KUCHING: Gerija St Faith Kenyalang nerima geran ari perintah besai sepenyampau RM300,000 dikena mantu gerija bejalaika projek ngaga baru tadika gerija nya, ti benung dipejalaika diatu.

Menteri Muda Pengintu Pengelantang Robert Lawson Chuat nyuaka geran nya ngagai chairman projek, Venerable Canon Nelson Ugas Balang madahka deka mantu ngiga belanja kelebih dikena ngaga tadika nya laban ungkus projek nya udah niki.

“Aku udah nulis surat sukung ke gerija lalu betemu enggau Menteri Kebun Dandang Besai enggau Komoditi Datuk Sri Douglas Uggah Embas laban deka minta bantu (belanja dikena bejalaika projek), lalu Ugah betemu enggau Menteri Besai, Datuk Seri Najib Tun Razak.

“Aum nya mujur lalu geran dikemendarka Menteri Besai dikena bejalaika projek ngaga rumah baru Tadika tu,” ku iya lebuh madahka pekara nya ngagai komiti gereja ba atur pengawa nyuaka geran ti diatur ba Bilik Aum Parish ditu, kemari.

Lawson madahka geran nya udah bisi sebedau bulan Jun tu tadi, tang Uggah nadai awak nyuaka geran nya ngagai gerija.

“Nya kebuah iya ngasuh aku ngarika iya sehari tu,” ku iya.

Iya meri terima kasih ngagai Uggah laban meri duit bantu tambah nya lalu minta bala gerija ngaga sereta meri ripot pasal projek nya ngagai Opis Menteri Besai, ngambika bisi disimpan sida (Opis Menteri Besai).

Berebak enggau tu, Nelson Ugas Balang ti mega Vikar Gerija St Faith beterima kasih ke perintah ti udah meri duit bantu ti beguna amat kena ngaga baru tadika.

Iya madahka rumah baru tadika nya keterubah iya dipelabaka beungkus RM3.8 juta tang pengudah Chukai Barang enggau Servis (GST) dipejalaika, bajet sida nyau lebih lalu penyampau ti diguna diatu iya nya RM4 juta.

“Taja pan duit enda chukup, kereja ngaga sekula baru tadika nya udah ngelui ari timpuh ti udah ditetapka,” ku iya.

Sama bisi datai ba pengawa nyuaka geran nya, kaban komiti projek ngaga sekula baru tadika.

Dikarang Rengenyan Labang //

WISHESLAND: Raban gerempung tauka Wishesland (ari kiba) Munirah enggau Kimberly (ari kanan) Doris enggau Siow meri bup bekaul enggau Wishesland ngagai Fatimah.

KUCHING: Serakup Cerebral Palsy Kuching enggau Samarahan tauka Wishesland minta mensia mayuh, orang seseiku, gerempung ukai dikuasa perintah sereta gerempung korperat mantu serakup nya ngiga belanja dikena bejalaika projek Wishes Garden.

Menteri Pengintu Pengelantang, Orang Indu enggau Pemansang Ruang Bilik Datuk Fatimah Abdullah madahka Wishes Garden nya sebengkah terapi ti amat beguna ngagai nembiak Cerebral Palsy (CP).

Projek Wishes Garden nya ti dipejalaika bererenggat berengkah taun 2014, ti begunaka belanja urung RM400,000.

“Sehari tu raban ari serakup tauka Wishesland madahka tuju penemuai sida deka nerangka pasal projek baru ti benung dipejalaika, iya nya Wishes Garden.

“Wishes Garden iya nya sebagi ari terapi CP ti dibagi ngagai beberapa zon baka Welcoming Zone and Social Zone, Wishes Sensory and Play Zone enggau Wishes Meditation and Aromatheraphy Zone.

“Nya alai penatai raban tu mega, minta sukung ari mensia mayuh ba pengawa ngemujurka projek Wishes Garden. Lalu nyema tu tembu ila, dia Wishes Garden tu deka meri peluang ngagai nembiak CP ulih ngasaika pengidup ti gaga sereta lantang agi,” ku iya.

Fatimah mansutka pekara nya dalam aum pengarang berita pengudah nerima penemuai basa ari komiti Serakup Cerebral Palsy Kuching enggau Samarahan tauka Wishesland ba opis iya di Bangunan Baitulmakmur ditu, kemari.

Kelimpah ari nya, iya madahka Wishesland bisi bejalaika fisioterapi enggau hidroterapi ngagai nembiak CP.

Ku iya, penyampau nembiak CP di Sarawak mayuh sereta berejista lalu bisi rehabilitasyen ti dipejalaika serakup CP, sepital, Pusat Pemulihan dalam Komuniti enggau dibaruh serakup bukai.

“Penyampau ke berejista enggau Serakup Cerebral Palsy Kuching enggau Samarahan (Wishesland) bisi lebih 30 iku nembiak CP.

“Tuju serakup (Wishesland) tu mega deka meri penyedar ngagai mensia mayuh pasal CP sereta nama servis ti bisi disediaka gerempung tu nyengkaum fisioterapi, hidroterapi serete beberapa bengkah agi terapi nengah Wishes Garden,” ku iya.

Kelimpah ari nya, Sekretari serakup nya Siow Wei Sheong madahka projek nya udah dipejalaika kenyau ari taun 2014 sereta tembu nitihka penyukup duit dikena ngaga Wishes Garden.

“Naka ke diatu ungkup projek tu kami udah mujur ngumpul RM70,000 nengah beberapa program ti diatur serakup,” ku iya.

Sama bisi datai meri penemuai basa nya kemari Tukang Wang serakup nya Doris Ng Ming Chin;  Operasi, Munirah Dawi Saifuddin enggau Pengintu Pengelantang Pendiau Korperat Cooperate Affair, Kimberly Michelle Rose Ong.

Mensia mayuh ti deka nemu penerang silik tauka mantu projek Wishes Garden tau datai ngagai Wishesland ba Jalai Crookshank tauka betelefon ngagai lumur 082-252210 (opis) tauka 019-2288419 (Presiden serakup, Chi Poh Yung).

