Sida ti ngaul diri dalam lumba patut bebendar ngayanka pengelandik sereta penemu diri: Dr Mahender

MIRI: Penyereta nembiak sekula dalam pekara lumba enggau main ukai semina ulih ngangkatka pengerembai dalam diri, tang ulih nerenakka runding ti beserakup entara sida.

Direktor Lumba enggau Main Opis Menteri Pelajar Malaysia (KPM) Dr. Mahender Singh madah, KPM seruran meransang semua atlit di tikas sekula ba serata menua ngambi ngayanka pengelandik sereta penemu diri.

“Nengah lumba, bala nembiak sekula ba tikas sekula primari kelebih agi, ulih mantaika pengelandik sereta penemu sida dalam lumba ke mega ulih mantu sida nyadi atlit ti nyulut di tikas ke tinggi agi,” ku iya.

Ku iya nambah, lumba enggau main di sekula mega ngaul nembiak sekula di kandang menua pesisir.

Berindik ari tu, ku iya, ulih meri sukung sereta nerenak kaul lumba ukai semina di mengeri, tang mega ungkup atlit di sekula menua pesisir.

Iya mansutka jaku tu lebuh Pengerami Nutup Pekit Lumba Sekula Pribumi Sarawak 2016 ke diatur Opis Pelajar Nengeri Sarawak enggau Opis Pelajar Pelilih Miri enggau kerejasama iM Sarawak, ke bepalan di Hornbill Sports, Tingkat 3 Myy Mall Miri ditu, hari Enam bedau lama.

Sama bisi datai ngulu pengawa iya nya Direktor Pelajar Sarawak Rakayah Madon, Ketuai Sektor Pengatur Pemansang Mensia Mayuh Opis Pelajar Sarawak Ambrose Jarit. Pemesai Pelajar Pelilih Miri Dr. Hassan Hasbollah sereta temuai dipebasa ke bukai.

Ku Dr. Mahender, pekit lumba tu udah muka awak sereta peneleba ngagai nembiak di sekula menua pesisir dikena mandangka pengelandik enggau besemekih ngena chara lumba.

Ku iya, enti deka nyadi atlit ti nyulut, komitmen enggau pengeransing amat diguna dalam runding tetiap atilit nya.

“Anang leju meri pengabis manah nengah awak ke udah disediaka. Pengelandik atlit tu ulih dipeda ari umur lapan nyentuk 12 taun lalu iya deka terus ngerembai.

“Berindik ari nya, kena peluang tu enggau landik ngambika ulih nyapai penyulut ba pekara lumba,” ku iya.

Beserimbai enggau tu, Rakayah dalam jaku pengelalu iya madah, pekit lumba ke-8 tu seriris enggau pekara ke-9 dalam Pelin Pemansang Pelajar Malaysia (PPPM) iya nya ngangkatka kerejasama apai indai, komuniti enggau sektor peribit dalam pelajar.

Ku iya madah, tu inisiatif ke dikena ngayanka pelajar ukai semina diau dalam kelas aja, tang patut dikunsi enggau semua komuniti.

“Berindik ari tu, pekit lumba ti diatur kitai tu seiti program lumba ti ngangkatka pengawa kena ngemenuhka peminta semua nembiak sekula meseti ngaul diri paling enda dalam seiti kategori lumba lalu nyadika seiti ari pekara ngisi peminta program 1Murid 1Sukan (1M1S),” ku iya.

Pekit lumba tu ti bepun kena 14 Oktober lalu tembu lemai 15 Oktober udah mantaika main Futsal, Sepak Takraw enggau Bola Jaring ke disereta 20 tim Opis Pelajar Pelilih (PPD) ari Lundu, Serian, Simunjan, Sri Aman, Lubok Antu, Betong, Julau, Sibu, Selangau, Kanowit, Kapit, Song, Belaga, Tatau, Sebauh, Subis, Baram, Limbang, Lawas dan Miri.

JELU SIGA KE ENDANG TERIT DIJAGA: Jelu engkuli ari Brunei dijual enggau rega RM20, 000 ditu bedau lama ke udah.

MIRI: Dua iku rayat ari menua Brunei udah ditan ditu kenyau ari Hari Lima tu tadi ngambika mantu pansik ba pengawa bejualka jelu engkuli.

Kes tu udah diserah ngagai Opis Kampung Sarawak (JPS) bejalaika atur ke patut bekaul enggau jelu siga ke endang terit dijaga, dikelala ngena nama saintifik Neofelis Nebulosa.

Pengawa bejualka jelu engkuli tu udah ditemu nengah media rama.

“Bala pemesai penerit adat udah bejalaika pansik silik ba kes tu. Tu keterubah iya kes ke bansa tu bisi diterima JPS.

“Jelu engkuli tu agi idup. Asal penatai jelu tu ari Brunei lalu dibai ngagai Sarawak ngambika dijual enggau rega RM20,000,” ku seiku ari pemesai penerit adat JPS.

Ku iya, berindik ari nya, kes tu deka dibai ngagai kort ketegal bejualka jelu siga ke endang terit dijaga.

Enti sema ditemu salah, sida deka ditinggang ukum mata duit penyampau RM25,000 sereta deka dijil pengabis lama dua taun ari baruh Seksyen 29 (C) Ordinan Perlindungan Hidupan Liar 1998.

Ngelansa pekara bukai di Bakun, iya madahka dua iku lelaki dipelaba munuh jelu engkuli ba kandang menua ke sama.

“Kes tu mega ditemu nengah media rama lalu piak JPS diatu benung bejalaika pansik sereta nyidi dini alai lelaki tu,” ku iya nambah.

Ba kes ke bukai, empat iku lelaki peranak asal Indonesia udah dituku salah kort kena Hari Lima tu tadi ketegal ngembuan 10 iku burung bansa Entelit Burak tauka Burung Murai Batu sereta dua iku burung Kenyalang di Marudi.

Nitih ku pemesai penerit adat JPS, kededua bansa burung tu dijaga ari baruh Ordinan Perlindungan Hidupan Liar 1998.

“Peranak asal Indonesia ditemu salah lalu udah diukum jil lapan taun ketegal ngereja penyalah nya. Ukum tu udah didawa piak JPS,” ku iya.

KELALA LALU MERETIKA SEJARAH SARAWAK: Adenan (kanan) ngelawa eksibisyen gambar jeman perintah British, Jepun. Gambar Rosli Dhobi mega bisi dibantaika ba pengawa nya. Sama bisi dipeda Abang Johari (tengah) enggau Putit (kiba).

Tu setipak enggau status Sarawak ke nyadi sebagi ari menua ke enggau numbuhka serakup Malaysia

Dikarang Jacqueline R. David //

KUCHING: Sarawak ukai sebuah nengeri dalam Malaysia, tang iya (Sarawak) nyadi menua ke sama enggau numbuhka serakup Malaysia.

Kepala Menteri Datuk Patinggi Tan Sri Adenan Satem madah bisi bida ke besai laban Sarawak ukai sebagi ari Malaysia enti nitihka sempekat antara United Kingdom, Serakup Malaya, Borneo Utara, Singapore nyengkaum Sarawak.

“Lalu tu nyadi sempekat nasional antara menua tu ke direjista enggau United Nations, lalu iya enda ulih ditukar sengapa tauka nguji ngubah Institusyen Malaysia,” ku Adenan.

Iya madah munyi nya lebuh bejaku nutup Licha pasal Sejarah Sarawak ‘A Journey to Merdeka Sarawak in Malaysia’ ti diatur Gerempung Sejarah Sarawak ba sebengkah hotel ditu, kemari.

Iya nandu, enti sema haribulan nya ditukar, iya nya ngubah Hari Malaysia ngagai 16 September, ketegal Macapagal enggau Soekarno enda setuju lalu ketegal United Nations (UN) minta iya anang guai digaga dulu.

“Nya alai, enti deka nukar haribulan Hari Malaysia nya, semua lima parti di menua enda tau enda bela setuju.

“Ba sentang kes baka tu, semua parti politik enda tau enda seati, tang naka kediatu, kelimpah ari ubah nya, nadai sebarang ubah bisi digaga dalam Sempekat Malaysia (MA).

“Bisi seiti artikel dalam (Undang-undang) Malaysia ke enda dikemendarka, ketegal asal iya dipadah dalam undang-undang Malaysia, menua di Malaysia enda tau enda (nengeri-nengeri di Semenanjung dikumbai kategori A) Sabah enggau Sarawak ketegori B sereta Singapore kategori C.

“Peratika kategori nya nyelai mimit, iya nya ba menua ketagori A bisi nadai menua B enggau C ketegal ubah ti digaga dalam 1976. Reti nya, semina sebuah menua Malaysia mungkur sitak menua di Semenanjung, Sabah enggau Sarawak ngujungka dua menua tu nyadi nengeri ke-12 enggau ke-13, reti nya pangkat kitai diturunka,” ku iya.

Adenan ti mega nyadi Menteri Wang sereta Menteri Pengatur Pengeraja Asal enggau Rampa Menua madahka nya pengilap orang kitai.

“Pekara bukai dalam kandang 53 taun kitai dalam Malaysia, uji kita berundingka pemansang di Pahang enggau Sarawak.

“Taja pan kitai bepengeraja mayuh pemisi baka minyak enggau gis, kayu sereta pemisi bukai, kitai jauh kena tinggal enti dibanding enggau sitak menua bukai di Malaysia,” ku iya.

Iya nandu baru, enti kitai jauh kena tinggal di belakang dalam timpuh 10-20 taun, nyangka kitai ulih nerima tang enti nyau setengah abad?

“Datai ke sekula kitai pan nyau labuh ke ai, sekula kitai jai, nembiak sekula kitai agi bedarat nurun sekula, nadai api, nadai ai, betul ke enda tu?

“Tauka minyak enggau gis kitai diambi orang bukai, kitai semina ngemataka aja, lalu nadai diasuh bekunsi enggau orang bukai.

“Sapa ke ngaga Putrajaya ke nyau bebillion maya ex-PM Tun Mahathr Mohamad suba? Petronas? Dini Petronas bulih duit enti enda datai ari Sarawak, Sabah enggau Terengganu.

“Pengeraja kitai nadai di konsentrasi ngagai Sarawak, ke semina deka diberi ngagai kitai semina lima peratus aja,” ku iya.

Nya alai, ku iya, kitai rayat Sarawak enda tau enda besaup ngereja pengawa ba industri minyak enggau gis.

“Nya kebuah aku seruran ituk nyebut pekara tu, tang diatu sida (Petronas) udah mendingka kitai lalu belabuh nyediaka pengawa ungkup orang Sarawak taja pan enda mayuh,” ku iya.

Lalu baka nya mega enggau duit dikena ngemansangka menua, laban ninting taun diungkupka ngagai Sarawak enda chukup.

