PEMADU NYULUT: TR Jarrau (bediri dua kiba) begambar begulai enggau tim Koboz ke dipadu champion Pekit Main Bol Tujuh Sepiak trofi UPP Tanjung Bekakap 2016, empai lama tu tadi.

SIBU: Komiti Pengelikun engggau Pemansang Genturung Menua (JKKK) Rumah Joseph Jarrau udah mujur ngatur Pekit Main Bol Tujuh Sepiak Trofi Parti Rayat Bersatu (UPP) Tanjung Bekakap 2016, empai lama tu tadi.

Ba pekit tu, tim Koboz ari Bawang Assan mujur ngalahka tim bukai ti besemekih ngulihka gelar champion.

Dulu agi ari nya, tim sida ngalahka tim Bekakap Borneo, 2-0, ba pekit ke penudi.

Enggau nya, tim Koboz mai pulai perais mata duit RM150, trofi enggau midul lalu Bekakap Borneo nerima perais mata duit RM100, trofi enggau midul.

Penuduk lumur tiga diempu tim Laja Heaven sepengudah ngalahka tim Momogun enggau gol 1-0.

Dua bengkah tim tu bela nerima perais mata duit RM80 enggau RM50 sepengudah bulih penuduk lumur tiga enggau empat sereta bela disempulang trofi enggau midul.

Perais pemain ke pemadu nyulut maya tu diempu Julius Hading ari tim Koboz lalu Mattheus ari tim Momogun ngempu gelar pemain ke pemadu mayuh ngegol.

Seduai bela mai pulai trofi.

Perais disuaka Tuai Rumah Joseph Jarrau ti mega chairman JKKK Rumah Joseph Jarrau.

Pekit tu diatur ba padang Sekolah Kebangsaan Tangjung Bekakap kena 15 enggau 16 Oktober tu tadi lalu digulu 11 iti tim.

Tim ke bukai bela ngambi bagi ba pekit tu iya nya Salim FC, Matador FC, Honiveir City FC, Kampung Pisang FC, Talented Team FC, Kelabu Papau enggau UPP Tanjung Bekakap.

TERIMA KASIH: Moses (kanan) dalam perengka dikena enseput enggau indai iya meri besai terima kasih nuju mensia mayuh ti udah gerah jari meri bantu.

KUCHING: Sepenyampau RM126,238 pemeri ari komuniti di Sarawak udah diterima Gerempung Anak Mit Sakit Raya (S.O.S Kids) diungkup projek ‘Juluk Krismas 2016 Moses’.

Pemeri tu dikena mantu apai indai Moses Jack Davidson, anak mit lelaki ke beumur 18 bulan, bansa Bidayuh ari Kampung Opar, Bau, meli injin kena enseput iya nya ‘Philips Respironics Trilogy’ berega RM53,000 ngambika ulih dikena iya maya mulaika diri ke rumah begempuru enggau sida sebilik.

Moses ditepan penyakit rusak lempuang sereta batuk rangkai ngujungka lempuang iya enda normal lalu seruran begunaka perubat oksigen enggau begunaka bantu injin dikena enseput nentuka iya ulih enseput enggau lantang.

S.O.S Kids minta pengasih ari mensia mayuh nengah media rama ‘Facebook’ sida kena 22 September udah nya nengah media di menua tu nesau komuniti kena 1 Oktober ketegal deka ngiga belanja penyampau RM50,000 entara bulan September ngagai November 2016.

“Kami berasai chukup lantang deka madah ngagai bala komuniti alai kami udah nerima timbal ke chukup manah sereta mujur nyapai lebih ari tagit dalam timpuh ke pandak,” ku iya ba sebengkah penerang berita ngagai The Borneo Post kemari.

Penerang berita nya madahka ari kesemua penyampau RM126,238 pemeri nya – alai RM12,000 diterima ari Cahaya Mata Sarawak (CMS) Tribal Charity Run 2016, RM30,000 ari Unique Titan Machinery Sdn. Bhd. nengah Mid-Autumn Charity Fun Walk ke diatur kena 4 enggau 14 September 2016 tu tadi.

Penyampau RM84,238 da agi mujur digiga pengudah nya, antara 22 September enggau 17 Oktober 2016.

S.O.S Kids dalam penerang berita nya mega madahka pengawa ngiga belanja ungkup Moses udah diketu kemari (18 Oktober) lalu iya madahka gerempung nya benung ngatur pengawa meli injin dikena enseput ngagai Moses.

Penerang berita nya mega madahka laluh penyampau RM73,238 ke diterima deka dikena gempung nya neruska bantu ngagai Moses sereta 30 iku bala anak mit ke bukai ke bela nerima bantu ari S.O.S Kids.

S.OS Kids madah sida meri besai terima kasih ngagai semua orang ke udah gerah jari mantu ari mata duit tauka chara ke bukai sereta mega ngagai raban media di menua tu ke udah ngasuh juluk Krismas Moses nyadi nyata.

Penerang ke silik sereta ke bukai pasal aktiviti S.O.S Kids tau betanya ngagai Presiden gempung nya, Richard Lee ba lumur 019-8183399 tauka e-mel ba soskidskuching@gmail.com tauka ngelawa Facebook gerempung nya www.facebook.com/soskidskuchingsarawak tauka website www.soskidskuching.org.

YTJ ngarapka nya ulih ngetan, ngerembai sereta ngangkatka adat enggau jalai pengidup asal Iban

// Dikarang Rengenyan Labang //

KUCHING: Pengawa Yayasan Tun Jugah (YTJ) ti nganjung tukang sabak tebilang Siah Tutong, 74, ke menua New York dikearapka ulih ngetan, ngerembai sereta ngangkatka adat enggau jalai pengidup asal Iban ba pengawa nyabakka orang mati lalu ulih ditan sereta ditemu nembiak rebak baru kelimpah dikelala serata dunya.

Direktor Pemansik Yayasan Tun Jugah Dr. Robert Menua madahka, YTJ ti ngemeranka pengawa nyaga, ngetan sereta ngangkatka adat enggau jalai pengidup asal, seni enggau jaku Iban temegah ati laban udah mujur nganjung tukang sabak tebilang Iban Siah Tutong, 74, ngagai renggat antarabansa.

Lebuh dikerandau Utusan Borneo iya madahka YTJ dalam bulan September 2016, udah nganjung Siah ngambi bagi ba pengawa mantaika leka sabak enggau chara nyabakka orang mati ba renggat antarabansa di menua New York.

“Kitai temegah endar ati laban keterubah iya kami nganjung Siah Tutong, ari Rumah Nabau, di Entawau, Baleh, Kapit ke menua New York nyereta pengawa mandangka adat enggau jalai pengidup asal kitai Iban iya nya nyabakka orang ti udah mati.

“Diatu adat enggau jalai pengidup kitai Iban, pasal nyabak ke orang mati tu udah ditemu di serata dunya, sebedau tu orang enda nemu.

“Nya alai diatu bansa kitai Iban seiti ari bansa di dunya ti ditemu bisi adat enggau jalai pengidup asal kediri empu maya bisi orang mati, taja pan chara enggau bunyi leka sabak nya enda sama,” ku iya lebuh dikerandau ba Opis Yayasan Tun Jugah apin lama.

Kena 13 nyentuk 25 September 2016 ba Armoury’s Wade Thomson Drill Hill, New York City lebih 25 iku pesereta ari serata dunya baka ari menua Ghana, India, USSR, Kyrgystan, Azerbaijan, Armenia, Columbia, China,. Finland, Keny, Bhutan, Ecuador, Greece, Venezuela enggau Romani kelimpah ari Malaysia bisi ngambi bagi ba pengawa nya.

“Kitai enda ngetu naka tu aja, laban dalam taun 2017 ila tukang sabak Siah mega deka mantaika adat enggau chara pengidup asal bansa kitai tu di London,” ku iya seraya madahka diri deka nyempulang Siah maya nya ila.

Bejaku baru iya madah, leka sabak tauka nyabak ke orang mati dikena meri basa sereta penyinu enggau penusah ati ngagai orang ke udah mati.

Berindik ari leka sabak sereta chara nyabakka orang mati ti dikemeranka kitai Iban udah datai ba renggat antarabansa, Robert arap endar adat asal nya mengkang dikeingkat sereta dikelala, kelimpah ari Yayasan Tun Jugah ke bisi ngerikod leka sabak sereta ditulis dalam bup.

