

Ngambika bisi dikena bejalaika program CSR entara Petronas enggau perintah nengeri dalam timpuh lima taun

Dikarang Rengenyan Labang //

TANGGUNGPENGAWA RAMA: Adenan diberi basa nyuaka Anugerah Penajaan Pendidikan Petronas ngagai seiku ari entara 37 iku ti dipilih PETRONAS taun tu, lalu diperatika Sidik (dua ari kiba).

KUCHING: Perintah nengeri kemari nerima sepenyampau RM90 juta ari PETRONAS ungkup taun 2015, dikena bejalaika program tanggung pengawa rama koperat (CSR) di Sarawak.

Kepala Menteri Datuk Patinggi Tan Sri Adenan Satem  ngarika perintah nengeri nerima ungkup belanja nya seraya madahka perintah nengeri deka terus ngenegapka kerejasama nya enggau PETRONAS.

Program CSR ti diatur begulai entara Petronas enggau perintah nengeri dalam timpuh lima taun (2015-2019), iya nya ngemekuh tauka ngemeratka pekara pelajar, pengintu pengelantang pendiau enggau pemansang raban bansa sereta ngemanahka tauka ngintu rampa menua.

“Udah tu tentu kitai deka minta sida (PETRONAS) gerah agi jari dibandingka enggau diatu, kitai tetap nerima (RM90 juta) penyampau ke diberi ngagai kitai diatu, tang kitai tetap deka minta mayuh agi dalam timpuh ke pandak tu.

“PETRONAS ngelama tu endang korperat ti bisi tanggungpengawa sereta gerah jari lalu kekadang nyadi penyelamat ekonomi lebuh kitai betapi enggau penanggul ekonomi.

“PETRONAS bejalaika tanggungpengawa rama (CSR) sida dalam bidang pelajar, rampa menua, pengintu pengelantang  kelebih agi dalam bidang pelajar. Dalam timpuh beberapa taun ke deka datai (PETRONAS) deka numbuhka beberapa kolej teknikal di Sarawak,” ku iya.

Adenan mansutka pekara nya dalam aum pengarang berita pengudah ‘Majlis Pengumuman Sumbangan PETRONAS’ Kepada Negeri Sarawak, ti diatur Petronas ba sebengkah hotel ditu, kemari.

Puku tauka ungkup semua belanja CSR PETRONAS ngagai Sarawak dalam timpuh lima taun (2015-2019) deka dibantaika Menteri Besai (Datuk Seri Najib Tun Razak) empu, ku iya.

Kelimpah ari nya lebuh ti ngenang pasal peminta nambahka royalti minyak Sarawak ngagai perintah besai, Adenan madahka pekara nya bedau mujur diputuska.

“Kitai agi sereta deka terus berundingka pekara tu enggau perintah besai,” ku iya.

Ba jaku pengelalu ba pengerami nya, Chairman PETRONAS Tan Sri Sidek Hassan madahka sida iya deka terus nempa kerejasama sereta terus ngenegapka agi nengeri enggau raban bansa di Sarawak nengah inisiatif ti mekuhka pelajar, pengintu pengelantang pendiau enggau pemansang raban bansa sereta pengawa ngemanah tauka ngintu rampa menua.

Nitihku Sidek, ngena RM90 juta nya sida deka ngatur mayuh bengkah program baka Program Sentuhan Ilmu PETRONAS, Program Penajaan Pendidikan PETRONAS, program Bantuan Penajaan dan Latihan Institusi Vokasional (VISTA) enggau ke bukai.

“Program Penajaan Pendidikan Petronas dipejalaika dikena mantu nembiak ti dipilih ke ulih nampung pelajar ngagai universiti baka Universiti Teknologi Petronas (UTP) enggau universiti bukai.

“PETRONAS dalam atur program VISTA, udah bekerejasama enggau beberapa buah institusyen vokasyenal ti tebilang di Sarawak baka Center of Technical Excellence (CENTEX), Sarawak; Pusat Pembangunan Kemahiran Sarawak, AWISAR, Institut Latihan Perindustrian, Miri enggau Institut Kemahiran Belia Negera, Miri.

“Taun tu program VISTA deka dikemanahka agi nengah pengawa nambahka bantu ungkup pelatih ti datai ari ruang bilik ke kurang penatai pemisi, ti deka diatur begulai enggau Yayasan Sarawak, lalu ngarapka program tu ulih nempa orang bepengelandik dalam pemansang industri minyak enggau gis sereta ke bukai,” ku iya.

Kelimpah ari nya PETRONAS mega bejalaika program Biodiversity, Environment and Conservation Project (BEACON) ba Taman Negara Simalaju enggau Piasau Nature Reserve di Miri, nyaga ekosistem nengah nanam tukun tiru awakka karang laut galak idup sereta ngelindung paya bakau, ku iya Sidek.

“Kami (PETRONAS) beterima kasih ngagai perintah nengeri laban ti tegap meri kerejasama lalu kami deka terus meri sukung dalam semua inisiatif ti dipejalaika dalam timpuh panjai, ti meri penguntung ngagai nengeri enggau rayat,” ku iya.