“Kitai ngena duit kitai empu, ex-Kepala Menteri kitai suba, Tun Pehin Sri Abdul Taib Mahmud bisi nyimpan duit ke Sarawak, lalu belanja nya meh ke dikena kitai laban ungkup ke diberi Perintah Besai enda chukup,” ku iya.

Kelimpah ari nya, Adenan mega madahka diatu pemansang udah belabuh digaga baka ngaga Jalai Besai Pan Borneo, kuasa autonomi udah berengkah diberi pulai ngagai kitai.

“Jaku English diatu udah diangkatka nyadi Jaku lumur dua pengabis berat di Sarawak.

“Ketegal mayuh pemansang ke patut digaga Perintah Besai di Sarawak tang enda digaga, nya ke ngasuh orang Sarawak ringat, laban kitai enggai di dimain Kuala Lumpur.

“Aku udah madah, Sarawak udah badu nyadi koloni London, tang agi nyadi koloni Kuala Lumpur,” ku iya, ke agi mengkang madahka UMNO nyentuk diatu enda diterima di Sarawak.

Kelimpah ari nya, Adenan madahka enti kitai berunding kelia, Menteri Besai keterubah Malaysia, niang Tunku Abdul Rahman Putra Al-Haj enda kala nanya Sarawak deka enggau serakup Malaysia tauka enda?

“Nama penyadi enti sema niang Tunku Abdul Rahman enda nyadang numbuhka Malaysia? Nama penyadi 22 Julai ke udah diberi British ngagai kitai mega menua kediri empu?

“Perintah Sarawak tekala nya, pegai Kepala Menteri keterubah, niang Tan Sri Datuk Stephen Kalong Ningkan, enggau TYT maya nya, niang Tun Abg Openg udah dipadah lalu nangkan nya, bisi perintah menua kediri empu.

“Kitai ulih nyapai nyadi sebuah menua merdeka ngatika diri tang bisi dua bengkah utai ke ngachau kitai, iya nya pemari ari Parti Komunis Indonesia (PKI) ke tegap endar maya nya, lalu perundingka enti sida iya mujur ngerampas kuasa perintah kitai dalam taun 1965.

“Lalu baka nya mega kuasa ari China ke dibai Parti Komunis Malaya (PKM) ke deka ngambi Malaya, nyengkaum Sabah enggau Sarawak,” tanya Adenan.

Muntang kitai berunding baka kediatu laban semua pekara tauka gaya udah likun, tang kelia maya nya, semua orang takut, lalu bisi agi penusah iya nya Azahari Rebelllion dalam bulan Disember 1962, ku iya.

“Sarawak nadai chara bukai tang ngetan diri empu ke ngembuan rayat ke mimit. Kitai nadai chara bukai tang bepanggai ba soldadu Komanwel British, Australia, New Zealand enggau menua bukai.

Nya ngujungka menua kitai ulih likun dalam taun 1962 enggau 1963.

“Kitai beterima kasih ngagai British laban sida iya udah ngelengka ke kitai, tang Perintah British bisi pesan, iya nya hak Sarawak patut dijaga dalam Sempekat Malaysia, Ripot enggau Komiti Cobbold sereta Akta Malaysia,” ku iya.

Sama bisi nguluka pengawa nya, Sapit Kepala Menteri ti mega nyadi Menteri Pengawa Berumah enggau Kandang Mengeri Temuai Datuk Amar Abang Johari Tun Openg, Chairman Gerempung Sejarah Malaysia pampang Sarawak, Datu Putit Matzen, ADUN Jemorang Datuk (Dr) Juanda Jaya, enggau ADUN Demak Laut Dr Hadzland Hipni.

Pengudah ubah digaga dalam taun 1976, Sarawak nyau digelar nengeri baka 14 buah nengeri bukai

KUCHING: Putrajaya enda tau enda berundingka Sarawak ngembuan kuasa ke sama enggau serakup Malaya, lalu ukai semina sebagi ari 14 buah nengeri, ku Kepala Menteri Datuk Patinggi Tan Sri Adenan Satem.

“Nengah Konstitusyen Federal asal, bisi dipadahka iya nya serakup Malaysia mungkur semua nengeri di Malaya, dua menua di Borneo (Sabah enggau Sarawak) sereta Singapore.

“Pengudah ubah ti digaga dalam taun 1976, Sarawak nyadi antara sebagi ari 14 buah nengeri dalam serakup nya,” ku iya.

Iya madah, ketegal ubah nya, Sarawak lenyau kuasa, lalu kuasa nya ke deka dipinta dipulaika baru, nyengkaum ngaga ubah baru ngetanka Artikel 1 baka ke asal iya.

Adenan nandu, ubah ti digaga dalam taun 1976, enda ulih dikena agi laban nya ngelanggar Sempekat Malaysia ke disain dalam taun 1963, Ripot Komiti antara ejensi Perintah, Komiti Cobbold sereta pekara bukai ke bekaul enggau sempekat nya.

“Kitai sama enggau sida bukai ke nyain Sempekat Malaysia 1963. Enti kitai sebagi ari sida, kitai pan ngembuan kuasa ke sebaka enggau orang bukai,” ku iya madah pengudah Nutup Licha pasal Sejarah Sarawak di sebengkah hotel ditu, kemari.

Kitai (Sarawak) nyadi kaling nitihka Sempekat Malaysia, iya nya sempekat antara Malaya, Sabah, Sarawak, Singapore enggau United Kingdom, reti nya, lebuh semua sitak menua tu setujuka sempekat nya, reti nya kitai sama ngembuan kuasa ke sebaka.

“Nya kebuah, Sarawak deka nyadang ngaga ubah ba bagi nya, pulai baru ngagai ke asal IGC Sempekat Malaysia.

“Sempekat Malaysia enda ulih diubah sengapa, nyengkaum ngubah konstitusyen laban iya seiti Sempekat Antarabansa ke direjista ba United Nation, reti nya enti kitai enda ngasi ke UN, kitai ngelanggar undang-undang antarabansa,” ku iya, lalu nandu ukai reti kitai ningkilka diri ari Malaysia tang deka ke hak kitai dititih baka dalam sempekat 1963.

Ngelansa sentang Bajet 2017 ti deka dibantaika Menteri Besai Datuk Seri Najib Tun Razak kena 21 Oktober tu, Adenan madah enti ulih, Sarawak ngarap diungkupka bajet ke besai.

“Beratika ekonomi sereta rega minyak ke kurang, pelaba aku, kitai enda ulih ngasaika pemujur ekonomi baka suba, nya kebuah kitai ngena teda simpan kitai empu dikena ngatur pemansang ke patut,” ku iya.

Pekara tu ulih ngemuntangka sida mutarka sebarang penanggul ti ditapi lalu pulaika pemaik nembiak redak

// Dikarang Watson Menjang //

SRI AMAN: Semua ketuai komuniti kelebih agi tuai rumah sereta kunsilor bansa Iban diansak nambahka penemu sereta pengelandik ngambika ulih besemekih enggau bansa bukai.

Penemu iya nya seiti pekara ke enda nemu lenyau sereta enda nemu chukup, lalu ngembuan penemu enda ngira penemu dalam pelajar tauka pengelandik ngidupka kediri  beguna amat kelebih agi ngagai tuai ba tetiap komuniti. Jaku tu dipansutka Kaban Kunsil Nengeri (ADUN) Bukit Begunan, Datuk Mong Dagang lebuh ti bejadi pengawa ngerami Kunsilor Menjang Niah ti udah dipadu nyadi Kaban Kaunsil Pelilih Sri Aman (MDSA) bedau lama.

“Penemu tu amat dikemeratka dalam pengidup kitai, enda ngira penemu dalam pelajar tauka pengelandik ngidupka kediri. Ari penemu ti tinggi, tu ulih nyungkak pemansang lalu pulaika pemaik bala ari baruh kita.

“Ke diatu, mayuh ketuai komuniti kitai, enda ngira Tuai Rumah tauka Kunsilor, sida dichiri berindik ari pelajar enggau penemu ti dikembuan sida ngambi ulih teguh ngatur sereta mutarka penanggul ti ditapi di rumah panjai sereta rayat,” ku iya.

Mong mega ngelalau semua ketuai komuniti ngambika regas nyereta diri dalam sebarang program ke udah diatur ejensi perintah dikena nambahka penemu sereta muka runding sida ari penemu ti diiri ari program ti bekaul.

Iya nambah, nuju orang ti gawa perintah, nyema bisi awak diberi nyereta kus, sida dipinta enda muai peluang nya ketegal kus ti disediaka tu ungkup pemanah sida empu.

“Kita patut bagas macha, ari macha tu kitai ulih nambahka penemu. Kelebih agi macha dalam jaku Inggeris laban jaku tu jaku kedua ti patut dikuasa kitai lalu tu mega jaku rasmi seluruh dunya tu,” ku Mong nandu lebuh ti bejadika pengawa tu di Rumah Barang, Kara Begunan bedau lama.

Beserimbai enggau tu, Mong minta sukung ti tegut ari semua peranak ba baruh pegai iya, N31 Bukit Begunan, ngambi neruska sukung ngagai pengari BN lebuh pengawa bepilih besai (PRU-14) ti deka datai.

“Aku minta kita terus meri sukung ngagai pengari BN lebuh PRU14 tu ila iya nya YB Tuan Masir Kujat ngambika iya ulih neruska pemansang ke udah dilangkar ba sitak ari baruh iya,” ku iya ngujungka jaku.

Sama bisi ngulu pengawa tu iya nya Walikota Kaunsil Pelilih Sri Aman Richard Tawan, Kunsilor Tiam Bujang, Kunsilor Atal Dennis, Kunsilor Bangga Rigeh, Kunsilor Riji, Kunsilor Janggung, TR Phillip, sereta tuai komuniti ke bukai.

// Dikarang Judan Bungap //

SIBU: Sarawak udah ngerikod sepenyampau 973 iti kes nunu nadai pemendar naka ke diatu.

Pemantu Direktor Operasyen Bomba Opis Bomba enggau Penyah Penusah (JBPM) Nengeri Farhan Sufyan madah, ari penyampau nya 116 iti kes nyadi di Sibu.

Ku iya, tu dibagi ngagai tujuh iti kes kampung angus, babas (70 iti kes) enggau uras (39 iti kes).

“Taja pan baka nya piak kami enda nagang orang nunu baka sida ke bekebun mit.

“Tang kitai minta sida nyaga api sida nangika balat nyerarai ti tau ngujungka penusah angus ke besai nyadi,” pia ku iya maya berandau enggau pengarang berita, kemari.

Farhan madah, ba tuju pengawa betunu dikena muka kebun dandang besai, orang ke beempu kebun nya meseti minta pemendar ari Opis Pengeraja Asal enggau Rampa Menua (NREB).

Ba pekara penusah angus ke bukai, nengeri tu ngerikod 1,702 iti kes.

“Di Sibu, kes angus diripotka bisi 212 iti kes,” ku iya nerang.

KUCHING: Parti Bansa Dayak Sarawak-Baru (PBDSB) dipelaba deka nguji bediri minta pilih ba sitak Puncak Borneo dalam Pengawa Bepilih Besai Ke-14(PRU14) tu ila.