“Kami Yayasan Tun Jugah udah mayuh ngambi rikod pasal macham bansa sabak baka sabak bangkai, sabak lumbung enggau ke bukai ari bala tukang sabak di menua kitai ditu kelebih agi di kandang menua Batang Rajang, nambahka mayuh mega udah ditulis ba bup. Nya alai chara pengidup asal tu enda mudah lenyau.

“Tang kitai patut ngerembai sereta ngidupka adat enggau chara pengidup asal kitai baka leka  sabak enggau chara nyabak ke orang mati ngagai rebak baru, laban rebak baru diatu mayuh enda nemu lalu nadai penganti nyema sida ke tuai tu udah nadai.

“Nambahka nya maya di New York semua leka sabak nyengkaum ke dibai Siah mega bisi dirikod sida pengatur pengawa nya,” ku iya.

Berebak enggau tu Robert mega madahka bisi pengirau ati ngagai rebak baru ti nadai tentu pengerindu ba adat enggau chara pengidup asal bansa, baka nyabak ke orang mati ti majak enda dikemeratka kelebih agi ba peranak ke diau di mengeri.

Orang kelia di rumah panjai enti maya bisi pemati endang nyabak mantaika penyinu enggau penusah ati ngagai orang ke mati, tang diatu bisi kurang mimit laban nembiak rebak baru berasai malu, tu pekara ti enda manah, ku iya.

KUCHING: Suntuk duit pemansang ukai patut nyadika tegal Perintah Besai enda beratka tauka enda ulih nembuka projek pemansang di Sarawak.

Mandal Presiden Indu PKR Menua Voon Shiak Ni madah, Perintah Besai patut beratka projek pemansang infrastruktur di nengeri tu baka ngemanahka sekula, sepital enggau ngangkatka pengerai orang mayuh.

“Minggu nyin kemari, kitai bisi nyebut pasal penyuntuk belanja dikena ngemanahka beratus begunan sekula ke udah tuai di Sarawak ke udah dibai ngagai menteri renggat perintah besai sebedau tu. Lalu kitai ngarapka isu tu bisi disengkaum dalam Bajet 2017.

“Nambahka isu sekula, kitai mega betapi enggau isu ngemanahka perengka guna mensia mayuh ba Sepital Besai Sarawak (HUS), baka ngaga palan ngengkahka kerita betingkat ke udah disemaya betaun ke udah.

“Kitai ngingatka jaku Direktor Opis Pengerai Nengeri Sarawak Dr. Jamilah Hashim  ti madahka projek ngaga palan ngengkah kerita betingkat nya dipelaba dipejalaika taun 2017, kitai gaga ati ninga berita nya lalu ngarapka nyadi nyata,” ku iya.

Voon mansutka pekara nya dalam aum pengarang berita ke diatur ba Indu Opis PKR Nengeri ditu, kemari.

Berebak enggau tu mega iya ngenang pasal pengerusak lift ba HUS ti bisi penyadi iya nya seiku indai ngadaka anak dalam lift laban ti tekurung dalam liff ke rusak nya, ku iya.

Iya bepenemu, penanggul tauka isu projek ke tejanggal tauka enda ulih ditembuka  ke dibantaika nya ketegal suntuk belanja dikena bejalaika pemansang.

“Enti perengka guna mensia mayuh enda ulih disediaka, chara ke engkeman ti patut dipejalaika perintah iya nya ngelimatka belanja nengah pengawa ngurangka semua pengerami perintah tang patut ngena duit nya dikena nyendiaka perengka guna mensia mayuh nya.

Ku iya, perintah besai patut nerangka kini tungga belanja ke udah disediaka lalu ditambahka mega beberapa subsidi udag ditarit perintah dikena ngelimat belanja menua tu.

Dalam bulan disember 2015, Opis Kastam DiRaja Malaysia bisi udah mantaika penyampau chukai barang enggau servis (GST) ke udah mujur digumpul kenyau GST dipejalaika 1 April 2015, ti sepenyampau RM30 billion, ku iya.

KUCHING: Opis Menteri Kunsil Kandang Menua madah, dikena mutarka pengelaun duit bantu diberi ngagai orang ti dituntung penusah ampuh bah taun nyin kemari ti baru diberi dalam kandang taun tu, duit bantu nya enti nitihka patut ditaruh ba Perintah Nengeri Sarawak, lalu enda ibuh ditaruh di Putrajaya ti ngambi timpuh ke lama mansutka bantu nya.

Menteri opis nya, Senator Datuk Prof Sim Hui Kian madah, kemari duit bantu ti diberi ngagai sida ke tasah ampuh bah Fasa Kedua nya, ketegal Putrajaya kelalu laun mansutka bantu nya.

“Tu Fasa Kedua, ‘duit pengasih’ ungkup kita ke tasah ampuh bah, lalu aku empu enda lantang ati bantu tu kelalu lama dipansutka ketegal  semua bantu duit nya dikuasa Putrajaya,” ku Dr. Sim  seraya madahka Fasa Keterubah, duit bantu udah diberi maya PRN tu tadi lalu Fasa Ketiga deka diberi sebedau apus taun tu.

Iya madah munyi nya lebuh nyuaka duit bantu ngagai 688 iku ti tasah ampuh bah taun nyin tadi ari Kuching, Batu Kawa enggau Batu Kitang, ti nerima RM500 ke siti ruang bilik, di Balai Mensia Mayuh Stapok ditu, kemari.

Enti nitih ku iya, dikena ngenyampatka agi proses mansutka duit bantu nya, Putrajaya patut berundingka rayat menua tu ke betapi enggau penusah ampuh bah, tang semina nerima wang bantu (ke Fasa II) nyauka apus taun.

“Sida ke bedau ampit nerima duit bantu dalam Fasa II tu, aku ngarapka kitai liat ati nganti dulu laban sebedau apus taun tu Fasa III deka nerima ungkup sida.

“Aku suah udah madah, tetiap maya aku bejaku pasal pekara tu dalam Dewan Rakyat (di Parlimen), aku seruran ngarapka duit bantu tu ditaruh ba Perintah Nengeri Sarawak, ngambika ngemuntang sereta ngenyampatka bantu ngagai rayat, tang Putrajaya kelalu lubah” ku iya.

Ku iya, penyampau duit bantu nya enda ulih mayar ganti rugi ke ditapi  mensia mayuh ke tasah nya, tang maya musin ujan udah datai baru, lalu mensia mayuh ke diau ba endur ti mudah kena ampuh bah udah patut udah nyendiaka diri.

Dr. Sim ti mega mangku pengawa nyadi presiden Parti Sa’ati Rayat Sarawak (SUPP) madah, sekali tu  dikena napi musin landas, kompeni minyak enggau gis Petronas nengah Perintah Nengeri Sarawak sereta ejensi Opis Perintah udah setuju numbuhka CERT (Community Emergency Rescue Team) di Bantu Kawa, ngambika ulih nulung mensia mayuh ke betapi enggau penusah nya.

“CERT mungkur ejensi opis Perintah bukai baka Bomba enggau Penyelamat, JPAM sereta ejensi bukai,” ku iya.

Sama bisi ngulu atur pengawa nya kemari, chairman Opis Kunsil Majlis Perbandaran Padawan (MPP) ti mega ADUN Batu Kitang Datuk Lo Khere Chieng, Mandal chairman MPP ti mega  Ketuai Ranting PBB Batu Kawa Dato Ahmad Ibrahim, enggau pemesai SUPP bukai.

NASIH TANAH: Chumang bejalaika pengawa kelai bejadika pengawa nasih tanah pengudah miring Projek Pembinaan Lebuh Raya Pan Borneo Pakej Lapan ke mungkur jajaran ari Sungai Kua ngagai Sungai Arip.

SELANGAU: Projek ngaga Lebuh Raya Pan Borneo (PBH) Sarawak ungkup  pakej lapan ti mungkur ari Sungai Kua ngagai Sungai Arip sepemanjai 65 kilometer beungkus RM1.325 bilion dipelaba tembu dalam timpuh 48 bulan.

Direktor Musyati Sdn Bhd Abdul Rahman Ahmad madah, 80 peratus ari kesemua pengawa ngaga Lebuh Raya Pan Borneo iya nya nitihka jalai lama, lalu 20 peratus agi nitih jalai baru.

