PRS endang ari suba udah ngena tiga kriteria nya nyadika SOP ba pengawa milih chalun, ku Masing

KUCHING: Enam iku penyandang Kaban Parlimen (MP) ari Parti Rakyat Sarawak (PRS) patut nangkup tiga kriteria ditetapka parti sebedau sida dipilih baru dalam Pengawa Bepilih Besai (PRU) Ke-14 ti deka datai, pia ku Presiden Parti Rayat Sarawak (PRS), Tan Sri Datuk Amar Dr James Jemut Masing.

Ku iya, parti ari suba udah ngena tiga kriteria nya nyadika Atur Operasyen standard (SOP) ba pengawa milih chalun.

“Kitai udah mujur ngena SOP kitai empu dikena beratika penau chalun kitai. Sekalika sida tu mujur ba tiga kriteria ti udah ditetapka kitai, alai kitai deka nganjung nama sida ngagai bala ketuai tinggi Barisan Nasional (BN) ngambika diserenih.

“Tang baka selama, ngagai nama sida ti udah diserenih parti endang deka diterima bala ketuai tinggi BN,” ku Masing madah ngagai The Borneo Post ditu kemari.

Ku iya, kesemua tiga kriteria nya chukup beguna alai rintai ulih diterima bala rayat ba renggat pun menua laban pekara tu ke beguna endar.

“Ngagai bala MP kitai diatu ngambika dinan, kitai nerima sida ti ngembuan Indeks Penyulut Pengawa (KPI) ke manah ba renggat pun menua alai kitai ulih nemu pemayuh orang nerima sida.

“KPI sida deka dipilih parti enggau aku empu, nyadi Presiden ulih mutuska sapa bagi sida ti deka bediri maya PRU Ke-14 tu ila,” ku Masing.

Masing nimbal ripot ti dipansutka Sapit Presiden PRS, Datuk Joseph Entulu Belaun ti minta kesemua enam iku MP ari parti nya patut diasur ngenanka penuduk sida.

Nitih ku Entulu, peminta tu dibantaika bala kaban PRS rambau Aum Deligit Tiga Taun Sekali (TDC) parti nya di Bintulu kena 23 Oktober tu tadi.

Kelimpah ari Entulu, ke lalu nyadi MP Selangau, lima iku MP ke bukai iya nya Masir Kujat (Sri Aman), Datuk William Nyallau Badak (Lubok Antu), Datuk Joseph Salang Gandum (Julau), Datuk Aaron Ago Dagang (Kanowit) enggau Datuk Wilson Ugak Kumbong (Ulu Rajang).

Kriteria kedua nitih ku Masing, chalun ke diterima parti komponen BN ke bukai.

“Kitai gawa baka tim ke besai. Nya alai, MP kitai meseti nemu chara BN gawa baka ruang bilik ke besai.

“Nya alai, sida meseti ngembuan kaul ke manah enggau parti komponen BN ke bukai dikena nyamin PRS ulih nampung pengawa nyadi komponen parti ti mangka.

“Nya kebuah kriteri tu pekara ti beguna endar nyadi MP ke manah sereta mega patut nyema sida deka dipilih baru,” ku iya nerang nyemetak.

Masing ke mega nyadi Sapit Kepala Menteri nambah kriteria ketiga iya nya pemerat ti sebela.

“Kami mega melabaka bala MP ulih gawa begulai enggau bala Kaban Kunsil Nengeri (ADUN) ba kandang menua sida. Ambi ke chunto di Ulu Rajang, aku berasai lantang enggau MP kitai, Datuk Wilson Ugak laban iya udah bejalaika tanggungpengawa enggau gawa begulai enggau tiga ADUN ba kandang menua nya, Liwan Lagang di Belaga, Kennedy Chukpai Ugon di Murum lalu aku empu di Baleh,” ku iya.

Lebuhka ditanya nyema enam iku penyandang deka bediri baru, Masing semina tuchum lalu madah parti apin ngaga sebarang pemutus alai PRU Ke-14 dipebala deka diatur dalam taun 2018.

“Kitai enda berumban ngaga pemutus. Anti sereta perati aja. Kitai deka ngempuruka semua penerang sebedau PRU Ke-14 ti deka datai, udah nya baru kitai ngaga pemutus,” ku iya.

Ngelansa pekara bukai, Masing berasai lantang enggau TDC ke udah diatur manah sereta mujur taja ngaku bisi sekeda ‘ulah’ ke enda manah, tang iya enggai madah enggau silik.

MIRI: Sarawak nadai sebarang petalat kelebih agi ngaul pekara sensitif jalai pengarap enggau raban bansa, lalu nyadi nengeri chunto pemadu manah ngemeranka penyerakup raban bansa.