Nitih ku kaban dalam parti nya, PBDSB udah ngelala chalun ti bisi penau deka dikirai dalam sitak nya, ke dulu suba dikelala enggau nama sitak Mambong.

Ku iya, chalun tu ukai orang bukai ba sitak nya, seiku peranak asal sereta besai dia.

“Iya udah bejalai ngagai renggat pun menua beratika timbal ke diterima ari rayat ngagai parti nya diatu.

“Bala pengundi di Puncak Borneo dulu suba kala nyadi penyukung tegap PBDS sebedau iya dikinsil ketegal petalat dalam parti,” ku iya, ke enggai dikelala nama.

PBDS, ti majoriti Dayak kaban komponen Barisan nengeri tu, keterubah dikinsil kena 4 Desember 2002, diumba enggau petalat bala ketuai, tang udah angkat baru kena 10 March 2003, rambau PRU.

Udah nya iya dikinsil kena 5 Desember 2003, ketegal petalat bala ketuai enda ulih mutarka pekara taja diberi awak ke chukup bala Komiti Barisan Nasional (BN) diberi tanggungpengawa mantu ngiga jalai ke manah dikena mutarka iya.

Ku iya, seiku ari kaban parti nya udah dikelala deka bediri minta pilih ba Puncak Borneo ari baruh tikit PBDSB ke udah gawa ba pun menua ngelama tu.

PBDSB, ku iya, sedar penegap BN ba Puncak Borneo tang nyangka sekali ukai pejalai ke muntang ngagai BN ketegal sekeda pekara nasional ti mangka kelebih agi bala rayat.

“Naka ke diatu, semua orang bela bisi awak ke sama deka menang ba dia alai BN nyauka nyenggala deka ngirai chalun baru ba Puncak Borneo,” ku iya.

Ku iya berita ngerimbas pending ke bisi didinga penyandang Datuk Seri Dr James Dawos Mamit enda minta bediri baru ketegal pekara pengerai.

Kaban Supreme Kaunsil Parti Pesaka Bumiputera Bersatu (PBB), ke diatu Sapit Menteri Kuasa Karan, Teknologi Gadung enggau Ai, keterubah menang ba penuduk nya dalam taun 1999 nyadi chalun terus BN.

Sebedau megai pangku pengawa ke diatu, iya dipadu nyadi Sapit Menteri Dagang Temuai kena 14 Disember 2009 nganti penuduk Datuk Seri Sulaiman Abdul Rahman Taib.

Kena 16 Mei 2013, pengudah iya menang ba PRU Ke-13, iya dipadu nyadi Menteri Pengeraja Asal enggau Rampa Menua.

Bala ketuai kanan PBDSB mega ngaku parti nya udah mutuska diri badu agi nyadi parti Mesra-BN, tang sebengkah parti penyakal ngatika diri ti deka negika hak peranak Sarawak.

Ku iya, parti tu mega meruan enggau tuju sida – negika hak peranak Sarawak, kelebih agi komuniti Dayak sereta nyamin peminta sida deka ditangkup.

Sebedau PBDSB ngalih melakangka parti ti merintah, tu sekeda ari raban parti kaling-BN ke bukai nyengkaum Parti Tenaga Rakyat Sarawak (TERAS), SWP enggau Parti Rakyat Bersatu (UPP).

Bepelasarka statistik Pengawa Bepilih Nengeri (PRN) tu tadi, bisi 42,923 iku pengundi ke berejista ba Puncak Borneo alai 17,467 iku ba Mambong, 16,391 ba Tarat enggau 9,065 ba Serembu.

Kelimpah ari PBDSB, Parti Keadilan Rakyat (PKR) mega ngining penuduk nya alai chalun ke bisi penau, Willie Mongin mega udah bejalai gawa ngagai pun menua.

KUCHING: Sapit Kepala Menteri Tan Sri Datuk Amar Dr James Jemut Masing nesau semua bala Kaban Parlimen (MP) ari Sarawak enggau Sabah terus begempung ngetanka kuasa ke udah dipegai sida ngelama tu.

Masing, ke lalu nyadi Presiden Parti Rakyat Sarawak (PRS), madahka tu beguna endar ngagai bala MP ari kededua nengeri di Borneo ngayanka penyerakup ba pekara minta pulai baru kuasa ti bekaul enggau hak kededua nengeri nya.

Kaban Kunsil Nengeri (ADUN) Baleh nimbal penerang ti dipansutka Kepala Menteri Sarawak Datuk Patinggi Tan Sri Adenan kena Hari Minggu tu tadi alai bala MP Sarawak ulih meri perambu ba Parlimen minta pulai baru artikel Perlembagaan Persekutuan.

Nitih ku Adenan, sebedau diubah baru dalam taun 1976, Sarawak enggau Sabah ari baruh kategori ke bebida ari nengeri-nengeri di semenanjung.

“Sebedau nya (pengawa ngubah baru dalam taun 1976), iya madahka nengeri di Malaysia patut (a) nengeri ba Barat Malaysia, (b) Sarawak enggau Sabah lalu (c) Singapore. Singapore udah nyata nadai agi. Diatu semina seiti kategori aja,” ku iya ngelansa.

Ku Masing, nyema perambu minta pulai baru artikel Perlembagaan Persekutuan tu dibantai, semua MP ari Sarawak enggau Sabah patut nyukung perambu tu nadai ngira bida ba politik.

Lebuh ditanya sekalika PRS deka nguluka pengawa mantaika perambu tu, ku iya, nyema Sarawak mantai, iya patut digaga Parti Pesaka Bumiputera Bersatu (PBB) lalu PRS tetap nyukung.

“PRS ngempu enam ari 31 MP (Sarawak). Nya alai, kitai enda entu engkeman nguluka pengawa mantaika perambu minta pulai baru hak baka ke dijapai dalam Sempekat Malaysia 1963. Nyema Sarawak deka mantai, patut digaga PBB lalu PRS endang nyukung.”

Ku Masing, tu mega deka nyadi peransang ngagai bala MP Sabah nyukung perambu nya.

PBB diatu megai 14 MP dalam Parlimen, ditangkan PRS (enam MP), Parti Demokratik Progresif Sarawak (SPDP) (tiga MP), Parti Sa’ati Rayat Sarawak (SUPP) (Seiku MP) nyengkaum pengari Parti Kaling Barisan Nasional (BN) Tan Sri William Mawan Ikom.

Parti penyakal Parti Tindakan Demokratik (DAP) bisi lima MP lalu Parti Keadilan Rakyat (PKR) bisi seiku MP ari Sarawak.

Ngelansa pekara bukai, Sekretari Besai PBB Dato Sri Dr Stephen Rundi Utom, ke lalu nyadi Sekretari Besai BN Sarawak nadai meri sebarang timbal rambau aum pengarang berita.

KUCHING: Presiden Parti Reformasi Negeri Sarawak (STAR) Sabah, Datuk Dr Jeffrey Kitingan muji penemu Kepala Menteri (KM) Sarawak Datuk Patinggi Tan Sri Adenan Satem ke minta hak ke sebela enggau Semenanjung lalu pengawa ngubah baru Perlembagaan 1976 ngujungka Sabah enggau Sarawak disebut nengeri ke-12 enggau ke-13, dikinsil sereta enda diaku.

Jeffrey, ke lalu nyadi Kaban Kunsil Nengeri (ADUN) Bingkor, madahka diri nyukung penetap Adenan sereta nandu tu nyereminka iya (Jeffrey) enggau penetap bala United Borneo Front’s (UBF) ti ngerembai ba serata Sabah, Sarawak, Semenanjung enggau antarabansa nengah UBF’s Borneo Tea Parties kenyau ari bulan Desember 2010.

“Endang patut diperundingka baru batang tuju perintah British numbuhka serakup lima bengkah wilayah ari Tanah Melayu, Singapore, Sarawak, Borneo Utara (Sabah diatu) enggau Brunei, taja Brunei matak diri ari serakup nya.

“Tu mega pugu pekara alai Menteri Besai Tanah Melayu maya nya, Tunku Abdul Rahman, enggau bala menteri iya setuju enggau Menteri Besai Britain, numbuhka Seraakup Malaysia ke ngempung menua Serakup Tanah Melayu, Singapore, Sarawak, Borneo Utara (Sabah diatu) enggau Brunei ba London dalam bulan November 1961,” ku iya dalam sebengkah penerang berita kemari.

Nitih ku Jeffrey, sempekat dikena numbuhka Serakup Malaysia udah diaku dalam penerang begulai British-Tanah Melayu pengudah tembu randau di London sereta mega udah dirikod dalam Parlimen British nengah rikod Hansard kena 28 November 1961.

Tambah mega ku iya, lebuh Komiti Cubbold ditumbuh dalam taun 1962 lalu pengawa mansik timbal ari peranak Sabah enggau Sarawak pasal perambu numbuhka Malaysia, Chairman Komiti Cubbold, Lord Cobbold, udah dulu nangkan.

“Nyema bisi sebarang penemu deka beambi ulih ba Malaysia bekaul enggau nguasa Wilayah Borneo ari Perintah Tanah Melayu enggau ngemeluka hak peranak Sabah enggau Sarawak, ba runding aku, Malaysia tu siga enda diterima tauka puntan.”

Jeffrey madahka Serakup Malaysia tu nadai kala ngaul pekara Sabah enggau Sarawak nyemilik Persekutuan Tanah Melayu nyadi nengeri ke-12 enggau ke-13.

“Nyema pekara tu amat, nadai kebuah kitai nyain Sempekat Malaysia 1963 (MA63) laban semua peminta ngagai Sabah, Sarawak enggau Singapore ngambi ngemataka Sempekat Serakup Tanah Melayu 1957 disain 11 buah nengeri di Semenanjung.

“Nyema dipadah Sabah enggau Sarawak tu penengkebang alai Sabah enggau Sarawak deka nyemilik nyadi nengeri ke-12 enggau ke-13 di Semenanjung, sida patut bisi hak nulak lalu Malaysia ke bisi diatu tentu nadai agi.

Ku iya, semina ulih berunding aja nama penyadi ngagai rampa Sabah enggau Sarawak ke diatu nyema sida sida enda besetuju perambu numbuhka Malaysia suba.

“Ba semua pengaya asil minyak enggau gis, Sarawak mansutka RM55 bilion serata Sabah RM20 bilion da agi ninting taun, sida deka nyadi baka menua Singapore enggau Brunei, nya menua bansa ketiga enggau kelima pemadu kaya di dunya.

“Tang Sabah enggau Sarawak deka nyadi nengeri pemadu seranta enggau kedua seranta di Malaysia, laban semua pengaya udah dikena ngemansangka Semenanjung.”

Nyangka nya kebuah, ku Jeffrey, Sabah enggau Sarawak udah besetuju enggau perambu Malaysia ditumbuh, nyadi kaban ke sama, menyana agi tauka merinsa.

