Generator di sekula nya rusak lebih setaun, ngarapka piak bekaul mutarka penanggul tu enggau lengkas

MIRI: Sekula Primari (SK) Long Bedian udah dikemanahka nyadi sekula Komprehensif 9 (K9) ba taun 2011 suba lalu nyadi sekula keterubah di menua tu ngembuan sistem panel solar pemadu besai.

Taja pia bekal kuasa karan ari sistem solar nya bisi penanggul baka rusak injin generator ngujungka pengelantang 457 iku nembiak enggau pengajar ke bemalam ba sekula nya nyau tejanggal.

Rambau pengawa berandau enggau raban ari The Sunday Post kemari, Kaban Kunsil Nengeri (ADUN) Telang Usan Dennis Ngau berasai enda lantang ati ke penangul bekal kuasa karan ba sekula nya ti enda meruan kenyau ari bulan Mei taun tu.

“Penatai bekal kuasa karan ngagai sekuka nya endang ari sistem solar, sereta sistem solar nya udah digaga kenyau ari lima taun ke udah (2011) tang nadai kala diservis.

“Lebuh ari panas terit, solar nya ulih mekalka kuasa karan ngagai semua sukut di sekula nya dataika ngagai pukul tiga dini hari sereta udah nya petang tegayam,” ku Dennis.

Ku iya, mayuh raban apai indai nembiak datai ngelawa iya sereta bedawa penangul ti ditapi anak sida ti nyau bepanggaika lampu pichit maya mandi pagi urung iya pukul lima pagi maya sida dani.

Penangul nya suah nyadi urung iya pukul tiga pagi maya putus bekal kuasa karan.

Aku dipadahka raban nembiak dani urung pukul lima pagi iya nya jam dikena sida nyikap diri nurun ngagai sekula sereta sida semina nguna lampu pichit maya mandi sereta beradu ngena pekayan sekula,” ku iya seraya nampung baru madahka diri udah bejalai ngelawa ngagai sekula nya minggu seiti kemari ngabas sereta ngamatka sebana sida nya.

Kelimpah ari nya, raban orang ti gawa di dapur mega ngasaika penangul ti sebaka maya nyediaka pemakai pagi ngagai nembiak, sida semina gawa nyumai pemakai ngena panchar lampu dian sereta lampu pichit

Dennis madahka diri irauka pengelikun raban nembiak lebih agi ngenang penyampau nembiak ti diau bemalam dataika beratus iku sereta sekeda ari nembiak nya baru primari satu.

Lebuh ditanya enti sema sekula nya bisi ngembuan bekal kuasa karan ti disimpan, Dennis madahka generator sekula nya udah rusak dalam pengelama lebih ari setaun.

“Aku mega bisi dipadahka taja udah mayuh ripot sereta sebana nengah telefon nuju piak ti bekaul meresa tauka bejalaika pengawa mutarka penangul nya, tang nadai seiku raban orang datai ngibuhka penanggul sida.”

Iya udah nya nampung baru madahka sistem solar nya patut ambis kurang diservis sereta bateri iya patut diganti baru sentara generator nya patut dikemanah tauka ditukar baru.

“Kami enda tan ati meda anak kami di sekula menua pesisir enda dikeibuhka ba pekara hak sida laban semua tu perengka guna asas.

Iya minta raban piak ti bekuasa ti bekaul datai meresa penangul nya sereta ulih mutarka penangul nya enggau lengkas.

Sekula tu ngembuan penyampau semua nembiak 494 iku, nyengkaum 457 iku diau bemalam di sekula.

SK Long Bedian di Apoh Baram urung iya 200 kilometer ari Mengeri Besai Miri.

SIBU: Kaban parlimen Sibu, Oscar Ling madahka DAP udah mantaika langgur penemu numbuhka Sebengkah Komiti ti betuaika ex-Menteri Besai Tun Dr Mahathir Mohamad enggau Tun Abdullah Ahmad Badawi nasat tuduh Wall Street Journal (WSJ) ti madahka urung US$700 million duit IMDB udah dipasuk ngagai akaun Menteri Besai Malaysia ke diatu, Datuk Seri Najib Razak.

Ku iya, pemutus nya deka dibantaika di Parlimen nganmbika semua rayat nemu sentang pekara ti nyadi bekaul enggau skandal duit ti pemadu besai di menua kitai tu.

Ngenang jaku ti dipansutka WSJ, ripot nya madahka bisi lima deposit digaga ngagai akaun Najib lalu bisi dua kali penyampau ti pemadu mayuh iya nya a US$620 million enggau US$61 million, digaga dalam bulan Mac 2013, lebuh benung maya kimpin di Malaysia.

“Utai ti ditulis WSJ nya tuduh ke berat. Enti ditemu amat, nya deka nyadi skandal duit ti pemadu besai nyadi di menua Malaysia,” pia ku iya bau aum pengarang berita ditu pagi kemari.

Ku Ling, Najib patut ngambi kemisi ngambika pengawa nasat nya dipejalaika.

“Taja pia, enti Najib ngasaika diri beresi sereta nadai bekaul enggau skandal nya, iya patut nyaman WSJ enggau sesapa ti mantaika skandal nya ngambika iya enda dituduh salah ” ku iya.

Ku Ling, tuduh tu serius amat ti bekaul enggau ketuai menua tu.

Ku iya, semua penanggul ti besangkut paut enggau IMBD patut dipansik lalu pemutus nya dibantaika ngagai rayat.

Enti sema duit nya dikena bekimpin pengawa bepilih ku Ling, duit nya enda patut dipasukka ngagai akaun Menteri Besai.

Berindik ari nya bansa Kayan udah ngasaika pemansang enggau pengelantang ba komuniti

Dikarang Chris Bishop //

KUCHING: Raban bansa Kayan dipinta majakka pengawa nyaup perintah ngemansangka nengeri tu baka ti udah diadu raban ketuai bansa nya ke dulu suba.

Sapit Kepala Menteri Datuk Patinggi Tan Sri Alfred Jabu madah, bansa kayan kenyau menya sigi udah begempung enggau perintah ngaduka pemansang nyengkaum meri pengelantang ngagai komuniti nya empu.

“Dulu suba, raban bansa Kayan ngembuan raban ketuai ke landik baka Tajang Laing, Nyipa Batu, Luhat Wan enggau sekeda bukai.