Polisi ‘20 Perkara Ke Arah Sarawak Baharu’ nya deka nyadika lalau dikena nentuka kuing parti nya maya PRN ila

KUCHING: Parti Keadilan Rakyat (PKR) Sarawak deka bejadika polisi dikena nentuka kuing parti ti dikumbai ‘20 Perkara Ke Arah Sarawak Baharu’ kena 22 Julai tu.

Chairman PKR, Baru Bian madahka nya dikena parti nyikap diri napi Pengawa Bepilih Besai Nengeri (PRN) ke deka datai.

“Batang aum sehari tu kitai mekuh ngagai 20 Perkara Ke Arah Sarawak Baharu.Aku enda nyebut tu manifesto tang lebih ngagai kuing tauka tuju parti maya pengawa bepilih nengeri ila.

“Tu deka nyadika malin kitai mutarka isu ti chukup semak ba ati kelebih agi rayat Sarawak enggau Malaysia,” ku iya ba aum pengarang berita ti diatur ba indu opis PKR Nengeri ditu, kemari.

Nitihku Baru, 20 Perkara Ke Arah Sarawak Baharu manah amat sereta bisi fakta ti chukup pasal penanggul ke pemadu baru sereta ti nyadi buah kenang bekaul enggau rayat sereta nengeri Sarawak.

“Aku arap bendar tu chara ti realistik sereta praktikal dikena parti ngambika rayat Sarawak ulih berunding maya pengawa bepilih kunsil nengeri ila,” ku iya.

Baru ti mega Kaban Kunsil Nengeri (ADUN) Ba’Kelalan madah, entara isi 20 Perkara Ke Arah Sarawak Baharu iya nya kebebasan beragama, kenegaraan dan kerajaan, kebebasan, tanah, keadilan ekonomi, infrastruktur, nyaga pengerai, bekal elektrik enggau ai sereta isu pelajar.

Nitihku iya, 20 Perkara Ke arah Sarawak Baharu deka dipenyadi Sapit Presiden PKR ti mega Menteri Besai Selangor, Azmin Ali kena 22 Julai tu di Kuching.

Diperambuka ba hari ke sama Azmin deka bejadika pengerami nyambut pengabang Hari Raya Aidilfitri PKR renggat nengeri Sarawak, lalu palan nya deka dipadahka ila.

Ngenang pekara bukai, Baru madahka Komiti Pengawa Bepilih Nengeri (JPRN) PKR Sarawak ti diketuaika Mandal Presiden parti, See Chee How bisi netapka Indeks Pencapaian Utama (KPI) tetiap iku pemesai ba renggat nembiak redak.

Ku iya JPRN deka matau renggat nya ba tetiap 29 pampang parti di serata nengeri lalu sida ti tejapai KPI ke udah ditetapka, pemadu kurang 80 peratus deka diberi insentif iya nya ungkup belanja.

Taja pan ungkup belanja nya mimit, tang ulih dikena bejalaika program ke bukai.

“Tu sebagi ari chara PKR Sarawak milih chalun ti deka diasuh bediri minta pilih ba Pengawa Bepilih Kunsil Nengeri ila.

“Taja pia pekara bukai mega dikemeratka iya nya ulih menang, latar belakang enggau enti nuan deka nyadi chalun, nuan mesti bejalaika pengawa enggau manah,” ku iya.

Iya madahka parti enda nandu baru pengilap ke sebedau tu iya nya milih chalun semak maya pengawa bepilih deka diatur, ti ngujungka parti enda chukup timpuh meri kelala chalun ngagai pengundi.

“Sekali tu kitai mantaika mua baru, nurun betemu sereta gawa ke rayat ba tiap cabang. Kitai deka ngiga peluang sida nyadi chalun ti ulih menang.

“Deka ngingatka, kitai deka nentuka tetiap sitak Kunsil Nengeri enda meri jalai mudah ngagai Barisan Nasional,” ku iya.

SRI AMAN: Kaban Parlimen Sri Aman, Masir Kujat madah nadai kebuah rayat Sarawak enggai nyukung Menteri Besai, Datuk Patinggi Mohd Najib Tun Razak.

Kebuah pia, sekumbang Najib megai menua tu, mayuh projek pemansang udah diberi Perintah Besai ngagai nengeri Sarawak, ku Masir

Kenu ku iya, Najib seiku mih Menteri Besai kitai ke suah datai ngagai Sarawak nyengakum ngabas kandang menua pesisir engagu entigis menua ulu di nengeri tu.

“Ba penemu aku tu mandang penyiru iya ke deka ngemansangka rayat nengeri tu,” ku iya.

Masir madah munyi nya rambau Pengerami Ngiling Tikai ke diatur di Rumah Panjai Selanjan, Sebemban Asal ngerimbai Lachau di Sri Aman, ensana.

Pengerami nya dipenyadika Menteri Muda Betanam Betupi (Pansik enggau Makit), Datuk Mong Dagang.

Bela bisi datai Pemesai Opis Pekara Khas (JASA) Bagi Menua Sri Aman, Whelton Lumpoi, Supervisor JASA Parimen Lubok Antu, Geoffery Baja, Chairman Gerempung Bansa Dayak Nasional Sarawak (SDNU) Simanggang, Roland Demong Radin enggau bala tuai raban bansa ke bukai.

KENA MANAH: Fatimah (empat kiba) benung nyuaka replika chek pemeri RM10,000 ari perintah nengeri ungkup raban penyaga pengelikun seraya dikemataka Mundaw (tiga kiba) enggau Lowson Chuat (dua kiba) enggau bala bukai di Dewan Bukavu, kemari.

KUCHING: Raban Soldadu Malaysia (ATM) seruran bejejaga ba garis entara menua Sarawak- Kalimantan dikena nentuka menua tu seruran likun.

Panglima 1 Divisyen, Mejar Jeneral Datuk Stephen Mundaw madah munyi nya pengudah pulai ari menua sepiak apin lama ke udah.

“Kitai bisi palan penyaga ba sekeda garis entara menua. Aku baru pulai ari Pontianak pengudah betemu enggau Panglima Konam 12, berandauka pasal kaul pengawa entara raban soldadu,” ku iya.

