SIBU: kongres Serakup Orang Gawa Perintah (CUEPACS) Sarawak nyukung peminta Presiden Nasional Datuk Azih Muda enda ngira ba renggat perintah nengeri tauka menua ngambi beratika baru rega rumah kemaya ari, dikena ngintu pengelantang orang gawa perintah enggau mensia mayuh kelebih agi.

Presiden CUEPACS Nengeri (CNS) Ahmad Malie, ke mega Presiden Gerempung Pengajar Bumiputera Sarawak (KGBS) madah sida seruran nerima sebana ari bala pengajar ke enda tebelika rumah ketegal rega ti tinggi.

“CNS nyukung peminta Presiden CUEPACS (nasional) Datuk Azih Muda ngambika perintah beratika enggau silik rega rumah ke majak niki lalu ngujungka mayuh orang gawa perintah enggau komuniti ke kurang penatai pemisi enda tebelika rumah sida empu, taja pan kebendar, rumah seiti ari guna pemun tetiap ruang bilik.

“CNS nyukung ke peminta ti baka nya ukai laban orang ti kurang penatai pemisi tang sida ti tengan penantai pemisi mega enda tebelika rumah laban rega rumah manggai RM500,000 seunit.

“Tu kelebih agi ba mayuh mengeri besai di Sarawak, rega rumah niki enggau jampat, ti ngujungka mayuh sebana enda tebelika rumah kediri empau,” ku Ahmad madah ngagai The Borneo post bedau lama.

Iya nge l ans a bekaul CUEPACS ngansak perintah meratika baru Polisi Rumah Nasional iya nya meri awak ngagai orang gawa perintah ti kurang penatai pemisi teulihka rumah sida empu.

Presiden Azih mega madah sida patut ditandu bekaul ungkus idup enggau rega rumah ti majak niki manggai RM400,000 ungkup rumah di Kelantan.

Azih mega madah sida ngarapka penganggul orang ti gawa perintah patut dikemeratka perintah sereta polisi mega meseti diperati engggau lengkas.

Pekara tu kena nentuka mensia mayuh kelebih agi orang gawa perintah ti kurang penatai pemisi bisi rumah kediri.

Azih mega lalu bisi ngelansa bekaul duit turu khas patut diadaka perintah ungkup belanja sida ti meli rumah ke begaji mit.

UNGKUP BEPEKIT: Yong (tengah) nyuaka baju ‘jersi’ Trans Paint ke dikena Pekit Regatta Benak Batang Lupar ngagai Richard (kanan) seraya dikemataka Mujah (kiba) ba Opis Pelilih Sri Aman, ditu bedau lama.

SRI AMAN: Pekit Regatta Benak Batang Lupar bisi mantaika 19 kategori lumba ke deka diatur ba Sungai Batang Lupar, Sri Aman ti bepun ari 14 (sehari tu) nyentuk 16 Oktober tu.

Sepuluh lumba keterubah iya nya Kayuh 15 Laki (Tebuka, Kampung), Kayuh 20 Laki (Tebuka, Kampung), Kayuh 25 Laki (Tebuka, Kampung), Kayuh 30 Laki (Tebuka, Kampung), Kayuh ‘Unlimited Maraton’ enggau Kayuh 30 Laki Nanjak Pasang.

Semilan agi lumba ke bukai iya nya Sakai 30 Champur (25 Laki, 5 Indu), Sakai 20 Champur (15 Laki, 5 Indu), Lumba Benak, Lumba Perau Kayuh Bepasang, Lumba Perau Bangkut 15KK, Lumba Perau Panjai 15KK enggau Lumba Bot Laju (18HP, 30HP, 40HP).

Sapit Chairman Komiti pengatur Nelson Mujah Girie madah, Regatta Benak Batang Lupar sekali tu nadai lumba dalam kategori indu, tang sida ngambi bagi dalam kategori champur.

“Taun tu ndai penyereta ari tim orang indu tang semina bisi kategori champur iya nya indu enggau laki,” ku iya.

Mujah madah munyi nya sepengudah tembu pengawa nyuaka baju ‘jersi’ ari Kompeni Chop Thai Chiang ke dikena pesereta dalam Lumba Perau nyerumba Regatta Benak Batang Lupar beserimbai enggau Pengerami Benak Sri Aman tu ila di Opis Pelilih Sri Aman, ditu bedau lama.

Bisi 100 lambar baju ‘jersi’ ti bechap Trans Paint udah disuaka orang ti ngempu kompeni iya nya Tay Choon Yong ngagai Chairman Komiti Pengatur Richard Tawan Seru seraya dikemataka Mujah.

Kelimpah ari nya, bisi sepuluh tim ti udah nganjung penyereta sida dalam pekit tu ya nya Saga Sebuyau, Sinaran, Bujang Simanggang Tampak Rita, Bujaya SR Simanggang, SUPP Simanggang Jelai Nama, MDSA, Kampung Kem Pakit, LANDAS, Rumah Tinchin Banting enggau Kampung Tanjung Asam.

RIPOT: Torstein ngayanka bup Toward Sustainable Energy, Sustainbility Report 2014 ti nyeritaka penyulut SEB.

KUCHING: Ketuai Pemesai Eksekutif Sarawak Energy Berhad (SEB), Datuk Torstein Dale Sjotveit madahka semua projek 12 iti tekat hidro elektrik ti diperambu digaga di Sarawak ulih dipejalaika, enti nyema bisi peminta nya dikemansangka.

Iya bepenemu Sarawak deka ngeluarka produk kuasa elekterik lebih nyema bisi peminta makit ba kuasa elektrik baka ari Sabah, Brunei, Kalimantan Indonesia enggau industri di nengeri tu.

“Kitai patut ngemansangka enti nyema bisi beguna.

Kitai ngaga projek nya ukai ketegal bisi perambu, kitai ngaga laban bisi makit.

“Kitai udah bisi organisasyen sereta pengelandik ngemansangka nya.

Nya semina pekara ke deka dipejalaika enti bisi diguna,” ku iya lebuh ke nyaut tanya sekalika pelin ngaga 12 projek tekat hidroeletrik di nengeri tu deka dipajakka.

Torstein mansutka pekara nya dalam sesi tanya saut nyerumba atur pengawa ‘Datuk Torstein’s Meet-The- Media-Session’ ke diatur ba Menara Sarawak Energy ditu, kemari.”

Datuk Torstein Dale Sjotveit Ketuai Pemesai Eksekutif Sarawak Energy Berhad (SEB) Sebedau tu dalam ripot berita, tekat hidro elekterik nya deka ngasilka 30,000 MW elekterik dikena napi peminta guna industri kelebih agi industri dalam kandang SCORE.