“Serakup Tanah Melayu diatu nyaru diri begempung dalam Malaysia sereta perintah besai iya nadai kaul dalam pengawa ngubah sempekat 1976 ti nyemelaka Sabah enggau Sarawak begulai enggau 11 nengeri ke bukai di Semenanjung sereta nukar status sida nyadi nengeri ke-12 enggau ke-13 di Semenanjung sereta meri nama baru nyadi Serakup Malaysia.

“Pengawa ngubah baru endang enda patut enggau sereta enda diaku lalu plot ke jai sereta runding ke enda manah deka merintah Sarawak enggau Sabah sereta ‘ngenchuri’ pemansut asil enggau pesaka sida.

Ku iya, udah umbas endur nyeruri pengilap ke dulu suba lalu ngemetulka iya nyema Serakup Malaysia deka terus idup sereta mansang.

Nya alai ku iya, semina nengah pengawa nginsil ubah baru ba sempekat 1976 sereta nikal baru ngagai sempekat asal Malaysia ditumbuh baka ti udah dipesetuju dalam Perlembagaan Persekutuan 1963.

“Nyema Serakup Tanah Melayu enggau Perintah Besai enda bejalaika atur nya, endang patut sereta engkeman alai Sabah enggau Sarawak diberi pilih nendang Serakup Tanah Melayu ari Malaysia laban sida ke enda bebasaka sempekat asal Malaysia ditumbuh.”

Statistik naka 1 Jan – 31 Julai 2016 ngayanka 142 kes ba pesisir dibanding semina 81 kes di mengeri

// Dikarang Jacqueline R. David //

BISI UNDANG-UNDANG NGELINDUNG ORANG INDU: Fatimah (tengah) beratika SOP ke ulih ngelindung orang indu ti kena jamah laki sida. Sama bisi dipeda, Dev (kiba) enggau Noriah (kanan).

SANTUBONG: Kandang menua pesisir ngerikodka penyampau kes kasar ba rumah bilik lebih mayuh ari di mengeri, ku Menteri Pengintu Pengelantang Pendiau, Orang Indu enggau Komuniti (KKWKK), Datuk Fatimah Abdullah.

Ku iya, tu bepelasarka statistik ke bisi diripot naka 1 Januari nyentuk 31 Julai 2016 iya nya menua pesisir bisi ngerikodka 142 kes, dibanding enggau mengeri besai ke semina 81 kes.

Berebak enggau nya, ku iya nitihka bagi menua iya nya Kuching bisi ngerikodka 48 kes, ditangkan Sibu (40 kes) enggau Miri (34 kes).

“Taja Kuching diuan mayuh mensia tang bepelasarka peratus kes, menua Kuching ngerikodka enda mayuh kes enti dibanding enggau pemayuh tubuh.”

“Kes di Kuching enda bangat tinggi enti dibanding enggau pemayuh mensia.

“Ambika chunto, nembiak indu ke betubuh bisi dirikodka ba Sepital Besai Sarawak (HUS) nyangka pemayuh nya tinggi tang enti diperatika ari sukut peratus, Kapit ngerikodka lebih mayuh.

“Reti nya, dikena nentuka penyampau kes, penyampau mensia ke nguan menua nya deka diperati,” ku Fatimah.

Iya madah munyi nya ba aum media pengudah Nutup Lab Gegempung Mutarka Ulah Kasar ba Orang Indu enggau Anak Mit ti digulu urung 100 iku pesereta ari PDRM, KKWKK, Opis Pengerai (JKMS), DBKU, Opis Penyerakup Nasional enggau Integrasi (JPNIN), Opis Kimia, Opis Rumah Jil, Opis Pelajar (JPNS), enggau Opis Orang Indu enggau Ruang Bilik (JWPK) di sebengkah resort ditu, kemari.

Nangkan nya, Fatimah madah ulah kasar ngagai orang indu nyadi ketegal seiti ari kebuah besai, iya nya laki sida bisi ngambi dadah tauka mabuk.

“Enti orang laki nya seiku orang ke makai dadah, dadah tu tau ngeruga runding seseiku orang.

“Bepun ari tu, kekadang kitai ninga bisi bini kena palu, kena bukut, kena tendang laki ke udah makai dadah. Tang enti laki tu enda makai dadah, maya iya udah ngeleda sida nadai baka nya. Lalu baka nya mega laki ke suah ngirup ai bisa, udu amat deka nyamah bini.

“Lebuh laki sida udah kelalu gian, nadai duit dikena meli dadah tauka ngirup ai bisa, orang ke semak endur sida minta deka diransi baka sida sebilik empu,” ku iya seraya ngelalau dadah nya tau ngasuh orang laki jampat ringat nyentukka kempang datai jari.

Kelimpah ari nya, pekara bukai ke tau ngasuh orang lelaki ngerinsa iya nya napi penyuntuk ba ruang bilik tauka maya iya agi mit kala kena jamah apai indai,” ku iya.

Taja pia, Fatimah nandu, enti sema orang indu tauka anak indu bisi betapi enggau penanggil bansa tu, sida patut ngeripot ngagai PDRM tauka ngelawa sepital sebedau ngaga ripot ngagai JKMS.

“Nya alai, enti sema orang indu tauka bala anak bisi betapi enggau penanggul, tu mayuh ejensi ke ulih alai mutarka penanggul tu.

“Nya kebuah, opis menteri ngembuan kaul ke manah enggau ejensi bukai, ngambika muntang ngemutarka sesebengkah kes.

“Prosedur Operasyen Standard (SOP) ba sesebengkah ejensi enda sebaka, PDRM bisi SOP kediri empu pia mega JKMS. SOP tu enda tau enda dititih,” ku iya.

Ba bengkel nya, bisi tiga akta Kasar ba Orang Indu, Anak Mit enggau Ulah Enda Menuku ke enda tau enda bisi sempekat pemereti ati nyalin reti jaku kasar ba ruang bilik, kasar ba anak mit sereta ulah enda menuku.

“Pengawa ke digaga kami dalam bengkel tu, iya nya beratika kaul kerejasama genap ejensi ke bekaul dalam mutarka penanggul kasar ba Orang Indu enggau Anak Mit, enda bepanggai ba sebuh ejensi aja,” ku iya.

Sama bisi ngulu pengawa nya, Direktor Opis Orang Indu enggau Pemansang Diri Sebilik, Noriah Ahmad enggau Ketuai Opis Pemansik Penyalah (JSJ) Dato Dev Kumar.

// Dikarang Judan Bungap //

SAPA DULU DATAI: Pemekit baru melengka diri ngelawa adan.

KANOWIT: Pekit Lumba Perau Laju ke diatur beserimbai enggau Pesta Kanowit 2016 ditu udah mujur tembu, kilah ensana.

Baka taun ke sebedau tu, mensia mayuh ari macham bengkah menua bela datai nedat tebing Sungai Kanowit ngemataka lumba nya.

Pekit ke dianti mensia mayuh iya nya kategori SST60 Pro Class (Race 1) ti mandangka tim Meligai Warrior mujur ngempu gelar champion sereta mega ba penuduk lumur dua ketegori nya.

Ba kategori tu tim Miratrisya ngempu penuduk lumur tiga.

Nambahka nya, sekali agi tim Meligai Warrior nyadi champion ba kategori SST60 Pro Class (Race 2) alai maya nya penuduk dua enggau tiga diempu tim Xtreme Viking enggau Eighty Ninety.

Ba kategori 50HP & Below (Race 1), tim Belalang Nyembur dipadu nyadi champion lalu ditangkan tim Penanjong enggau Ferrari ba penuduk lumur dua enggau tiga.

Nangkan ke nya, tim Orion mujur ngalahka pemekit ke bukai lalu mujur megai gelar champion ba kategori 50HP & Below (Race 2).

Tim Belalang Nyembur enggau Penanjong ngempu penuduk lumur dua enggau tiga.

Kategori 30HP Tunnel Boat 3 Cylinder (Race 1) mandangka tim Orion sekali agi mujur megai gelar champion lalu penuduk lumur dua enggau tiga diempu tim Ganas Pasir Ngabu Baleh enggau Johan Racing Team.

Ba ketegori 30HP Tunnel Boat 3 Cylinder (Race 2), tim Orion sekali agi ngalahka tim bukai sebedau ngempu gelar champion.

Tim Orion Song enggau Johan ngempu penuduk lumur dua enggau tiga.

Ba kategori 30HP 2 Cylinder Tunnelboat (Race 1), tim JSM Adong Belalai ngempu gelar champion lalu ditangkan tim BGRT ba penuduk lumur dua enggau Seri Bukit Famely ba penuduk lumur tiga.

Gelar champion ba kategori tu (Race 2) diempu JSM Adong Belalai lalu BGRT megai penuduk lumur dua enggau Seri Famely ba penuduk lumur tiga.

Ba kategori 18HP Tunnelboat (Race 1), gelar champion diempu GB Group Tan, JSM ba penuduk lumur dua enggau tim BGRT ngempu penuduk lumur tiga.

Penuduk champion ba kategori tu (Race 2) diempu GB Group Tan lalu ditangkan BGRT enggau MRT ba penuduk lumur dua enggau tiga.

Ketegori 18HP Long Boat (Race 1) mandangka tim Nanga Sengayan nyadi champion, Racing 1 Miri ngempu penuduk lumur dua enggau Ensulit Langit ba penuduk lumur tiga.

Tim Nanga Sengayan sekali agi mujur nyadi champion ba kategori ke sebaka (Race 2) lalu Racing 1 Miri ba penuduk lumur dua enggau Ngemah RT lumur tiga.

1…2…3!!!: Kaban Kunsil Nengeri (ADUN) Machan Allan Siden Gramong ngelai pekit belabuh.

BERENGKAH: Bala pemekit benung deka besemekih pengelaju.

JULAU: Ketuai komuniti kelebih agi ti dichiri perintah baka tuai rumah, tauka tuai ke bukai sereta Komiti Pemansang enggau Pengelikun Genturung Pendiau (JKKK) ukai semina nyadi mata enggau pending perintah aja.

Sida mega patut nyadi orang ke mantaika buah runding sentang pekara ti bekaul enggau tanggung pengawa sida, ku Pemesai Pelilih Julau Mohd Said Atoi lebuh ti ngulu pengawa nyuaka chek Projek Mit Menua Pesisir (MRP) enggau surat chiri tuai komuniti ba Balai Komuniti ditu bedau lama.

“Guna tuai di tetiap genturung pendiau iya nya mai buah runding perintah seraya sida patut ngerembaika berita ti betul ke meri penemu bekaul polisi perintah enggau program pemansang,” ku iya nerang.

Kerejasama entara tuai genturung pendiau enggau opis iya mega amat dikemerat kelebih agi ba sentang sistem pemeri perintah, ku iya nambah.

Dikena negutka kerejasama entara opis sida enggau JKKK, Pemesai Pelilih mesan ngambika sida seruran ngaul pangan diri.