Bisi datai ngului pengerami nya kemari Sapit Kepala Menteri Datuk Patinggi Tan Sri Alfred Jabu Numpang, Speaker Kunsil Nengeri Datuk Amar Mohamad Asfia Awang Nassar, Menteri Pengintu Pengelantang, Orang Indu enggau Pemansang Ruang Bilik Datuk Fatimah Abdullah, Sekretari Perintah Nengeri Sarawak, Tan Sri Datuk Amar Mohamad Morshidi Abdul Ghani.

KUCHING: Gerempung Ukai Dikuasa Perintah (NGO) ti mantu orang ke tasah, Hope Place hari Dua tu udah tadi nerima temuai ari USA, Wendi Taylor, ke deka belajar sereta ngulihka penemu sentang bansa pemakai ti diberi ngagai orang ti tasah tauka sida ke begunaka bantu di menua tu.

Taylor ngarika raban volenter ari USA, iya nya USA Global Youth Food mega deka meda enti sida iya ulih muka pampang sida ditu tauka bekerejasama enggau NGO di menua tu.

Di USA, serakup USA Global Youth Food udah ngerejista 29 buah pampang bejalaika pengawa nyadi volenter baka pengawa ti dipejalaika Hope Place, iya nya nganjung pemakai ngagai orang ke tasah tauka seranta.

Nitihku jaku ari orang ke mungkal Hope Place Kelvin Wan, Taylor mega deka nemu bakani menua tu nengah opis pengelantang pendiau nemu orang nya tasah tauka seranta, lalu sida ti nyendia tauka meri tulung nya, ni gaya pemakai ke dianjung lalu bakani gaya ngatur pengelantang pendiau sida nya sereta sistem di Sarawak.

Taylor madahka diri tekenyit lebuh dipadahka sebuah NGO di menua tu semina ulih nganjung utai pakai ke rangkai aja, ku Wan.

Di USA, orang ke tusah mantaika sebana sida nengah internet enti utai pakai ti dianjung ngagai sida enda baru tauka pemakai ti pulaika pengerai, ku iya.

“Di USA, mensia mayuh kelalu moden nyentuk ke sida mantaika sebana nengah internet lalu nangkan nya orang ke gawa ngatika diri deka ngemanahka agi servis sida iya,” ku iya.

Iya madahka pemakai ti dianjung ngagai orang ti tusah di USA semua baru sereta manahka pengerai.

“Di USA, bala volenter deka nganjung pemakai ke baru ngagai orang ke tusah ninting hari. Sida iya tau besebana enti sema pemakai tauka volenter nya enda bejalaika pengawa sida enggau manah, nya alai NGO pan enda tau enda ngemanahka servis sida iya.

“Ditu, kitai semina meri pemakai ti rangkai aja, enti bisi pan pemakai ke baru, kitai enda chukup tubuh volenter nganjung pemakai nya,” ku iya, lalu nambah, Taylor madahka pemakai rangkai ti dianjung kitai ditu, nyangka kurang manahka pengerai.

Di USA, perintah menua meransang kompeni ti bebesai nulung orang ke tasah, ku iya.

Taylor bisi di Kuching dalam kandang dua hari tu. Minggu nyin tadi, iya di semenanjung nulung sereta nitihka NGO bukai.

“Ditu Wendi (Taylor) nitihka kami nganjung pemakai ngagai ruang bilik ke tusah. Kami mega besilih penemu dalam pekara bekaul enggau pengelantang pendiau. Nitihka jaku Taylor, baka ditu, orang ke seranta tauka tusah sebaka enggau di USA. Taja pia, pemakai ti dianjung agi baru baka ikan enggau manuk, ke enda tau enda manah ke pengerai, ukai baka enggau Hope Place ti nyendiaka pemakai ke rangkai,” ku iya.

Naka ke diatu, NGO nya nyukung lebih ari 120 ruang bilik. Mensia mayuh ke deka nemupenerang ke silik tau betelefon ngagai Hope Place (013-5672775) ari pukul 9 pagi ngagai 12 tengahari (Hari Satu ngagai Hari Lima). Mensia mayuh ke deka meri bantu ngagai raban tu, dilalau ngambi resit ari volenter di Hope Place.

KUCHING: Pasar Malam ‘Satok Uptown Market’ nadai bekaul enggau Opis Menteri Pengawa Dagang  Temuai (KPN) tang ari baruh kemata Opis Menteri Pemansang Pengawa Rama (KPS).

Menteri Dagang Temuai Datuk Amar Abang Johari Tun Openg madahka sebarang penanggul ti ditapi ba  di Le’ Park (belakang Dewan Suarah), patut diputarka KPS.

“Satok Uptown Market nya ari baruh kemata  KPS, nya alai awakka opis menteri mutarka penanggul  pasar malam nya…Enggai nyadi aku masuk champur ba pengawa opis menteri bukai.

“Tang Satok Uptown Market nya nadai bekaul enggau opis menteri kami (KPN) tauka Opis Menteri Pengawa Berumah (KP). Nama pasar malam nya aja ti munyika ari baruh jaga aku, tang ukai pegai opis menteri kami.