SEB udah nembuka pengawa ngaga tekat ai Murum 944MW taun nyin kemari lalu tekat ai Bakun 2,400MW ti diempu perintah besai, udah tembu dalam taun 2010.

Nambahka nya tekat ai Batang Ai 100MW ke diempu SEB, udah tembu urung 30 taun ke udah.

Tekad ai keempat di Baleh enggau kapasiti 1,285 MW udah dikemendarka Kabinet dalam bulan Jun taun nyin kemari, dipelaba renggat keterubah projek nya deka dipejalaika taun baru.

Nitihka ripot berita, bulan Jun taun nyin kemari Kepala Menteri Datuk Patinggi Tan Sri Adenan udah nginsil pengawa ngaga tekat ai di Baram 1,000 MW dikena meri peluang ngagai pakar rampa menua enggau tekat ai antarabansa bejalaika pengawa pemansik.

Kelimpah ari nya, lebuh ditanya ba sesi tanya saut ke penudi enggau raban Media sebedau ke ngetu gawa ba SEB, bekaul enggau pengarap ati iya ngagai Sharbini Suhaili, 53, ti nyilih iya ba penuduk Ketuai Pemesai Eksekutif, iya madahka penganti iya nya orang ke chukup bepeneleba kelebih agi enggau Petronas.

Iya madahka diri enda nyain baru kontrak ti abis timpuh ujung bulan tu enggau SEB laban ti deka meri awak diri ngagai ruang bilik ke lama udah enda entu dikeibuhka iya.

“Aku enggau SEB ngambi timpuh setaun setengah deka ngelala bagi orang ke patut nyadi ketuai SEB lalu aku arap endar Sharibini orang ke digiga nya.

“Aku ngarapka iya (Sharbini) ulih beratika baru nama utai ke udah dikereja kami dalam timpuh tujuh taun ke udah.

Ke manah patut digaga enggau lebih manah agi, ke enda manah patut diketuka nitihka penemu iya,” ku iya seraya madahka diri pulai ke menua asal iya di Oslo, Norway.

Torstein berengkah gawa enggau SEB kena 1 November 2009 nyentuk ujung bulan Oktober tu.

Sharbini deka berengkah nyadi Ketuai Pemesai Eksekutif SEB kena 1 November tu.

SIBU: Tiga pangku pengawa besai dalam Komiti Pemansang enggau Pengelikun Genturung Pendiau (JKK) ba rumah panjai enda patut dipegai diri sebilik aja dike-na nentuka pemaik iya.Sekretari Politik Kaban Kunsil Negeri (ADUN) Dudong, Tiong Sie Keong madah, tiga pangku pengawa besai JKKK tu iya nya Chairman, Sekratari enggau Tukang Wang.

“Nyema penuduk Chair-man udah dipegai tuai rumah, Sekretari enggau Tukang Wang agi ga anak enggau menantu, tu deka ngujungka pekara besibil,” ku iya lebuh pengawa nyuaka geran projek mit pemansang menua pesisir (MPR) ngagai 72 JKKK ba si-tak DUN Dudong, ensana.

Kenu ku Tiong, pekara baka tu ulih ngujungka pekara besibil nyadi lebih agi bekaul enggau duit MRP ke diberi perintah ungkup sesebengkah JKKK rumah panjai.

Iya madah bisi nerima kompelin ari sekeda peranak rumah panjai ke nusi enda nemu kini penunga penge-lesap duit MRP ke diberi ngagai sida.

“Lebuh tiga pangku pen-gawa besai nya dipegai diri sebilik aja, nyadi muntang amat nyadi pekara besibi,” ku iya seraya madah duit MRP nya endang dipenggi semua peranak rumah panjai.

Tiong mega madah, pen-yampau duit MRP ke diberi bepanggai ngagai penyampau ruang bilik dalam sesebeng-kah rumah panjai nitihka rikod Opis Kaunsil.

Nya alai, ku iya endang patut tuai rumah tauka JKKK ngaduka baru rintai pen-yampau ruang bilik tauka pintu dalam rumah panjai sida lalu dipadah ngagai Opis Kaunsil.

“Tu beguna amat ngambika penyampau MRP ke diberi nya chukup ungkup semua ruang bilik dalam rumah panjai,” ku iya.

Berebak enggau nya Chair-man Unit Bumiputera Parti Rakyat Bersatu (UPP) Pam-pang Dudong, Bansa Sandah ba jaku iya ngelalau rayat di sitak Dudong muai ideologi politik ke bebida.

Ku iya, rayat Duding pa-tut nyukung Datuk Tiong Thai King ke nyadi pengari rayat ba sitak nya ngatur pemansang.

“Anang kitai nyukung penyakal tauka piak nga-tika diri laban sida enda ulih meri pemansang ngagai kita (rayat),” ku iya.

KUCHING: Orang ke ngempu palan penyeridi anak mit (taska) tauka tadika di selampur nengeri tu ke agi liat ati bedau berejista deka dipinta nutup palan sida terus.

Nyemetak mansutka pekara nya, Menteri Muda Pelajar Tumu Anak Mit enggau Pemansang Ruang Bilik Sharifah Hasidah Sayeed Aman Ghazali taja pia, madah jaku tangkan nya gerah kepenudi perintah laban beratika pengelikun anak mit.

Tang, ku iya perintah diatu agi belembut sereta meri timpuh ngagai dedini palan taska tauka tadika ke empat berejista.

“Sebedau gerah ngasuh nutup nya digaga, kami deka bejalaika atur penerit adat sereta meri tangkan dulu dikena nentuka semua pengempu palan nya nitihka atur ke udah ditetap dalam bejalaika operasyen taska enggau tadika.

“Kami mega enda kelalu SHARIFAHjai kempang ngasuh nutup palan nya terus tang meri sida (pengempu) timpuh endur ngerijsta taska enggau tadika diri empu,” ku iya.

Iya madah munyi nya lebuh dirandau pemberita pengudah nyuaka perengka dikena ngajar ba pra sekula ungkup sitak Kunsil Nengeri (DUN) Samariang, di Kampung Semerah Padi Fasa Satu, ditu, kemari.

Nangkan nya ku iya, kimpin jom rejista taska enggau tadika mega udah dipejalaika opis menteri dikena meransang orang ke ngempu taska enggau tadika di Sarawak ngerijsta palan sida.

“Pengawa ngerista taska tauka tadika beguna amat laban nya bekaul enggau pengawa nitihka standard ke udah ditetapka Opis Pengerara Api enggau Penyah Penusah Malaysia (JBPM), Opis Pengerai, Opis Tanah enggau Survei (JTS) sereta unit pengeluar lisin.