“Raban ketuai tu udah nentuka bansa Kayan nempa pemujur ba pengawa sekula, rama, institusyen ruang bilik kelimpah ti ngembuan kaul ke manah enggau bansa bukai.

“Bepelasarka pemujur nya, komuniti Kayan patut majakka pengawa manah sida ti udah meri kerejasama ngagai perintah dalam atur ngemansang nengeri tu. Anang kiruhka pekara ti nyadi di Semenanjung Malaysia,” ku iya.

Jabu mansutka jaku tu maya bejadi Pesta Gawai Lunau ke diatur Gerempung Orang Indu Kayan Sarawak (PWKS) di sebuah hotel tebilang ditu, malam ensanus.

Jabu nambah, komuniti Kayan udah ngasaika pemaik nengah kerejasama ke diberi sida ngagai perintah ke alai mayuh sida udah teulihka pengawa di kandang mengeri.

Ngenang sentang Pesta Gawai Lunau, Jabu ke mega Menteri Pemansang Menua Pesisir enggau Menteri Betanam Betupi Moden pechaya, pengerami nya mantu ngintu adat enggau main asal bansa kayan.

“Nengah pengerami tu kitai meda main asal Kayan dipandang ngagai bala mayuh ke begempuru ditu.

“Bansa bukai ti enda kala meda main asal tu deka ngelala bansa Kayan enggau silik agi lalu tu meh chara sida ngenanka identiti diri,’ku iya.

Dulu agi ari nya, Penyanding Penemu PWKS Senator Lihan Jok ba jaku pengelalu madah, Pesta Gawai Lunau diintu rambau musin bumai.

Ku iya gawai nya diadu dikena meri basa ngagai semengat tauka petara padi kelimpah ngerami asil padi ti diulih ba taun nya.

“Tembu Gawai Lunau ngelaika pengujung kalendar bansa Kayan ke alai semua pengawa ke bekaul enggau pengawa bumai udah tembu,”ku iya.

Ba pengerami nya jabu bisi ngagihka RM0,000 ngagai PWKS.

Bela bisi datai Kaban Kunsil Nengeri (ADUN) Telang Usan enggau Balai Ringin, Dennis Ngau sereta Snowdan Lawan, Sapit Sekretari Perintah Nengeri Datu Ose Murang, Chairlady PWKS Roselyn Lah enggau orang bukai.

MIRI: Taja hari bisi ujan enda lama kena malam ensana tang nya udah mujur mantu raban pengerara api (bomba) enggau penyah penusah ditu nagang api ari ke terus nganguska kampung puang di Kuala Baram.

Ketuai Opis Bomba Zon 6 Supt Law Poh Kiong lebuh ke dirandau kemari madahka taja hari ujan nya enda lama, tang iya mujur mantu sida ngetuka serarai api sereta ngurangka asap.

“Ujan ti labuh kena malam Hari Enam tu tadi udah mujur mantu kami nagang api nya ari ke nyerarai kelebih agi nuju Jematan Asean,” ku iya.

Ku Law nampung baru, sida mengkang matau kandang endur nya 24 jam. Sida mega bisi dibantu raban bomba volunter.

Iya madahka, raban nya diatu benung ngemataka anak api di tisi jalai sereta nalan ti udah diempa api.

“Ditu kami bisi ngembuan sebuah injin ngerara api, sebuah tangki ai, tiga unit tangki ai, lima buah pikap (4WD) sereta sebuah lori,” ku Law seraya nampung baru madahka sida iya mega ngena bilun engkabang ti diterebaika 10 iku raban nya ari unit langit.

Ngenang pekara bukai, Law madahka penyauh tenggau di kandang menua nya beinsur manah pengudah ujan tang iya ngelalau raban orang betengahka jalai alun anang laju maya bepasangka kereban pengangkut dikena nyeliah sebarang penusah ke enda disadang.

BINTANGOR: Penusah angus ke nuntung Rumah Mansur Danum, Teluk Batu ditu bela disah Kaban Kunsil Nengeri (ADUN) Daro Dr Murni Suhaili.

Iya ke datai ngabas tembawai rumah panjai angus nya kemari bisi nyuaka pemeri RM4,000 ngagai Tuai Rumah Mansur.

Bela bisi datai nyempulang penatai Murni iya nya Pengulu Augustine Pau.

Pemeri nya dikena nyaup ngelempung penusah ke nuntung peranak rumah panjai nya.

Penusah angus tu nyadi urung pukul 3.22 lemai kilah ensana ti ngujungka lapan pintu bilik abis angus lalu semina sepintu aja mujur enda diserarai api.

Semua sida serumah 40 iku dipadahka nadai bakal tang semina tinggal gari ba punggung aja.

Raban bomba mujur ngerara api ari ke deka nyerarai ngagai Rumah Petrus laban ke enda jauh ari rumah panjai nya.

KUCHING: Chairman DAP Sarawak Chong Chieng Jen nimbal petenah ari Parti Keadilan Rakyat (PKR) Sarawak nengah laman Facebook PKR ti madah sida deka ngerampas penuduk ke endang ungkup PKR.

Chong pechaya Barisan Nasional (BN) endang enda patut menang mudah di menua pesisir lalu ketegal PKR enda bejalaika pengawa enggau manah, DAP patut ngatur pengawa nya.

“Kitai patut enda duduk jenuh pia aja lalu ngarapka tuah ajih nyadi maya pengawa bepilih tu ila.

“Enti deka menang, kitai patut udah ngereja pengawa lama suba sebedau hari muai undi. Nya meh kebuah DAP ngelanchar projek Impian Sarawak ba bulan September 2013, bedau lama pengudah tembu pengawa bepilih 2013.

PKR enda regas ngadu pengawa di menua pesisir ke alai chalun sida ba taun 2013 udah enda meri serbis agi,’ku iya nengah pesan jaku pandak kemari.

Ketegal nya DAP enggai nyadi enda ngereja pengawa ke ditinggal PKR ngambika BN enda menang enggau mudah ba pengawa bepilih ti deka datai, tandu iya.

Chong ke mega MP Bandar Kuching enggau ADUN Kota Sentosa madah pekara nya ulih diperatika enggau mudah, ba penuduk ke alai PKR alah rambau 2013 nadai mayuh kereja udah diadu sida kenyau alah.

Katika PKR  nyadang ulih nempa pemujur ba pengawa bepilih ti deka datai, tambah iya.