Sapit Kepala Menteri,  Datuk Amar Abang Johari Tun Abang Openg madahka Sarawak diuan pupu raban bansa enggau jalai pengarap sereta runding ti ulih  bebatak asur enggau meretika pangan diri.

“Sarawak nengeri ti likun endang, nengeri ke bukai suah betalat enggau pangan diri tang kitai di Sarawak likun sereta ubah bala ketuai ke merintah nengeri mega mujur sereta diterima semua raban bansa enggau nadai petalat,” ku iya rambau Pengawa Ngengkahka Batu Pemun Surau Abu Bakar As-Siddiq ditu bedau lama.

Johari mega madahka Sarawak mega nyadi chunto nengeri Islam laban sida ti megai pengarap Islam enggau Ukai Islam ditu bebasaka pangan diri kelebih agi dalam pekara nirika rumah sembiang.

“Orang Islam enggau Ukai Islam bela betulung sereta mantu pangan diri nirika rumah sembiang lalu pemereti ati tu nempa Sarawak nyadi nengeri chunto,” ku iya nerang.

Johari ngaku nengeri di Semenanjung beratika Sarawak ngemeranka chara perintah ti bebasaka main asal enggau adat asal pupu bansa.

Ngelansa bekaul enggau pengawa nirika rumah sembiang nya, Johari ke mega nyadi Menteri Dagang Temuai Sarawak nerangka projek surau tu meda penyerakup semua bansa ngujungka rumah sembiang tu mujur digaga.

“Kitai meda kaban korporat ukai Islam, pengari rayat ukai Islam enggau bala pemesai Islam empu ditu besaup nyuaka pemeri nentuka pengawa nirika surau As-Siddiq tu mujur,” ku iya.

Beserimbai enggau nya, Johari mega bisi ngemendarka geran penyampau RM200,000 ngagai komiti ngaga surau As-Sidddiq lalu besemaya deka nambahka geran nya ila.

“Enti piak komiti mujur ngiga enggau nambahka belanja, alai aku deka nambahka dua kali ari penyampau belanja nya dikena nyukupka belanja ke bisi dikena ngaga surau beungkus RM800,000,” ku iya.

Ba lansa ke bukai Surau As-Sidddiq mungkur pemesai 0.93 ekar ba Perumahan Senadin ke beungkus penyampau RM800,000. Naka tu kaban korporat Datuk Hii King Chiong udah nyuaka pemeri penyampau RM200,000.

Genturung pendiau nya bisi urung 1000 iku peranak ke megai pengarap Islam lalu pengawa nirika surau tu ulih nangkup urung 200 ngagai 250 iku ba seiti maya.

Sama bisi datai Menteri Muda Dagang temuai ke lalu nyadi ADUN Senadin, Datuk Lee Kim Shin, Residen Miri, Antonio Kahti Galis, Pemesai Pelilih Miri Abdul Aziz, Chairman Komiti Ngaga Surau Abu Bakar As-Siddiq, Abang Mohamed Abang Deli sereta bala bukai.

UNGKUP KENANG: Dennis (tiga kiba) rambau begambar begulai enggau raban RELA pengudah pengawa bejadi Kus Pengelala RELA Siri 3/2016 di Long Bedian.

LONG BEDIAN: Pengawa peranak menua tu ngaul diri ba kereja volunteer baka Ikatan Sukarelawan Malaysia (RELA) ulih mai pengelikun enggau pengelantang ngagai menua.

Kaban Kunsil Nengeri (ADUN) Telang Usan, Dennis Ngau madah pengawa peranak menua tu ngaul diri dalam gerempung beunifom diperati ulih matau pengelantang enggau pengelikun kelimpah ari nerenak kerejasama.

“Raban Rela ba rintai kedua pengudah raban polis enggau soldadu, bala sida mega megai tanggungpengawa nyaga pengelikun enggau pengelantang kelebih agi ba tumpuk pendiau,” ku iya rambau bejadika Kus Pengelala Rela Siri 3/2016) di Long Bedian.

Dennis madah kaul peranak ba tumpuk pendiau dalam Unit Rela mega meri awak ngagai sida meretika pangku pengawa nyaga pengelikun enggau pengelantang mensia mayuh.

“Raban Rela bisi awak ngulu seminar ke diatur ba Kuala Lumpur dikena nambahka penemu lalu nyema diaku, sida ulih nyadi ketuai dalam komuniti,” ku iya.