“Diatu nama Satok nyau nyadi komersial…Amat nya bisi nama Satok nyangkut dia tang nadai bekaul enggau opis menteri kami,” ku Abang Johari.

Iya madah munyi nya lebuh dikerandau pengudah nyuaka geran ari Projek Mit Pemansang Menua Pesisir (MRP) ngagai 21 buah gerempung ba Opis Menteri nya di Wisma Perumahan ditu, kemari.

Iya nandu baru, sebarang pengawa ke nyadi ba Le’ Park ditanggung KPS, lalu pemeresi endur nya pan, diintu tukang sapu ti endur nya tiap kali udah abis pasar malam.

“Ke ditemu aku, bisi dua buah serakup ke ngena endur nya, iya nya Satok Uptown Market lalu sebuah agi Kelab Nembiak ke ngena palan nya alai lumba enggau main. Nya alai, ku aku nyerah ngagai opis menteri KPS, Tan Sri William Mawan mutarka penanggul nya,” ku iya.

Enti nitihka penemu ti dibantai Mawan apin lama tu tadi, palan bejual ba Satok Uptown Market nya deka dipindahka ngagai siti endur.

“Endur baru nya patut udah dikelala Opis Kaunsil Bandaraya Kuching Utara (DBKU), lalu opis kaunsil tu deka madah ngagai KPS palan ke engkeman alai pasar malam,” ku iya.

Minggu nyin tadi, Mawan minta aktiiviti pasar malam ‘Satok Uptown Market’ nya patut diketuka tekala nya laban palan nya balat kamah endur lalu perengka gunaba palan nya mega mayuh rusak.

Kelimpah ari nya, mensia mayuh ke diau enda jauh ari nya mega bisi ngaga besebana madahka Satok Uptown Market nya kelalu inggar.

Satok Uptown Market dibuka ninting hari Lima enggau Enam belabuh ari pukul 9 malam datai nyentuk dini hari (3 pagi).

“Aku kala kia sekali, manah endar aktiviti pasar malam nya dia…..Nya alai, sebarang penanggul ke nyadi dia patut diputarka opis menteri Mawan, lalu sida ke bejual tauka bemain ba endur nya anang nyalahka pangan diri,” ku iya.

Bandaraya Kuching ngembuan kriteria ti patut sereta dikelala komuniti ba renggat entarabansa

Dikarang Jacqueline R. David //

KUCHING: Bandaraya Kuching udah dipilih Yayasan 1Malaysia nyadi ‘Bandaraya Perpaduan’.

Menteri Pengawa Dagang Temuai Datuk Amar Abang Johari Tun Openg madah, Yayasan 1Malaysia ti bechairmanka Prof Dr Mudzaffar Chandra enggau Tan Sri Lee Lam Thye udah bejuraika pekara tu ba renggat entarabansa maya ke ngiga bandaraya ti tau dirintaika nyadi  ‘Bandaraya Perpaduan’ ti mungkur penyerakup ba komuniti, pupu raban bansa enggau jalai pengarap.

“Pengudah mansik pekara tu enggau silik, sida mutuska Kuching dipilih nyadi ‘Bandar Perpaduan’ laban dikelala komuniti entarabansa.

“Kriteria ti disengkaum lebuh ngiga bandaraya ti patut ngempu gelar nya, enda tau enda bisi komuniti ‘metropolis’ ti ngembuan pupu raban bansa sereta jalai pengarap, ngembuan palan pelajar tinggi (IPT), bandar ke gadung sereta ngembuan mayuh jalai pengarap ke bebesai di dunya di dalam menua nya,” ku Abang Johari seraya madahka atur nya chukup terit.

Iya madah munyi nya lebuh bejaku ba atur pengawa nyuaka geran ngagai 21 buah serakup ba opis iya di Wisma Perumahan, Jalai Sukma ditu kemari.

Iya madah, Kuching ngembuan semua ti dipinta nya, nyengkaum tiga iti jalai pengarap ti pemadu besai di dunya baka Kristian, Islam enggau Buddha, ke alai tetiap pupu bansa ke bepengarap tu ulih beserakup sereta diau likun enggau pangan diri.

“Peratika palan besembiang tetiap jalai pengarap di bandaraya tu ti besemak enggau pangan diri, sereta ulih dilawa nengah chara bedarat. Komuniti pupu raban bansa kitai pan mayuh macham lalu tetiap pupu raban bansa nya ulih diau likun enggau pangan diri,” ku iya.

Ku iya baru, kena 1 Ogos tu ila, sida ke pandai sereta tebangkar dalam pekara bekaul enggau rayat ke datai ari mayuh macham pupu bansa deka datai ke Kuching lalu baum ditu.

“Kebuah baka nya laban kitai tu dalam bandaraya, lalu pengawa kitai ngetanka penyerakup kitai nya, lalu deklarasyen nya deka digaga kena bulan Ogos  taun 2015. Nangkanka nya bisi forum entarabansa bekaul  enggau chara ngenegapka kaul ba entara komuniti pupu raban bansa sereta jalai pengarap.

“Naka ke diatu, nadai kalai kitai ninga Bandaraya Perpaduan di dunya, tang semina bisi ‘City of Passion’ aja. Nya alai, kitai ke diau di menua tu enda tau enda nyaga penyerakup nya,” ku iya.