“Maya kitai enda bediri ngerebut penuduk di menua pesisir, PKR nuduh kitai ngelakka sida ngatur penuduk ke tusah dirampas.

“Pengudah kitai ngepunka pengawa di menua pesisir, nyendia diri napi pengawa bepilih ti deka datai…PKR nuduh kitai deka ngerampas penuduk nya ari sida,”ku iya.

Entara sekeda laman facebook PKR madah projek Impian Sarawak dipejalai ngambika tau dikena ngerampas penuduk PKR Sarawak di menua pesisir ke alai pekara nya lain ari tuju asal, iya nya mantu PKR.

PKR minta DAP enda ngachau penuduk sida di menua pesisir ketegal pekara nya tau ngeruga peluang sida nempa pemujur ba pengawa bepilih ti deka datai.

SIBU: Pengerami Ngiling Bidai ti diatur staff Sepital Sibu kena malam Hari Minggu tu tadi ba sebengkah hotel udah mujur diatur seraya beperindang enggau pangan diri. Bisi 500 iku raban staff datai ngulu pengerami ti dipenyadika Kaban Kunsil Nengeri (ADUN) sitak Tamin, Datuk Joseph Mauh Ikeh.

Pengerami nya diatur raban Komiti Dayak sepital nya ti diketuaika Chairman Pengatur Pengerami Daughlass Saran.

Daughlass madah, tuju pengerami nya diatur kena ngerapitka kaul entara staff di sepital nya.

Iya mega ngaku bantu ari Mauh ti udah mantu raban komiti nya nengah bantu belanja dikena sida bejalaika aktiviti.

Mauh dalam jaku ti dipansutka iya ngansak raban indu misi sereta lutor di sepital ngarapka sida belajarka mayuh bansa jaku ngambika sida ulih berandau enggau macham bansa orang ti sakit.

Pengudah nya iya bisi ngemendarka geran agih belanja perintah dikena komiti nya bejalaika aktiviti sida dalam taun seiti tu ila.

Bela bisi datai ngulu pengarami nya Direktor Sepital Sibu Dr Ngian Hie Ung sereta Kaunsilor ari Opis Kunsil Pelilih Menua Pesisr Sibu (SRDC) Dr Ali Puji sereta Andrewson Ngalai.

MANAH AMAT TIMBAL: Sekeda orang negrijista diri beperesa tikas gula dalam tubuh di Summermall Samarahan kemari. Bela dipeda Dr Voon (dua kiba).

Berindik ari timbal mensia mayuh, program pengerai ti enda bebayar tu deka diatur dua minggu sekali

Dikarang Chris Bishop //

SAMARAHAN: Diabetes Malaysia pampang Sarawak ngadu pengawa meresa tikas gula dalam tubuh enggau enda bebayar ungkup mensia mayuh tiap dua minggu sekali.

Chairman Dr William Voon madah pengawa nya deka diatur ba mayuh bengkah gudang bebeli barang ngelingi Kuching baka ke di Spring, CityOne, Boulevard sereta ke bukai.

“Ba pengawa ke udah kami nerima timbal ke manah ari mensia mayuh lalu ngarap sida ke bedau beperesa datai ba pengawa ke bisi diatur kami udah tu.

“Kelimpah ari nya, kami mega meri penerang sentang guna ngintu tikas gula dalam tubuh ngambika enda ngelui ari patut,” ku iya lebuh dikerandau di Summermall Samarahan ditu, kemari.

Iya madah gerempung sida bisi mega ngadu pengawa ke sama di Serian lalu mujur matak lebih 200 iku orang datai beperesa.

Enggau nya Dr Voon meransang mensia mayuh datai beperesa ke alai asil peresa, tikas gula enggau peninggi tekan darah dalam tubuh ulih ditemu tekala nya.

Taja bala Dayak ke graduet seruran betambah tang pemayuh sida indu agi ngalahka orang lelaki

Dikarang Judan Bungap //

SIBU: Sapit Kepala Menteri Datuk Patinggi Tan Sri Alfred Jabu Numpang berasai temegah ati enggau penyampau graduet Dayak ba nengeri tu ke dipeda majak nambah ninting taun.

Taja pia, iya madahka penyampau nya bisi besibil laban penyampau orang indu ke graduet mayuh agi ari lelaki.

Ku iya, taja enda mujur ba pelajar tang sida ke lelaki mayuh mujur ba pengawa bukai baka pengawa ti bekaul enggau pengelandik tauka vokasional.

“Nya alai, kitai mengkang meransang bala nembiak lelaki chakah agi ngulihka penemu nyentuk ngagai tikas ke pemadu tinggi.

“Kebuah pia, nengah pemujur ba pelajar raban bansa Dayak megai tanggungpengawa ke besai lalu ulih nyaup ngangkatka pemansang pendiau pengidup bansa diri,” ku iya.

Jabu mantaika jaku tu maya Pengerami Ngiling Bidai ke diatur Gerempung Dayak Sarawak (SDNU) Pampang Sibu ditu, malam kilah ensana.

Bela bisi datai maya tu iya nya Sekretari Besai SDNU ti mega Chairperson Serakup Indu Dayak Sarawak (SIDS) Pampang Sibu Dato Ir Alice Jawan, Chairman SDNU Pampang Sibu Tengku Gruna, Ketuai Pelilih Menua Kanowit Katis Noel, bala Sekretari Politik Kepala Menteri enggau bala tuai raban bansa ke bukai.

Jabu ti mega Menteri Moden Pengawa Betanam Betupi enggau Menteri Pemansang Menua Pesisir mega muji SDNU enggau SIDS ti bebendar besaup ngangkatka tikas pelajar nembiak Dayak.

Ku iya, pengeransing dua bengkah gerempung ukai dikuasa perintah (NGO) tu nyengala dipeda nengah chara beberika tanda peransang pelajar ngagai nembiak Dayak ti mujur ba pelajar ninting taun.

Bekenangka pengerami Gawai ke diintu maya hari tu, ku Jabu, agi kelia raban bansa Dayak ngintu Gawai dikena ngelai tembu bumai.

Tang ku iya, mayuh bansa Dayak diatu udah ngelengka ke pengawa bumai tang agi mengkang ngintu adat Gawai.

“Nya alai, diatu raban bansa Dayak ngintu Gawai nengah macham bengkah tuju baka dikena ngelai gagaka pemujur anak ba sekula, mujur ba kereja tauka pengawa dagang,” ku iya.