Iya mega ngingatka semua tuai komuniti bela nyukung sebarang program ti diatur perintah.

Sida patut nyadika tu seiti pelasar mandangka diri ba program rasmi ti diatur ba genturung pendiau sida, ku iya ngelalau. Sida mega patut beterima kasih nuju perintah laban udah meri basa ngagai sida mega tanggungpengawa tu pia mega udah meri elawin ketegal sida ti udah nyaga bala rayat.

Beserimbai enggau pengawa nya, bisi sepuluh iku tuai komuniti udah nerima surat chiri nampung servis sida ngagai empat taun agi.

Sida tu iya nya Tuai Komuniti China Kapitan Liang Ching Chang  enggau semilan iku Tuai Rumah iya nya  Barak Ranking, Bani Rimban, Jepun Lamit, Nyanau Kilukut, Mauwa Langgat, Malang Angot, Ringgit Janpong, Jemmy Janin enggau Saba Sanggai.

ADUN Meluan Rolland Duat ke udah dipebasa nyuaka surat chiri tu ngelalau semua ketuai ngambika seruran ngerapitka kaul enggau iya sereta perintah ngambika nadai penanggul lebuh ti meri projek pemansang ngagai sitak sida.

Peranak sitak Meluan mujur ulh nerima agi belanja MRP, ti diberi ari baruh Program Transfomasyen Menua Pesisir, projek sereta servis ke bukai ari iya laban sida udah meri sukung ngagai BN lebuh pengawa bepilih bedau lama, ku iya.

Sama bnisi ngulu pengawa tu iya nya Pengari Opis Pelilih Sarikei Henry Gimong, SAO Jabang Juntan ari Opis Pelilih Kanowit enggau Prinsipal Sekula Sekondari (SMK) Julau, Christopher Kelebit.

Dikarang Jacqueline R. David//

AGI TINGGAL: Penanggul sekeda nembiak Iban kitai di menua pesisir enda betatika pemerat pelajar, ngujungka nembiak kitai Iban jauh tinggal dibanding enggau bansa bukai.

KUCHING: Randau ke-2 Bansa Asal pasal Pengawa Sekula di Malaysia (Second Malaysia Indigenous Peoples’ Conference on Education tauka MIPCE II) ti diatur di Pantai Damai Resort, kena 20-22 September tu tadi.

Randau nya keterubah endar diatur di Sarawak, digulu urung 282 Bansa Asal ari serata Malaysia nyengkaum bala pengari ari opis Perintah.

Dalam randau nya, urung 40 iti pansik ti bisi dipejalaika di dalam menua tu kelebih agi ari bala pengajar Sekula Tinggi sereta pansik ari menua luar bekait enggau   “Jaku sereta Jalai Pengidup enggau Pengawa Sekula” bisi dibantai sereta dikerandau enggau bala mayuh.

Jaku Asal- Siti ari batang penemu ke mayuh dikerandau lalu nyadi ke pemutus randau -iya nya pasal Jaku Asal. Nitihka penerang ari Dr. Sheldon Shaeffer, urung  81 peratus ari 136 iti Jaku Bansa Asal dalam menua Malaysia tu udah tau dikumbai “bisi penanggul”  tauka “mati”.

Ba penemu Gerempung Dunya (United Nations) reti jaku ke “bisi penanggul” tu sama enggau semina rebak apai aja agi ulih bejaku (rebak anak enda agi ulih bejaku) ngena Jaku Asal nya.

Lalu reti jaku ke “bisi penusah” tu sama enggau semina ba rebak aki aja agi ulih bejaku ngena Jaku Asal. Pia mega, enti kitai ngira ari rampa ke besai agi, dalam dunya tu kitai mensia bisi urung 6, 000 bansa Jaku, tang 20-50 peratus ari jaku nya deka punas dalam Taun 2100.

Semina urung 300 ngagai 500 iti aja Jaku dalam dunya tu ke endang disadang enda punas lalu meruan dikena rebak ke dudi ila. (Krauss 2007).

Andrew Paul, ke mansik pekara tu lalu seiku ari pemesai ke meri licha (ari SADIA Sarawak) madah, enti kitai beratika Jaku Iban, urung setengah ari leka Jaku Iban (vocabulary) nya datai ari leka jaku ke bekait enggau pengidup lama kitai suba.

“Ambika banding baka kampung sereta semua utai ti bisi dalam kampung, sungai enggau semua utai ti bisi dalam sungai, semua utai ti nemu terebai baka burung, semua utai ke bekait enggau pengawa bumai-betaun, semua utai ke suah disebut ba Leka Main enggau semua perengka ke dikena kitai besesehar ngidupka diri di Rumah Panjai jeman kelia.

“Nyadi leka jaku tu endang disadang deka nyadi majak jarang laban utai lama tauka pengidup lama nya, nyau makin jauh ari pengidup kitai kemaya hari tu. Tang leka Jaku kitai ke dikena besesehari nya pan nemu punas, enti sema kitai enda ngemeratka nembiak kitai bejaku ngena Jaku Asal kelebih agi ba maya umur ke agi biak.

“Ambika chunto, ari pansik ke bisi dibantai ba “National Colloquium to address the educational needs of Native American Students, USA, 2005”, ketegal ngena Jaku English kenyau ari Sekula Tumu/Sekula Primari dia ba siti sekula (Window Rock Unified School District, Fort Defiance), keterubah bisi urung  89 peratus nembiak Asal Bansa Navajo nemu bejaku Asal, tang sepuluh taun udah nya, semina 3peratus aja agi nemu bejaku Navajo.

“ Nitihka pansik nembiak ti bisi peluang ngena Jaku Asal lebuh maya agi mit suah  agi ulih ingat sereta bejaku ngena Jaku Asal nya lebuh maya udah tuai,” ku Andrew.

Tang kelimpah ari ngetanka Jaku siti-siti bansa, Jaku Asal tu mega mayuh udah ditemu ulih mai mayuh pemanah ngagai pengawa sekula kelebih agi ba Sekula Tumu. Enti nitihka pansik ke udah digaga, sekeda ari pengelebih Jaku Asal ke dikena ba Sekula Tumu enggau Sekula Primeri nya;

1. Nembiak mudah sereta jampat agi mereti lebuh diajar bejaku, macha enggau nulis ngena Jaku Asal, ari ke diajar ngena Jaku bukai. Kebuah baka nya, laban jaku bukai nya tau ngasuh utai ke diajar nya tau tusah ketegal jaku tang ukai ketegal utai ke diajar. Pansik mega madahka  lebuh nembiak nya udah nemu macha sereta nulis ngena Jaku Asal, nembiak nya deka jampat agi belajar ke jaku bukai.

2. Pengajar suah endar saru ke nembiak ti enda meretika utai diajar nya “nembiak ke lubah”, taja pan sekeda ari nembiak nya ukai nembiak ke lubah tang sida enda meretika utai ke diajar ketegal jaku ke dikena ngajar. Nembiak ke ngasaika diri enda ulih berunding tauka enda ulih meretika utai ke diajar lebuh maya ba umur ke agi biak, selalu iya deka ngembuan pengurang ari sukut pengering runding sereta pemerani berunding dalam pengawa sekula. Nembiak ke diajar ngena Jaku Asal mega selalu iya kurang agi deka badu sekula enti dibanding enggau nembiak ke diajar terus ngena jaku bukai. Ambika chunto, di menua Guatemala, sida iya belabuh ngena polisi Jaku Asal ba sekula dikena sida iya mutarka penanggul bala nembiak maya ke enggai nurun sekula (semina 40% ke deka nurun) lalu setengah ari sida nya badu sekula ba primari1. (Ducher, 1995)

3. Enti diajar ngena Jaku Asal, nembiak nyamai agi betanya –saut, berandauka penemu baru enggau gagit (enthusiasm). Mayuh pansik madahka nembiak ke diajar dalam kelas ngena jaku asal jauh lebih gagit (berebut deka nyaut tanya pengajar) ari nembiak ke diajar ngena jaku bukai (suah agi diau sereta ngelalaika diri).

Enti kitai ngenang pasal jaku ke bisi dikena ba pengawa sekula dalam dunya tu, bisi lima iti chara siti jaku dipejalaika ba pengawa Sekula – Hoius (1976),

1. Dikena nyadika “Jaku dikena ngajar” (medium of instruction) ba semua renggat sekula.

2. Dikena nyadika “Jaku dikena ngajar” ba sekeda renggat sekula udah nya diganti enggau jaku bukai.

3. Dikena nyadika “Jaku dikena ngajar” ba sekeda subjek aja.

4. Diajar ba siti subjek aja tang enda dikena nyadi ke “Jaku dikena ngajar”

5. Nadai dikena sekali dalam pengawa Sekula.

Di Malaysia, Jaku Bansa Asal dikena ba chara lumur 2 (Jaku Mandarin, Tamil), lumur 4 (Jaku Iban) enggau chara lumur 5 (mayuh  jaku asal ke bukai).

Andrew madahka ba peminta ari pemutus randau tu tadi, semua orang ke bisi enggau ngulu pengawa randau nya besetuju minta Jaku Orang Asal dikena nitih chara Lumur 2, iya nya minta Jaku Asal dikena ba Sekula Tumu, Sekula Tadika, Pra-Sekula enggau sekula Primari.

“Peminta tu sebaka enggau sistem sekula ti udah dipejalaika bansa China enggau  India ba menua tu kenyau ari penumbuh Serakup Malaysia 1963 suba.

“Pemutus penemu ari randau tu tadi deka disua ngagai Menteri Pelajar Malaysia,” ku iya.

Kelimpah ari nya mega, pemutus penemu pasal Jaku Asal tu, sigi ukai penemu ke baru, ambika chunto; UNESCO udah mujur bejalaika pengawa nerang ngagai orang mayuh pasal pemesai reti Jaku Asal tu kenyau ari taun 1953 kelia, ku iya.

Di menua USA, undang-undang udah digaga dalam taun 1968 dikena netapka Jaku Orang Asal tau dikena nyadi jaku ke dikena ngajar sampai anak orang asal nya nemu Jaku English (Rotberg 1984).

Ku iya, sekeda menua ke dudi agi bisi udah ngubah undang-undang menua lalu bejalaika polisi ngena Jaku Asal, iyanya baka menua Vietnam (1992), Bolivia (1994), Papua New Guinea (1995), Ghana (1996), Combodia (2012), Thailand (2012) enggau The Philippines (2013).

“Lalu pia mega, kenyau ari taun 2007 suba, bisi lebih 20 iti menua udah tauka benung bejalaika projek nguji ngena Jaku Asal tu ba sekula tumu. Di Malaysia, PACOS di Sabah udah mujur numbuhka 25 iti chabang sekula tumu ke ngena Jaku Asal di Sabah.

“Bala DBNA mega benung mupuk numbuhka sekula tumu ngena Jaku Asal ba menua bansa Bidayuh,” ku iya.