Kelimpah ari nya, iya ngelalau gerempung NGO ngangkatka ‘spirit of moderation’ lalu dalam timpuh ke sama mega seruran ngenegapka nya.

“Aku begunaka sukung semua kita ngangkatka bandaraya kitai, anang nitihka pengawa ti nyadi di semenanjung. Nya ti dikedeka opis menteri kami dalam RMK-11 tu, ambika (chunto) baka ba genturung pendiau ti digaga di bandaraya tu gadung, bisi palan belelak sereta bisi palan alai komuniti kitai berandau sereta bekelala enggau pangan diri,” ku iya.

Kelimpah ari nya, ba pekara bekaul enggau pengelikun ku iya, anang semina ngarapka polis aja, tang bala ari serakup pan bela tau nyaup.

“Kelimpah ari nya, kitai pan bisi ny endiaka palan baru ke rebak nembiak kitai ngambika bisi endur sida besaup bejalaika pengawa sida mantu perintah. Anang kelalu nitihka ati sereta nyengala nerima pemadah ke enda ditapis lalu ngumbai pemadah ke datai ari teknologi nya semua amat. Enti pemadah enda ditapis, tau nyadi penanggul ba kitai,” ku iya seraya ngarapka komuniti sama nyingkang enggau perintah ngangkatka kelala tu lalu tetiap iku rayat kitai pan patut berasai temegah ati laban dipilih nyadi Bandaraya Perpaduan.

Abang Johari ti megaMenteri Pengawa Berumah madahka enda lama agi iya bisi enggau aum ‘International Congress Worldwide’ ke alai iya deka meri kelala Bandaraya Kuching lebuh ke baum nya.

Maya di Buenos Aires ila, maya nyain sempekat enggau bandaraya ke bebesai di dunya, Kuching deka dipilih nyadi palan baum nangkan nya ila, pia ku Abang Johari seraya madahka nya tu siti basa ke besai.

“Ungkup gerempung NGO, perintah seruran mantu sida  kelebih agi ba pengawa ngetanka Kuching. Kitai deka ngemansangka Bandaraya Kuching nyadi sebuah bandaraya ke mujur,” ku iya.

Ba atur pengawa nya kemari, urung 21 buah gerempung NGO nerima geran ke manggai urung RM293,000.00 ti dibagi entara 21 buah NGO nya.

SELINTING KENA: Dayang Roayah benung ngujika perengka pengerara api seraya disaup staf bomba. Bela bisi dipeda Len enggau temuai ke hbukai.

SARIKEI: Rayat di menua pesisir tauka ke diau di entigis ulu sungai patut nemu mimit pasal chara nagang penusah angus sereta penemu sentang kebuah nyadi penusah rumah angus.

Menteri Muda ba Opis Kepala Menteri (Promosyen Pelajar Teknikal) enggau Menteri Rampa Menua, Datu  Len Talif Salleh madah enti bisi penemu ba sentang pekara tu, tentu iya ulih ngurang penyampau kes angus.

“Ari suba nyentuk ke diatu agi mayuh rayat menua kitai ngumbai pekara ke bekaul enggau penusah angus semina dibaruh kuasa raban pengerara api (bomba) aja.

“Kitai suah ninga sebana mensia mayuh ke bisi ditinggang penusah angus, sida suah ngutuk raban bomba ketegal pengerugi ke ditapi.

“Betegalka raban bomba laun datai sereta mayuh agi ke bukai. Tang raban sida tu kebendar iya enda nemu penusah ke nyadi endang datai ari pengilap sida empu.

“Nyema kitai nemu sentang pekara pugu maya penusah tu, kelebih agi maya api baru nyadi. Kitai andal tentu api nya ulih rara ari ke nyerarai besai sebedau bomba datai,” ku Len.

Iya madah munyi nya rambau Pengerami Ketuai Begulai Enggau Rayat nyerumba Program ‘Fire Point’ enggau Kimpin Nagang Penusah Angus ke diatur begulai enggau Ops Pengerara Api enggau Penyah Penusah Sarikei sereta Opis Pekara  (JASA) Sarikei bepalan di Balai Mayuh GunaKampung Seberang Sarikei, empai lama ke udah.

Nyerumba pengerami tu bisi 77 buah perengka pengerara udah disadung ngagai 11 buah kampung ba kandang menua Sarikei.

Kenu ku Len, program ngiri penemu endang patut dikerembaika mayuh agi sepanjai maya.

Iya madah, ngiri penemu pasal pekara tu endang beguna amat ngambika raban orang ke ditinggang penusah enda bangat mayuh lenyau reta tengkira.

Kaban Kunsil Nengeri (ADUN) Belawai madah, ulah ‘udah tepantup baru deka ngeleda’ patut dilengka laban nesal dudi nadai reti.

“Kita patut nemu kebuah penusah tu nyadi ketegal ari pengilap diri. Nya alai, sebedau penusah nyadi, kitai patut bejejaga,”ku iya.

Nyerumba program nya, mensia mayuh ke bisi datai diajar chara nguna perengka pengerara api.