Berindik ari nya ku Jabu, pengerami Gawai ulih ditanka lalu diturunka ngagai nembiak rebak baru.

Berebak enggau pengawa tu Jabu dipebasa nyuaka peransang pelajar ngagai 27 iku nembiak ke udah mujur ba pelajar sida.

Kelimpah ari nya iya mega dipebasa nyuaka perais ngagai pemekit ke menang ba pekit ngaga Nyabor Lelaki, Pekit Ngukir Terabai enggau Pekit Ngayam Tikai.

Ari 2,689 palan pengereja pengawa ke udah diperesa di Sarawak, 52 iku pengaji ditemu Opis Pengereja Pengawa enda nitihka undang-undang

SIBU: Opis Pengereja Pengawa (JTK) Sarawak bisi meresa kira 2,689 palan gawa di nengeri tu bekaul enggau undang-undang Akta Upah Minimum 2012 ungkup timpuh enam bulan keterubah dalam taun (2015) tu.

Direktor JTK Sarawak August Buma madah, ari penyampau nya bisi 52 iku pengaji enda nitihka atur ke udah ditetap.

“Kami udah nganjung notis gerah nuju 44 majikan laban enda nitihka undang-undang lalu lapan keretas pansik betuju dikena nunggu sida nengah seksyen 43 Akta Majlis Perundingan Gaji Negara 2011 (Akta 732).

“Nyema dikenukuka salah, pengaji nya ulih ditunggu enda ngelui RM10,000 ungkup seiku pengereja pengawa,” ku iya madah ngagai Utusan Borneo lebuh dirandau empai lama ke udah.

August madah munyi nya lebuh dipinta meri timbal bekaul enggau penyampau pengawa meresa ke udah dipejalaika sida sepanjai taun tu.

Kenu ku iya, ari 52 kes ke nadai nitihka undang-undang nya, 23 kes ari industri hospitaliti iya nya, sektor nyendiaka pemakai enggau hotel, ku iya.

August mega madah, ba taun 2014, staf sida bisi meresa 4084 palan pengereja pengawa dikena nentuka undang-undang Perintah Gaji Minimum 2012 dititih.

“Rikod kami mandangka ari penyampau nya ba timpuh iya diperesa, bisi 74 iku pengari nadai nitihka gerah.

“Notis gerah udah dianjung nuju pengaji lalu sida ke nadai nitihka gerah tauka puntan mayar gaji pengereja pengawa ke betugung, sida deka ditunggu,” ku iya.

Ba taun nya mega, bisi 51 kes ripot bekaul enggau Perintah Gaji Minimum 2012 bisi dibantaika di Kort Buruh, ku iya.

Iya madah, ari 51 kes, 43 endang ari sektor pengatur pengawa enggau servis.

August mega madah, diatu mega udah bisi ayan berita dalam surat kabar pasal sebana jaga pengelikun ke nadai dibayar gaji minimum enggau upah bukai baka ke udah dirintaika dalam ‘Ordinan Buruh Sarawak’.

“JTK deka mansik sereta nunggu sida tu nitihka pematuh nyema sida nyengala ngelanggar undang-undang gaji minimum 2012,” ku iya.

Wang turu tu mega dikearap ulih ngelempung tating belanja nembiak Belaga belajar di Politeknik

Dikarang Chris Bishop //

KUCHING: Tabung Amanah Bakun (TAB) kemari nyuaka Surat Tawaran Sekularsip (Geran Bantu) ‘one off’ ngagai semilan iku nembiak ke belajar di Politeknik Kuching, Matang ditu.

Pengawa nya dikemujurka Direktor Politeknik Kuching Sahul Hamed Abdul Wahab ke alai TAB diarika Pemesai Eksekutif Romio Ding.

Bejaku rambau pengawa ke diatur di bilik aum Politeknik nya, Sahul ngarap duit bantu nya ulih dipelanja enggau manah.

“Ngarapka duit bantu ari TAB tu ulih ngurangka tating belanja nembiak ke belajar di Politeknik sereta ngarapka sida ulih nampung pelajar ditu baru jemah,” ku iya.

TAB ke dipelanja perintah nengeri enggau besai kenyau ari taun 1996 udah nyendiaka geran bantu ke dibayar sekali aja ngagai raban nembiak ari pelilih Belaga ke kena bungkur projek Tekat Ai Bakun.

Kelimpah ari nya, Sahul mega madah Politeknik suah ngatur promosyen di serata Sarawak nyengkaum ke Belaga, Limbang, Lawas enggau Marudi.

“Polisi kitai iya nya deka nyendiaka pelajar renggat tinggi ngagai semua nembiak di serata Sarawak.

“Promosyen tu deka seruran dipejalai lalu kitai ngarap mayuh agi nembiak ari Belaga nampung pelajar di Politeknik ditu,” ku iya.

Nengah bantu TAB nya nembiak ke ngambi kus renggat setipikit dalam nengeri deka nerima bantu RM1,000 lalu sida ke belajar di palan pelajar tinggi luar Sarawak deka nerima RM1,500.

Ungkup program degree enggau master, sida ngagihka bantu ba penyampau RM2,000 – RM2,5000.

Romio ba jaku iya madah program bantu nya sebengkah inisiatif dikena mantu nembiak ari Belaga kelebih agi ba pekara ti bekaul enggau belanja.

Bantu diungkupka ngagai raban nembiak ti ngambi kus setipikit nyentuk renggat master di semua palan pelajar tinggi di menua tu.

Semilan iku penerima kemari iya nya Claudia Anthony Antong, Caroline Letiug, Rachel Ujang, Gabriel Thiong Yiew Ibong, Daniel Mering Ibong, Stefanie Kain, Leonard Kebing, Shabatini Telen Ding enggau Florenica Aren Awing.

Bela datai Sapit Direktor (Akedemik) Annuar Idris.

Dikarang Jacqueline R. David //

KUCHING: Universiti Teknologi Mara (UiTM) Sarawak Kampus Kota Samarahan udah dipilih alai ngatur Simposium Pansik Entarabansa Ke-6 (IRSSM-6) kena 11-15 Ogos 2015.

Rektor UiTM Sarawak Prof Dato Jamil Hambali madah UiTM deka ngempuruka sida ti deka mantaika keretas kereja ari serata menua.