Iya madah munyi nya maya dirandau pengudah nyuaka kuih raya ngagai kaban soldadu beserimbai enggau pengerami Aidilfitri ditu, kemari.

Kenu ku iya, mayuh pekara dikerandauka maya nya nyengkaum isu pengelikun enggau jaku sempekat bela besaup nyaga pengelikun ba garis entara kededua bengkah menua.

Taja pia, Stephen enggai madah silik penyampau kes orang ke ditangkap tauka jalai chit ke bisi dibuka enggau jalai gajah ke bisi di garis entara menua tu.

Iya madah, rambau musim pengerami ila raban pengelikun iya nya Soldadu Darat (TD) enggau Raban Soldadu Malaysia (ATM) deka begulai pengawa enggau opis perintah ke bukai baka Imigresen, PDRM enggau Kastam bejejaga.

“Enti ba garis entara menua, kaban kitai di Indonesia ke ngintu hari raya mega gawa,”ku iya.

Nya alai, ku iya bisi palan penyaga ke begulai nyaga garis entara menua Malaysia-Indonesia.

“Penyampau kitai ke gawa ngemataka garis entara menua belabuh ari Tanjung Datu ke Ba’Kelalan enggau Bario mayuh tang kitai enda tau nyebut penyampau iya nyemetak.

“Jalai chit tetap bisi tang udah dialit, bisi lubang baru ga ditebuk. Utai tu seruran berubah nyengkaum jalai gajah.

“Tang kitai benung nginau, ngemata sereta beratika pengawa ke dikereja ba jalai chit enggau jalai gajah. Kami nemu sapa ke nengah jalai nya lalu kami bisi gambar sida,” ku iya.

Stephen mega madah, penyampau mega dipeda bisi nurun tang nya ukai reti raban orang tama nadai beradat badu ngaga jalai chit ke baru.

“Jalai chit enda tentu laban udah kala dialit tang udah nya ditebuk sida baru. Taja pia pekara tu agi dipeda likun.

“Enti dipeda sigi ditangkap, tang kami enda tau madahka penyampau sida ke mansa garis entara menua,” ku iya.

Naka tu, bisi semilan palan dijaga ATM ba garis entara menua di Sarawak.

Stephen mega meri terima kasih ngagai perintah nengeri laban ke siru pasal pengelantang pendiau raban penyaga pengelikun ke gawa di garis entara menua tu.

Sama bisi datai Menteri Pengintu Pengelantang Pendiau, Orang Indu enggau Pemansang Ruang Bilik, Datuk Fatimah Abdullah, Ketuai Penerit Adat Maritim Wilayah Sarawak, Laksamana Satu Maritim Ismail Bujang Pit.

ANGUS: Api benung mau makai sebuah rumah suwa di Jalai Resak, Sri Aman tumu dini hari kemari.

SRI AMAN: Seiku lelaki beumur 35 taun retung ba sebengkah penusah angus ke nyadi di rumah suwa iya di Jalai Resak, Sri Aman tumu dini hari kemari.

Penusah tu nyadi pukul 2.47 dini hari, lelaki ke benama Joseph Adil Dom peranak Rumah Engkana, Aping Pantu dipeda retung dalam agu rumah suwa nya.

Nitihka penerang Polis, maya ditemu bangkai lelaki tu dipeda benung duduk ba mangkuk agi rumah siwa iya dipelaba nguji ngidupka diri.

“Penerang tumu madahka lelaki tu diau ke diri aja nyuwa rumah nya lalu rumah tu rumah kayu ke udah lama nadai disambung karan lalu iya diau dia semina nguna lilin enggau lampu kelita lebuh malam hari.

“Lelaki tu agi bujang gawa ba sebengkah kedai snooker di pasar ditu,” ku iya.

Bangkai lelaki tu udah dibai raban Bomba enggau Penyah Penusah ke Sepital Sri Aman ngambika diperesa.

Nyentuk berita tu dikarang, penyampau pengerugi ketegal penusah angus agi benung dipansik.

Dulu ari nya, bisi lapan iku bomba Sri Aman ngesah penusah tu pengudah sida nerima kanggau ari mensia mayuh urung pukul 3 dini hari.

SEATI: Wong (lima kiba) nguluka bala kaban UPP ke bukai nyadaka panjung ‘Idup UPP’. Bela dipeda Dr Johnycal (lima kanan), Tiong (empat kanan) sereta bala ke bukai.

SIBU: Bala kaban Parti Rayat Bersatu (UPP) dilalau bekerejasama sereta gawa bebendar agi ngambika ulih ngambi ati sereta diterima rayat.

Presiden UPP Dato Sri Wong Soon Koh madah, UPP endang sebengkah parti ke agi baru sereta ngepunka mayuh pekara baru.

“Laban ke nyadi pelasar ke agi baru sereta baru berengkah bejalai, tentu mayuh penguji ke nganti di mua,” ku iya rambau bejadi opis UPP Pampang Bawang Assan kemari.

Opis UPP Bawang Assan tu bepalan ba Jalai Merdeka, nyadi opis ketiga dibuka ditu nangkan opis UPP Pelawan enggau Bukit Assek. Opis UPP Lanang deka dipenyadika kena 5 Julai tu.

Sama bisi datai Kaban Kunsil Nengeri (ADUN) Engkilili ke mega nyadi Ketuai Nembiak UPP, Dr Johnycal Rayong, Chairman Kaunsil Mengeri Sibu ke mega nyadi Chairman UPP Lanang, Datuk Tiong Thai King, dua iku Sekretari Politik Kepala Menteri Andrew Shilling enggau Pau Kiew Chuang, bini Wong Datin Sri Pauline Leong sereta ke bukai.

Pengerami nya bela digulu kaban UPP ari pampang Bawang Assan, Dudong, Pelawan, Bukit Assek, Kanowit, Bintangor enggau Sarikei.

Kenu ku Wong ke mega nyadi Menteri Wang Kedua, pemar ke nganti UPP nyengkaum mayuh bengkah isu enggau penanggul rayat sekalika nya bekaul enggau pekara sosial, ekonomi, politik enggau ke bukai.

“Sekeda ari pemar tu ulih diputarka enggau chara ngiga jalai pemutus, ukai enggau chara ngelarika diri.