Sama bisi datai Sekretari Politik Kepala Menteri, Dayang Roayah Abang Adeng, Pemesai Opis JASA Sarikei, Ahmat Adai enggau Kunsil Sarikei, Khalid Andong.

Sehari tu amat mih apai indai lenyau duit ringgit tang enti anak udah teulihka pemujur jemah penyamai nya pulai ngagai sida baru

SRI AMAN: Pengawa nyengulaka anak nyentuk nyadi nembiak ke mujur endang ukai pekara ke muntang tang begunaka pengeransing ari bala apai indai.

Menteri Muda Pemansang Menua Pesisir enggau Pengawa Berumah, Datuk Francis Harden Hollis madah, terubah iya endang pedis bala apai indai nyengulaka  anak sida tang asil iya ulih dipeda nyema bala anak udah teulihka pemujur jemah ila.

“Sehari tu kita patut bebuaika duit ringgit, lelak ngulihka belanja enggau utai bukai dikena nyengulaka anak tang kita empu deka ngasaika asil iya jemah ila.

“Enda ngawa kitai pedis dulu laban kitai empu deka ngasaika asil iya jemah. Bala anak kitai sempama baka pun sawit, meseti suah diberi baja sereta dijaga enggau manah-manah,” ku iya.

Kaban Kunsil Nengeri (ADUN) Simanggang tu madah munyi nya rambau bejadi Pengerami Merarau diatur Gerempung Apai Indai enggau Pengajar  (PIBG), Sekula Primari (SK) Kumpang ditu, ensana.

Iya madah, bala apai indai enda patut ngumbai pengawa nyengulaka anak nya sebengkah pekara ke ngenusah tang patut nganggap bala anak nyadika reta dudi hari.

‘Kitai ngarapka bala apai indai muai runding sida ke baka nya lalu patut berunding panjai deka ngemansangka anak sida nyadi orang ke pemadu mujur sereta ulih gawa ke menua tu,” ku iya.

Nangkan nya, Harden mega ngelalau PIBG terus bekerejasama enggau raban sekula ngemansangka pekara pelajar bala nembiak.

“Aum apai indai enggau pengajar patut suah agi diatur ngambika apai indai nemu baka ni pemutus pelajar bala anak diri empu,” ku tandu Harden.

Ba pengerami nya, Harden bisi ngungkupka belanja RM 5,000 ngagai PIBG sekula nya dikena sida bejalaika program sepanjai taun.

UNGKUP RAYAT: Alexander (lima kiri) benung nyangkingka perengka pengerara api ke kelai nejadi Program Fire Point enggau Kimpin Pengelikun Angus di Michael Jalak di Kanowit.

KANOWIT: Balai Bomba enggau Penyah Penusah Pelilih Kanowit bisi ngatur Program Fire Point enggau Kimpin Pengelikun Angus di  Rumah Michael Jalak, Jalai Nibong-Tada, Bawan ditu, empai lama ke udah.

Program tu dipenyadi Kaban Kunsil Nengeri (ADUN) Ngemah Alexander Vincent.

Entara aktiviti ke bisi diatur nyerumba program tu iya nya licha nyeliahka penusah angus, demonstrasyen ngerara api enggau kimpin nyeliahka penusah angus.

Sama bisi datai Sekretari Politik Kepala Menteri Maurice Giri, Ketuai Bomba Zon 4 Penguasa Kanan Bomba I (PKBI) Abdul Mutalib Rashid, Ketuai Balai Bomba Daerah Kanowit Arrahman Chik, Pemesai Opis Pemadah pelilih Kanowit Wan Mohd Zuki Wan Ismail, Pengulu Juin Adan enggau  Tuai Rumah Michael Jalak.

Tuju program endang dikena nyeliahka peranak rumah panjai ditinggang penusah angus rumah panjai .

Nangkan nya, Rashid minta mensia mayuh ke diau di kandang menua nya anang betunuka utai laban gaya hari ke majak angat baka diatu.

Iya mega ngelalau raban indau orang ke semina diau di rumah terus ngemeranka pengelikun dapur sereta peresa hos, kepala gis lalu tentuka pala gis ditutup rapit pengudah nyumai.

NUTUP GAWAI 2015: Peter Jilin (tengah) nguluka pengawa Ngiling Bidai di Rumah Empading.

MARUDI: Urung 25 iku bala tuai rumah/ketuai komuniti nyengkaum Kaunsilor Tuai Rumah Ridun ke mega nyadi Chairman Serakup Tuai Rumah ari Sibuti, disempulang  Kaunsilor Tuai Rumah Linggu enggau Tuai Rumah Patrick Libau ke mega nyadi Mandal Chairman Parti Progresif  Demokratik Sarawak (SPDP) Pampang Saeh enggau sekeda kaban SPDP Sitak N.62, udah ngulu pengerami Ngiling Bidai di Rumah Empading, Sungai Bakas, Sibuti bedau ti udah.

Pengerami Ngiling Bidai nya diatur raban Komiti Pemansang enggau Pengelikun Genturung Pendiau (JKKK) Rumah Empading sereta dipenyadika Mandal Chairman SPDP Sitak Bekenu ngarika Presiden SPDP, Dato Sri Tiong King Sing.