Bisi 17 menua ngambi bagi lalu entara sida tu mega speaker tebilang ke endang bepengelandik dalam penemu diri empu.

“Kami (UiTM Sarawak) mega mujur mai bala pengelicha kami ke landik dalam pekara tu (Pengawa Dagang). Tambah mega pemanah program tu nyadi lalau ke berat ungkup sukut ngatur pengawa,”ku Jamil.

Iya madah munyi tu lebuh nguluka aum media pengudah sida betemu enggau Menteri Pengawa Berumah sereta Menteri Pengawa Dagang Temuai Datuk Amar Abang Johari Tun Openg dikena nganggauka iya nyadi ‘Patron’ di Wisma Perumahan ditu, kemari.

Sebedau tu IRSSM-5 kala di gaga di Astonia, lalu ke sekali tu UiTM Sarawak Kampus Kota Samarahan dipilih nyadi tuai rumah.

Pemerat pekara tu ku iya, enti enda bejimat, enda besedia, kitai tau kena tinggal ari menua bukai ke udah jauh maju ngembuan strategi ngatur pengawa.

Entara pekara ti deka dipejuraika, ku iya, iya nya bekait enggau chara ngatur pengawa ngambika penguntung ti di ulih kitai besai agi, ku iya.

“Naka tu, kami udah mujur nerima timbal ke manah ari urung 115 sida ari 17 buah menua ke deka mantaika urung 100 keretas kereja maya nya ila.

“Opis peribit enggau ejensi perintah patut ngambi peluang tu endur nambahka penemu diri,” ku iya.

Entara speaker ti deka mantaika keretas kereja ila, iya nya Prof Dr Jay Kandampully (ari Chairman IRSSM ari Ohio State University, USA), Prof Dr Jochen Wirtz (National University of Singapore), lalu speaker maya ‘pre-simposium’ sereta panel ti deka bejuraika pekara nya (Pansik) nyengkaum Prof Dr Byron Keating (University of Canverra), Prof Dr Alison Dean (University of Newcaastle), Prof Madya Dr David Solnet (University of Queensland) ari Australia, seiku pedagang ke udah mujur ari menua tu Tan Sri Datuk Amar (Dr) Hamid Bugo.

Chairmain program tu ila, Prof Madya Dr Voon Boo Ho lalu dibantu Prof Madya Dr Firdaus Abdullah, Dr Ellen Chung enggau Patricia Jussem.

Jaku rambai simposium tu iya nya, ‘Service Excellence for Sustainability’, ukai semina kualiti servis aja tang pemujur servis ngangkatka pemansang.

“Enti servis kitai manah, reti nya penguntung ke opis kitai pan manah, orang pan puas ati. Nya alai, berat ba kitai enda tau enda bisi jurai pasal pekara tu laban kitai deka belajar ari Singapore sereta sitak menua bukai,” ku iya.

Sida patut belebas ngemansutka jaku lalu anang ngemelika bala ketuai ari menua kelas ketiga sepeneka ati

KUCHING: Ulah lantang bejaku nengah media di menua maju ukai reti sida ulih sepeneka ati ngemelika tauka betenahka raban ketuai ari menua ke benung mansang.

Menteri Pemansang Tanah Tan Sri Datuk Amar Dr James Masing madahka Menteri Besai Datuk Seri Najib Tun Razak patut ngeringka diri ngena undang-undang ngelaban Wall Street Journal (WSJ) ke udah nuduh iya sentang pekara ti bedau temu pengamat.

Ku iya nampung, raban ketuai di menua ke benung mansang patut ngetan sereta nagang sebarang penerang ti dikeluarka raban media menua maju dikena nyeliahka berita petenah nya majak ngerembai.

Dalam batang berita ti dikeluarka WSJ madahka Najib udah ngambi duit penyampau US$700 milion (RM2.63 bilion) iya nya duit ari 1Malaysia Developmant Bhd (1MDB) ke ditepu ngagai akaun bank iya empu.

Masing ke nyadi Presiden Parti Rakyat Sarawak (PRS) ngarapka semua raban ketuai politik di menua tu terus bediri di belakang Menteri Besai nyaup dalam pekara tu.

Iya madahka pekara nya ukai semina bekaul enggau 1MDB tang mega ulah bala pemberita ari menua maju dikena ngemelikka  raban ketuai ari menua ti benung mansang,” ku iya madah ngagai The Borneo Post, kemari.

“Kitai patut madah ngagai sida lebas bejaku lalu anang ngemelika bala ketuai ari menua kelas ketiga sepeneka ati.

“Nya alai, bala ketuai ari menua kelas ketiga patut nyikap diri nepis jaku petenah media ari menua maju lebuh berita ti dikeluarka sida tu selebubu ngapa, sida sigi majak ngemaruhka kitai enggau sepeneka ati.

“Raban ketuai politik di Malaysia, enda ngira jalai politik sida, meseti bediri di belakang Najib nyukung iya napi pekara tu. Tu ukai semina pekara 1MDB. Tu bekaul enggau pengawa ngemelika ti digaga raban media menua maju ngelaban menua kelas ketiga.

WSJ enggau orang ti meri penerang ngagai Sarawak Report dalam berita ti dikeluarka kena Hari Lima madahka “unnamed investigator”, nuduh penyampau RM2.63 bilion duit 1MDB bisi dipasukka dalam akaun Najib empu.

Opis Menteri Besai madahka pekara nya semina dikena numbangka politik lalu 1MDB nyemetak nyaut madahka nadai pengawa mindahka duit ngagai akaun Najib.

Najib empu nulak pekara nya, sereta iya ngemeranka jaku nya sengaja ditempa raban politik ti nyakal minta iya meleka ari pangku pengawa ke diatu.

Najib bisi ngasuh luyar iya beratika berita WSJ nya sereta deka mutuska pekara nya enda lama agi ngambika ngaga pengawa ke patut. Nitih ke penerang saman nya deka digaga di Kuala Lumpur dalam pun minggu seiti nyin ila.

“Pengamat berita ke digaga ulih Sarawak Report enggau WSJ bepanggai ba ari ni penatai berita nya. Enti penatai nya tau dikearapka, baka nya mega enggau jalai cherita nya.