“Pengawa bejalaika projek Lebuh Raya Pan Borneo deka muka mayuh agi pengawa puang ungkup peranak menua tu kelebih agi dalam timpuh lima taun ti deka datai.

“Pia mega, sida ti ngempu tanah teulihka penguntung enggau pemaik laban tanah sida deka berega,” ku iya rambau Pengawa Miring Projek Ngaga Lebuh Raya Pan Borneo Pakej Lapan mungkur ari jajaran Sungai Kua ngagai Sungai Arip ditu kemari.

Abdul Rahman madah, projek tu mega deka ngangkatka tikas pengidup bala rayat ba sepemanjai Lebuh Raya Pan Borneo.

“Kitai ngarapka jalai besai tu deka nyediaka perengka guna ti menyana agi sereta meri pengelantang enggau ngemandakka timpuh pejalai bala rayat di Sarawak bejalai mindah ngagai bagi menua ke bukai,” ku iya nerang seraya meri terima kasih ngagai perintah nengeri enggau perintah besai ke udah meri pengandal ngagai sida ngemujurka projek nya.

Pengawa miring udah dipejalaika Sekretari Politik Menteri ba Opis Menteri Besai, Adriana Chumang Nyambong ngarika Menteri ba Opis Menteri Besai ke lalu nyadi Kaban Parlimen (MP) Selangau, Datuk Joseph Entulu Belaun.

Dalam jaku dipansutka iya, Chumang meransang peranak menua nya kelebih agi sida ke bisi tanah ti kena renchah meri kerejasama ngagai piak kompeni kunteriktor dikena nentuka projek nya dipejalai enggau mujur.

“Pia mega ngagai kompeni kunteriktor patut meri pengawa puang ngagai peranak menua nya dikena mantu nyungkak penatai pemisi sida,” ku iya.

Sama bisi datai Pemesai Pelilih Selangau Christopher Ranggau Unting, Penghulu Balai Gara, Penghulu Thomas Jawa enggau Kaunsilor Dali Merawing.

Nembiak sekula dipinta seruran ngena runding kritis lebuh ti nyaut tanya pengajar dalam kelas

MIRI: Pelajar ti menyana ulih ngadaka raban bansa ti ulih ngemansangka menua, nya alai bala nembiak diperansang berunding enggau kritis.

Menteri Pengintu Pengelantang Pendiau, Orang Indu enggau Raban Bansa, Datuk Fatimah Abdullah madah runding ti kritis patut bisi dalam kelas ngambika bala nembiak teulihka pelajar ke menyana.

Sebagi ari pengawa nentuka pelajar ke menyana ulih dijapai ku iya, nusun baru sereta ngemanahka Kurikulum Standard Sekula Primari (KSSR) enggau Kurikulum Standard Sekula Sekondari (KSSM).

“Nya alai, berengkah ari taun nyin tadi, 20 peratus ari tanya peresa perintah UPSR bepelasarka tanya ti begunaka Pengelandik Berunding Tikas ti Tinggi (KBAT).

“Ungkup taun tu, tanya KBAT nya nambah manggai 30 peratus,” ku iya.

Iya mansutka jaku nya ngagai pengarang berita ba aum pengarang beri pengudah bejadi nutup Aum Antarabansa Pekara Pelajar (ICE) 2016 ti diatur Serakup Pengerembai Profesionalisme Pelajar Sarawak (PROFES) enggau Institusi Pematih Pengajar (IPG) Kampus Miri, bepalan ba Hotel Meritz Miri ditu kemari.

Sama bisi datai Sapit Chairman PROFES Abang Mat Ali Abang Masagus enggau Chairman Begulai ICE 2016 ke lalu nyadi Direktor IPG Kampus Miri Jamiran Salam.

Ku iya nerang, tuju ubah dalam kurikulum nya dikena nerenak runding ti kreatif, inovasyen, mutarka penanggul enggau pengelandik nyadi tuai ngagai bala nembiak.

Dulu agi ari nya, Fatimah ke mega Patron PROFES madah, raban bansa kemaya hari nemu pemesai guna KBAT dalam nyaup nyapai pemansang dalam abad ke-21 tu.

“Taja pia, pengelandik ke tinggi agi diajar sereta diserenih nyadi pejurai/petalat mayuh bala pengajar enggau orang ti ngaji pengereja pengawa ti mantaika pengirau sida alai raban nembiak ‘enda ulih berunding’.

“Dalam pansik Brookhart (2010), deka nemu KBAT tu iya nya ari sukut mindahka penemu, berunding chara kritikal enggau mutarka penanggul. Nyema bala pengajar berunding ba tikas ke tinggi baka mutarka sebengkah penanggul, sida tau netapka tuju ngajar bala nembiak ngelala sereta jalai mutarka penanggul ukai semina dikena ba sekula aja, tang mega dikena berundingka pekara dalam pengidup. “Tu ukai semina mutarka penanggul ke disediaka bala pengajar aja, tang mega mutarka penanggul baru ti digaga sida empu sereta nyendiaka jalai mutar,” ku iya nerang silik.

Ngelansa gempuru besai pengelama dua hari (18 enggau 19 Oktober) berambaika leka jaku ‘Propagating Quality Education: Integrating Thinking in the Classrooms’ alai tuju iya nyediaka pelasar bekunsika pelajar ngagai bala pengajar enggau pemansik dalam nambahka pemanah pengawa ngajar enggau belajar di Sarawak.

Gempuru besai tu digulu urung 300 iku bala pengajar ari Semenanjung, Sabah, Sarawak, New Zealand enggau Hong Kong nentuka bala pengajar enggau pemansik ngerembaika pelasar bekunsika pelajar sida di Sarawak, kelebih agi di Miri.

Program tu nyukung aktiviti pemansang pelajar ti deka mantu bala pengajar di Sarawak ukai semina di mengeri aja tang mega ba kandang menua ulu enggau menua pesisir.

Berebak enggau nya, gempuru besai tu mega meransang Miri nyadi sebagi ari palan ditapat di Sarawak endur ngerembai pengawa bekunsika pekara pelajar.

Sekeda pengelicha ke bisi ngaul diri dalam gempuru besai tu Profesor Madya Dr. Lee Kean Wah enggau Profesor Madya Dr. Tan Choon Keong ari Universiti Malaysia Sabah, Direktor Serakup Pelajar Kaunsil Islam Sarawak, Datu Dr. Afi Badiozaman Tuah enggau Profesor Madya Dr. Henry Ma ari Universiti Politeknik Hong Kong.

SAMALAJU: Palan Industri Samalaju enggau industri kuasa intensif beguna amat nyadi chunto ba pengawa nempa Sarawak nyadi nengeri industri jemah ila, pia ku Tuai Megai Menua (TYT) Tun Pehin Sri Abdul Taib Mahmud.

“Jemah ila Sarawak deka bepanggai ba pemansang adap ke utara menua, ngelui ari kandang menua ti ditumbuh di Sarawak.

“Kebuah pia laban pemisi kuasa adapka menua di utara Sarawak deka bisi di Miri tauka Bintulu,” ku iya seraya nambah madahka tu pengelebih sereta pemansut kuasa ke mudah agi ti ulih matak mayuh agi pemeranak puku jemah.

Dalam kandang 20 taun ke deka datai, Sarawak ku iya nyauka nadai tatak mekal kuasa, nengah kuasa hidro, enggau kuasa bepelasarka industri ti benung mansang di Asia.

Taib madahka Samalaju dipilih nyadi sebagi ari pekara nya, sereta ke bukai laban nya ngarika gaya pengidup Sarawak jemah ila.

Iya bejaku munyi tu maya bejadi pengawa muka Hotel Samalaju Resort ensanus.

Sama bisi ngulu pengawa nya Direktor Ngereja Pengawa Cahya Mata Sarawak Berhad (CMSB) Group Dato’ Richard Curtis, Sapit Sekretari Sarawak Datu Ismawi Ismuni, Direktor Eksekutif CMS Group  Datuk Syed Ahmad Alwee Alsre enggau Residen Bintulu Muhamad Yakup Kari.

Tandu iya, Samalaju deka ulih bulih ungkup ti sebaka ba pengawa matak industri ke bansa tu.

Sektor peribit mega ku iya deka bejalaika pengawa ti beguna endar ukai semina nyukung projek enggau pemansang di Samalaju tang mega nyukung penemu ti tau  ngeyampatka agi singkang ke baru di Sarawak jemah.