“Nya alai, kitai patut ngembuan penemu enggau strategi baru dikena nyaup bala kaban parti enggau orang bukai,” ku ADUN Bawang Assan nya.

Menteri Kaunsil Kandang Menua enggau Pemansang Raban Bansa nya mega madahka, peminta rayat ke maya hari tu majak mayuh lalu kaban UPP nadai pilih bukai kelimpah bebendar gawa nulung mensia mayuh.

Enggau jaku puntang, ku iya mayuh bengkah agenda nganti bala ketuai enggau kaban UPP, begunaka saup ari semua ngambika nyapai juluk nya.

“Aram semua kitai angkat napi semua pemar tu sereta gawa bebendar ngamatka peminta rayat,” ku Wong.

Berebak enggau nya, Wong mega meri terima kasih ngagai lebih 200 iku kaban UPP ari sitak puak menua tu ke bisi datai ngulu pengerami nya, laban ba penemu iya sida tu endang orang ke bebendar nyukung parti.

“Nengah sukung semua kita (kaban parti), aku andal UPP ulih nyadi sebengkah parti ke tegap, ulih begempung sereta mansang maju,” ku tandu iya.

SIBU: Pengerami Ngiling tikai ti diatur Gerija St Michael, Sibu Jaya empai lama, udah dikerami enggau mayuh macham aktiviti.

Ba jaku pengelalu Chairman pengatur pengerami,Lucas Man minta raban gerija nya beserakup.

“Beguna amat kitai nempa kaul ti tegap sereta pemereti ati enggau pangan diri,” ku iya.

Pengerami ngiling tikai nya udah ditutup Rev Fr Richard Lau.

JULAU: Sepenyampau 24 iku peranak genturung pendiau Engkamop ditu nerima bayar pampas RM205,063.32 pengudah tanah sida diambi ungkup projek ngemanah Jalai Entabai/ Rantau Limau.

Projek ngangkatmanahka jalai sepemanjai 9.44 km nya dikemendar Perintah Nengeri ba taun 2010 ke alai renggat keterubah pengawa ngambi tanah nya mungkur jalai ke pemanjai 1.35 km.

Ungkup renggat keterubah tu, projek mungkur 26 bidang tanah ba pemesai 5.73 hektar ke diempu 24 iku prnerima chek bayar pampas.

Bayar nya disua Kaban Parlimen Julau Datuk Joseph Salang Gandum bedau lama tu tadi di Opis Pelilih Menua Julau.

Bela datai, Residen Sarikei Dahim Nadot, Ketuai Opis Tanah enggau Penyukat Pelilih Sarikei, Ngu Tai Kong enggau Menijer Projek Opis Kereja Raya Chieng Siong Ming.

Dikarang Chris Bishop//

UNGKUP KITA: Awang Tengah (tiga kanan) nyuaka pemeri PUSAKA ngagai seiku pengari serakup seraya dikemata (ari kiba) Aziz, Julaihi, Sarudu enggau Sudarsono.

KUCHING:Perbadanan Kemajuan Perusahaan Kayu Sarawak (PUSAKA) deka majak ngemeratka pekara ti bekaul enggau pengawa beranakka puku, ku Menteri Pengatur Pengeraja Asal enggau Rampa Menua II Datuk Amar Awang Tengah Ali Hassan.

Iya ke mega Menteri Pemansang Industri enggau Menteri Perengka Guna Mensia Mayuh madah, pengawa nya deka nentuka penatai pemisi PUSAKA mengkang meruan lalu nyadi seiti ejensi ti melanja sekeda projek di nengeri tu kelebih agi di Tanjung Manis.

“Tusun pengawa tu dikemujur nengah kaul Pusaka Capital ti udah beranakka puku ba sekeda projek ti mai penguntung di Bandar Baru Tanjung Manis.

“Entara sekeda iya nya projek industri kebun sawit ke alai Pusaka Capital mega udah ngadu kerejasama enggau KTS Group bejalaika projek ‘CPO Bulking Facilities’. Projek tu begunaka puku RM69.5 juta,”ku iya.

Awang Tengah mansutka jaku tu ba pengerami nyuaka pemeri ninting taun PUSAKA, sepenyampau RM266,000 ngagai 59 buah gerempung pengintu pengelantang enggau gerempung ke ukai dikuasa perintah (NGO) di Dewan Seminar PUSAKA, Wisma Sumber Alam ditu, kemari.

Kelimpah ari nya, iya madahka Pusaka Capital mega bisi ngaga projek rumah ungkup orang gawa perintah di Tanjung Manis ke beungkus RM95 juta.

“Perintah mega udah ngasuh PUSAKA ngaduka projek bukai lalu ukai semina pengawa ke bekaul enggau industri beramu aja.

“Entara projek besai ti udah diasuh digaga PUSAKA iya nya nyendia infrastruktur ungkup projek Hab Halal Tanjung Manis nengah kerejasama Unit Hab Halal Opis Kepala Menteri,” tandu iya.

Berindik enggau nya PUSAKA ku Awang, patut nguji pengawa dagang bukai lalu ukai semina pengawa ti bepelasarka kayu aja.

Ku iya, pekara nya berat ngambika PUSAKA ti ditumbuh 42 taun ke udah ulih bejalaika tanggungpengawa rama ungkup komuniti baka pemeri ti udah disua sehari tu.

Bela datai Menteri Muda Pemansang Industri Datuk Julaihi Narawi, Sekretari Mendam Opis Menteri Pengatur Pengeraja Asal enggau Rampa Menua Datu Sudarsono Osman, Menijar Besai Pusaka Datu Sarudu Hoklai enggau Kaban Direktor Pusaka, Tan Sri Datuk Amar Abdul Aziz Husain.

Dikarang Judan Bungap//

SAUP ARI AKU: Wong (lima kanan) nyuaka pemeri ngagai TR Rantie seraya dikemata bala bukai di Bintangor, empai lama ke udah.

BINTANGOR: Direktor Besai Feri Sian James Wong udah nyuaka pemeri ngagai Gerempung Tuai Rumah (PTR) Pampang Meradong.