“Naka kediatu, Sarawak Report endang enda ulih dikearap. Semadi meh penerang nya digaga, nya alai alai kitai enda ibuh nyangka utai ke nyadi aja. Penau kitai ngidar tauka nyadungka pemadah ukai reti kitai peneka ati ngemruhka orang ti dikerindu tauka enda dikerinduka kitai,” ku Masing.

Nitihka penerang ari opis WSJ ti bepalan di New York madahka pengawa pansik sida nya endang pekara ke amat bepelasarka dokumen ke sigi ulih dikearap.

KUCHING: Sapit Kepala Menteri Datuk Patinggi Tan Sri Alfred Jabu sekali agi dipilih nyadi pro-chanselor II Universiti Malaysia Sarawak (Unimas) ungkup dua taun nyentuk bulan Oktober 2017.

Pengudah nerima surat chiri ari mandal chanselor UNIMAS Prof Dato’ Dr Mohamad Kadim Suaidi kemari, Jabu besemaya deka meri servis ke pemadu manah ngagai universiti nya.

“Tu sebengkah tanggungpengawa ke berat lalu aku berasai temegah. UNIMAS sebengkah palan pelajar tinggi ti dipebasa lalu aku berasai gaga dipilih baru nyadi pro-chanselor II,” ku iya rambau penemuai basa raban UNIMAS ti diuluka Kadim ba opis iya di Wisma Bapa Malaysia, Petra Jaya.

Tuai Pemegai Menua Tun Pehin Sri Abdul Taib Mahmud mangku pengawa nyadi chanselor UNIMAS ke alai Kepala Menteri Datuk Patinggi Tan Sri Adenan Satem dipilih nyadi pro-canselor I ba taun ke udah.

Jabu netap pekara pelajar udah nyadi sebengkah pekara ti dikemerat lalu iya pechaya enti tiap iku kitai ngembuan pelajar, mayuh agi pemansang ulih dijapai.

“Kitai beguna dedikasyen, inteligen, disiplin enggau integriti, semua tu dikembuan kitai deka teulihka penau. Ba Malaysia, UNIMAS nyendika semua pekara tu.

“Penyampau pelajar ngerijista diri enggau penyampau bala graduet majak nambah lalu pia mega pelajar orang indu mayuh agi ari sida ke lelaki. Engka sida lelaki rindu agi ke pengawa bukai, aku enda nemu,”ku iya.

Ngenang kaul bukai, UNIMAS deka ngatur konvokasyen ke 19 kena 14 -17 November lalu lebih 5,000 iku sida ti belajar ditu deka nerima skrol.

Dikarang Chris Bishop //

KUCHING: Raban nembiak ari Pelilih Belaga ke bisi nerima surat kangau tauka benung nampung pelajar di palan pelajar tinggi diperansang minta geran bantu sekulasip ari Tabung Amanah Bakun (TAB).

Pemesai Eksekutif TAB Romio Ding madah geran bantu nya diungkup ngagai sida ke udah nerima surat kangau belajar di palan pelajar tinggi serata menua.

“TAB asil pemeri perintah nengeri enggau besai lalu diungkup ngagai peranak Belaga ke kena bungkur projek tekat ai Bakun.

“TAB udah ngagihka bantu tu kenyau ari taun 1996 lalu nyentuk diatu kitai udah meri bantu nengah chara ‘one off’ ngagai 2500 iku pelajar.

‘Penetap mudah aja, nembiak Belaga ke udah nerima surat kangau ari palan pelajar tinggi di serata menua sigi tau minta bantu tu.

“Sida ke udah belajar di palan pelajar tinggi tang bedau kala nerima bantu tu tau mega minta diatu,’ku iya.

Romio mansutka penerang tu lebuh dikerandau pemberita pengudah ngemata pengawa nyuaka geran bantu ‘one off’ ngagai semilan iku pelajar Politeknik Matang ditu, kemari.

Ngenang sentang pengawa sehari kemari, Romio madah TAB  ngembuan kaul ke manah enggau Politeknik Kuching ke alai mayuh program udah diadu kededua ejensi.

“Tu meh asil ari gempung manah begulai enggau Politeknik Kuching, mayuh nembiak kitai ari Belaga udah nampung pelajar ditu,’ku iya seraya ke madah lebih 25 iku pelajar ari Belaga udah masuk Politeknik Mukah.

Romio mega madah sida udah ngadu pengawa ke sama iya nya nyuaka geran bantu ‘one off’ ngagai pelajar Belaga ke benung belajar di UiTM Samarahan ba minggu ke udah.

Kitai ngasai peluang tu nerima basa ke besai ari raban nembiak lalu ngarapka sida mujur ba pekara pelajar, tandu iya.

Iya nambah berengkah pun taun 2015 nyentuk bulan Jun  penyampau 100 pom pinta udah diterima TAB lalu benung nganti pemendar.

Pengudah nganti pengelama 20 taun, mujur mega rumah panjai sida disikap ngena bekal kuasa karan

Dikarang Conny Banji //

KANOWIT: Pemuas ngetan penyabar sereta penatuk minta penyikap nyambung bekal kuasa karan ungkup Rumah Veronica Silas di Nanga Bawan ditu, udah dikeamat berebak enggau pengerami Gawai Dayak taun tu pengudah nganti pengelama 20 taun.

Tuai Rumah Veronica Silas, 50, 14 bauh ruang bilik peranak rumah panjai iya nya maya ngintu pengerami Hari Gawai bulan June tu tadi, keterubah sida ngasaika pengelantang ngena bekal kuasa karan 24 jam pengudah dikemendarka kena bulan April taun tu tadi.

Iya ngenang, maya peranak rumah panjai nya napi penangul bekaul enggau pengawa ngulihka grid kuasa perintah lebuh sida keterubah iya nerima projek ti dipejalaika di baruh Skim Bekal Kuasa Karan Menua Pesisir (RES).

Rumah panjai tu urung iya penyauh pejalai semina 10 minit ngena entukar ari jalai besai Nibong/Tada ditu, ku iya.

“Pengawa meratika udah berengkah dipejalai dalam taun 2009 suba pengudah sida nganjung peminta projek nyambung kuasa karan ba rumah panjai sida. Diatu, kami serumah berasai gaga.

“Tang kekadang iya enda ulih dipejalaika ketegal penanggul pengawa nyambung tali karan nya ngerenchah kebun sawit dandang besai ti dikembuan orang seseiku.