“Ba sentang tu, nyemetak amat kami enggau nejuka sukut pengelikun anak mit lebih agi sida ke dijaga taska tauka benung belajar ba tadika,” ku iya seraya madah statistik taska enggau tadika ke nadai berejista ba nengeri tu agi bedau ulih disebut berindik ari pengawa raban penerit adat ke benung nyidi sida.

Ngenang pasal pengerami nya, iya madah pengawa nyuaka perengka dikena ngajar nya mungkur lima pra sekula ba sitak Samariang nyengkaum Taska Permata Kemas Kampung Semerah Padi Fasa 1, Taska Permata Kemas Kampung Samariang Batu, Tabika Kemas Kampung Sungei Bedil A, Tabika Kemas Samariang Jaya 2 enggau Tabika Kemas Taman Sukma A.

Ku iya, dikearapka nengah perengka dikena mantu ngajar nya ulih nyaup raban pengajar ransing agi nempa pemintar bala anak mit.

“Tanggungpengawa pengajar endang meri penemu ke pemadu manah ngagai nembiak dalam nempa sida nyadi nembiak ke nyulut sereta nyadi mensia ke menyana dudi hari,” ku iya.

Entara perengka dikena ngajar ke bisi disuaka rambau nya baka katil, pakej lumba, perengka manipulatif sereta kereban ‘puppet’.

SARIKEI: Rayat ari menua pesisir patut lebih nemu sereta beratka pasal pemesai reti pemujur ba bidang pelajar dikena napi dunya kemaya hari tu.

Sekretari Politik Kepala Menteri, Teng Ung Woo madah, penyedar tu beguna amat dikena nentuka bala nembiak ari menua pesisir ulih nyingkai seretai enggau pengulih ke dijapai bala nembiak di mengeri.

“Kitai deka ngelalau bala nembiak ari menua pesisir, anang nyukat pengulih enggau penyuntuk ke dikembuan tang patut meransang diri empu ngena penyuntuk nya dikena nyapai pemujur nandaka kitai ulih taja mayuh pengurang.

“Ba jeman diatu, kitai enda ulih agi majak tinggal ari semua sukut, nyema kitai deka mujur sereta ngasaika penyenang pengidup.

“Nya alai, kitai deka semua piak besaup enggau pangan diri nentuka nembiak rebak baru mujur lalu anang ngembuan ulah enggau kiruh,” ku Teng.

Iya madah munyi nya rambau Program Info Komuniti 1 Malaysia (K1M) Upper Road/Jakar Ngerembaika Penerang Pemadu Baru Enggau Ngedut Agi Penyerakup Ba Raban Komuniti, apin lama ke udah.

Program tu mujur diatur ba Rumah Rambai Ulu Minus Jakar, ditu.

Ba jaku iya, Teng bisi madah mensia mayuh patut nguna awak enggau pemansang teknologi pemadah laban pengelandik nguna pekara tu diatu nyadi pekara ke beguna amat.

Ku iya, pengelandik ba sentang teknologi pemadah (IT) diatu beguna amat laban tebal agi pengawa dikereja besehari-sehari diatu mayuh bepanggai ngagai perengka teknologi ke semina ba tunjuk jari.

“Kitai deka mensia mayuh nambahka pengelandik diri ba bidang tu, lalu abis nadai ngembuan penemu mimit ba pekara nya,” ku Teng.

Berebak enggau nya, Teng mega ngarapka K1M Upper Road Jakar ulih nyadi pelasar pemandah endur ngatur program ti meri pemaik ngagai mensia mayuh.

Mayuh aktiviti udah diatur nyerumba program tu baka licha ari palan internet 1 Malaysia, licha ari Opis Lada Malaysia, pekit kuiz, pekit poco-poco, pekit karaoke anak mit enggau mayuh agi ke bukai.

Bela bisi datai Chairman Opis Kaunsil Pelilih Sarikei (MDS), Wong Zye Yeng ke ngarika Kaban Kunsil Nengeri (ADUN) N45 Repok, Dato Sri Huang Tiong Sii, Pemesai Pemadah Pelilih Sarikei, Abdul Latif sereta urung 200 iku peranak ke diau besemak.

PALAN PENUSAH: Gaya bas ekpres pengudah ngelantak belakang lori uras ba Batu 6, Jalai Kelupu, Bintangor, malam ensanus.

BINTANGOR: Semilan iku penumpang iya nya tujuh lelaki enggau dua iku indu ke numpang bas bakal ketegal penusah eksiden ke nyadi entara sebuah bas ekpres enggau sebuah lori uras, ditu malam ensanus.

Penusah nyadi ba Batu 6, Jalai Kelupu, Bintangor.

Ketuai Polis Pelilih (KPD) Bintangor, DSP Mohamad Hafipi Mohd Salim madah, penusah nyadi urung pukul 9.10 malam.

“Pansik tumu beratika maya penusah nyadi, bas ekpres ke ngundan 40 iku penumpang enggau dua deriba nya benung dalam rantau jalai ari Kuching ke Miri.

“Nangkan nya, lori uras ke dibai seiku deriba enggau tiga iku pengereja pengawa nya benung nuang uras ari tong uras ngagai lori ba lurung ke sama enggau pejalai bas iya nya sepiak kiba nuju ke Sibu.

“Dipelabaka penusah nyadi bepun ari deriba bas ekpres nadai meda lori uras nya ari jauh, lalu lebuh udah semak lori nya deriba bas enda lanchat nguingka stering lalu telantakka belakang lori uras nya,”ku Mohd Hafipi nengah sebengkah penerang ngagai media, kemari.

Semua sida ke bakal udah dibai berubat ngagai Sepital Sarikei.

Semua pengereja pengawa ke munggah uras enggau deriba lori uras nya selamat.

Ku tandu Mohd Hafipi, kes nya udah dipansik nitihka Seksyen 10 LN166/59.

MUKAH: ‘Industri Kampung’ulih nyadi produk besai dalam makit di menua tu tauka import.

Kaban Kunsil Nengeri (ADUN) Daro Syafiee Ahmad madah, bala pedagang patut pintar ngena peluang enggau bebendar ngemanahka produk sereta kualiti barang.

“Kemeratka sukut mungkus enggau chap ngambika produk ulih besemekih sereta rembus ngagai makit ke besai agi,” ku iya rambau Pengawa Nangguhka Kus Mungkus enggau Chap diatur Opis Pemansang Ekonomi Sarawak (SEDC) ensana.

Ku iya bala pedagang patut ngerebut peluang sereta ngelawa sebarang aja kus ke bisi diatur ejensi dikena nambahka penemu sida.

“Pengagit seruran deka ngulihka pemujur sereta andal ngagai diri empu ba pengawa dagang entara kebuah ke ulih ngujungka seseiku orang dagang mujur,” ku tandu iya.

Pedagang ke enda mujur laban nadai inisiatif sereta pengeransing tang semina ngarapka bantu aja.