Pemeri RM10, 000 nya disuaka iya ngagai Chairman PTR Pampang Meradong Tuai Rumah Rantie Ayai ba pengerami Ngiling Tikai di Rumah Rami Sandai, Sungai Stumau ditu, empai lama tu tadi.

Wong madah, iya ti nyuaka pemeri nya laban deka nyaup PTR Pampang Meradong ngemujurka agi pengawa enggau tuju gerempung.

“Kitai ngarap gerempung tu ulih bejalaika tanggungpengawa enggau manah nitihka juluk gerempung,” pia ku iya madah maya nyuaka pemeri nya.

Berebak enggau tu mega, iya ngelalau bala ke bisi datai maya nya bela ngetanka sukung ngagai Barisan Nasional (BN) maya pengawa bepilih nengeri ti deka datai.

“Sapa-sapa chalun BN, kitai meseti nyukung iya laban pemansang pengidup kitai lebih agi ba rumah panjai tebal agi bepun ari pegai BN,” ku iya madahka baru.

Kelimpah ari nya, Wong mega bisi nyuaka pemeri RM1,000 ngagai Rumah Rami.

Pengerami sehari nya dipenyadi Sekretari Politik Kepala Menteri Romeo Christopher Tegong lalu bela digulu pengari Kaban Kunsil Nengeri (ADUN) Semop Abdullah Saidol, Sanlos Selamat, Ketuai Barisan Nasional (BN) Sarikei Ding Kuong Hing sereta bala bukai.

SRI AMAN: Menteri Muda Pemansang Menua Pesisir enggau Pengawa Berumah Datuk Francis Harden Hollis ngelalau rayat di menua pesisir ngemeratka sukut pemansang ba genturung pendiau sida lalu ukai beserekang penemu pasal bida jalai politik enggau pangan diri.

Kenu ku iya, sebengkah chara dikena nyapai juluk pemansang nya enggau chara nyukung ‘chuan’ politik ke dibai Barisan Nasional (BN).

“Nyema rayat di menua pesisir sepenemu nyukung BN, enda tusah perintah ngaduka perambu sereta bejalaika mayuh bengkah program pemansang ke ulih meri pengelantang ngagai pengidup sida.

“Anang beserekang penemu ketegal jalai politik ke bebida. Peratika parti politik ke dikelala suah mai ubah ba pengidup rayat sereta ukai semina nemu ngutuk tauka muai jaku petenah,” ku iya.

Kaban Kunsil Kunsil Nengeri (ADUN) Simanggang tu madah munyi nya rambau Pengerami Ngiling Bidai Gawai Dayak diatur Opis Kaunsil Pelilih Sri Aman (MDSA) ke diatur di Rumah Achun, Menalang Undop, Sri Aman, kilah ensana.

Berebak enggau nya, Harden bisi madahka diri deka ngungkupka belanja RM5,000 ngagai Komiti Pemansang enggau Pengelikun Genturung Pendiau (JKKK) Rumah Achun, Menalang sereta RM3,000 diberi ngagai rumah panjai nya.

Nangkan nya, Harden mega ngelalau rayat di menua pesisir di DUN Simanggang terus nyukung parti ke nyengala dalam serakup BN.

“Anang mudah alah umbuk parti ke ngumbai diri udah masuk BN. Kebuah pia laban empai bisi ‘hitam putih’ (surat betulis) ke ngenukuka parti nya udah amat-amat nyadi kaban BN Sarawak.

“Nya alai aku ngarapka rayat di menua pesisir nyengkaum di DUN Simanggang meseti pintar ngelai parti BN enggau ukai BN maya Pengawa Bepilih Kunsil Nengeri (PRN) ke deka datai ngambika nyamin pemansang jemah,” ku iya.

Sama bisi datai Ketuai Opis Kaunsil Kandang Menua Sri Aman Richard Tawan Seru, Penyanding Penemu Komiti Nembiak Parti Se’ati Rayat Sarawak (SUPP) Simanggang, Patrick Michael Malajin enggau bala Kaban Kunsil (Kaunsilor) MDSA.

KUCHING: Kem Pengerai Impian Sarawak deka ngaduka pengawa meresa pengerai dua hari berunggu di Rumah Panjai San Demam Sri Aman, berengkah sehari tu (Hari Enam) enggau Hari Minggu.

Berindik enggau nya Chairman Parti Tindakan Demokratik Sarawak (DAP) pampang Sri Aman, Leon Jimat Donald meransang semua orang ke diau ngelingi datai beperesa pengerai tubuh diri.

Ku iya, servis meresa pengerai nyengkaum meri enggau nadai bebayar deka dipejalaika lapan iku lutur pakar enggau dua iku lutur ngeli.

“Anang muai peluang meresa pengerai tubuh diri ba lutur pakar ke dibai kami maya dua hari nya ila.

“Semua servis nyengkaum ubat deka diberi enggau enda bebayar lalu kita ke diau ngelingi dikelaluka datai,’ku Leon ke mega Mandal Chairman DAP Nengeri.

Iya madah, pengawa nya deka berengkah pukul 4.00 lemai ngagai pukul 8.00 malam kena 4 Julai (Hari enam), ke alai ba hari kedua iya nya 5 Julai, pengawa beperesa deka berengkah pukul 10 pagi nyentuk 8 malam.

KUCHING: Balai Dagang enggai Industri Dayak (DCCI) deka ngatur penemuai Belajar Seraya Beratika Peluang Dagang ti ketiga kali ngagai menua tasik, iya nya ngagai Taiwan.

Sapit presiden DCCI, Kilat Beriak madahka penemuai ngelama enam hari ngagai Taiwan nya belabuh ari 5 nyentuk 11 Disember.

“Tuju penemuai nya dikena nyendiaka peluang ngagai raban profesenyel enggau orang dagang Dayak ngambika belajar sereta ngulihka penemu ari raban Balai Dagang enggau Industri di Taiwan sereta ngulihka penemu pasal komersial enggau pekara dagang ungkup penyereta ari DCCI.

“Penemuai ngagai ‘Keduataan Malaysia’ di Taipei mega sebagi ari program lebuh ke nemuai nya,” pia ku Kilat, ti mega Chairman Komiti Servis DCCI.