“Kami mega dipinta berunding enggau orang ti ngempu kebun sawit nya minta pemendar ari sida. Sida besetuju tang minta bayar RM400 ba tiap pun sawit ti kena renchah projek nya,” ku iya bejaku madah ngagai The Borneo Post lebuh dirandau di rumah panjai iya kena Hari Lima tu tadi.

Randau tu diatur rambau pengerami Ngiling Bidai sereta pengerami kelai pengawa bejadika bekal kuasa karan di rumah panjai nya diatur Komiti Pemansang enggau Pengelikun Genturung Pendiau (JKKK) Pedai/Jih/Tuah/Bawan.

Kaban Kunsil Nengeri (ADUN) Ngemah Alexander Vincent nyadi pengabang dipebasa maya pengerami sehari nya sereta mega disempulangka bini iya Susan Clement, Penghulu Ugap Seribu, Pengulu Juin Adan sereta Chairman Pedai/Jih/Tuah/Bawan JKKK Tuai Rumah Basil Ujang.

Veronica madahka pengawa pengawa menilai sereta berunding, semina semilan pun sawit ditentuka udah ditebang dikena meri awak bejalaika projek nya.

Penanggul datai baru laban rumah panjai nya enda chukup belanja dikena mayar ngagai orang ti ngempu kebun nya, ku iya.

Rambau pengerami Gawai Dayak taun nyin kemari, Veronica madah, iya udah ngangauka ADUN Ngemah Alexander Vincent ngagai rumah iya sereta ngenataika penanggul nya.

“Dalam awak pengelama kurang ari setaun, penanggul nya mujur diputarka pengudah YB ti dipilih siru ke penanggul nya lalu diputar.

“Nya alai kami ngangau ke iya baru taun tu ngagai rumah panjai tu ngambika kami bekunsika pengaga ati begulai enggau iya tu udah mantu kami,” ku iya.

Iya nampung madah, sebedau tu sida begunaka belanja penyampau entara RM300 ngagai RM400 sebulan ungkup sebuah ruang bilik dikena meli diesel kena ngidupka injin api. “Diatu kami semina mayar dalam RM100 sebulan nyengkaum RM22 bayar loan ari penyampau loan kami RM800 dikena ngelekatka meter karan,” ku iya.

Dalam jaku ti dipansutka iya rambau pengerami nya, Alexander madahka iya meda udah mayuh rumah panjai di Jalai Nibong/Tada nyengkaum rumah kediri diatu udah nerima bekal kuasa karan.

Iya udah nya ngemendarka geran agih belanja penyampau RM10,000 ngagai JKKK Rumah Veronica sereta RM3,000 dikena bebelika perengka dapur Biro Indu.

Nyempulang pengerami nya, iya meda nerima pom nyereta Parti Rakyat Sarawak (PRS).

BEJADI: Mong (lima kiba), Harden (empat kiba), Masir (tiga kanan) nebah dumbak seraya dikemataka Louis (tiga kiba), Vevien (dua kiba) maya bejadika pengerami nya.

SRI AMAN: Pengajar ti Kreatif sereta Inovatif ulih nempa nembiak ti nyulut sebaka enggau juluk menua.

Menteri Muda Betanam Betupi Sarawak (Pemansik enggau Dagang), Datuk Mong Dagang madah,pengajar ti ngembuan kededua kriteria nya seruran ulih berundingka pekara ti baru ti ulih mai ubah ba sistem sida maya ke ngajar.

“Nya alai, kitai meransang bala pengajar di negeri tu ngubah chara ngajar ke suba ngagai chara ti lebih kreatif sereta inovatif lebuh sida ngajar.

“Chara ti kreatif sereta inovatif ulih matak pengerindu nembiak belajarka sesebengkah mata pelajar”, ku iya.

Iya ti mega Kaban Kunsil Nengeri (ADUN) Bukit Begunan bejaku munyi nya lebuh bejadika Pengerami Makai Lemai 2015, Serakup Apai Indai enggau Pengajar (PIBG), Sekolah Kebangsaan (SK) Melugu di Dewan Suarah ditu bedau lama ti udah.

Nengah awak nya, Mong mega meransang bala apai indai ngemeratka pelajar bala anak laban sida mih ti dikearap nyadi ketuai menua sereta reta ti pemadu beguna dikena ngemansangka menua tu.

“Kitai ke apai indai anang sesekali ngelengkaka tanggungpengawa nganjung anak besekula laban jeman diatu pemandai nya beguna amat”,ku Mong.

“Anang mikir pengawa nyengulaka anak nya pekara ti nating kita tang pikir mih pengidup sida jemah ila.”

Ku iya, anang betegalka penyeranta kita enda nyengulaka anak.

“Udah mayuh orang ti seranta nyengulaka anak sida manggai ba tikas pelajar ke pemadu tinggi serta teulihka pemujur di universiti”,ku iya.

“Aku pechaya, mayuh mega apai indai nemu tanggungpengawa nyengulaka anak laban semina nengah pelajar aja ulih ngubah gaya pengidup sida.”

Bela bisi ngulu pengerami nya,Kaban Parlimen Sri Aman, Masir Kujat, Menteri Muda Pemansang Menua Pesisir enggau Pengawa Berumah Sarawak ke lalu nyadi ADUN Simanggang, Datuk Francis Harden Hollis, Pemesai Opis Pelajar Pelilih Mit Sri Aman, Vevien Mujah, Kepala Penmgajar Sekula, Louis Aom, bala pengajar enggau exco PIBG bukai.

Beserimbai enggau nya, Masir ngungkupka belanja RM 50,000 lalu Mong meri RM 20,000 ngagai PIBG ngambika bisi dikena bejalaika aktiviti sepemanjai taun sida.

Dikarang Judan Bungap//

NYIKAP DIRI: Bala pengajar begambar kenang maya Program Kecemerlangan UPSR 2015 renggat Meradong ke diatur SJK Kai Chung ditu, empai lama tu tadi.

BINTANGOR: Opis Pelajar Pelilih Mit (PPD) Meradong udah ngatur Program Kecemerlangan UPSR 2015 renggat Meradong ba SJK Kai Chung, empai lama tu tadi.

Program tu ngembuan tuju deka meri peransang ngagai bala pengajar nembiak Taun Enam sebedau peresa UPSR belabuh bulan September tu.

Nambahka nya, program tu mega dikena nyikap pengajar enggau penemu ke baru lebih agi bekaul enggau matapelajar ti suah nyadi penanggul ba bala nembiak.