“Dalam timpuh panjai, ari Bintulu ke Miri, kitai deka nemu mayuh agi kualiti enggau gaya pemansang timpuh panjai.

“Lebuh kitai tetemuka Samalaju, kitai berunding nguji matak pemeranak puku ke besai, orang deka nemu sida patut ngempuruka baru sekeda industri ti ukai semina bepanggai ba tikas ke penudi dalam pengawa ngasilka barang tang bisi maya antara pemansut asil bepelasarka industri enggau pengawa ngasilka barang penguna ke penudi.

“Aku ngasaika kami udah chukup mujur ngumbuk sida mansang ngagai Samalaju,” ku iya.

Ku iya, Samalaju deka terus ngemansang sereta penyampau tubuh mensia ditu deka majak nambah lebih ari kandang menua bukai di Asia lalu berebak enggau nya matak mayuh agi sida ti ngembuan penau.

Nya kebuah berengkah ari keterubah endar, ku Taib, iya bebendar nguji nyeliahka pemansang sementara ungkup Samalaju, tang terus nuju pemansang tetap lalu pekara tu beguna langkar ti chukup silik ungkup dudi hari, ngambika pemeranak puku nya puas ati dudi hari.

“Aku meda pekara ti besai deka nyadi di Samalaju, Bintulu udah bisi pengemun ti manah, tang Samalaju deka majak maju lalu deka nyadi sebagi ari Sarawak moden ti bisi penegap ba disiplin raban pengereja pengawa, matak raban profesional, pengereja pengawa teknikal enggau sekeda bansa disiplin.

“Samalaju patut ulih ngingat pemujur mengeri Miri lalu setipak pemujur ke sama, enggau awak ti besai ungkup pemansang,” ku Taib.

Palan Industri Samalaju udah bisi perugan pemansang ti manah ba kuasa loji intensif ti  nyengkaum Tokuyama, Press Metal, Pertama Ferroalloys, OM Materials (Sarawak), Sakura Ferroalloys enggau penyangkai kapal Samalaju.

Beseerimbai enggau pengerami nya, Taib mega bisi ngemata pengawa nyain dua sempekat pemereti khas antara Samalaju Properties, keterubah enggau ‘Trustees’ Gerija Methodist di Sarawak meli tanah pemesai 10 ekar ungkup sekula sereta Sempekat Pemereti Ati (MoU) enggau PMB Development Sdn Bhd, sebagi ari Press Metal Group tama ngagai pengawa berundingka ‘pajak gadai’ unit apartmen di Samalaju Eco Park.

KUCHING: Tukang sabak Iban ti tebilang Siah Tutong, 74, udah ngayan sereta ngangkatka adat enggau jalai pengidup asal bansa kitai Iban iya nya nyabakka orang ti mati, ngena Sabak Sinu Ngenang ba renggat dunya.

Siah, kena 13 nyentuk 25 September 2016 bisi dianjung Yayasan Tun Jugah ti bechairmanka Tan Sri Leonard Linggi Jugah ngambi bagi ba pengawa mantaika leka sabak sereta chara nyabakka orang mati, ti diatur di New York.

Iya madahka diri temegah ati laban udah mai sereta mandangka adat enggau chara pengidup asal Iban ngagai dunya begulai enggau lebih 25 iku tukang sabak ari serata dunya.

Taja pan tuju atur pengawa di New York dikena ngayan sereta ngangkatka adat enggau chara pengidup asal Iban ngagai renggat antarabansa, tang Siah enda empelitaka adat enggau jalai pengidup asal Iban nya, nyabakka orang ke mati.

“Aku chukup gaga ati laban sabak kitai udah dikelala dunya. Sabak ke dibai aku ngagai New York iya nya Sabak Sinu Ngenang, lalu baka maya dikangau nyabak di menua kitai, maya nyabak kin (New York) aku pan bisi mai piring.

“Maya ke nyabak tu kitai enda tau sebarang, nya alai maya kin ari nya aku endang bisi mai piring. Kebuah aku ngena Sabak Sinu Ngenang laban enggai nyadi mai Sabak Bangkai laban nadai orang ke mati ditunga. Enti Sabak Bangkai enda tau enda bisi bangkai ditunga, pia mega Sabak Lumbung patut bisi gambar orang ke dilumbung ditunga maya nyabak.

“Tu keterubah endar aku nyabak di menua tasik, lalu sekali agi ila ba pun bulan Jun 2017 aku dibai Yayasan Tun Jugah ke London ngulu renggat kedua pengawa ngayanka adat enggau jalai pengidup asal Iban lebuh nyabakka orang mati,” ku iya lebuh dikerandau Utusan Borneo ba Opis Yayasan Tun Jugah ditu, apin lama.

Siah ke dianjung Yayasan Tun Jugah ke New York  disempulang Kurator Muzium Yayasan, Janet Rata Noel, begulai enggau lebih ari 25 iku pesereta tauka tukang sabak ari menua baka Ghana, India, USSR, Kyrgystan, Azerbaijan, Armenia, Columbia, China, Finland, Kenya, Bhutan, Ecuador, Greece, Venezuela enggau Romania, ti ngambi bagi dalam pengawa nya.

Pengawa nyabak nya fokus ngagai profesionalisme dikena ngayanka penyinu ati ari sukut antropologi enggau mai tebangkar main asal bekunsika penyelai chara nyabakka orang mati.

Pengawa nyabak nya nya ditengkebang seiku orang seni Amerika, Taryn Simon, nengah kerejasama Dr Ida Nicolaisen, ti kala nyadi mandal chairman Forum Tetap Pertubuhan Bangsa Bersatu pasal isu Bansa Asal.

Pengawa nya diatur sereta dipelanja Park Avenue Armoury, iya nya sebuah institusyen seni ti enda ngambi untung di New York City.

Kelimpah ari nya Siah ti asal ari Rumah Nabau, di Entawau, Baleh, Kapit, lebuh ditanya peneleba iya nyadi tukang sabak,iya madahka diri udah bepeneleba 13 taun nyadi tukang sabak.

Dalam timpuh 13 taun nya, iya dikangau orang nyabak enda ngira sekalika nya di nengeri tu empu tauka di Semenanjung Malaysia.

Berebak enggau tu iya madahka pengirau ati diri meda pengawa nyadi tukang sabak majak punas sereta enda dikemeratka rebak baru.

“Nyabak tu, aku belajar ari menyadi aku niang Limau. Niang ti ngansak sereta meransang aku belajar nyabak. Berindik ari nya dalam timpuh tujuh hari bejurut aku belajarka chara enggau leka sabak, lalu ba hari kelapan aku udah nyabak.

“Tang diatu orang ke biak nadai ati deka belajar nyabakka orang mati. Bala uchu nadai nampung, enggai diajar. Nadai orang nampung mih tu ila, putus tali perau,” ku iya ti bisi dua iku anak, 12 iku uchu enggau 9 iku ichit.

Nambahka nya, lebuh ngenang pasal upah nyabakka orang mati di rumah panjai, Siah madahka upah ti diberi nyengkaum duku enggau sarung, kain belambar, tajau sigi, manuk siku, pinggai enggau utai bukai ke patut.

Nyema semua barang nya enda dibai ku iya, ulih diganti upah ngena mata duit RM400.

Mensia mayuh ti deka begunaka tukang sabak tu tau telefon ngagai iya ba lumur 014-5887384.

Bekaul enggau ubah ke digaga ba Parlimen ti nurunka status Sarawak ba taun 1976, ku Baru

// Dikarang Rengenyan Labang //

AUM MEDIA: Baru dalam aum pengarang berita kemari ngayanka surat kabar The Borneo Post ti ngeripot bekaul Artikel 1(2) Konsitusyen Perintah Besai ke diubah ba taun 1976, seraya diperatika See (kiba) enggau Voon (kanan).

KUCHING: Parti Keadilan Rakyat (PKR) Nengeri deka mantaika perambu minta Perintah Sarawak patut madahka penetap penemu sida bekaul enggau nurunka status Sarawak ngagai nengeri, pengudah  Artikel 1(2) konstitusyen Perintah Besai diubah ba taun 1976.

Chairman PKR Nengeri, Baru Bian madahka perambu nya deka dibantaika dalam Aum Kunsil Nengeri ke diatur 21 ngagai 30 November tu ila.