Kilat apin lama, udah nyadi chairman beandauka pasal penemuai nya ba Opis Sekreteriat DCCI ditu. Aum nya mega digulu Chairman Komiti Dagang Agro Batang Ai, Malcolm Mussen Lamoh.

Ku Kilat,program nya diatu benung diatur sebuah ejensi penemuai di Kuching.

Entara palan ti deka digusung maya nya baka Sun Moon Lake and Aboriginal Speciality Centre,Recreational Farm and Aquaculture Project di Taichung.

Iya mega madah, penemuai ngagai Taiwan nya Belajar Seraya Beratika Peluang Dagang ti ketiga kali ngagai menua tasik udah diatur DCCI.

Ba taun 2012 enggau 2014, lebih 100 iku kaban DCCI enggau ba penemuai ke sebaka, iya nya ngagai Vietnam enggau Myanmar,ku iya.

Sesapa ti bisi ati deka enggau, tau ngerejista diri ba Sekreteriat DCCI nengah lumur 082-425821; faks:082-422806: tauka ngajung email ngagai tjayang@gmail.com

Dikarang Chris Bishop//

KUCHING: Penyanding penemu Parti Tindakan Demokratik (DAP) pampang Balai Ringin Ringin Tuai Rumah Usop Kinyang minta Parti Keadilan Rakyat (PKR) meri peluang ngagai chalun DAP bediri ba sekeda sitak.

Ku iya, pinta tu setipak enggau jaku tesau Chairman PKR Nengeri, Baru Bian ti ngansak semua parti penyakal di nengeri tu begempung kelebih agi maya bepilih.

Usop ngasaika PKR enda patut agi nganjung chalun bediri ba 41 iti sitak baka ke maya pengawa bepilih ti udah.

“Ba pengawa bepilih ke udah, PKR nyabung chalun ba 41 iti sitak tang semina menang 3 aja, ke alai DAP nyabung chalun ba 15 iti sitak lalu menang 12 iti penuduk.

“DAP diatu nerima sukung ke manah ari rayat ti diau di menua pesisir kelebih agi pengudah inisiatif Impian Sarawak dilanchar dua taun ke udah, iya nya ba taun 2013 ke alai Parti Pesaka Bumiputera Bersatu (PBB) nangika penegap DAP.

“Pekara tu nyata dipeda pengudah raban ari PBB ngansak bala tuai rumah ngemuntanka program ke udah diatur DAP baka ke ngachau program MedCamp di Betong kemari,’ku iya.

Berindik enggau nya, DAP patut nyabung chalun ngarika penyakal ketegal sida udah bebendar ngadu pengawa ke pemaik rayat sereta udah nguna mayuh awak.

PKR patut meri awak ngagai DAP ketegal sida (PKR) udah suah nyabung chalun tang lalu enda teulihka pemujur, tandu Usop.

Iya nambah, ketuai dalam DAP enda sebaka enggau ketuai parti bukai, DAP ngembuan raban ketuai ti angkun meri servis ngagai rayat lalu enda mudah ngelengka ke rayat taja pan alah maya pengawa bepilih.

“Chalun DAP seruran deka meri servis seraya mutarka penanggul rayat. Sida ngembuan disiplin ti tinggi sereta angkun ngereja pengawa,”ku Usop.

Gagitka penegap DAP Sarawak, Usop nyuaka pom nyadi kaban seumur idup DAP ngagai Chairman DAP, Chong Chieng Jen rambau penemuai iya ngusung Usop di Kpg Abok, dua bulan ke udah.

KUCHING: Pampang Nembiak Sarawak Dayak National Union (SDNU) deka ngatur pengawa bepilih ti keterubah kena 12 Julai ba Lurung Merdang 3 di Kota Samarahan.

Ketuai pampang nembiak SDNU, Churchill Edward Drem madah, taja pan SDNU diatu udah ditumbuh ngelama 59 taun, pengawa ngeregaska bagi nembiak diatu endang datai ba maya ke patut enti diperati ari timbal kaban nembiak ti deka bejalaika tanggungpengawa ngagai gerempung tauka meri servis ngagai mensia mayuh nengah NGO nya.

Protem komiti nembiak baru ditumbuh dua ke udah,nadai melabaka bisi pemutus besai nyadi maya bepilih nya tang ketegal demokrasi, proses nya tetap dipejalaika, ku iya.

Dulu ari nya, protem nembiak pampang Samarahan udah ditumbuh kena 3 Jun tu tadi enggau juluk deka ngenankan bagi Nembiak SDNU.

Kededua bagi enggau pampang nembiak Samarahan besetuju deka begempung ngereja pengawa, ukai semina ngerejista kaban baru tang mantu komuniti Dayak ngintu sereta ngeraga adat asal, main asal enggau gaya pengidup Dayak.

Kelimpah ari nya, sida mega deka nentuka kurang agi penyampau nembiak ti enda besekula ari komuniti Dayak sereta nentuka apai indai meransang anak sida ti belajar ba sekula sekondari ulih nampung pelajar ngagai universiti tauka institusyen teknikal.

“Kelia,aki ini kitai bepanggai ba pengawa ‘Bejalai’ enggau ‘Berimba’ ngiga peluang, tanah enggau pengaya, tang diatu pelajar enggau pengelandik teknikal deka nyadi kereban bulih pemujur sereta muka pintu bulih peluang ti manah agi,” ku Churchill.

“Kami mega deka nentuka adat, main asal enggau gaya pengidup Dayak enda punas ketegal pemansang enggau pekara moden. Tu mih kereban dikena ngelaika identiti bansa Dayak, ti ngempung kitai sereta talukka pesaka kitai,” ku iya.

“Aku arapka bala kaban ulih ngawakka diri ngulu aum enggau pengawa bepilih pampang nembiak SDNU. Anang nanya nama utai ulih dikereja SDNU ke kita tang tanya diri nama ti ulih dikereja kita ungkup SDNU,” ku iya.

Kelimpah ari nyadi ketuai pampang nembiak, Churchill mega dichiri nyadi Mandal presiden SDNU.

Kaban tauka sesapa ti bisi ati deka nemu penerang ti silik pasal pengawa bepilih enggau aum keterubah pampang nembiak SDNU nya tau betelefon ngagai iya nengah lumur 017-8081485.