Bala pengajar mega diberi awak bekunsika penemu enggau pengelandik senentang chara ke patut dikena ngembing nembiak napi UPSR.

Program tu dipenyadika Pemesai Opis Pelajar Pelilih Mit Meradong, Ismail Abang Mahamud.

SIBU: Tiga bengkah pampang Sarakup Indu Dayak Sarawak (SIDS) udah nyuaka saup ngagai Duit Turu Pelajar Gerempung Dayak Sarawak (SDNU), lemai kilah ensana.

Saup tu disuaka SIDS Pampang Sibu, Sarikei enggau Sekuau ngagai Sekretari Besai SDNU Datuk Ir Alice Jawan.

Ba pengawa tu, SIDS pampang Sibu nyuaka saup RM3,000 lalu ditangkan SIDS Pampang Sarikei enggau Sekuau bela nyuaka RM2,000.

Alice ti mega Chairperson SIDS Pampang Sibu madah, saup nya ngelaika sukung sida ngagai Duit Turu Pelajar SDNU ba tuju bela ngemansangka pelajar nembiak Dayak.

“Tu sebengkah ari chara kitai besaup enggau pangan diri ngangkatka tikas pelajar nembiak bansa Dayak,” pia ku iya madah.

Pengawa nyuaka saup tu digulu Chairperson SIDS Pampang Sarikei enggau Sekuau Rosy Gita enggau Rabiah Balang.

Dikarang Jacqueline R. David//

MENTAS: Jamilah nyuaka pemeri ngagai seiku indai tuai ti sakit tungkul ati di sepital nya seraya dikemataka Anne(kiba) enggau Pauline (dua kiba).

KUCHING: Yayasan Jantung Sarawak ti dibuka dalam taun 1988, kenyau dibuka nyentuk ke diatu, nadai kala ngetu nyukung Sepital Besai Sarawak (HUS) dalam sukut pengerai tungkul ati.

(Board of Trustee) SHF Datin Patinggi Dato Jamilah Anu, bini Kepala Menteri madah, kenyau dibuka nyentuk ke diatu SHF nadai kala enda nyukung mantu HUS nyengkaum nganjung pesakit anak mit tauka orang besai tuai berubat ngagai Singapore.

“Suba kitai nadai perengka guna ngubat penyakit tungkul ati, sekali melanja seiku pesakit manggai urung RM30 ribu nyentuk RM40 ribu.

“Diatu kitai udah bisi ‘Pusat Jantung’, kita enda ibuh agi nganjung pesakit kitai keluar ari menua tu, tambah mega mayuh orang meri perengka guna dikena ngubat tungkul ati di SHF, kelimpah ari kitai ngangkatka pengerai tungkul ati rayat kitai di menua tu,” ku Jamilah.

Iya madah munyi nya lebuh dikerandau maya nemuai ngagai ‘Pusat Jantung’ (HUS) di Kota Samarahan beserimbai enggau Hari Raya sereta nyuaka pemeri nyengkaum meri perengka guna ngagai palan nya ditu, kemari.

Ku Iya baru, pengerai tungkul ati patut dikemeratka tetiap iku kitai ke lebih agi kemaya hari tu, laban penyakit tu entara penyakit ti tau ngasuh orang parai sereta penyakit munuh lumur satu di dunya.

Nya alai ku iya, ninting taun,Sarawak deka ngintu ‘World Heart Day’ dikena ngingatka mensia mayuh ngambi ngemeratka pengerai tungkul ati. Ninting taun mega beserimbai enggau ‘World Heart Day’, SHF bisi ngatur pengawa pemandang, enda bebayar meresa tungkul ati nyengkaum raban lutur, pakar tungkul ati, pakar Paedaetrik, Kardiologi deka bejalai ngagai serata menua nerangka pasal pengerai tungkul ati.

Ku Jamilah, SHF kenyau ari taun 1988 nyentuk ke diatu udah ngemansutka belanja urung RM40 juta nyentuk RM50 juta, dikena meli perengka guna ke pengerai tungkul ati di HUS.

Lebuh Palan Pengerai Tungkul Ati baru dibuka ba HUS, sida udah belabuh meli perengka guna ti dikena bebuntas, berubat, perengka guna bukai nyengkaum injin dikena ba wad nya.

Bedau lama tu tadi, SHF meli ‘City Scan’ ke berega lebih RM4 juta enggau sebuah injin ti berega RM1.4 juta ti tau dikena bala pakar ari menua tu.

“Terima kasih ngagai mensia mayuh ngelama tu ti udah nyuaka bantu dikena sekeda injin tu sereta mega dikena meli perengka guna bukai nyengkaum kaban komiti perintah menua enggau perintah besai ti enda ngengetu mantu,” ku iya.

Ba atur pengawa nya kemari, Jamilah ti mega nyadi ‘Trustee SHF’ nyuaka 128 iti pemeri sereta perengka guna ti beungkus urung RM30 juta nyengkaum meri Basikal kena Eksesais (2 unit diberi ngagai Opis Fisioterapi), Sistem ‘Wireless Audio’ (siti set diberi ngagai Opis Fisioterapi), Emergency Trolley (siti unit diberi ngagai Opis Ubat Nuclear), enggau 3 unit ‘Hot/Cold Water Cooler diberi ngagai Ccu/ICU & CTW, Cardiologi enggau Day Care sereta Geriatric & Bilik pesakit.

Naka ke diatu, SHF bekerejasama enggau ‘Heart Foundation of Malaysia’, Opis Menteri Pengerai, sepital enggau ejensi perintah nyengkaum peribit kala ngaga atur pengawa bekaul enggau serakup tu ngagai endur bukai di Sarawak baka di Kuching, Sibu, Bintulu, Miri enggau Sarikei, nyengkaum Bau, Serian, Tebedu, Sri Aman, Betong enggau Saratok.

Sama bisi ngulu atur pengawa nya kemari, Direktor ‘Pusat Jantung’ (HUS) Dr Mohd Asri Riffin, Ketuai Pakar Buntas Cardiothoragic, Dr Jong Yuan Hsun, Konsultan Cardiologist, ari Opis Gardiologi HUS Dr Alan Fong Yean Yip, Tukang Wang sereta ‘Trustee’ SHF Datuk Anne Teng enggau seiku agi (trustee) ti mega Sekretari SHF Pauline Kon Sec.