Penanggul Nembiak Iban Dalam Pengawa Sekula- Kelimpah ari randau pasal Jaku Asal nya, bisi dua iti pansik bekait enggau kitai Iban, sama bisi dibantai ba randau nya.

Pansik ti digaga  Dr. Rosline Sandai madahka, pasal ngaga chara ke dikena ngajar “Leka Main” ngagai kitai Iban ba sekula lalu kedua, iya nya bala ari SADIA bisi mega mantaika pansik sida ia pasal utai ke tau nyadi penanggul sereta pemujur nembiak kitai Iban menua ulu dalam pengawa sekula.

Enti nitih, mayuh pansik ke udah digaga orang dalam dunya tu, penanggul ke bekait enggau pemujur seiku-seiku nembiak dalam pengawa sekula tu mayuh, utai ke tau nanggul belabuh kenyau ari pemakai maya ke agi dalam kandung, ditampung ngagai pengerai nembiak maya iya udah ada (baka ke enda tentu pengerai, enda tentu meda, enda tentu ningga), pengidup sida sebilik (baka penatai pemisi, pengarap, takah pelajar, pengawa, pemendar ngemeranka pengawa sekula) , jalai pengidup orang ke begenturung pendiau (baka Adat, pantang, pengarap, jaku), menua ke alai diau (baka menua Ulu tauka nengeri, menua  ke benung mansang tauka udah mansang, polisi Perintah), Sekula (baka perengka guna sekula, perengka ke dikena besehari, atur sekula, pemesai sekula, pemayuh nembiak), Pengajar (baka takah sekula, takah pengelandik, chukup latih tauka enda, pengelama udah gawa, pemendar, chara begulai enggau nembiak, penanggul ari jaku/Adat, indu tauka lelaki), atur kelas (baka chara ngajar, utai ke diajar, perengka kena ngajar, chara nguji nembiak, chara besaut-tanya) enggau macam-macam pekara bukai.

Andrew nandu baru, madahka pansik ari Sadia nya berindik ari utai ti bisi dipeda 53 iku kitai Iban ke bisi udah bulih degree enggau penatai asal sereta besekula di menua ulu.

“Sida 53 iku tu dipinta ngingat sereta bekunsika utai ka bisi dipeda sida iya nyadi ba Sekula lebuh sida iya nyapai umur 15 taun ke baruh. Pansik tu dipejalaika sama bela ngena chara ‘qualitative’ (randau sereta tanya ke nadai disekat penemu) enggau ‘quantitative’ (tanya ke udah diatur).

“Tang ba sara ke sekali tu, semina sekeda ari pansik ke bisi udah digaga nya aja bisi sempat dikunsika kitai.

Pengurang Penatai Pemisi -Nitihka pansik kami sebuat, penanggul ke pemadu besai (73%) nuntung nembiak kitai bansa dalam pengawa sekula,ketegal  kurang penatai pemisi (nyengkaum semua penanggul bukai ke bisi bekaul enggau penanggul kurang penatai pemisi). Pengurang dalam penatai pemisi tu sigi lama udah dipansik serta ditemu orang ukai semina ulih mai pemedis ari sukut pengurang belanja sereta pengurang pemakai ke manah ke pengerai tang mega udah ditemu ulih mai mayuh macam pengurang ke bukai, kelebih agi ari sukut pengelemi runding sereta pengering ati dalam pengawa sekula.

“Reti nya, penanggul penatai pemisi tu endang udah lama ditemu balat endar mai pengurang ari segi pemujur nembiak dalam pengawa sekula. Tang penanggul tu ukai utai ke ulih terus diputar ke kitai seiku tauka bala raban NGO, laban penanggul penatai pemisi tu balat endar bekait enggau atur pengawa Perintah lalu begunaka puku ke besai.

“Nya alai, kena nyambung sara ba senentang penanggul penatai pemisi tu kitai enggai nyadi enda dulu ngait ke iya enggau langur pengawa Perintah.

Nyadi penanggul penatai pemisi tu bisi udah masuk dalam langgur pengawa Perintah ke deka ngemansangka pengawa sekula tauka “Malaysia Education Blueprint 2013-2025” (Preschool to Post-Secondary Education). Dalam langgur nya, pengurang penatai pemisi tu endang sigi udah diaku sereta diterima perintah nyadi ke siti kebuah ke ngasuh pemujur nembiak di menua Ulu jauh tinggal ari pemujur nembiak ke di nengeri.

“Nya alai, dalam langgur ti sama, perintah madah  enggau terang tuju sida  deka nyendiaka sekula ke sama ulih meri peluang ngagai semua nembiak, ngambika semua nembiak bela ulih mujur dalam pengawa sekula enggau enda ngira endur diau, indu-lelaki tauka pematai pemisi (equity).

Berindik ari langgur Malaysia Education Blueprint 2013-2025 nya, Opis Pelajar madahka deka bejalaika atur nitihka juluk ati sida iya ke deka ngurangka setengah (50%) ari “bida” pemujur pelajar nembiak sekula antara:

i) Menua Ulu enggau di mengeri, ke alai sida iya mega madah deka ngurangka 25% “bida” pemujur pengawa sekula antara i) penatai-pemisi sereta ii) Indu enggau lelaki dalam Taun 2020. Ari langur nya tadi, dia Opis Pelajar bisi udah bejalaika mayuh macham atur baka ngangkatka perengka guna ke dikena ba sekula, meri bantu ngagai nembiak ke kurang penatai pemisi, meri latih ngagai bala pengajar, ngemeranka chara belajar ke berunding baka HOTS, numbuhka chara bekungsika penemu ti baru baka VLE, meri kuasa ngagai JPN enggau PPD meri saup, ngulu sereta ngemataka pemansang sereta pemujur sekula, nyendiaka 1, 757 iku SISC+ & SIPartners+ enggau mayuh agi utai bukai.

Lalu asil ari pengawa Opis Pelajar nya tadi bisi udah dibantai ba ripot ninting taun kenyau ari taun 2013, 2014 enggau 2015 (Malaysia Education Blueprint 2013-2025). Bagi Taun 2015, ari segi bida antara pemujur di Menua Ulu enggau di mengeri di Sarawak, i) ba UPSR bida nya bisi nurun 10%, tang ba SPM bida nya niki 1.22%.

Ripot ti sama mega bisi madahka sekula ke kurang pemujur (Band 6/7) bisi nurun ari 139 (2014) ngagai 95 (2015). Tang bida antara i) penatai-pemisi sereta ii) Indu enggau lelaki nadai diayanka ba ripot nya, engka laban juluk nya ditetapka nurun 25% lebuh datai ba taun 2020 ila.

Enti kitai beratika enggau silik, bida pemujur antara menua Ulu enggau di nengeri ba UPSR ke bisi udah nurun 10% di Sarawak nya sigi siti berita ke manah, tang enti kitai mandingka pemujur nembiak kitai di Sarawak enggau pemujur nembiak di Semenanjung, taja pan enti sema bida pemujur antara menua ulu enggau di mengeri di Sarawak ulih diturunka 100% -ngagai 0% (taja pan Juluk ati Malaysia Education Blueprint 2013-2025 semina naka nurun 50% aja), agi meh pemujur kitai di Sarawak tu jauh tinggal ari pemujur nembiak ke besekula di Semenanjung baka ke bisi ayan ba (chart) “Banding Ari Segi Pemujur Antara Nengeri ba UPSR enggau SPM 2011”. Naka ba ripot 2015, pemujur nembiak ba SPM nadai udah berubah antara menua ulu enggau di mengeri di Sarawak.

Ari sukut pelajar di renggat Ke-tiga (Tertiary enrolment/Diploma tauka Degree), enti diperatika utai ke nyadi ba dunya, dalam taun 2014 suba, nitihka penerang ari “World Bank Data-UNESCO Institute for Statistics”, penyampau nembiak ti nampung pelajar ngagai Pelajar Renggat ke-3 di menua South Korea, urung 95%.

“Reti nya ari 100 iku nembiak ke berumur 5 taun, 95 iku nembiak mujur nampung pelajar ngagai renggat ke-3, lalu ba penuduk lumur dua, menua Finland enggau penyampau 91% lalu dalam taun ke sama, Malaysia nyapai urung 39% -kira 56% tinggal ari South Korea.

“Enggi bala Bidayuh bisi 23% dalam taun 2013 (Jati, 2013), lalu enggi kitai Iban -nadai udah bisi data ke baka nya, tang mayuh orang ngasaika kitai Iban agi jauh tinggal ari bala Bidayuh, retinya jauh baruh ari 23%,” ku iya.

Lalu enti kitai ngenang langgur Malaysia Education Blueprint 2015-2025 (Higher Education), Perintah Malaysia nyadang pemujur nembiak di menua Malaysia ke ulih nampung pelajar ngagai Renggat ke-3 ulih diangkatka ari 36% (2012), 39% (2014) ngagai 53% dalam taun 2025 (3% lebih ari setengah).

Ku Andrew, ari pansik bala nembiak ke tegap megai pengarap tu bisi ngembuan ati ke jauh kering sereta liat lebuh napi penanggul kurang penatai pemisi.

Dikarang Rengenyan Labang//

NYULUT: Entara raban 20 Gerup ke pemadu nyulut ti mujur masuk Konvensyen KIK Opis Perintah Renggat Nengeri Sarawak 2016.

KUCHING: Konvensyen Kumpulan Inovatif & Kreatif (KIK) Perkhidmatan Awam Peringkat Negeri Sarawak 2016 bisi dipasuk 20 gerup, ti diatur kemari enggau sehari tu nyerumba Minggu Inovasyen 2016.

Objektif Konvensyen KIK Ke-7 ke diatur ba Hotel Imperial, Kuching dikena nempa tauka numbuhka budaya ngemanahka  agi sereta ngaga penemu baru awakka ulih ngasilka kereja ti optimum.

Dua puluh (20) Gerup KIK ti pemadu nyulut di nengeri tu nya berebutka tiga kategori iya nya Kategori Teknikal, Kategori Pengurusan enggau Kategori Hybrid iya nya kategori baru

Entara 20 gerup nya nyengkaum Opis Jil Penjara (Indu Jil Sibu) Bagi Menua Sibu tauka Gerup BLACK OLIVE; Majlis Bandaraya Miri (TATSUNOKO); Opis Kampung Sarawak (SARAWAKENISIS); Majlis Bandaraya Kuching Selatan (PEKA X); Lembaga Air Kuching (B TEN); Pusat Kepelbagaian Biologi Sarawak (BIOBEGONIA); Opis Pengerara Api enggau Penyah Penusah Malaysia (JBPM), Nengeri Sarawak (ENGINE14); Perbadanan Kemajuan Perusahaan Kayu Sarawak (TIMEPIECE) enggau Opis Pelilih Subis (ASTRA TECH), ti berebutka Kategori Teknikal.