Iya madah, pekara bekaul enggau pengawa ngubah status nya udah nyengenda baka ke udah diayanka ba surat berita.

“Pekara ke deka dibai kami sehari tu iya nya kami deka mantaika perambu ba aum Kunsil Nengeri (DUN) ti berengkah 21 November tu minta Perintah Sarawak madahka penetap penemu sida bekaul enggau ngubah tauka nginsil penuduk tu.

“Dikena nambahka penerang tu, kita udah macha pasal jurai  ke bekaul enggau ubah status Sabah enggau Sarawak nyadi nengeri, ke mega nyadi topik besai dalam Borneo Post sehari tu.

“Baka ke udah ditemu kita semua, tu udah nyengenda ba taun 1976, ubah ke digaga ba Parlimen ti nurunka status kitai,” ku iya madah ngagai raban pengarang berita, kemari.

Baru mansutka pekara nya dalam aum pengarang berita ke diatur ba Indu Opis PKR Negeri ditu.

Iya ke meri penerang nya lebuh ngenang pasal  ubah Artikel 1(2) dalam Konstitusyen Perintah Besai , taun 1976 ke diripot  Borneo Post kemari.

Dalam ripot berita nya madahka ubah Artikel 1 (2) Konstitusyen Perintah Besai ti nurunka status Sabah enggau Sarawak ari pelilih dalam Malaysia ngagai nengeri udah dipejuraika kena 12 enggau 13 Julai 1976, disukung 130 iku kaban parlimen lalu empat iku agi enda setuju.

Ubah Artikel 1(2) nya entara 48 ubah Konstitusyen Perintah Besai di baruh Rang Undang-undang ti dibantaika Menteri Besai Datuk Hussein On kena 12 Julai 1976, lalu dikemendarka kena 13 Julai 1976.

Nadai seiku ari kaban Parlimen ari Sarawak nyakal Rang Undang-undang ti mungkur ubah nya, lalu empat kaban parlimen ke nyakal ubah nya baka Lim Kit Siang, Dr. Tan Chee Khoon, Farn Seong Than enggau Lee Lam Thye ari DAP.

Semina dua kaban parlimen ari Sarawak iya nya Leo Moggie Irok (Kanowit) enggau Tin Ling Kiew (Bintulu) enda dirikod dalam ripot rasmi nyukung ubah nya lalu bisi mega sida ke nyakal ubah nya, enda dirikod.

Dua kaban parlimen ari Sabah iya nya Tun Datu Mustapha Datu Harun (Marudud) enggau Pengiran Tahir Pengiran Patera (Kimanis) mega nadai dalam rikod nyereta aum nya.

Nambahka nya Baru ngarapka kaban kunsil nengeri tu ulih nyukung perambu nya, lalu iya pechaya bendar sebedau bala kaban parlimen ti setujuka ubah nya suba nadai timpuh ke panjai beratika perambu nya.

“Nya alai diatu mih maya ke betul endur kitai semua besaup dalam pekara tu,” ku ADUN Ba’Kelalan nya seraya muji sekeda kaban BN bisi ngenang tauka nyebut pekara nya.

Kelimpah ari nya dalam penerang berita ke disadung ngagai raban pengarang berita, Baru madahka sistem pelajar di nengeri tu patut diubah enggau jampat sereta ngemeratka polisi ti patut sereta ditan lalu dipejalaika dalam timpuh ke panjai.

Iya mega bepenemu nengeri tu patut enggau pengelengkas nempa nembiak ti landikJaku Inggeris enggau ke bukai ti enda tau enda dikemeratka.

“Kepala Menteri patut lengkas dalam pekara tu, lalu aku meri perambu ngambika ngempuru pengajar ti bepeneleba ngambika sama berunding ngelangkar pelin ke Sarawak. Autonomi pelajar patut diambi ari Perintah Besai. Nya aja chara iya,” ku Baru.

Baru dalam aum pengarang berita nya disempulang Mandal Chairman PKR Nengeri ti mega Kaban Kunsil Nengeri (ADUN) Batu Lintang See Chee How enggau Mandal Presiden Indu PKR Menua Voon Shiak Ni.

Pengelandik dalam lumba, bejaku mega dikemeratka dikena nyamin pengidup nembiak jemah ila

SRI AMAN: Penyulut nembiak sekula ukai semina bepanggai ba pelajar akademik aja, tang mega dalam pekara lumba enggau ko-kurikulum, pia ku Menteri Muda Ekonomi Menua Pesisir (Kandang Menua Ulu) enggau Kebun Bedandang Besai Sarawak, Datuk Francis Harden Hollis.

Ku iya, penau bala nembiak berandau sereta bejaku ba mua mayuh mega nyadi pekara ti tau dikemeran dalam diri nembiak nya empu.

“Pengelandik tu deka nempa bala nembiak bisi penau enggau tuai runding dalam mayuh bengkah bidang,” ku iya rambau bejadika Program Lumba, Main enggau Ko-Akademik Zon Undop Taun 2016 bepalan ba Padang Lumba, Sekula Primari (SK) Temudok Kem, Sri Aman semak ditu pagi kemari.

Iya madahka, pengawa lumba tu deka terus nyadi sebagi ari pekara ti tau nagang bala nembiak ari tepejuh enggau bemacham aktiviti ti enda menuku.

“Nengah latih tumu ba mental enggau dalam diri nembiak, atlit nya deka dilatih ngambi ulih besemekih sereta ransing agi.

“Kitai patut sedar nengah lumba tu, kitai ulih ngemansang modal mensia ti menyana sereta mensia ti ngembuan runding kelas satu ke nyadi ketuai menua dudi hari.

“Nengah pengawa lumba ukai semina deka nempa bala nembiak bepengerai ba batang tubuh tang mega runding ti regas,” ku iya nampung.

Harden ke mega nyadi Kaban Kunsil Nengeri (ADUN) Simanggang nerangka, aktiviti lumba mega ulih nerenak penyerakup entara raban bansa dalam pupu bansa di Malaysia.

“Penyerakup nyadi kunchi pemujur Malaysia dataika pegari ba renggat antarabansa. Kitai enda patut ilap ba pekara pemesai guna penyerakup dikena nempa menua bansa Malaysia ke mujur enggau lantang.

“Indikator pemadu manah tu iya nya nengah lumba. Semangat kerejasama enggau bebatak asur beguna endar dalam ngemujurka aktiviti lumba. Semua atlit begempung nyadi champion nadai ngira chura kulit, bansa enggau jalai pengarap,” ku iya nampung silik.

Berebak enggau nya, Harden mega mujur pengawa dipejalaika Komiti Kaunsil Kepala Pengajar (MGB) Zon Undop dalam ngatur karnival tu ke dierati nyadi sebengkah pengawa ti manah endar laban ulih nempa bala nembiak ti sebela ari sukut kademik, lumba enggau pemanah ulah diri.

“Aku dipadah, batang tuju ngatur karnival tu dikena milih pengari Zon Undop dalam ketetiga bansa pekit iya nya pelanda, main enggau ko-kurikulum ngagai tikas pelilih enggau bagi menua Sri Aman ungkup taun 2017.

“Tu pengawa ti chakah dipejalai MGB Zon Undop ti endang deka meri pangka ngagai tikas penyulut pengari Zon Undop ba renggat pelilih enggau bagi menua taun baru.

“Aku ngarap, pengari ti dipilih tu deka nyedia diri tumu kelebih agi dalam bidang olahraga. Latih beguna endar dikena ngangkatka tikas penyulut bala nembiak nentuka Zon Undop nyapai pemujur ti besai dalam Balapan enggau Padang ba renggat Bagi Menua Sri Aman taun baru,” tandu iya.

Sama bisi datai Kepala Pengajar SK Temudok Kem ke lalu nyadi Chairman MGB Zon Undop, Bohan Sahar, Kepala Pengajar SK Batu Lintang ke lalu nyadi Sekretari MGB Pelilih Sri Aman, Leonard Libau Anol sereta kepala pengajar, bala pengajar enggau atlit ke bukai.

Berebak enggau pengawa nya mega, Harden bisi ngemendarka agih belanja ungkup taun 2017 penyampau RM 10,000 ngagai Wang Turu MGB Zon Undop enggau RM 5,000 ngagai Serakup Apai Indai enggau Pengajar (PIBG) SK Temudok dikena bejalaika aktiviti sepanjai taun sida.