Ulah negatif nya patut dikikis nyema deka nyadi pedagang ke mujur jemah ila.

Iya ngarap nengah kus ke diatur piak SEDC serak tu deka ulih meri penemu ngagai bala pesereta.

Berebak enggau nya, Syafiee mega ngelalau bala pra pedagang nyendika perambu dagang dudi hari.

Tu ku iya, dikena beratika gaya dagang enggau kuing dagang ke dipejalaika nya.

Urung 29 iku pedagang ti ngembuan produk diri empu udah dipilih nyereta kus pengelama dua hari nya.

Muak ke pagi, Syafiee bisi nyuaka 10 iti bangku ungkup Sepital Daro ke guna bala kaban belayan pesakit sereta ngabas Tabung Darah enggau pengawa ngaga Klinik Ngeli.

SIBU: Kaunsil Pemansang Indu enggau Ruang Bilik  (MPWK) Pampang Sibu deka ngatur licha pasal pemesai reti tanggungpengawa orang indu enggau pemar kemaya hari kena 23 Oktober, bepalan ba Hotel Paramount, belabuh pukul 2 nyentuk  5 lemai.

Bejaku ngagai raban media kemari, Chairman Pampang MPWK Sibu Dato Janet Lau madah,  program nya sebengkah ari aktiviti ninting taun dipejalaika MPWK.

“Tuju kami ngatur licha tu dikena ngiri penemu ngagai orang indu sentang pemesai reti tanggungpengawa sida ngagai pemansang menua.

“Kami ngarap nengah penemu tu raban orang indu ulih ngemansangka diri nyapai penatai pemisi ke manah agi,” ku iya madah ngagai pengarang berita.

Ku iya, licha nya dipelaba deka dikemujurka sapit chairman Kaunsil Mengeri Sibu (MPS) Rogayah Jermain sereta sekeda pemesai ari bank menua tu.

“Kami nyediaka urung 100 iti penuduk lalu kami ngarap bala orang indu ba luar dia ngambi peluang tu dikena nambahka penemu diri napi dunya kemaya hari tu,”ku iya.

Licha tu dibuka ngagai raban indu Bumiputera aja lalu sida ke bisi ati endang diperansang sampal datai.

Kelimpah nya, kena 30 Oktober tu mega, MPWK Sibu deka ngatur Hari Ruang Bilik ba Kpg 1Malaysia di Bukit Aup, berengkah pukul 8 pagi nyentuk 12 tengahari, ku  Janet.

“Urung 15 buah ruang bilik dipelaba ngambi bagi ba program tu ke nyediaka mayuh aktiviti nyengkaum sukaneka enggau ke bukai,” ku iya.

Berebak enggau nya, barang sapa ke deka nemu penerang silik pasal dua bengkah program tu ulih betelefon terus nuju lumur 011-35209299.

MIRI: Gerempung Pekebun Sawit Dayak Sarawak (DOPPA) udah ngepunka atur numbuhka sektor koperasi sereta milih kaban kaunsil keterubah Koperasi DOPPA (KODOPPA) nengah Aum Besai Ninting Taun (AGM) keterubah ke diatur ba Bintulu, kena Hari Enam minggu ke udah.

Nengah penumbuh KODOPPA nya, iya deka nyaup gerempung tu ngangkatka  industri sawit, bepun ari kebun nyentuk datai ba kilang.

Ku Sekretari DOPPA Incham Serdim, 15 iku kaban kaunsil udah dipilih betuaika Tohit Nyagam ke nyadi chairman KODOPPA keterubah,  Bunie Japah nyadi sekretari enggau Dan Giang nyadi tukang wang KODOPPA.

Nya alai, ku iya tu deka ngerintis jalai ngagai bala pekebun sawit kelebih agi raban bansa Dayak nyereta pengawa ti lebih besai dalam industri sawit iya nya nengah koperasi ti bepengkalan ba Kuching.

AGM ke diatur ba Bintulu nya udah digulu lebih 50 iku kaban DOPPA lalu sida diberi penerang pasal penumbuh koperasi ari pengari Pekara  Ekonomi Komiti Koperasi Malaysia Pampang Kuching, Richard Tegang.

Richard ba licha iya nerang ngagai kaban gerempung pasal penumbuh koperasi nya bisi tatak penyampau kaban, iya nya semina kaban DOPPA aja ulih beranakka puku  koperasi.

Ku Icham, koperasi nya ngemuntangka bala kaban nyereta pengawa dagang bekaul enggau sawit baka muka palan pengumpul sawit, dagang nyual baja enggau rachun sawit kelimpah nyendia kereban dikena ngangkut sawit.

Bela bisi datai ngulu AGM iya nya Presiden DOPPA, Dr. Richard Mani.

Ku iya, enti deka nyadi kaban KODOPPA, orang nya dipinta mayar panjar RM50, udah nya enti deka beranakka puku mayar RM500.

Sida ke deka nemu penerang silik pasal DOPPA tauka KODOPPA, betelefon terus nuju  Incham ba lumur 019-885 3914  tauka Bunie Japah (019- 889 4905).

Perintah besai udah ngemendar pengawa ngaga dua jalai, sebuah jematan dikena ngelengkas pemansang di Sangan

TATAU: Perintah besai ngemendarka pengawa ngaga dua jalai enggau sebuah jematan ba sitak Sangan, Tatau lalu tu nyaup ngelengkaska pemansang ba sitak nya, ku Menteri ba Opis Menteri Besai, Datuk Joseph Entulu Belaun.

Projek keterubah dipadah deka digaga ujung taun 2013 iya nya jalai ari Rumah Pagah, Sangan nuju jalai digaga Ladang Pelita ngembuan 1.4 kilometer pemanjai beungkus RM 3.2 juta lalu dipelaba tembu ujung taun tu.

“Projek ngaga jalai tu dipejalaika Opis Parit enggau Entali Ai (JPS) lalu pengudah projek dikemendar nya ngelai perintah endang nyengala ngamatka semaya ngagai rayat kelebih agi di menua pesisir baka ba Sangan sereta sitak ke besemak,” ku iya.

Iya madah munyi nya ngagai media pengudah ngulu pengawa nasih tanah Jalai Rumah Pagah, Sungai Sangan Tatau, kemari.

Ku iya, dua agi projek ke deka dikemujur udah tu iya nya ngaga jalai ari  simpang Merit nuju Rumah Ngindang ke ngembuan 4.3 kilometer pemanjai beungkus RM8 juta nyengkaum projek ngaga jematan meraka Sungai Anap beungkus RM 2.5 juta ke benung diadu ba renggat nentuka dokumen tinder.