Ku Dennis nampung, kaul bala sida dalam Unit Rema meri pemaik kelebih agi dalam meri penerang pasal propaganda perintah sereta ngiarka pekara-pekara ti enda betul pasal perintah.

“Lebuh raban Rela chakah bejalai ke pengawa sereta bisi penemu, alai sida nyadi mata enggau pending perintah meri penerang ngagai bala rayat pasal pemansang ke dibai perintah,” ku iya.

Lebih 200 iku kaban Rela besemak Telang Usan ngulu Kus Pengelala Rela Siri 3/2016 di Long Bedian alai tuju iya dikena nambahka pengelandik raban Rela.

Ku Dennis taja kaul raban dalam Unit Rela nadai penatai pemisi ti meruan, tang tu nerenak runding andal ngereja pengawa volunteer kena nyaga pengelikun.

Dennis bela bisi ngemendarka geran Projek Mit Pemansang Menua Pesisir (MRP) penyampau RM5000 ngagai piak pengatur kus.

BERA: Opis Menteri Pemansang Menua Pesisir Enggau Kandang Menua (KKLW) nagit numbuhka 5,000 buah unit Rumah Bina Negara (Rumah BN) ari baruh Opis Pemansang Orang Betanam Getah Kebun Mit (RISDA) enggau FELCRA Berhad sepemanjai timpuh Atur Pemansang Malaysia Lumpar ke-11 (2016-2020).

Menteri iya, Datuk Seri Ismail Sabri Yaakob madah, tagit RISDA deka ngaga 100 unit Rumah BN ungkup keterubah iya taun tu lalu 475 unit rumah ninting taun pengudah tu di serata menua nyentuk taun 2020.

“Taja pia, pengudah beratika agih belanja dalam Bajet 2017 RISDA enggau FELCRA empu nerima RM200 juta, kitai andal ulih ngaga pengabis mimit 4,000 rumah lalu pemadu mayuh 7,000 rumah.

“Tagit tu ulih dijapai nyema peminta nadai penanggul enggau geran tanah sida empu. Tu mega bepanggai ba peminta rebak kedua pekebun mit RISDA. Kelimpah ari nya, ejensi-ejensi ke bukai ari baruh KKLW mega bisi perambu dudi hari bejalaika pengawa ngaga Rumah BN bepanggai ba peminta.

“Dalam minggu baru bisi aum exco menua pesisir nengeri lalu aku minta saup sida ngulihka tanah perintah nengeri ngagai bala peminta Rumah BN sereta tu deka ngenyampatka raban nembiak rebak baru muntang agi bisi lot. Nadai perintah bukai di dunya baka tu,” ku iya dalam jaku bejadika Rumah BN ba Kampung Bintang ditu kemari.

Sama bisi datai Chairman RISDA, Datuk Zahidi Zainul Abidin enggau Exco Perintah Pahang, Datuk Seri Shakar Shamsuddin.

Ba lansa ke sebaka, Ismail Sabri madah, projek Rumah BN nya mega deka meransang raban nembiak di menua pesisir ari mindah ngagai mengeri besai ti tinggi ungkus pengidup.

“Raban nembiak di menua pesisir ti gawa tang nadai penerang gaji tau diaku nengah tuai tumpuk pendiau aja dikena ngulihka duit jali ari bank.

“Dikearap enggau pemujur Rumah BN tu deka meri peransang ngagai peranak menua pesisir terus meri sukung ngagai jalai pengarap, bansa enggau menua seriris enggau juluk perintah deka mega pengawa ekonomi ulih disungkak bala komuniti menua pesisir,” ku iya.

Program Rumah BN nyadi program pengawa berumah ulih ditangkup raban nembiak di menua pesisir kelebih agi rebak kedua ba tumpuk pendiau asal ari raban B40, meri awak ngagai sida bisi rumah kediri empu.

Rumah tu dijual enggau rega RM65,000 seunit enggau pemesai 700 kaki persegi sereta ngembuan tiga bilik tinduk, dua bilik mandi sereta disikap ngena api enggau kipas.

Insentif perintah sepenyampau RM20,000 mega diberi ngujungka duit jali manggai RM45,000 tauka RM250 sebulan.

Naka ke diatu, opis menteri udah nerima 145 peminta Rumah BN lalu 100 ari nya udah dikemendar.

IDENTITI BANSA: (Ari Kiba) Dr Abdul Rahman, Roland Sagah, Dr Stephen enggau Torstein ngena tenggak ti digaga ari marik disuaka Gerawat (dua kanan).

BARIO: Beserimbai enggau pemujur bejadi Stesyen Kuasa Solar Hybrid,Sarawak Energy Berhad (SEB) udah ngatur Pengerami Makai Lemai Kelai Meri Terima Kasih ti diatur ba Balai Komuniti Bario apin lama udah.