BESAUP: Raban 4KAD enggau Yonik 312 KH besaup ngaga langkau lumba enggau main.

LUBOK ANTU: Program Jiwa Murni Patroli Terkoordinasi (PATKOR) Siri kedua 2016 ba udah mujur diatur ba Sekula Primari (SK) Batang Ai ditu.

Program tu nyadi sebagi ari tentatif aktiviti PATKOR iya nya bejalai begulai ba garis antara menua kededua menua (Malaysia enggau Indonesia).

Soldadu Darat Malaysia (TDM) diarika Rejimen Ke-4 Kor Amor Diraja (4KAD) lalu Batalyon Infantri 312 Kala Hitam (Yonif 312 KH) ngarika Soldadu Nasional Indonesia-Angkatan Darat (TNI-AD).

Sama nyaup ngemujurka program tu raban ari sekula nya, bala staf kompeni SESCO Berhad Batang Ai, Serakup Apai Indai Enggau Pengajar (PIBG) sereta Opis Pelajar Pelilih Lubok Antu.

Sekeda ari aktiviti beripai ti diatur iya nya ngemanahka jalai ba kandang sekula, ngemanahka langkau lumba, ngechat garis ba padang sekula, nanam bungai, meresi pagar enggau ngaga trek endur pekit engkechit jauh.

Dikena meri basa ngagai semua ke udah ngemujurka aktiviti nya, piak sekula enggau lantang ati nyediaka pemakai dikena merarau ti disedia begulai.

Aktiviti ke baka tu dikearap ulih nyintalka agi kaul raban soldadu enggau mensia mayuh meri bantu nengah Program Jiwa Murni ti dipejalai.

Sama bisi datai ngulu program tu, Pemesai Merintah 4 KAD Leftenan Kolonel Mohd Nizam Masri, Pemesai Pelajar Pelilih Lubok Antu Thomas Kanyan Siam, Kepala Pengajar SK Batang Ai Joseph Suat Mara enggau Chairman PIBG Johnson Tampa.

BERIPAI: Raban 4KAD enggau Yonik 312 KH begulai enggau bala staf sekula, PIBG meresi kandang sekula.

MUJUR: Rashidah (bediri tengah) begulai enggau raban bukai ke sama enggau ngemujurka karnival nya, megai poster mandang ngagai mensia mayuh pasal pengawa ti deka diatur di Miri kena 21 Mei taun baru.

KUCHING: Pustaka Nengeri netapka sida iya deka ngetanka Karnival Sarawakiana 2016 nyadi siti chap tauka kelai Pustaka Negeri endur mandangka reta pesaka komuniti Sarawak.

Karnival Sarawakiana 2016 ti berambai leka jaku ‘Tradisi Kita, Khazanah Kita’ deka diatur di Miri kena 21 Mei taun baru, ngambika orang Miri sama bela ulih ngasaika nya.

Ketuai Pemesai Eksekutif Pustaka Negeri (CEO) Rashidah Bolhassan madahka pengawa nya mega deka diatur di Kuching kena 29-31 Oktober tu, deka digulu ulih mensia mayuh ke meda lalu adat bansa kitai.

“Tuju ngatur karnival tu ketegal ngemeratka sejarah, adat bansa asal sereta etnik di menua ngambika ditemu nembiak rebak baru, ku iya madah ba aum media bekaul enggau ‘Karnival Sarawakiana 2016’ di Bilik Baum Pustaka Nengeri ditu, kemari.

Rashidah ngarapka mensia mayuh ari serata dunya ti deka nemu pasal adat asal sereta deka ngelala Sarawak enggau semak agi kelebih agi rebak baru datai maya nya ila.

“ Pustaka Nengeri mega nyukung sereta meransang pengawa bejalaika pansik pasal sejarah, adat, seni sereta penemu bansa asal di Sarawak,” ku iya.

Rashidah mega madah, entara main bukai ti bisi diatur maya nya ila baka pekit Bermukun, pengawa berapi ngaga lauk tradisional, pekit lagu tradisional, pengawa pemandang pasal Keringkam, seni sereta licha pasal adat pesaka.

BELAJAR BEDAGANG: Entara raban ke ngambi bagi ba pengawa bedagang tauka bejualka pemakai enggau ai irup, nyerumba Hari Usahawan Kecil sekula nya. — Gambar Zulkiflee Sebl

KUCHING: Hari Usahawan Kecil ti diatur Sekolah Kebangsaan (SK) Semerah Padi dikena ngepun sereta ngiri pengelandik ngagai nembiak sekula dalam pengawa dagang sereta ngaduka belanja.

Guru Penyelaras Pasca Tahun Enam SK Semerah Padi 2016, Abdilah Sar madahka program nya dikearapka ulih muka runding nembiak sekula nya ngaul diri ba pengawa dagang.

“Objektif Hari Usahawan Kecil tu dikena ngajar nembiak bedagang seraya belajar ngadu kediri empu duit ke nyadi puku enggau untung maya sebedau enggau pengudah program.

“Nambahka nya, program tu diatur dikena muka runding nembiak ngasilka ekonomi ngena chara bedagang, ngelatih nembiak bekelimat maya bebelanja enggau nempa ulah deka beripai sereta bebasaka pangan diri, entara nembiak dalam tim,” ku iya madah ngagai Utusan Borneo.

Berebak enggau tu iya madahka diri temegah ati meda sukung enggau pengeransing bala nembiak seraya bejualka barang pemakai enggau ai irup ti digaga bala nembiak nya empu.

Sukung ari apai indai mega manah , lalu program sehari nya diatur enggau lanchar, ku iya.

Hari Usahawan Kecil ti dipejalaika sehari kemari sebengkah program ke diatur Komiti Tembu Tahun Enam Sekolah Kebangsaan Semerah Padi, ke nyadi seiti aktiviti nembiak pengudah tembu peresa Ujian Pencapaian Sekolah Rendah (UPSR).

Bisi 13 buah bansal nyual mayuh macham pemakai enggau ai irup, lalu bansal nya diaduka nembiak Tahun Enam sekula nya empu.

Program sehari nya ke diatur ba kantin sekula mujur nyapai objektif enggau penyampau asil ari pengawa nya ari tim ke nyereta program nya, bisi RM2,396.80.

KUCHING: Penemu parti penyakal ke ngasuh penyandang Kunsil Nengeri sitak Batu Kawa, presiden Parti Sa’ati Rayat Sarawak ti mega Menteri Opis Kunsil Kandang Menua Senator, Datuk Prof Dr Sim Hui Kian ngetu ari mangku pengawa iya, semina baka jaku orang ti enda berunding, ku Dr. Sim.

Dr. Sim ditanya pengarang berita bekaul enggau jaku Kepala Menteri ba siti atur pengawa ujung minggu nyin tadi ke minta Perintah Besai masa Sempekat Malaysia 1963 nyengkaum ibuhka hak Sarawak, enda tau enda dipulaika baru laban nya semina ngemaruhka Sarawak aja, ku Dr Sim seraya madahka SUPP nengah Sekretari Besai parti nya deka mansutka penemu sida enda lama agi.

“Pekara tu seruran dikeingatka aku, endang nyadi tanggungpengawa aku meri lalau ngagai rayat pasal pekara tu.

“Kitai anang sesekali ngumbai Sarawak sebuah menua tang kitai tu ke mantu ngempung Malaysia,” ku iya.

Dr Sim ditanya pasal ‘hansard’ ti madahka Kaban Parlimen Sarawak enggau Sabah dalam taun 1976, nyukung Artikel 1 (2) Konstitusyen Perintah Besai nurunka penuduk Sarawak enggau Sabah nengeri dalam Malaysia maya dipejuraika kena 12 enggau 13 Julai 1976, ti disukung 130 iku Kaban Parlimen lalu dibantah 4 iku ke bukai.

Seiku ari pemesai ke nyukung Artikel 1 (2) Konstitusyen Perintah Besai nya diubah iya nya ex-presiden SUPP kelia, Tan Sri Ong Kee Hui (MP Bandar Kuching), ketegal nya, penyakal ngasuh Dr Sim badu mangku pengawa iya ke diatu.