“Rayat sitak Tatau patut neruska sukung ngagai ketuai Barisan Nasional (BN) dikena nentuka mayuh agi peamnsang dipejalai dikena ngubah pengidup enggau ngangkatka kualiti perengkaguna ba sitak kita,” ku iya.

Ngenang pekara bekaul, iya ke mega Kaban Parlimen Selangau bejaku maya Program Gauk Ke Penguna ba Rumah Jelaping Jali ngelalau bala ketuai raban bansa ba  Sangan enggau Tatau lebih agi tuai rumah, penghulu, pemancha enggau  temenggong patut minta bantu projek beungkus setengah juta enggau ke atas ngagai opis menteri ke bekaul.

“Surat ulih dikenataika ketuai raban bansa ngagai pengari rayat tauka kaban parlimen dikena nentuka peminta nya datai ba opis tauka ejensi ke bekaul,” ku iya.

Taja pia, ku iya dikena minta bantu ke beungkus kurang ari RM100,000, iya ulih diberi ngagai Kaban Kunsil Nengeri (ADUN) sitak diri empu laban sida mega bisi diberi agih belanja dikena ngemujurka projek ke nyampau nya.

“Pekara ke lebih beguna iya nya genap ketuai raban bansa patut nemu atur ke udah ditetap lalu ngenataika surat peminta ngagai ejensi tauka opis ti betul awakka pekara nya jampat diperunding,” ku iya.

Bela bisi datai Pemancha Valerie Manyi, Penghulu Salang Anchok sereta bala ketuai raban bansa enggau sekeda pedagang ari sitak Sangan enggau Pasar Tatau.

Ngambika bisi dikena ngemanah infrastruktur sekula, ngatur pengawa enggau perengka guna kelimpah ari ngarapka gaji pengajar ditambah

Dikarang Rengenyan Labang //

KUCHING: Kesatuan Guru Bumiputera Sarawak (KGBS) meri pengarap besai ngagai perintah ulih mantaika insentif ti ulih ngagitka ati ungkup raban pengajar, infrastruktur sereta perengka guna nembiak enggau sekula dalam Bajet 2017.

Presiden KGBS, Ahmad Malie madah, endang dianti genap serak raban bansa di menua tu nyengkaum raban pengajar sereta piak sekula ke lalu meri pengarap besai ngambika diungkupka belanja ke patut dikena ngangkatka pemanah infrastruktur tauka perengka guna sekula enggau nembiak.

Bajet 2017 ke deka dibantaika Menteri Besai Datuk Seri Najib Tun Razak kena 21 Oktober tu.

“KGBS ngansak sereta ngarapka ungkup belanja dikena ngaga enggau ngemanah infrastruktur sereta begunan sekula ke udah tuai ditambah mayuh agi.

“Laban di Sarawak agi kelalu mayuh sekula ke udah tuai sereta patut digaga baru tauka dikemanahka ke pengelantang pendiau nembiak.

“KGBS ngarap sereta ngansak ngambika ungkup belanja ba pekara ngatur pengawa ti besai agi ngagai Opis Pelajar Nengeri sarawak (JPNS) awakka ulih diagih ngagai sekula dikena ngatur pengawa sekula ngambika efektif agi,” ku iya madah ngagai Utusan Borneo.

Iya mansutka penerang nya lebuh dipinta madah nama utai ti dikearapka KGBS ngagai perintah dalam Bajet 2017.

Nambahka nya iya madahka KGBS ngarapka insentif nyengkaum meda gaji baru pengajar ngambika senipak enggau tanggungpengawa pengajar ke majak berat,  baka ke disemaya Menteri Pelajar sebedau tu.

“Kami ngarapka insentif pelajar baka ke dikenataika sekeda gerempung pengajar kelebih agi KGBS ulih nyadi nyata dalam Bajet 2017,” ku iya.

Opis Menteri Pelajar Malaysia (KPM) udah ngungkupka sepenyampau RM1.3 billion dalam Bajet 2016 dikena ngemanah infrastruktur enggau sekula di Sabah enggau Sarawak.

Kelimpah ari nya, Presiden Kesatuan Guru-Guru Sarawak (STU) Jisin Nyud lebuh ditanya pekara ke sama bekaul enggau bajet 2017, iya mega ngarapka ungkup belanja pelajar di Sarawak ulih diberi mayuh agi.

Laban pelajar elemen ke pemadu beguna, STU ngarapka ungkup belanja pelajar 2017 enda dikurang dibandingka enggau pekara bukai.

“Enti ulih ungkup belanja pelajar kelebih agi di Sarawak ulih ditambah mayuh agi, laban mayuh penusah angus nyadi ba begunan sekula di nengeri tu lalu nya alai kitai amat begunaka bantu kelebih agi dalam infrastruktur.

“Kitai begunaka bantu belanja lebih agi dikena nganti sekula kayu tauka begunan ti udah tuai ngagai begunan simen sereta nukar baru wayar elekterik dikena nyeliahka insiden penusah angus enggau begunan sekula runtuh,” ku iya madah ngagai Utusan Borneo.

Kelimpah ari nya, Jisin ngarapka akses internet ba sekula kelebih agi di menua pesisir bisi diungkupka belanja.

KAPIT: Orang biak ti bisi ati jadi melaki bini dilalau minta setipikit tikah.

Lebuh dikerandau pengarang berita apin lama udah, residen Bagi Menua Kapit Joseph Belayong madah, umur ti patut ngagai bala lelaki enggau indu jadi melaki bini iya nya 21 taun.

“Umur ti patut ngagai bala lalaki enggau indu jadi melaki bini iya nya 21 taun, tang ba sekeda kes lelaki enggau indu ti deka jadi melaki bini nya beumur baruh ari 21 tang enda tau enda ngelui ari 16 taun,” ku iya madah ba opis iya ditu ensanus.

Ba pekara tu, seduai ti deka jadi melaki bini nya enda tau enda bisi pemendar ari apai indai tang mega bepanggai ba sapa ti beumur baruh ari 21 taun,” ku Joseph.

“Lebuh sida deka ngerejista tikah sida ba Opis Pengerejista Bansa (JPN), dia bisi dua chara. Keterubah terus ngagai JPN lalu minta sida mandangka gambar ba papan notis JPN pengelama 21 hari, lalu kedua nya minta nikah jampat ngagai opis residen (Tang bedau bisi setipikit tikah). Enti nya dikemendarka residen, seduai ti deka jadi nya tau ngerejista diri ba JPN ngambi bisi setipikit tikah. Baka kes ke baka tu tau enda ibuh mandangka gambar pengelama 21 hari,” ku iya.

Ku Joseph baru, tikah nya enda ulih direjista ba JPN enti seduai ke jadi nya tadi beumur ari baruh 16 taun.