Linggie Empading ti bisi bejaku ngarika Tuai Rumah Empading, madahka apai iya enda ulih ngulu pengerami nya ketegal enda bepengerai sereta baru pansut ari Sepital Miri.

Ku Linggie,pengerami Gawai Dayak ti diintu ba rumah panjai nya taun tu berambaika leka jaku ‘Seiti Dayak Seiti Kelalin Enda Beserara’.

Ba jaku ti dipansutka iya, Peter Jilin meri besai terima kasih ngagai VSDC sereta peranak Rumah Empading ti udah ngangauka iya bejadi pengerami Ngiling Bidai nya.

Lebuh ti ngenang pasal rambai jaku nya, Peter Jilin madah, pengerami Ngiling Bidai diintu semua raban bansa Dayak ti mai pemaik ngagai semua raban bansa di menua tu ngambika ulih begempung enggau pangan diri.

Peter Jilin mega madahka nembiak rebak baru udah ngaga inisiatif ngatur Miri Unity Chapter (MUC) di Miri apin lama ti udah, sereta iya ngenataika pengaga ati ngagai raban pengatur nya.

Ku iya, MUC ti udah diatur di Miri deka pulaika pemaik enggau penyerakup.

Ku Jilin, kitai patut seruran berundingka menua Malaysia, Sarawak, enggau raban komuniti di Bekenu nya empu diuan datai pup raban bansa. Kitai udah lama idup begulai enggau manah sereta begempung enggau pangan diri, nya alai kitai  anang ngemendarka sebarang pengawa ti tau ngeruga kaul entara kitai semua.

Ku iya baru, penemuai iya nya kelimpah bejalaika pengawa politik, iya mega bejalaika tanggungpengawa ngenegapka Parti SPDP enggau Barisan Nasional (BN) sereta ngenanka nya.

Nya alai, iya ngelaluka penatai semua orang sereta semua pupu raban bansa, enda ngira penemu politik tauka rama, ti bisi diberi surat kangau tauka enda, semua dipinta sampal datai. Bekaul enggau pengawa milih chalun, iya ngelempaika pekara nya ba ketuai Parti sereta BN.

Pengerami nya udah  digulu lebih 1,000 iku seraya diperindang enggau penyanyi Iban menua tu, Christina Brayon ti tebilang enggau lagu Agi Bekira.

Peranak Rumah Dennis di Batu 14 Jalai KJD Sibu udah betapi enggau penanggul suntuk ai urung tiga taun

Dikarang Rengenyan Labang //

KUCHING: Peranak Rumah Dennis Umpol, Batu 14 Jalai KJD Sibu minta dikemerat, diperati sereta dikesinu piak ti bekaul mutarka penanggul suntuk ai.

Seiku peranak rumah nya Ningkan Kindi madahka penanggul suntuk ai nya ditapi sida dalam timpuh dua nyentuk tiga taun ke udah.

Ningkan madahka penanggul suntuk ai nya udah mayuh meri penusah sereta ngeruga pengelantang enggau pendiau sida sebilik enggau sida serumah.

“Ketegal penyuntuk ai tu kami sebilik enggau kami serumah chukup merinsa kelebih agi maya bisi pengerami baka Gawai Dayak, pengerami melah pinang sereta maya bisi rabat laban nadai ai dikena meresi tauka bebelaka pemakai tauka diirup.

“Bala sida ke indu mega suah besebana mantaika penanggul ngintu utai maya bisi penusah rabat enggau maya bisi pengerami.

“Nyentuk ke diatu kami agi bepanggai ba ai pegung, alai kami serumah mandi,” ku iya besebana ngagai pengarang berita.

Lebuh ditanya sekalika pekara nya kala dikenataika ngagai piak ti bekaul, iya madahka penanggul nya endang suah udah dikenataika.

Berebak enggau tu iya ngarapka pengari rayat sekalika Kunsil Nengeri tauka Parlimen ulih berati sereta mantu mutarka penanggul nya.

“Kami suah amat udah minta bantu perintah. Sida iya endang bisi nganjung ai ngena lori, taja pia ai ke dianjung nya suah agi enda beresi sereta beamur.

“Kami mega amat ngarapka Kaban Kunsil Nengeri (ADUN) Dudong (Yap Hoi Leong)  enggau Kaban Parlimen Lanang (Alice Lau) ulih mantu mutarka penanggul nadai ai tu,” ku iya.

CHARA MANSUH: Gaya nyumai manuk pansuh di rumah. — Gambar pengias

KUCHING: Bansa Dayak endang tebilang enggau mayuh bengkah bansa pemakai asal ke chukup nyamai diempa lebih agi pemakai ke dilulun dalam ruas tauka dipansuh.

Sebut aja manuk pansuh, nadai orang Sarawak enda ngelala laban ke suah belaukka pemakai tu. Lauk ke dipansuh endang chukup tebilang ba raban bansa Dayak di Sarawak baka Iban, Bidayuh enggau Orang Ulu.