“Bakani tau nyadi baka nya? Enti apai nuan dijil ketegal enchuri sereta ngerumpak, aku ke nyadi anak nitihka iya kena jil pia? Aku antara tim Adenan (Kepala Menteri Datuk Patinggi Tan Sri Adenan Satem) ke baru.

“Taun 1976? orang ke nyain nya pan udah parai, bah bakani aku nyaut ngarika orang ke udah parai?. Kami tim baru Adenan, SUPP ke baru dipegai aku. Taun 1976, aku nadai enggau orang bepolitik,” ku Dr Sim madah maya dikerandau pengudah nyuaka duit bantu ngagai orang ke tasah ampuh bah di Balai Mensia Mayuh Stapok ditu, ensanus.

Taja pia, iya madahka mega madah, nama kebuah hak Sarawak nyauka nadai agi.

“Taja pia, tu taun 2016 lalu tu penemu kami ke minta hak Sarawak dipulaika sereta Artikel 1 (2) diubah baru.

“Sida penyakal pan enti ditanya pasal tuai pemesai sida iya ke udah parai, ulih enda sida iya nyaut lalu mangku betanggungpengawa ba penyalah tuai pemesai sida ? Nya mandangka penemu penyakal baka pikir anak mit lti agi muda runding…Bakani ku aku nyaut ba pekara ke enda ditemu aku?,” tanya Dr. Sim.

Ba tanya bekaul enggau chalun maya Pengawa Bepilih Besai Menua (PRU) tu ila, bisi enda SUPP udah nyendiaka chalun parti nya, ku Dr Sim:

“Kami ulih merambu nama chalun ti dikedekaka kami, penyakal pan baka nya…PRN enggau PRU sebaka. Sapa ke nyadi chalun, beratika rikod kita manah, suahka agi ngabas tauka begulai enggau rayat,” ku iya.

Lalu baka nya mega enggau parti United People’s Party (UPP) ku iya, nyata endar pengatur BN di Sibu enggau Lanang kala nyebut pasal chalun ungkup sitak nya,chalun ari BN.

“Aku enggai sengapa nimbal…, tentu pemutus ke penudi endar bepanggai ba presiden parti sereta chairman BN iya nya Menteri Besai,” ku iya.

Ngagai nembiak sekula ti ngachau nembiak bukai dikena nagang kes nya ngambika enda majak nyadi

// Dikarang Rengenyan Labang //

KUCHING: Diatu udah datai ba timpuh ke patut endur Opis Menteri Pelajar Malaysia (KPM) neritka atur baka ukum gantung ari sekula setaun ngagai nembiak sekula ke ngachau nembiak sekula bukai, dikena nyeliahka ari sebarang penanggul tauka penusah besai nyadi.

Presiden Kesatuan Guru Bumiputera Bersatu Sarawak (KGBS), Ahmad Malie madah, berindik ari pekara nya perambu ti dibantaika opis menteri nya endang pekara ke patut, enggaika kes tu majak nambah sereta balat nyadi.

“KGBS nyukung amat perambu KPM ti deka neritka ukum gantung ari sekula setaun ngagai nembiak ti bekaul enggau kes ngachau nembiak sekula bukai di sekula. KGBS amat nyukung KPM ti nemu pasal pangka ari penusah ketegal kes nya ba raban nembiak diatu.

“Ba penemu KGBS, udah datai ba maya iya nembiak ke ngachau nembiak bukai di sekula diberi ukum ke berat, laban baka ti kala dipeda dikerembaika ba media sosial sebedau tu, sekeda kes tu ngemakal sereta bisi mega nabanka nyawa,” ku iya.

Ahmad mansutka pekara nya ngagai Utusan Borneo lebuh dipinta meri penerang bekaul enggau Opis Menteri Pelajar ti merambu deka ngukum gantung ari sekula setaun ngagai nembiak ke bekaul enggau kes nembiak ngachau ke nembiak sekula bukai.

Apin lama, Menteri iya Datuk Seri Mahdzir Khalid madahka, piak iya deka serius agi bekaul enggau kes nembiak ke ngachau nembiak bukai ti nyadi diatu sereta mega majak nambah, lalu berindik ari tu opis menteri bejalaika atur ke patut.

Taja pia menteri nya madahka perambu nya dalam renggat benung dipansik, nya alai bala Gerempung Ukai Dikuasa Perintah (NGO) dipinta sama meri penemu.

Ahmad ngarapka atur terit ke diperambu deka dipejalaika opis menteri nya ulih mujur sereta meri pangka ngagai nembiak ke ngereja penyalah nya, ti enda patut dikereja nembiak sekula laban nya ulih ngemakal nembiak bukai.

Atur terit ke diperambu nya dikearapka ulih mutarka kes tu ba bala nembiak sekula, ku iya.

“KGBS amat setuju nembiak ke ngachau nembiak sekula bukai deka diasuh bejalaika pengawa pengasih enggau servis sosial sereta dipasuk ngagai pulan ngemanahka ulah dikena nempa nembiak nya nyadi orang ke menyana, ari ke digantung ari sekula pia aja.

“Nyema ukum tu enda meri empas ke positif, taja pan udah setaun nembiak nya diukum gantung ari sekula, endang patut bendar timpuh ukum gantung sekula nya dilanjarka ngagai timpuhka ke patut agi,” ku iya.

SIBU: Sepenyampau 1,766 iku ke ngembuan Sijil Pelajaran Malaysia Vokasional (SPMV) udah diambi gawa ba pengawa perintah ari taum 2014 nyentuk taun tu (Januari ngagai 30 September), pia ku Menteri ba Opis Menteri Besai, Datuk Joseph Entulu Belaun.

Bepelasarka rikod ari Opis Servis Kereja Perintah (SPA), ku iya, ari penyampau nya, 344 iku ngembuan SPMV udah diambi gawa dalam taun tu (Januari ngagai 30 September),sereta 747 iku dalam taun 2014.

Ku Entulu nambah,bisi ngembuan setipikit vokasional diterima ba peminta servis perintah bepelasar ba pekara penetap skim servis.

“Bisi 64,661 iti peminta dianjung ngagai SPA entara taun 2014 enggau 2016 (Januari ngagai 30 September) sida ke ngembuan SPMV. Ari penyampau tu, 17,354 iti peminta taun tu (Januari ngagai 30 September), alai 21,102 (peminta) dalam taun nyin tadi sereta 26,205 dalam taun 2014,” ku iya lebuhka dirandau.

Taun tu (Januari ngagai 30 September), Sabah nyadi menua pemadu mayuh peminta (3,461), dientudika Sarawak enggau 2,084 iti, Perak (1,725), Kelantan (1,616), Johor (1,587), Kedah (1,514), Pahang (1,029) lalu ke bukai kurang ari 1,000.

Dalam taun nyin tadi, bisi 3,813 iti peminta ari Sabah lalu Sarawak 2,410 iti, Perak (2,172), Johor (1,959), Kelantan (1,928), Kedah (1,885), Pahang (1,318), Wilayah Pesekutuan Kuala Lumpur (1,043) lalu nengeri ke bukai kurang ari 1,000.

Bedau lama ke udah, Menteri Muda Pemansang Pengereja Pengawa enggau Latih Datu Len Talif Salleh madahka sida ke bisi Diploma ari kolej vokasional udah dijamin sida mega ulih nganjung peminta ba pengawa dalam sebarang opis perintah nengeri SPA.

Len mega madah genap kolej vokasional di menua tu ari baruh bidang kuasa Opis Menteri Pelajar, nya alai, kelayakan sida diaku SPA.

Iya mega madahka bala graduet ari kolej vokasional anang nangi pasal penuduk sida laban setipikit diploma sida diaku ulih nganjung peminta gawa ba kededua opis perintah nengeri enggau perintah besai.

Entulu madah bisi 73 peminta dalam taun tu (Januari ngagai 30 September), chalun diploma ari kolej vokasional ke dianjung ngagai SPA.

“Sida ke bisi diploma (semua diploma ke diaku perintah) tau nganjung peminta ba semua pangku pengawa ti endang ungkup diploma nyadi atur skim servis nya.

“Tebal agi pangku pengawa ke dipinta chalun endang bekaul enggau diploma sereta setipikit ari kolej vokasional tauka sekula vokasional. Sida ke bisi diploma diaku perintah nyengkaum sida ke ari kolej vokasional ulih nganjung peminta ba semua pangku pengawa ti engkeman enggau gaya penetap ba skim servis,” ku Kaban Parlimen (MP) Selangau nyimpul.