Pengerami Makai Lemai nya udah digulu lebih 200 iku lalu Menteri Perengka Guna Mensia Mayuh Dato Sri Dr Stephen Rundi anak Utom enggau bini iya Datin Sri Loreta Sawot, Menteri Muda Perengka Guna Mensia Mayuh (Elekterik enggau Telekomunikasyen) Dr Abdul Rahman Junaidi enggau bini iya Siti Shorgayah Ahmad Zaidin, Perengka Guna Mensia Mayuh (Bekal Ai) Datuk Roland Sagah Wee Inn, CEO Datuk Torstein Dale Sjøtveit Sarawak Energy Berhad Group, Kaban Kunsil Nengeri Mulu Dato Gerawat Gala, Kaban Kunsil Nengeri Telang Usan Dennis Ngau enggau Residen Miri Antonio Kahti Galis nyadi temuai dipebasa malam nya.

Gerawat, lebuh ke bejaku madahka rayat di menua pesisir agi begunaka penyikap perengka guna ti manah agi lalu sekeda perengka guna nya udah dikemanah tauka bisi mega deka dikemanah.

“Pengidup rayat udah berubah pengudah bisi bekal elekterik 24 jam lalu aku arapka mayuh agi deka digaga dudi ila baka ai beresi enggau lampu jalai,” ku iya.

Stesyen Kuasa Solar Hybrid Bario nya digaga ba Genturung Pendiau Baru, Bario udah dikemendarka kena bulan September taun siti nyin tadi ti mega kuasa ke tegap lalu naka ke diatu tu udah nguntungka lebih 200 ruang bilik ba genturung pendiau di tanah tinggi Bario.

Berebak enggau nya Dr Stephen madah, endang bisi pematut ngaga ‘Coming Home Program’ dikena matak raban ke biak ti udah graduet pulai ke menua diri sereta ngubah gaya genturung pendiau asal sida.

“Bario palan ti manah lalu aku enggau YB Dennis udah berandau pasal program tu. Pengawa dikereja kitai diatu nguntungka nembiak rebak dudi mega, nya kebuah kitai begunaka sida pulai lalu mantu peranak ditu,” ku iya seraya madahka bekal ai beresi, palan telekomunikasyen enggau pengawa nirika dua puluh ngagai tiga puluh tiang lampu jalai dipejalaika SEB di Bario deka nyadi nyata enda lama agi.

Dulu ari nya, pengudah bejadi stesyen kuasa, Dr Stephen lalu nemuai ngagai rumah panjai Kampung Baru, ke alai iya bisi ngungkupka RM15,000 ngagai komiti JKKK nya. Pengawa iya dipuji tuai rumah panjai lalu iya mega menteri ti keterubah endar ngindikka kaki ngagai rumah panjai nya.

Disalin Ari Churchill Edward//

Ngambika urup nya ulih dikemansang, diintu sereta dikelaku ungkup ke guna rebak dudi ila

KUCHING: Ngintu sereta ngelakuka urup Iban, pesaka intelek ti enda majak dikeibuhka nyadi batang juluk ethnolinguist Associate Professor Dr Bromeley Philip enggau bala pangan iya bukai ke sebaka runding enggau iya.

Bromeley, begempung enggau Sarawak Dayak National Union (SDNU) sepenemu besaup ngaga pemandang dikena nyapai juluk nya.

Palan ke engkeman endur ngaga pemandang iya nya ba palan pematih pengajar (IPG) baka IPG Sarawak di Miri enggau IPG Rajang di Bintangor, Rumah Dayak Saratok ungkup pemaik bala pengajar Dayak enggau nembiak SMK Saratok, Dewan sekula  SMK Julau No.1, SMK Julau No.2 enggau SMK Pakan.

Licha enggau bengkel nyadi pilih pengelicha universiti nya maya ngaga pemandang nya. Entara bup ti ditulis Bromeley,iya mega bisi ngaga bupkereja ungkup pengawa ngajar enggau belajarka ungkup urup Iban ngagai bala pesereta.

“Batang juluk projek tu iya nya ngintu urup Iban nya ngambika enda punas, ngelakuka pengawa nguna urup Iban ngagai bala pengajar jaku Iban, pengelicha, nembiak rebak dudi bansa Iban enggau mensia mayuh bukai nengah seminar, kus, bengkel, penemuai enggau pemandang dikena ngemansangka urup Iban nya nyadi sistem moden ti mudah dikena pengawa nulis nyengkaum nulis siri asil ti deka dikeluarka.” ku Bromeley madah lebuh dikerandau pengarang berita apin lama udah.