Kategori Pengurusan diperebutka Gerup Opis Tanah & Survei (JTS) Bagi Menua Limbang (LANDS TAHAI Q); JTS Bagi Menua Mukah (ACCURATE); Opisn Imigresyen Malaysia, Nengeri Sarawak (SKY CREW); Opist Residen Bagi Menua Mukah (TAPOW) enggau Opis Pengerejista Bansa Menua, Nengeri Sarawak (S4P).

Kategori baru iya nya kategori Hybrid dipasuk gerup Lembaga pelabuhan Miri & JBPM Negeri Sarawak (K-9INE); Opis Betanam Betupi Bagi Menua Bintulu & Universiti Putra Malaysia (MENAUL BATU II) enggau Majlis Daerah Serian & Komuniti (SERDIC).

Berup ti menang tiga kategori nya deka ngarika Sarawak dalam konvensyen renggat Menua ke diatur di Nengeri Melaka kena 10 enggau 11 November tu ila.

Kelimpah ari Konvensyen KIK nya, pengawa pemandang enggau sesi Diskusi Inovasyen (20 Oktober) mega bisi diatur nyerumba Minggu Inovasyen ti bepalan ba hotel ke sama.

Kena 21 Oktober 2016, Pengerami Ngintu Minggu Inovasyen 2016 deka diatur lalu pengerami nutup dipelaba deka dipenyadika Kepala Menteri Datuk Patinggi Tan Sri Adenan Satem ke diatur ba Hotel Imperial, Kuching.

Bisi urung 300 iku pemerati datai ngemataka 20 gerup mantaika asil KIK ba konvensyen nya kemari.

KUCHING: Pasukan Polis Gerak Am (PGA) udah mujur nangkap insap ti dibai tama nengah chara belalai ti dianggar beungkus lebih setengah juta ringgit ba dua pengawa ngabas ngenyit di Jalai Kuching-Serian lemai ensanus, pemujur ti pemadu besai tim nya taun tu.

Komander PGA Briged Sarawak, SAC Khaw Kok Chin madah, nitihka pansik penerang, siti tim PGA udah ngabas ngenyit sebuah rumah di Km 18.5 Kuching-Serian urung pukul 4 lemai ensanus sereta nangkap 10,850 katun insap premium gold ti dianggar beungkus RM435,500 enda nyengkaum chukai.

Ku iya dalam operasyen nangkanka nya, tim nya udah ngabas ngenyit sebuah agi rumah urung 800 meter ari palan operasyen keterubah pengudah sejam lalu nangkap 7,150 katun agi insap mayuh bansa chap ti dianggar beungkus RM156,000.

Ku iya, naka ke diatu nadai agi ditangkap bekaul enggau kes insap dibai tama nengah chara belalai, tang ku iya PGA mujur ngenanka dua ti deka nyuap raban tim PGA RM15,000 ba operasyen nya.

“Dua lelaki berumur 40 enggau 62 tahun udah nya diserahka ngagai raban Opis Penagang Pengawa Makai Suap Malaysia (SPRM) ti sama bisi enggau ba operasyen nya,” ku iya ba aum media di Indu Opis Briged PGA Sarawak, di Batu Kawa ditu kemari.

Ku Khaw, orang ti mai insap nya nengah chara belalai ngelama tu enda naruh insap nya ba siti endur dalam timpuh ke lama sereta mindah ari sebuah rumah ke bukai maya nyadung nya ngambika dijual.

Ku iya tim nya agi nasat sapa ketuai ngereja pengawa nya sereta deka bebedar agi ngemunaska pengawa mai tama insap nengah chara belalai nya.

Ku iya kes dispansik nengah Seksyen 135 Akta Kastam 1967. — Bernama

S4S ngansak Pengelicha Universiti Malaysia Perlis minta ampun ketegal udah ngemaruhka peranak Sarawak

KUCHING: Parti Bansa Dayak Sarawak Baru (PBDSB) nyukung penerang berita pemadu baru dikeluarka Sarawak for Sarawakians (S4S) ngansak Pengelicha Universiti Malaysia Perlis minta ampun ketegal ngemaruhka peranak Sarawak ti ngasuh peranak Sarawak pansut ngagai sida ti deka mantaika tanya pasal menua asal sida empu di Malaysia.

“Kita enda nyangka jaku ke baka nya pansut ari seiku pengelicha ti ngembuan pelajar tinggi ari universiti, kelebih agi ari universiti Malaysia. Tu nyata ngayanka pengelicha tu suntuk penemu pasal sejarah Malaysia ditumbuh. Genap iku peranak Sarawak kemaya hari nemu Malaysia tu ditumbuh tiga bengkah menua, ke bendar patut nydi kaban kunsi ke sama, enti enda nama kebuah Kepala Menteri Sarawak ransing negika kuasa autonomi Sarawak?,” ku Presiden PBDSB, Cobbold John.

Dalam penerang berita ngagai The Borneo Post kemari, Cobbold madahka pengelicha nya patut ngiga pekara ke betul sebedau ngemaruh peranak Sarawak.

“Tu pekara ti sensitif lebuh datai ba Sempekat Malaysia 1963 laban tu ukai pekara baru ba peranak Sarawak,” ku iya.

Cobbold dalam penerang nya madah, taja pan Kepala Menteri Datuk Patinggi Tan Sri Adenan Satem bisi madah dalam penerang berita, sebedau diubah dalam taun 1976, Sarawak enggau Sabah ari baruh kategori ke bebida ari sekeda nengeri di Semenanjung, netapka nengeri patut nyadi nengeri dalam federasyen Malaya, Sarawak, Sabah enggau Singapura.

“Lalu Sarawak enggau Sabah ke bendar nyadi kaban manah nengah Sempekat Malaysia 1963,” ku iya.

“Batang pekara iya nya Sempekat Malaysia enda ulih diubah, taja Konstitusyen Perintah Besai nukar iya baru dalam taun 1976, sempekat nya ke bendar sempekat antarabansa rasmi ti rejista enggau Gempung Gerempung Bansa-Bansa Bersatu. Ari sukut ni Federasyen Malaya bisi hak sereta pemendar ngubah baru sempekat antarabansa enggau nadai sebarang pemendar ari UN?,” tanya Cobbold.

Ku iya nambah, nyata endar federasyen Malaya enda bebasaka sempekat antarabansa lalu jaku pejah dipansutka pengelicha Universiti Malaysia Perlis nya kelai sida enda bebasaka nya.

“Ketegal enda nemu pasal Sempekat Malaysia 1963 (MA63) tu nyadika batang kebuah penyaru penemu ba pengamat sejarah Malaysia ditumbuh,” ku iya.

Ku iya baru, taja pan bala nembiak sekula diajar pasal Malaysia ditumbuh bepelasarka ubah ke digaga Konstitusyen Perintah Besai dalam taun 1976, ti ukai pekara ke amat ba MA63, asal (IGC) Inter-Governmental Committee Report, enggau ke bukai.

“Nyadi parti politik rayat Sarawak, PBDSB seruran nyukung sebarang enggau semua pekara ungkup pemaik hak autonomi Sarawak baka kaban kunsi ti sebela lalu nyukung Kepala Menteri Sarawak dalam pengawa dipejalaika iya minta hak autonomi Sarawak.Tu ukai semina pasal pekara politik aja tang mega lebih agi pasal minta pulai baru hak Sarawak baka dalam sempekat ke dipesetuju dalam taun 1963 suba. Laban kenyau ari nya mayuh pengurang ba sekeda kuasa, lalu kitai endang patut ngambi pulai hak kitai ba pekara tu.

“Nyema Faderasyen Malaya enda agi ulih ngintu pemaik nyadi kaban kunsi, kitai minta Kepala Menteri Sarawak enggau gempung parti iya ningkilka diri ari Barisan Nasional (BN) ngambika enda disiping, laban Kepala Menteri udah pengamat Malaysia udah enda ngelanggar Undang-undang antarabansa enti sida enda tetitihka Sempekat Malaysia kti disain dalam taun 1963,” ku Cobbold.

Iya mega madah, kelalu mayuh pekara udah nyadi menya lalu ke diatu Sarawak dikemeli ba hak sereta diaku nyadi nengeri tang patut dipebasa nyadi sebagi ari kaban dalam Malaysia.

PBDSB meransang semua peranak Sarawak terus begempung sereta nyukung negika hak autonomi Sarawak nengah chara nyukung pangan diri sereta parti politik di menua tu, kaban Gempung Ukai Dikuasa Perintah (NGO), nentuka kitai ulih nempa pelasar ke tegap nyapai juluk enggau tuju minta pulai baru integriti Sarawak enggau ngambi baru hak basa Sarawak ti udah lenyau kenyau ari 40 taun ke udah pengudah ubah digaga dalam taun 1976.

“Aram mih nempa Sarawak tebilang baru,” ku iya nyimpul jaku.

Dikarang Jacqueline R. David//

Penemu ti dipansutka iya nengah licha ‘History of Sarawak’ udah ngenyima ati peranak Sarawak
KUCHING: Pengari Sarawak for Sarawakian (S4S) Peter John anak Jaban kemari, ngansak seiku Pengelicha ari Universiti Malaysia Perlis (UMP) patut minta ampun ngagai rayat Sarawak laban udah ngasuh rayat Sarawak pindah enti sida iya enda lantang ati dalam Malaysia.

Peter madah Profesor Datuk Dr Ramlah Adam udah ngemaluka semua rayat Sarawak enggau jaku iya ba licha ‘History of Sarawak – A Journey to Merdeka: Sarawak in Malaysia’, kilah ensana.

“Iya ngasaika semua rayat Sarawak patut ninggalka menua diri ngambi orang Semenanjung muntang diau di menua tu?,” tanya Peter ba aum media nya.

Peter nandu, jaku Ramlah munyi nya ngemaluka semua rayat Sarawak lalu nya nyengkaum ngemaluka jaku Kepala Menteri (Datuk Patinggi Tan Sri Adenan Satem) ke berani mantaika pekara nya, bekait enggau hak sereta kuasa Sarawak.

Iya madah, S4S sereta gerempung NGO bukai udah suah minta hak sereta kuasa Sarawak diberi pulai nitihka Sempekat  Malaysia (MA) 1963, Ripot Komiti entara Ejensi Perintah sereta Ripot Komiti Cobbold.

“Nadai salah kitai minta kuasa sereta hak Sarawak dipulaika baru ari Perintah Besai pengudah 53 taun,” ku iya.

Iya madah Sarawak setuju numbuhka serakup Malaysia lalu berindik ari nya, sigi bisi hak minta pekara ke udah dipekat nengah MA.

“Kami enda ninggalka Malaysia ketegal seiku orang ari Semenanjung Malaysia ke enda ulih nerima penuduk sereta pinta kami,” ku Peter.

Ujung Minggu nyin tadi, Ramlah bisi mantaika keretas kereja iya bekait enggau penuduk Sarawak dalam Malaysia, bisi madahka pekara baka politik dibantai sereta diangkatka laban enda sepenemu pasal konsep menua Malaysia lalu ulih ngachau pengelikun menua.