KUCHING: Opis Menteri Dagang Dalam Nengeri, Koperasi enggau Pekara Bebeli Barang (KPDNKK) Sarawak nyamin bekal minyak sumai di nengeri tu chukup.

Sapit Direktor KPDNKK Sarawak, Abd Hafidz A. Rahim madah, berindik ari nya rayat di nengeri tu dilalau ngambika enda irauka bekal minyak sumai enda chukup.

Iya madahka piak penerit adat KPDNKK Sarawak deka chakah bejalaika pengawa matau di nengeri tu, dikena nentuka nadai penanggul enda chukup minyak nya.

“Sehari tu tadi kami bisi baum enggau raban pemungkus enggau pemurung minyak kena sumai, sida iya nyamin bekal minyak bepanduk ungkup penguna di Sarawak deka chukup. Kuota minyak sumai di makit Sarawak iya nya 3,883 metrik tan sebulan.

“Aku minta ngambika penguna anang irau ati pasal bekal minyak sumai di nengeri tu, laban naka ke diatu kitai ninga ‘viral’ ke enda temu ari ni penatai iya, tang ke bendar utai nya enda nyadi di Sarawak.

“Pengawa matau deka chakah agi dipejalaika ba semua renggat lalu ke bendar di Sarawak nadai penanggul bekal minyak sumai, naka ke diatu,” ku iya lebuh ke ditelefon Utusan Borneo, kemari.

Ketuai Pemesai Penerit Adat KPDNKK Sarawak mansutka pekara nya lebuh ditanya bekaul enggau isu minyak sumai ti dikerembaika di menua tu, kemari.

Bejaku baru Hafidz madahka pemungkus enggau pemurung minyak sumai besemaya deka meri kerejasama ngagai KPDNKK. Di Sarawak bisi 173 pemungkus enggau pemurung.

Nambahka nya iya ngarapka rayat tauka penguna di nengeri tu ngeripot ngagai opis menteri nya nyema tetemuka bisi penanggul bekaul enggau bekal minyak sumai.

“Taja pia, enti nemu bisi penanggul bekaul enggau bekal minyak bepanduk, patut diripot ngagai KPDNKK nengah talian bebas tol 1-800-886-800,” ku iya.

Nitihku iya, pemungkus enggau pemurung enti ditemu salah baka ngelalaika sereta ngalauka bekal nya, ulih diukum ari baruh ‘Akta Kawalan Bekalan 1961’, lalu enti ditemu salah deka diukum nyentuk ngagai RM100,000 tauka dijil tiga taun.

Anggar nya bepelasarka pansik dipejalaika Opis Menteri Pemansang Infrastruktur Sarawak bedau lama udah

// Dikarang Chris Bishop //

KUCHING: Sarawak begunaka belanja RM20 bilion ba pengawa nyendia atur penyambung ngagai semua genturung pendiau di Sarawak ti mungkur 31,512 peranak nengeri tu.

Mansutka penerang tu, Menteri Kereja Raya Dato Sri Fadillah Yusuf madah anggar nya bepelasarka pansik ti udah dipejalaika Opis Menteri Pemansang Infrastruktur Sarawak bedau lama tu tadi.

“Ba taun 2016, Sarawak udah ngagihka belanja RM5.9 bilion ungkup pengawa pemansang lalu ari penyampau nya, RM2.6 bilion dikena ngemansang kandang menua pesisir.

“Maya manggai ba 2030, kitai netapka juluk ulih nyendia perengka guna enggau atur penyambung di semua kandang menua pesisir di serata Sarawak ti seikas enggau nengeri bukai,”ku iya.

Fadillah mansutka jaku tu ba ‘3rd Sarawak Business & Investment Summit’ ke diatur di sebuah hotel ditu kemari.

Aum sehari ti bejuraika kuing enggau strateji Perintah Nengeri ba pekara ekonomi nya nya dipenyadi Kepala Menteri Datuk Patinggi Tan Sri Adenan Satem.

Ngenang kaul ke sama, Fadillah nambah ba pengawa nyendia atur penyambung ngagai 5,000 genturung pendiau ke betumpuk di nengeri tu, SCORE udah ngambi insiatif ngerembaika industri dalam kandang menua.

Ku iya, mayuh palan industri udah ditumbuh ari inisiatif nya baka ke Palan Industri Samalaju lalu nyentuk ke diatu RM30 bilion puku ari 15 kompeni menua luar udah diperanak di SCORE.

“Insiatif tu udah nyendia atur penyambung ngagai mayuh kandang menua pesisir ngelingi SCORE,”ku iya.

Ngenang kaul ke sama, Fadillah madah Printah Besai udah ngemendar empat projek jematan iya nya Jematan Ijan, Rambungan, Meda Jaya Flyover enggau Batang Lupar ke ba pemanjai 5km.

Semua nya ku iya begunaka belanja RM1.55 bilion lalu disadang berengkah digaga ba pengujung taun 2017.

KE PENGINGAT: Adenan (tiga kiba) begambar enggau raban ASLI. Bela dipeda Dr Rundi (kiba) enggau Fadillah (empat kiba).

KUCHING: ‘Friendly Policy’ ba atur matak pemeranak puku ari menua luar baikka nya ba renggat Perintah Besai tauka Nengeri seruran dikemeran di Sarawak ngelama ke udah, Ku Kepala Menteri Datuk Patinggi Tan Sri Adenan Satem.

Ku iya, polisi nya mega udah mujur ngenanka ekonomi nengeri Sarawak ba ikas manah tajapan ba maya ke diatu gaya ekonomi di serata dunya majak labuh.

“Kitai meransang kompeni ari menua luar beranakka puku sida ditu. Polisi tu mai pemaik ngagai Sarawak lalu nya mungkur pengawa dagang ari atur import nyentuk maya ngalih ngagai pengawa industri.

“Nengah ‘Friendly Policy’, kompeni ari Jepun, Korea, British, Amerika sereta ke bukai beranakka puku sida ditu,’ku Adenan.

Iya mansutka jaku tu rambau bejadi “3rd Sarawak Business & Investment Summit” ke diatur di seiti hotel ditu, kemari.

Ngenang kaul ke sama, Adenan madah rega minyak enggau komoditi ti majak nurun engka sebengkah ari pusin ekonomi lalu meri empas ba serata dunya.

“Tajapia, mengkang bisi penampak ba gaya ekonomi di Sarawak. Kitai majak matak pemeranak puku ari menua luar.

“Semua nya ketegal kitai ulih nyendia bekal kuasa ke mudah kelimpah ngembuan mayuh tanah endur numbuhka industri,”ku iya.

Ku iya nambah, palan tekat ai Murum, Bakun enggau Batang Ai ulih nyendia bekal kuasa ke mudah lalu nya udah matak kompeni pemeranak puku datai.

Kitai mega ulih nyendia orang gawa bepengelandik ditu, tandu iya seraya madah Perintah Nengeri diatu meratka pengawa nempa orang gawa ke landik ba pekara teknikel enggau vokasional.

“3rd Sarawak Business & Investment Summit” kemari diatur Asian Strategy & Leadership Institute (ASLI) lalu bejuraika kuing sereta strateji Perintah Nengeri dalam atur nyapai juluk nyapai menua bepemisi tinggi ba taun 2020.

Nitihka jaku Adenan, Sarawak diatu nyadi nengeri ba penuduk lumur tiga ti udah ngangkatka ekonomi Malaysia ke alai ba taun 2015 Sarawak ngasilka penatai pemisi ba penyampau RM118.9 biliun.

Adenan pechaya ekonomi Sarawak ulih dikerembai manah agi lalu pengawa ekonomi ke diatu mungkur pengawa meri servis ba ikas 33.1 peratus, pengawa gudang (27.2%), pengawa lumbung enggau kuari (22.1 %), betanam betupi (14.3%) enggau pengawa begaga begunan/rumah ba ikas 3 peratus.

Bela datai Menteri Kereja Raya Dato Sri Fadillah Yusuf, Menteri Perengka Guna Mensia Mayuh Datuk Dr Stephen Rundi, CEO ASLI Tan Sri Dato Dr Micheal Yoh enggau Presiden Balai Dagang enggau Industri Sarawak Datuk Abang Abdul Karim Tun Abang Openg.