Pia mega raban bansa ke bukai, kelimpah ari raban bansa Dayak nyengkaum ke datai ari Malaya (Semenanjung Malaysia) sereta temuai ari menua luar mega kala nguji nyepi pemakai tu rambau ke nemuai ngagai Sarawak.

Ba raban bansa Iban, pemakai ke dilulun dalam ruas tu tebal agi baka manuk, ikan enggau jani. Lalu ba bansa Bidayuh iya dikumbai syok tanok darum bu-uruk tauka dalam jaku Iban iya manuk dipandu dalam ruas.

Sebaka enggau lemang, pemakai tu dipanduk dalam ruas sereta didaing enggau api kayu tauka manah agi ngena kayu api ke udah pansut bara.

Chara nyumai manuk pansuh, ambi sebatang ruas pemanjai 1 meter ulih endur nepu seiku manuk ti udah ditetak sereta digerami enggau rempah daun bungkang tauka upak tepus.

Seiku orang dagang bejalaika pengawa inap desa di kampung Semadang, Penrissen enda jauh ari Kuching, Kerin Sarus, 51, madahka penyamai manuk pansuh ukai semina bepangai ba renchah asal aja, tang mega manuk ti dipandu dalam ruas nya nambahka bau renggut pansuh sereta penyamai isi manuk nya.

Kenu ku iya, pemakai nya suah dinah ngagai temuai tetiap rambau pengerami diintu di Sarawak, tang diatu iya udah dikomersialka nyadi pemakai di restauran.

Ku iya, manuk ti dipanduk dalam ruas nya bebida ari penyamai enggau bau renggut ari manuk ti dipanduk dalam periuk.

“Iya ti dipanduk dalam ruas nyamai agi sereta bau renggut,” ku Kerin.

NGINTU MANUK: Manuk tuai dulu dichabut bulu sebedau ke ditetak, digulai rempah sereta disimpan dalam ruas. — Gambar pengias

Ku iya, nadai begunaka minyak makai enggau ai, perengka dikena mansuh nya endang udah digulai enggau manuk ti udah ditetak sereta ditepu dalam ruas lalu didaing di atas bara api dataika iya mansau.

“Tu nunjuka bansa pemakai tu ulih dikategorika nyadi seiti menu pengerai laban iya dipanduk nadai ngena minyak makai tauka perengka kimia,” ku iya.

Ku iya, renchah ti suah dikena bepandukka pemakai nya ditanam diri empu peranak di menua nya, sentara ruas nya diambi ari babas.

Bekunsika mimit chara manduk manuk pansuh, Kerin madahka manuk nya meseti baru, manah agi enti ngena manuk tuai laban isi iya manis sereta ruas ti dikena meseti iya ke baru diambi dikena ngulihka bau renggut, sentara daun jabang dikena nejal mua ruas nya.

Dikena nambahka agi bau renggut pansuh nya, iya madahka ditambah bungai kechala.

Kerin madahka, sekeda perengka dikena ngadu pansuh iya nya manuk (manuk tuai), lia, serai, bawang burak, garam, miching, bungai kechala enggau daun jabang.

Ku iya, pengudah manuk nya diperesi lalu ditetak, iya udah nya digerami enggau lia, serai, bawang burak, garam enggau bahan perasa sechukup iya dalam pengelama setengah jam. Daun jabang nya digusuk enggau garam dikena ngeluarka getah iya sereta ngurangka pemait iya.

Semua utai nya tadi ditepu ke dalam ruas lalu daun jabang dikena nejal mua ruas sebedau iya didaing atas bara api. Gurak ke pansuta ri ruas nya datai ari isi manuk ti dipanduk dalam ruas nya lalu nyadika kuah iya.

“Anang nunu ruas nya, bara api ti pemadu manah dikena. Tejuka sampai manuk nya mansau, dalam pengelama setengah jam sebedau iya dinahka,” ku Kerin.       Siti Azureen Zukifli, 25, madahka manuk pansuh ngembuan penyamai ti bida sereta nyamai diempa begulai enggau asi.

Seiku nembiak ari Universiti Swinburne, Melbourne, Australia, Goldie Yang, 26, ti kala bemalam di inap desa dikembuan Kerin madahka, keterubah iya nguji nyepi asai manuk pansuh, iya lalu rinduka pemakai nya.

“Kelimpah asai iya ti nyelai sereta nyamai, manuk pansuh mega bansa pemakai ti manah ke pengerai laban nadai minyak sereta ngembuan mayuh herba asal ti ngembuan pemanah ngagai batang tubuh mensia,” ku Goldie seiku temuai peranak menua China. — Bernama

UDAH MANSAU: Manuk pansuh ke udah mansau dituang dalam bisin. — Gambar pengias

Enti semina ngarapka bantu ari perintah, mayuh amenity sosial tejanggal

MIRI: Agih belanja asil ari pemeri RM90 juta ari piak Petronas ungkup Sarawak dalam kandang lima tahun (2015-2019) dikearapka ulih dikena ngemansangka menua pesisir.

Kaban Kunsil Nengeri (ADUN) Telang Usan Dennis Ngau Jok madah, agi mayuh amenity sosial tejanggal digaga enti semina ngarapka bantu belanja ari perintah laban penyampau belanja ke diberi nya enda chukup.