Dikarang Rengenyan Labang//

MENDINGKA PENERANG: Uggah (kanan) lebuh mendingka penerang sereta berandauka pasal loji biodiesel ba IOT Kuching ari Independent Oil Terminal (IOT) Management, kemari.

KUCHING: Semua 175 buah stesyen minyak di Sarawak deka ngena Biodiesel B7 lebuh manggai ba bulan September 2015, enti Loji Biodiesel ba Independent Oil Terminal (IOT) Kuching beoperasyen 100 peratus.

Menteri Kebun Dandang Besai enggau Komoditi Datuk Amar Douglas Uggah Embas madah, IOT Kuching iya nya loji biodiesel ti kedua sereta kereban penyampur biodiesel kelima di nengeri tu.

“Sehari tu aku ngabas loji biodiesel baru ba IOT Kuching ti beungkus RM12 juta, diatu udah 50 peratus beoperasyen lalu kitai arap endar enti (IOT Kuching) beoperasyen magang, semua stesyen minyak di Sarawak deka ngena biodiesel B7 lebuh manggai ba bulan September tu ila.

“Penemuai aku tu dikena ngenukuka penembu kereban penyampur tauka loji biodiesel tu ngambika program Biodiesel ulih chakah dipejalaika di Sarawak.

“Nengeri tu bisi lima iti kereban penyampur biodiesel iya nya di Bintulu, Tanjung Manis enggau dua buah di Miri lalu ti kelima IOT Kuching tu,” ku iya.

Uggah mansutka pekara nya lebuh dikerandau raban pengarang berita maya ti nemuai seraya bejalaika pengawa ngabas kereban penyampur biodiesel ba IOT Kuching ditu, kemari.

Berebak enggau tu Uggah nerangka formula B7, iya nya 93 peratus minyak diesel dichampur enggau 7 peratus biodiesel (minyak sawit).

Ku iya, di Semenanjung Malaysia formula B7 berengkah dikena kenyau bulan November 2014, lalu di Sabah enggau Sarawak dalam bulan Disember 2014.

“Reti nya tujuh peratus ari minyak diesel ti dijual ba stesyen minyak kitai nya ari minyak sawit, berindik ari program tu dipejalaika, di serata menua tu deka nguna 700 tan minyak sawit CPO.

“Tu seiti chara kitai ngangkatka agi guna sawit di nengeri tu, enggau chara tu kitai ngarap ulih ngetanka penegap rega sawit,” ku iya seraya madahka menua Indonesia mega bejalaika program ti sebaka, iya nya nguna formula B7 enggau B15.

Kelimpah ari nya. iya madahka menua tu mega deka merambu ngena B10, berindik ari pemujur B5 enggau B7.

“Diatu kitai agi dalam proses konsultasyen, kami agi nganti timbal ari beberapa stakeholder lalu diperambu B10 deka dipejalaika dalam bulan Oktober tu ila.

“Enggau penyampat kitai nerima timbal, kitai deka ngaga pansik lalu enti kitai ulih bejalaika formula B10, reti nya kitai begunaka abis nadai 1 million tan CPO digaga nyadika biodiesel ungkup guna domestik,” ku iya.

Sapa-sapa chalun BN endang disukung tang kami di menua tu ngarapka iya ukai chalun ke kala alah

Dikarang Judan Bungap //

BINTANGOR: Rauh pengawa bepilih kunsil nengeri (PRN) nyau majak inggar didinga lalu chalun ke deka nguji bediri mega udah belabuh ngenampakka mua diri ba raban mensia mayuh.

Pia mega pekara ke bisi nyadi di sitak Kunsil Nengeri (DUN) Meradong nyau berupai ayan bala sekeda kaban parti ti dipelabaka deka bediri ba penuduk nya.

Pekara tu tampak bendar dipeda maya pengerami Gawai Dayak enggau pengerami Ngiling Tikai tu tadi alai sekeda ari sida tu gauk begulai enggau rayat rumah panjai kelimpah agi nyalam, nyangka empai kempang madahka diri bisi ati bediri ba penuduk nya.

Maya Berita Iban berandau enggau sekeda tuai rumah ba Meradong, tebal agi sida madahka diri endang udah lama meda pekara nya lalu melabaka PRN ti deka datai nyangka ‘angat’ agi ari ke udah laban sekeda sida ke deka bediri tu datai ari parti ti sebaka.

Tuai Rumah Rami Sandai ari Sungai Stumau, Meradong madah, ketegal pekara nya, rayat rumah panjai diatu mayuh ngembuan peragam ati ke enda sebaka ngujungka tebantai mayuh bengkah cherita.

“Kami ditu udah lama meda sida tu suah niki rumah panjai ba tuju deka ngayanka diri deka bediri ba DUN Meradong maya PRN ti deka datai.

“Taja sida mimit tang ba aku tauka kami serumah endang sigi nyukung Barisan Nasional (BN) aja.

“Tang taja pia ba kami, manah agi parti BN milih chalun ke baru ti bisi pengelebih ngambi pulai penuduk tu ari Parti Tindakan Demokratik (DAP).

“Kami ditu udah nemu magang ‘baga’ pengari BN ti udah bediri ba DUN Meradong.

“Nya alai, engkeman alai tuai BN milih orang ti baru ari sida ke lama suba,” pia ku iya madah ngagai pengarang berita.

Ba penemu TR Lium Bunya, ari Skim B, Bintangor madah, undi ari bumiputera ngagai BN enda kala limpang tang ketegal alah undi ba kandang mengeri (enggi bansa China) DUN Meradong diatu dipegai penyakal.

Nya kebuah ku iya, serak tu, tuai BN meseti milih chalun ke endang ulih ngambi penuduk nya ari penyakal lebih agi chalun ti baru.

“Sapa-sapa chalun BN kami endang sigi nyukung. Tang kami menua tu minta chalun nya meseti orang baru ukai sida ke kala alah suba,” pia ku iya madah.

Ngenang sekumbang ke dipegai penyakal, ku TR Lium, nyentukka diatu sida serumah 23 pintu empai ditampung kuasa karan taja tali karan ulih dijengau ari mua empelua.