MARUDI: Kenyau ari dipilih nyadi Kaban Kunsil Nengeri (ADUN) Marudi, Datu Dr Penguang Manggil udah meri lebih 10 buah kerusi roda, katil sepital enggau bantu ke bukai ungkup raban orang nyelai pendiau (OKU) sereta sida ti begunaka bantu ba sitak tu.

Penguang mansutka jaku tu rambau nyuaka pemeri kaki pelesu ngagai Amputee Ukin Samat apin lama ke udah.

“Aku deka neruska pengawa ke bansa tu sereta malas pengangkun sereta sukung sida.

Amputee Ukin Samat ulih bejalai baru sereta sida sebilik berasai lantang lebuh Datu DrPenguang Manggil ke lalu nyadi Menteri Muda Kaunsil Kandang Menua datai mantu sereta mutarka penusah iya.

Ukin enggau sida sebilik meri besai terima kasih ngagai Datu Dr Penguang ke udah gerah jari alai peminta sida deka meda (Ukin) ulih bejalai baru nyadi nyata.

Bantu tu disua iya rambau penemuai ngagai rumah panjai sida ba Rumah Berauh ak Barau di Sg Entulang, Bakong apin lama ke udah.

MARUDI: Kaban Kunsil Nengeri (ADUN) Telang Usan, Dennis Ngau madahka pengirau ati bekaul enggau sekeda sekula primari di Ulu Baram ti ngembuan rikod penatai nembiak sekula ke majak kurang.

Dalam taun nyin tadi, rikod penatai nembiak ba setiap sekula primari di Ulu Baram enda kurang ari 100 iku nembiak tang diatu ba sekula ke nadai buding urung 20 iku, ku iya nerang.

“Nyema penyampau tubuh nembiak majak mimit, aku enda nemu sekalika sekula nya agi ulih beoperasi. Pekara tu ti dikenangika kitai.

“Ba genap sekula, nengah pengajar ke dianjung ngajar deka nyadi ejen ngubah bala nembiak enggau bala komuniti besemak.

Dennis Ngau mansutka jaku tu rambau bejaku ba Pengawa Bejadika Lumba Darat MSSR ke-31 Zon Baram Tengah bepalan ba Sekula Primari (SK) Long Laput, Baram Tengah pagi kemari.

Pekit tu diatur berengkah ari 12 ngagai 16 Oktober lalu digulu lebih 500 iku raban atlit enggau bala pengajar ungkup taun tu.

Ngelansa pekara bukai, Dennis madah ngagai raban komuniti Orang Ulu di Ulu Baram patut beratika pekara tu enggau berat agi.

“Kitai enda ulih nejuka pekara tu pia aja laban mayuh sekula udah ditutup ketegal kurang nembiak sereta rikod nurun sekula kelalu mimit.

“Ambi ke chunto, SK Long Liam, SK Long Atip, SK Long Ikang, SK Long Wat, SK Long Anap, SK Long Palai enggau SK Long Apu sereta mayuh sekula ke bukai di Ulu Baram ngembuan rikod nembiak ke kelalu mimit.”

Dennis merambu seriris enggau pelin pemansang perintah baka semua pemansang perintah ke bukai deka digaga ba kandang menua entigis seraya ngangkatka tikas pengidup nengah pengawa ekonomi.

Kitai mega meseti sedia bekerejasama enggau perintah. Perambu bukai ngambika Opis Pelajar ngaga buding ba setiap sekula dikena ngemuntang bala apai indai nganjung anak sida besekula.

Iya mega seruran nerima sebana ari bala ketuai raban bansa pasal sekula nadai ngembuan perengka guna baka buding.

Pekara tu ku iya, nyata endar dipeda ba SK Long Laput ke bisi ngembuan perengka guna nya alai lebih 100 iku nembiak ari Kampung Sungai Dua enggau Sri Kenawan dianjung diau bemalam ba buding.

Berindik ari penyuntuk ba pekara belanja ti diagih Opis Menteri Pelajar ku iya, endang patut piak sekula chakah agi nyereta pekit lumba darat laban semina nengah chara tu aja ulih ngiga belanja nangkup peminta sekula sida empu.

“Nya alai aku meransang semua sekula bela bekerejasama bejalaika tanggungpengawa sida.

Sama bisi datai Temenggong Elizabeth Dengm, Sekretari Politik Kepala Menteri Sarawak, Charles Balan Seling, Chairman MDM, Kaunsilor Edward Mendai, Kaunsilor Wan Kah, Rokimin Imah, pengari Opis Pelajar, Chairman Gerempung Apai Indai Enggau Pengajar (PIBG) SK Long Laput, Harold Usung Wan.

Kaban parti meseti dikemendarka milih ketuai ke patut pengudah pengawa bepilih ditatak pengelama 12 taun

KUCHING: Ubah politik moden begunaka pemanah atur dikena meri awak ngagai genap iku kaban parti milih sapa ketuai sida nyengkaum kaban Parti Rakyat Sarawak (PRS).

Presiden iya, Tan Sri Datuk Amar Dr James Masing madah, pengawa bepilih dalam sesebengkah parti endang sebagi ari atur demokratik dalam PRS.

“Nya alai, bala kaban meseti dikemendarka milih sapa ke patut nyadi ketuai lalu sida pengudah pengawa bepilih ditatak pengelama 12 taun.

“Ketuai dalam PRS majak tuai lalu orang biak deka bejaku. Nyema enda diatu, kamaya agi deka ngubah ketuai dalam PRS,” ku iya madah ngagai Utusan Borneo ditu, kemari.

PRS deka ngatur Aum Deligit Tiga Taun Sekali (TDC) di Bintulu kena 21 nyentuk 23 Oktober ke dipelaba digulu 635 iku pengari ari 346 pampang besai, 125 deligit ari sayap nembiak enggau 164 deligit ari sayap indu.

Entara balat diperati serak tu iya nya pengawa bepilih pangku pengawa kedua besai parti iya nya sapit presiden PRS ke direbut dua chalun.

Masing madah, iya pechaya chalun ke bekaul sigi veteran politik lalu sida nemu nama reti bepilih dalam politik.

“Aku pechaya PRS nyadi sebuah parti ke chukup tuai penemu napi pangka bekau ari ‘penyarut’ politik.

“Bala chalun sigi veteran po-litik sereta nemu naka reti be-pilih dalam politik,” ku iya.

Ensana Sekretari Komiti Pengawa Bepilih PRS Edward Kurik madah, pekit ngerebut penuduk sapit presiden parti deka diterus laban kededua chalun bela enda nyurutka diri.

Chalun dua iku tu iya nya Datuk Joseph Salang Gandum enggau Datuk Joseph Entulu Belaun bela enda nyurutka diri ari nyadi chalun pengudah timpuh nganjung nama chalun ditutup kena 30 September.