Peter enggau seiku agi aktivis, Karen Shepherd, antara 400 iku mensia mayuh ke bisi datai ngulu licha nya.

KUNTAU: Kelas belajar bekuntau ASADIA 2016.

KUCHING: Akademi Serakup Dayak Iban Sarawak (ASADIA) nutup kelas belajarka  main asal taun 2016 kena 4 Disember, pengudah tembu sereta mujur ngatur semua lapan bengkah kelas main asal bansa Dayak kelebih agi main asal bansa Iban.

Lapan main asal nya nyengkaum kelas belajar ngajat bisi 75 iku, gendang pampat (48), bekuntau (20), pengap (3), nusuk marek empang (8), ajat Bidayuh tauka Birwhang Be’uh (11), sape (14) enggau kelas belajar betaboh (15).

Ketuai ASADIA, Mabong Unggang madahka diri temegah ati laban sekali agi akademi nya mujur ngatur main asal bansa Dayak setipak nengah rambai jaku akademi ‘Main Asal Kitai Tanggungpengawa Kitai’.

Iya ngarapka mensia mayuh kelebih raban bansa Dayak ulih terus nyukung sereta sama nyaup ngetanka main asal bansa kitai nengah pengawa nyereta kelas belajarka main asal ke bisi di ditumbuhka di menua tu kelebih agi ASADIA.

“Berindik ari pemujur ngatur semua kelas belajarka main asal nya, ASADIA merambu deka ngatur pengerami beserumpu makai lemai lalu nyuaka setipikit penyereta seraya nutup kelas main asal ASADIA taun 2016.

“Kami udah netapka kena 4 Disember tu ila endur ngatur pengerami beserumpu nya, lalu deka diatur ba Christian Ecumenical Centre (CEC) ditu.

“ASADIA ngarapka mensia mayuh terus nyukung pengawa ke diatur akademi tu awakka ulih meri peransang ngagai akademi ngetan sereta ngerembaika main asal Dayak lebih agi bansa kitai Iban,” ku iya madah ngagai Utusan Borneo.

Nitih ku Mabong, pengerami nya dipelaba deka digulu Sapit Kepala Menteri ti mega Menteri Betanam Betupi Moden enggau Ekonomi Menua Pesisir, Datuk Amar Douglas Uggah Embas.

Lebuh ke ngenang pasal kelas main asal nya, iya madahka kelas nya ukai semina diatur ba ASADIA ke bepalan ba Indu Opis Serakup Dayak Iban Sarawak di Kota Sentosa aja tang mega bisi diatur ba genturung pendiau, sekula sereta ba 10RRD Kem Muara Tuang.

Iya madahka diri temegah ati laban kelas ke diatur akademi nya ukai semina dipasuk raban besai tuai tang mega nyengkaum bala nembiak mit.

“Aku ngarika ASADIA meri besai terima kasih ngagai sukung ke udah diberi ngagai akademi,” ku iya.

Penerang silik bekaul enggau program tauka kelas ASADIA nyengkaum pengerami beserumpu makai lemai tau ditanya ngagai Mabong empu ba lumur 012-6925562 tauka sekretari ASADIA Melisa King ba lumur 013-8183549.

Dikarang Judan Bungap//

BAJIK: Michelle (duduk) dipadu nyadi Ratu Pesta Kanowit 2016 begambar begulai enggau Sharron (kiba) sereta Stephenie.

KANOWIT: Michelle Thomas Magal udah dipadu ngempu gelar Ratu Pesta Kanowit 2016 beserimbai enggau malam ke penudi Pesta Kanowit 2016, kena malam hari Minggu tu tadi.

Enggau tu, Michelle, 25 ti gawa nyadi indu misi di Pelilih Pakan mai pulai perais mata duit RM800 sereta disempulang enggau trofi.

Penuduk lumur dua diempu Sharron Valiny Nanong ari Sibu Jaya.

Iya ke beumur 21 taun mai pulai perais mata duit RM700 enggau trofi.

Nangkan ke penuduk nya, Stephenie Glen, 25, ari Sungai Ngemah, Kanowit dipadu megai penuduk lumur tiga lalu mai pulai perais mata duit RM600 enggau trofi.

Perais sida ke menang tu disuaka bini ADUN Ngemah Alexander Vincent, Susan Clement, bini Ex-Kaban Kunsil Nengeri (ADUN) Machan Datuk Gramong Juna, Dato Catherine Gramong sereta Jenny Empaling.

Pekit serak tu mujur matak penatai 17 iku pemekit ari Sibu, Sarikei, Bintangor, Kapit, Miri enggau Bintulu kelimpah Kanowit empu.

Kelimpah pekit nya, program ke bukai ti bisi diatur malam nya iya nya panggau pemerindang ari Champion Pekit Karaoke Lagu Iban, Melayu enggau China, ‘Gerak Kreatif’ (Poco-poco) kelimpah main asal ke dibantai Serakup Indu Dayak Sarawak (SIDS) Pampang Kanowit.

Kelai pengerami malam ke penudi tu iya nya mantaika bungai api.

Sama bela bisi datai maya tu iya nya Alexander Vincent, ADUN Machan Allan Siden Gramong, ADUN Meluan Roland Duat, ADUN Murum Kennedy Chuk Pai, Gramong enggau Chairman Komiti Pengatur Pesta Kanowit 2016 Katis Noel Nyabong.

Projek lima taun tu nyaga enggau ngidupka baru terumbu karang Taman Negara Terumbu Karang Miri-Sibuti 

MIRI: Projek RM8 juta ‘PETRONAS-Sarawak Forestry eco-Marine Conservation’ ba Taman Negara Terumbu Karang Miri-Sibuti deka nyadi peransang ba pengawa dagang temuai enggau komuniti berikan di Miri.

Kerejasama lima taun entara PETRONAS enggau Sarawak Forestry Corporation (SFC) deka nyaga enggau ngidupka baru terumbu karang kelingi 12,200 hektar Kompleks Terumbu Sibuti dalam kandang 186,930 hektar Taman Negara Terumbu Karang Miri-Sibuti.

“Projek tu ngelai pengawa ngintu rampa menua ti ngemeratka pengawa ngidupka baru enggau nambahka pemayuh bansa utai idup ba tasik di Sarawak ti nyauka punas ketegal pengawa berikan belalai,” ku Chairman PETRONAS Tan Sri Mohd Sidek Hassan rambau pengawa ngelanchar projek dilancharka Kepala Menteri Datuk Patinggi Tan Sri Adenan Satem ditu kemari.

Ku iya, Petronas endang bebendar nyaga rampa menua enggau holistik taja betapi enggau pemar pengelama 40 taun ke udah kenyau ari penumbuh iya berindik ari gaya rega minyak dunya niki diatu.

Ari baruh projek ngintu ti berengkah dipejalai taun nyin tadi, sepenyampau 1,750 ‘bebola’ terumbu karang pelesu deka diengkah ba terumbu karang, lalu udahnya ditangkan program nambahka penyedar ti deka dipejalai nyentuk taun 2019 ila.

‘Bebola’ terumbu pelesu tu deka nagang orang ti berikan ari taman negara nya laban pukat sida deka carik nyema tekait ba ‘bebola’ terumbu pelesu ke diengkah ba ngelingi terumbu karang.

“Kami ngarapka terumbu tu deka beranak sereta mai asil nambahka penyampau ikan di tasik Miri. Berindik ari tu, mayuh penyelam antarabansa deka datai sereta nyelam di kandang tasik terumbu karang Miri-Sibuti lalu aktiviti tu deka meri penguntung sektor dagang temuai.

“Lebih ari 2,000 orang berikan di Miri enggau Sibuti deka ngasaika asil berikan ti mayuh agi. Sosio-ekonomi deka jampat agi mansang pangka ari projek tu,” ku iya nandu.

Naka ke diatu, bisi 550 ‘bebola’ terumbu karang udah diengkah ba kandang tasik projek tu. Agi bisi 1,200 unit deka ditanam dalam taun 2017.

Pengudah ‘bebola’ terumbu karang ditanam, kaban projek tu deka berengkah bejalaika pengawa ba renggat kedua iya nya timpuh meresa terumbu sereta bejalaika pengawa Ngemanah, Pelajar enggau Program Ngelaku sereta Meri Penyedar (CEPA) ti dilangkar ke deka ngangkatka penyedar mensia mayuh pemesai guna pengawa nyaga enggau ngintu tasik. Renggat tu deka dipejalai berengkah ari taun 2017 ngagai taun 2019.

Projek tu dipelanja PETRONAS lalu SFC megai tanggungpengawa penau ba teknikal sereta baka ni chara ngereja pengawa nyaga enggau ngintu kandang menua sereta utai tumbuh enggau utai idup di Sarawak.

Taman Negara Marine Miri-Sibuti nyadi taman Negara marin pemadu besai di Sarawak alai Malaysia nitihka atur ‘International Convention on Biological Diversity’ ke minta kandang menua tasik diintu. Taman tu nyadi rumah ngagai bansa utai idup dalam ai baka penyu, ikan paus sereta mega terumbu karang.

Iya mega nyadi sebagi ari ‘Sea Turtle Highway’ tauka pejalai mindah penyu ti deka ngiga endur betelu ninting taun.

Taja pia, ketegal pengawa berikan ngena pukat tunda ngelama tu, penyampau ikan ke datai nyengkaum paus udah bekurang enggau penyu nadai agi mulaika diri ngagai pantai.

“Kami mutuska diri kereja begulai enggau SFC nanam ‘bebola’ terumbu pelesu ba kandang ti kena pangka lalu tu udah nyata mujur nagang sida ti ngena pukat tunda belalai lalu berebak enggau nya deka nyadi Palan Ngempung Ikan (FADs), iya nya matak penatai ikan pelagis baka ikan lumba-lumba ngagai taman negara tu,” ku Tan Sri Sidek.

‘Bebola’ terumbu, pemerat iya setan seiti, tan pengelama 500 taun dalam tasik. Iya ulih nyaru nyadi batu asal sereta mantu ngidupka terumbu karang. Gaya tekstur nentuka organisma ti lembut baka alga, alga terumbu, span, terumbu polip ngagai tanah ba sida enggau proliferate.

Tan Sri Sidek nandu PETRONAS mega udah meri sukung agih belanja ngagai projek ngangkatka pemanah rampa menua ke bukai di Sarawak alai RM10 juta ungkup projek Biodiversiti, Ngangkat enggau Ngemanah Rampa Menua (BEACON) ba Taman Negara Similajau di Bintulu, RM5 juta ungkup inisiatif ngangkatka Palan Kampung Galau Piasau di Miri sereta mega RM35 juta ungkup projek Nyaga Tebing Tasik Miri.

Iya madahka Petronas bekunsika asil enggau pengeransing dikemeran Kepala Menteri Sarawak Datuk Patinggi Adenan Satem dalam pengawa nyaga enggau ngintu pesaka ekologi di nengeri tu.