“Ukai semina nya aja, udah ke menang suba, DAP lalu nadai dipeda ngabas penusah kami.

“Kami ba DUN Meradong tu andal amat BN ulih megai DUN Meradong udah PRN tu ila ngambika kami enda ngining pemansang menua bukai,” ku iya sambil madah penusah sida nadai pemansang diumba agi Parlimen Sarikei bela dipegai penyakal.

TR Susie Chundi bela ari Skim B, Bintangor mantai penemu ti sebaka ngarapka penuduk enggi BN di DUN Meradong ila diarika chalun baru.

“Sapa-sapa ari BN ke dipilih nyadi chalun ila endang disukung kami magang.

“Kami ditu udah dipegai penyakal dua penggal tenguk bendar ke pemansang semina ketegal undi orang bukai ti limpang ari BN.

“Beri awak ngagai orang baru, sida ti bisi pengelebih, iya ke tau menang laban enti enda pia ukai semina BN aja berasai lebu tang kami rayat deka lebih agi ngasaika pengerugi,” pia ku iya madah.

Ba pemutus PRN 2011 suba, Ting Tze Fui (DAP) bulih 6,884 iti undi ngalahka chalun BN Ling Kie Kiong ti bulih undi 4,197.

PRN 2006 suba mega DUN Meradong mandangka Ting bulih undi 5,990 enggau majorit 3,578 undi ngalahka seiku chalun ari BN enggau tiga iku chalun ngatika diri.

BINTANGOR: Rumah panjai kayu di Teluk Batu, urung iya penyauh 16 Kilometer pejalai nengah ai sungai Rejang ari pasar Bintangor ditu udah angus kena ngalih hari kemari.

Nitih ku Ketuai Balai Raban Pengerara Api (bomba) enggau Pengenyah Penusah, api nya diadang berengkah nyerarai urung iya pukul 3.20 lemai berindik ari kanggau ti diterima sida bekaul enggau penusah nya urung iya pukul 3.22 lemai.

Empat iku kaban bomba nurun ngesah penusah dalam pengelama 35 minit, api sigi nyau deka nganguska kesemua semilan pintu rumah panjai nya.

Tujuh iku raban Bomba Sarikei mega datai ngesah lalu sida mujur ngerara api dalam timpuh 10 minit, ku iya, seraya nampung, api nya udah nganguska kesemua lapan buah rumah.

Maya sida bejalaika pengawa nya sida napi penangul ketegal jalai ti mit amat nyambung ngagai rumah panjai nya, Ku Nicholas.

Kelimpah mujur nagang sepintu ari rumah panjai nya anggus, sida mega mujur nagang api nya ari ngerekai ngagai rumah-rumah ke besemak enggau penusah tu nyadi, iya nya Rumah Petrus, ku iya nampung.

Kesemua 40 iku peranak Rumah (Rh) Mansor Danum ke nguan rumah ke ditinggang penusah udah mujur ngerarika diri enggau nadai pedis tauka bebadi, ku iya.

Nitih ku penerang ti dipadahka seiku ari orang ti ditinggang penusah nya, api berengkah ari bilik besai ari tengah rumah panjai nya, tang raban bomba agi mansik nentuka ari ni penatai api nya sereta kebuah penusah nya nyadi.

Dikarang Judan Bungap //

SIBU: Parti Rayat Bersatu (UPP) deka ngirai manuk sabung parti sida bediri ngarika Barisan Nasional (BN) ba penuduk Kunsil Nengeri (DUN) Dudong maya Pengawa Bepilih Nengeri (PRN) ti deka datai.

Pekara tu dipansutka Ketuai Nembiak UPP Dr Johnycal Rayong Ngipa maya Pengerami Ketuai Begulai enggau Rayat di Rumah Nelson Surau, Sungai Durin Kanan ditu, lemai kilah ensana.

“Kitai ngarapka chalun UPP ulih dianjung bediri ba penuduk tu maya PRN ila.

“Taja pia, kami endang bepanggai ba pemutus Ketuai BN nengeri milih sapa chalun UPP ke patut bediri ditu ila,” pia ku iya madah.

Bela bisi datai maya tu iya nya Sekretari Politik Kepala Menteri Pau Kiew Chuang, Chairman Opis Kunsil Menua Pesisir Sibu (SRDC) James Laju Ambok, Sapit Sekretari Publisiti Nembiak UPP ti mega Sapit Chairman Bumiputera UPP Dudong Frankie Junau enggau Tuai Rumah Nelson.

Iya ti mega Kaban Kunsil Nengeri (ADUN) Engkilili madah, rayat diatu anang saru enggau jaku achuk piak ti enggai meda UPP madahka parti UPP parti penyakal.

“Ari suba kami endang udah madah UPP endang sebagi ari BN.

“Nambahka nya, empai lama tu tadi Menteri Besai Datuk Seri Najib Tun Razak udah terang madah parti UPP  sebagi ari BN nengah BN Plus.

“Nya alai, kitai ngarapka raban bansa Bumiputera anang pambar lalu nyukung UPP maya PRN tu ila laban ari penyerakup tu kitai ulih ngambi pulai penuduk Dudong ari pegai penyakal,” ku iya sambil madah UPP ngembuan awak ke manah ngambi pulai penuduk nya bepun ari sukung rayat dia.

Berebak enggau pengerami tu, Dr Rayong ngansak rayat rumah panjai ngemansangka tanah adat (NCR) sida enggau pengawa betanam betupi.

Taja pan baka nya ku iya, tanah nya tau disukat kelinggi dulu ngambika ulih diberi surat pala tanah.

“Mayuh ejensi perintah baka Risda, Felcra enggau MPOB ulih nyaup kitai di rumah panjai numbuhka kebun sawit, lada tauka getah.

“Pia mega anang ngelengkaka pekara sekula laban ari tu pengidup kitai deka mansang tauka berubah nitihka orang ke udah mujur agi,” pia ku iya madah madahka baru.

Ba pengerami tu Dr Rayong bisi nyuaka chek RM3,000 ari iya ngagai Komiti Pengelikun Genturung Pendiau (JKKK) Rumah Nelson Surau.