KUCHING: Orang Nyelai Pendiau (OKU) patut bisi pengari dalam Opis Kunsil Kandang Menua dikena ngangkatka pemanah perengka guna mensia mayuh ti beratka raban nya, kelebih agi ba mengeri besai di Sarawak.

Menteri Pengintu Pengelantang Pendiau, Orang Indu enggau Pemansang Raban Bansa, Datuk Fatimah Abdullah madah, enggau penyereta tauka bisi pengari raban nya lebih agi OKU buta enggau bekerusi roda, nya ulih meri peluang ngagai opis kunsil kandang menua nemu nama utai ke patut sereta diguna raban nya.

Berindik ari pekara nya, iya ngarapka opis kunsil kandang menua di nengeri tu kelebih agi di mengeri besai patut bisi kaul Gerempung Orang Buta Malaysia (SBM) pampang Sarawak.

“Manah amat enti bisi abis nadai seiku ari pengari ari SBM dichirika nyadi kunsilor ba opis kunsil kandang menua, tu beguna amat laban sida iya ulih meri penerang ngagai opis kunsil pasal nama utai ke diguna raban OKU tu.

“Dalam perambu pemansang mengeri pekara ke diguna OKU patut disengkaum sekali, reti nya ngambika nadai raban ditinggal, nya alai penerang ari raban OKU tu beguna amat awakka kitai nemu nama utai ke diguna sida,” ku iya.

Fatimah mansutka pekara nya lebuh bejaku seraya bejadika pengerami ‘Hari Tongkat Putih Antarabangsa Peringkat Kebangsaan’ ke alai Sarawak dipilih nyadi tuai rumah taun tu, ke diatur ba Tebing Ai Kuching ditu, kemari.

Pengerami nya diatur Opis Pengintu Pengelantang Pendiau Raban Bansa (JKM) begulai enggau SBM Pampang Sarawak nengah kerejasama Yayasan Salam, ti dipasuk 12 pampang SBM ke alai bisi aktiviti bejalai bebala mayuh seraya nutup mata enggau ngena tungkat, penyauh tiga kimometer (KM) nyerumba pengerami nya.

“Objektif Hari Tongkat Putih tu dikena ngajar sereta meri penyedar ngagai orang ke bisi meda pasal OKU buta enggau bekerusi roda, ngambika nemu nama utai dikedeka, diasai, diguna sereta ulih ngatika diri empu enda ibuh minta bantu orang bukai,” ku iya.

Bepelasarka peneleba pengudah bejalai bebala mayuh seraya ditutup mata enggau ngena tungkat nya, Fatimah madahka raban OKU ti buta enggau OKU bekerusi roda deka betapi enggau pemar enti nadai perengka guna mensia mayuh ti beratka raban nya, baka lampu trafik ke bisi bunyi enggau lurung jalai kaki ke bisi tile.

Iya ngarapka opis kunsil kandang menua di nengeri tu ulih beratika perengka guna nya ba raban OKU buta enggau bekerusi roda.

“Dikena mutarka penanggul ti ditapi OKU buta tu, jalai enggau lampu tarfik enda tauka beratka raban OKU. Opis Kunsil Kandang Menua patut ulih beratika pekara tu dikena ngangkatka aksesbiliti enggau mobiliti OKU buta enggau bekerusi roda.

“Lampu trafik patut bisi ngeluarka bunyi madahka maya ngetu enggau meraka jalai alun lalu jalai patut dilekatka tile. Nya ulih mantu OKU buta madahka dini biluk, simpang enggau ke bukai.

“Mengeri Kuching semina bisi empat lampu trafik ke disikap sistem bunyi, tang mengeri Kuching bisi lebih ari empat lampu trafik. Kitai ngarapka opis kunsil ulih nyikap lampu trafik ke bukai ngena sistem bunyi laban nya ulih mantu OKU Buta,” ku iya.

Kelimpah ari nya bekaul enggau pemesai guna pekara pelajar ngagai anak OKU, Fatimah madahka di Sarawak naka taun 2016 bisi 67 iku nembiak OKU ke besekula ba dua buah sekula sekondari enggau dua buah sekula primari ti nyendiaka pelajar khas ngagai raban nya.

“Penyampau kelas khas nya di Sarawak bedau chukup ngarapka opis menteri ke bekaul ulih nambahka mayuh agi kelas kelebih agi kelas integerasi ditumbuhka.

“Laban enti peluang pelajar bisi disediaka, raban tu ulih nampung pelajar ngagai ke renggat tinggi agi. Diatu di Sarawak bisi tujuh iku pengajar orang buta lalu ari penyampau nya empat iku ditikika pangkat nyadi sapit kanan pelajar khas,” ku iya.

NGELANCHAR: Harden benung ngelancharka Pesta Bena Sri Aman ditu lemai kemari.

Nyata dipeda tetiap maya pengerami tu diatur Pasar Sri Aman dedat laban mensia mayuh ari serata dunya: Harden

Disalin Ari Kelvin Lambai //

SRI AMAN: Pasar Sri Aman ukai aja tebilang enggau produk dagang temuai ‘Fenomen Bena’ ba mensia mayuh di menua nya tang penyadi asal nya mega ditemu mensia diserata dunya enggau antarabansa.

Menteri Muda Ekonomi Menua Pesisir enggau Kebun Bedandang Besai Sarawak, Datuk Francis Harden Hollis madah, Bena Sungai Batang Lupar entarapenyadi ti nyelai di dunya lalu keempat besai di dunya ti majak dikerindu temuai antarabansa.

“Penyadi asal tu ke bendar udah ngangkat nama Sri Aman dimata dunia lalu dikelala mensia mayuh ba renggat antarabansa,” ku iya bejadi Pesta Benak Sri Aman edisyen ke-14 ungkup taun 2016 ba Tebing Sungai Batang Lupar Sri Aman ditu lemai kemari.

Nyata dipeda ku iya, tetiap maya pengerami tu diatur kenyau ari taun 2001 nyentuk ke diatu, Pasar Sri Aman dedat laban mensia mayuh ukai aja ari Sarawak, Semenanjung enggau Sabah tang mega temuai antarabansa baka ari Perancis, Austraslia sekeda menua di Asia.

“Berani aku madahka Pesta Benak di Sri Aman tu ke bendar iya udah dikelala mensia mayuh di serata dunya lalu kitai ti nyadi rayat di Sri Aman patut temegah ati laban Sri Aman tebilang di serata dunia,” ku iya.

Ukai naka nya aja, enggau pemisi produk dagang temu ai ti tebilang di serata dunya tu, udah meri peluang ngagai mensia mayuh ditu ngangkatka penatai pemisi nengah chara nyereta peluang dagang beserimbai enggau pengawa ngatur pengerami besai tu.