“Kitai endang ngarapka agih belanja nya ulih diampitka kelebih agi dikena ngaduka pemansang di menua pesisir,” ku Dennis madah ngagai Utusan Borneo kemari.

Iya dipinta nimbal penemu bekaul enggau pemeri RM90 juta ari Petronas dikena bejalaika program tanggungpengawa rama korporat (CSR) di Sarawak disebut kena Hari Tiga tu tadi.

Bejaku silik pasal pekara tu, Dennis endang ngarapka agih belanja nya ulih disadung ngagai menua Baram kelebih agi di Telang Usan.

“Laban menua Baram enggau Telang Usan bisi kaul enggau Projek Entali Ai Sabah-Sarawak (SSGP) Petronas, nya alai kitai endang patut bulih agih belanja nya,” ku tandu iya.

Nangkan nya, Kaban Parlimen Sibuti Ahmad Lai Bujang bela bekunsil penemu pasal pemeri ari Petronas nya serya meri terima kasih laban tu mandangka pengeransing pengawa ke digaga Kepala Menteri Datuk Patinggi Tan Sri Adenan Satem.

“Kitai meri terima kasih ngagai Petronas laban ke udah ngungkupka pemeri nya ngagai Sarawak,”ku iya.

Ungkup sitak ke dikuasa iya, Ahmad ngarapka agih belanja tu ulih meri penguntung ngagai rayat mayuh kelebih dikena ngaduka pemansang.

Entara projek pemansang ke patut digaga ba sitak iya baka ngemanahka jalai raya enggau projek pemansang ke bukai.

KUCHING: Parti Tindakan Demokratik (DAP) Sarawak ngutuk ulah Barisan Nasional di Betong ti ngena seiku tuai rumah ngemba raban Impian Sarawak DAP bejalaika kem perubat ba sebuah gerija di Ulu Layar, semak enggau pasar Betong.

Nitihku Chairman DAP Sarawak Chong Chieng Jen, pekara nya nyadi pengudah berita pasal kem perubat di Betong ngerembai, ke alai seiku paderi ba gerija nya diemba tuai rumah ti dichiri, iya nya tuai rumah Lugat.

Ku iya, kelimpah ari emba tuai rumah, samseng ari rumah panjai nya mega sama ngemba deka ngachau pengelikun paderi gerija nya enggau sida sebilik sereta ngemba deka ngeruga kem perubat nya.

Ku iya, taja pan polis udah dipadahka pasal pekara nya tang nadai sebarang atur dipejalaika ngagai piak ti ngereja pengawa nya.

“Laban ti nangika pengelikun sida sebilik dikeruga, paderi nya minta kami nginsil kem perubat ba gerija nya,” ku iya ba aum pengarang berita ti diatur ba indu opis DAP ditu, kemari.

Ketegal ti beratka pengelikun paderi sereta sida sebilik, Chong madahka sida ngambi pemutus mindahka kem perubat nya ngagai opis DAP di Pasar Betong.

“Kami mega deka ngatur perengka pengangkut peranak ari kandang menua nya ngambika sida ulih datai ngagai servis nyaga pengerai ti disediaka kami.

“Kami berasai enda lantang ti laban BN Betong ngemeratka politik lebih ari rayat menua pesisir lalu sanggup muai peluang sida meresa pengerai ti udah dibai ngagai sida,” ku iya.

Berindik ari pekara nya Chong ti mega Kaban Parlimen Bandar Kuching enggau ADUN Kota Sentosa minta Kepala Menteri Datuk Patinggi Tan Sri Adenan Satem beratika pekara nya.

“Enti Adenan amat Kepala Menteri ungkup semua rayat Sarawak, iya patut jampat ngasuh Tuai Rumah Lugat minta ampun ba mua mayuh ngagai paderi enggau orang di menua pesisir Betong sereta besemaya enda ngachau kem perubat ti diatur ba gerija.

“Kami meri Adenan enggau Tuai Rumah Lugat nyentuk pagila madah sereta minta ampun……enti enda, kem perubat tu deka dipindahka ngagai opis DAP di pasar Betong, Medan Bandar Baru Betong,” ku iya.

Dulu ari nya, Chong madahka kem nya dibaruh projek Impian Sarawak DAP ti deka berengkah 6 Julai tu ti ngena servis lima iku lutur nyengkaum tiga iku lutur ngeli sereta kereban perubat enggau lebih 100 kilogram ubat.

“Kem perubat tu deka disikap ngena lutur ti meresa pengerai, meri penerang pasal pengerai, meri ubat enggau merambu perubat ke dudi baka ba sepital mit sementara.

“Tuju program tu dipejalaika laban mayuh peranak kelebih agi di rumah panjai enda ngemeratka pengerai laban tebal agi ari sida nya tusah deka ngelawa sepital tauka klinik beperesa pengerai,” ku iya.

Naka ke diatu, kem perubat nya mujur diatur ba beberapa kandang menua baka Bawang Assan, Bintangor, Bau, Batu Kitang enggau Rantau Panjang (Batu Kawa) lalu udah ngubat lebih 1,000 pesakit.