“Aku minta peranak ditu ngambi peluang ngangkatka asil penatai pemisi sida nengah chara bedagang enggau ke bukai sekumbang pengerami tu,” ku iya.

Berebak enggau nya, iya mega meransang peranak menua nya nyendiaka produk baka krafjari ti tau ke tepa  ngagai temuai ti datai ke Sri Aman.

“Aku ngarap udah tu, bisi orang dagang kitai di Sri Aman ditu ngasilka produk krafjari ti dijual ngagai bala temuai lalu nyacdika tanda pengingat tetiap maya sida datai ke Sri Aman,” ku iya.

Besrimbai enggau nya, Residen Bagi Menua Sri Aman, Jonathan Lugoh ti mega Chairman Komutu Besai Pengerami nya madah, urung 50,000 iku temuai datai sekumbang tiga hari pengerami nya diatur taun tu.

“Kami nagit 50,000 iku temuai datai pke Pesta Bena Sri Aman taun tu lalu kami pechaya, tagit nya ulih dijapai nyentuk ke hari kepenudi  pengerami kena Hari Minggu tu,” ku iya.

Bela bisi ngulu pengerami nya, Kaban Kunsil Nengeri (ADUN) Lingga, Simoi Peri, Sekretari Politik Kepala Menteri, Datuk Seri Doris Sophia Brodie, DO Sri Aman, Ismawie Salleh, bini Harden, Datin Simba Nallang enggau bala ketuai opis perintah sereta raban bansa ke bukai.

Pesta Bena Sri Aman 2016 bisi ngerintaika mayuh bengkah aktiviti ti memanah nyengkaum Regatta Bena, Pekit Ratu Dagang Temuai Bena, Pekit Ratu Kebaya Nyonya, Pemandang Bena, Bazaar Ria, Panggau Main Asal Benak, Mr. Bena, Bena Bike Gathering sereta Autoshow enggau mayuh agi ke bukai.

SADONG JAYA: Menteri Kereja Datuk Seri Fadillah Yusof minta penguna Jematan Batang Sadong ke baru dibuka kemari meri timbal ngagai opis menteri nya nengah Opis Kereja (JKR) Sarawak, enti sema bisi pemerat bukai kena ngemanahka agi jematan nya.

Ku iya, timbal ari pengguna berat dalam pengawa mantu beratika gaya jematan dalam pemanjai 1.48 kilometer ke digaga enggau ungkus urung RM211,385,628.60.

“Enti nitih, kami beratika gaya jematan tu dalam kandang dua bulan lalu ari nya, kami deka nerima timbal ari penguna, lalu enti bisi pemerat bukai kena ngemanahka agi ke patut digaga, kami deka ngaga iya lalu enti nadai, iya deka dibuka ngagai mensia mayuh,” ku iya.

Iya madah munyi nya lebuh dirandau ulih pengarang berita ba atur pengawa muka Jematan Batang Sadong, ke mega nyadi jematan ke pengabis panjai meraka sungai di Malaysia, di atas jematan nya kemari.

Iya nandu baru madah pasal jematan nya, opis menteri sida iya udah dipadah pasal teknikal audit udah netapka Jematan Batang Sadong likun lalu ulih dibuka ngagai mensia mayuh.

Ku iya, pengudah ngabas sereta meda jematan nya, iya madah bisi pemerat ngemanahka agi ba sentang endur orang bejalai kaki.

“Enti kitai bejalai, bisi pekara mit ke patut digaga manah agi, kelebih agi enti ditemu ba sekeda bengkah jematan nya, bisi bengkah ke enda likun ke sida ke bejalai kaki.

“Ni bagi ke patut dikemanahka agi baka ke udah disebut dulu agi, lalu enggau nya aku beterima kasih ngagai JKR Sarawak ke nyadi ejensi teknikal beratika projek tu,” ku iya.

Kelimpah ari nya, Fadillah ti mega nyadi Kaban Parlimen Petra Jaya madahka pengawa bejadika Jematan Batang Sadong dijangka deka dipejadika ulih Menteri Besai Datuk Seri Najib Tun Razak enggau Kepala Menteri Datuk Patinggi Tan Sri Adenan Satem.

“Jematan tu sebagi ari ‘Aku Janji’ ulih Menteri Besai enggau sukung Kepala Menteri, atas peminta tuai pupu bansa ari renggat Parlimen enggau Kunsil Nengeri sereta tuai pemesai menua tu empu.

“Ketegal nya, jematan tu dipejadika lalu ketegal nya mega, kitai deka meri basa ngagai Menteri Besai enggau Kepala Menteri bejadika jematan tu, lalu ngarapka ulih netapka haribulan deka bejadika jematan tu ila,” ku iya.

SARATOK: Bakal ti balat ba dada ngujungka seiku sekuriti ke gawa ba sebengkah opis perintah semak ditu, bebadi nyawa lemai kemari, kes tu diengkah ari baruh kes munuh diri naka ke diatu.

Ketuai Polis Pelilih (KDP) Saratok, DSP Lee Thai Lein madah, niang Rekie Empading, 58, dipelaba nimbak diri empu ngena senapang patah bansa Made in USA 12GA Choke ba rumah iya di Taman Seroja Indah, Saratok.

“Penusah tu nyadi urung pukul 1.30 lemai. Lebuh penusah nyadi, niang enggau dua iku anak iya sereta dua iku da agi kaling anak iya benung tinduk ba bilik besai rumah nya pengudah mulaika diri ari ngulu pengerami melah pinang ba sebuah rumah panjai di Ulu Krian Saratok.

“Bepelasarka pansik tumu penusah tu, niang tama ke dalam rumah sereta ngagai bilik iya lalu ngambi senapang patah lalu terus nimbak diri empu ba dada ngujungka iya bebadi nyawa.

“Dalam penerang tumu ari sida ke diau besemak sereta kaban belayan niang, kebuah iya nimbak diri bedau ulih ditemu,” ku iya dalam sebengkah penerang berita, kemari.

Kenu ku Lee, nadai sebarang laya tauka petalat nyadi ba niang enggau sida sebilik sebedau penusah nya nyadi.

Tambah mega ku iya, sebedau penusah nyadi nuang bekereja syif malam ari pukul 8 malam kena 14 Oktober (Hari Lima) nyentuk 8 pagi, 15 Oktober (Hari Enam).

“Ku sida sebilik, pengudah tembu gawa, niang nadai mulaika diri ke rumah nyentuk penusah nya nyadi.

“Senapang ke dikena niang nimbak diri udah dirampas dikena bejalaika pansik enggau silik.

“Berebak enggau nya, bangkai niang udah dianjung ngagai rumah bangkai Sepital Saratok ngambika dikena nasat enggau silik,” ku iya seraya ngelansa kes tu benung dipansik piak polis.