Ku Bromeley, urup Iban tauka urup Dunging alphabet nya ukai sistem nulis kelia menya laban penengkebang nya idup menggai ba tengah taun 80an. Urup nya ngenampakka ‘dynamism’ urup moden ti engkeman ungkup pengawa nulis. Nya ngundan tulis ‘syllabic’ enggau simbol tulis urup. Gaya urup nya dipandangka nengah urup moden. Urup nya mega bisi 59 ke alai 16 iti nya simbol konsonan lalu ke bukai (43) ngarika vokal ari sukut kluster vokal enggau diftong, ku iya.

Gaya bukai ti dipandangka urup Iban ti mida iya ari hiroglif lama laban urup nya ukai digaga ari logograms tang ari fonologi enggau simbol urup. Ngena set urup ti sistematik, penguna patut mudah agi ngena sereta ngingatka 59 iti urup nya.

“Reti nya, sistem tulis ti sistematik mudah dikena. Nengah pengawa ngena sistem tulis ti dinamik tu, nadai kebuah pengawa ngena jaku Iban tu enda ulih diregaska baru. Taja pan teks Iban ulih ditulis ngena urup Roman tauka Latin, tang nguna urup Iban empu endang tetap betul ari sukut ortografi – kaul fonologi.Urup nya mega ulih nangkap semua bunyi dalam jaku Iban, lalu nyamih kebuah iya chukup dinamik dikena ngarika tulis dalam leka jaku Iban,” ku iya.

Urup Iban nya ditengkebang niang Dunging Gunggu, udah dikemansang nyadi urup dikena dalam komputer, sama tau dikena ba Microsoft Words enggau Macintosh.. Urup Iban ti dikena dalam komputer nya dikena enggau nama ‘LaserIban’ ti bisi dalam software ti ulih disimpan ke dalam komputer. Urup LaserIban ungkup Windows enggau Macintosh ke bendar iya ‘cross-platform compatible’, ke mega ulih nyadi ‘Word files’,sebaka enggau urup English.

Ngena urup tu mega, ulih ‘re-alphetise’ ngagai teks roman Iban, nya alai ulig digagaka pangkalan data alai naruh dokumen ‘ke amat-amat’ dalam asal Iban.

Urup Dunging mengkang dikelala enggau sistem tulis, lalu semina ketegal nya urup nya diaku sereta dirikod dalam ensiklopedia ba Pelajar Iban 2001 (lambar 29 nyentuk 33). Urup nya ke asal mengkang manah lalu ditaruh Bagat Nunui, siku Kepala Pengajar ti udah pinchin ke mega nyadi Tuai Rumah of Nanga Ulai diatu.

Sistem tulis Dunging udah dikelala enggau manah ba sekeda bengkah endur. Keterubah endar urup ti diaku Dunging ulih dipeda ba Kamus Iban-English ke ditulis Anthony Richards (1981).

Pengawa ngaku urup Dunging nya besai endar reti sereta udah digaga nyadi Ensiklopedia Pelajar Iban ti dikeluarka Tun Jugah Foundation dalam taun 2001. Pengawa ngaku urup iya tu ulih ditemu ari baruh ‘alphabet’ ti ngemeratka sekeda lambar bekaul enggau asil kereja Dunging.

Dalam taun 2011, Dr Bromeley sebagi ari komiti pengatur Forum Jaku Iban. Bela sama nyadi komiti iya nya Ketuai Nembiak SDNU Churchill E. Drem enggau Editor Berita Iban Mathias Kassap Utusan Borneo merambu deka ngatur seminar sereta simposium dalam kandang beberapa bulan tu ti nyadi sebagi ari pengawa dikena ngintu jaku enggau sistem urup Iban.

SRI AMAN: Bala peminat main Futsal enggau basketball ba kandang Taman Sentosa Indah enggau Rancangan Perumahan Rakyat (RPR) Fasa II ditu mantaika pengaga ati laban Gelanggang Futsal enggau basketball ti dianti sida ngelama tu benung digaga lalu deka tembu enda lama agi.

Pengawa ngaga Gelanggang Futsal enggau basketball nya siti ari projek ari baruh Projek Tranformasyen Menua Pesisir (RTP), Kaban Kunsil Nengeri (ADUN) Simanggang, Datuk Francis Harden Hollis.

Harden lebuh dikerandang maya ngabas projek nya ditu pagi kemari madah, projek ke beungkus RM250,000 deka meri pemaik ngagai urung 500 iku peranak ke diau mendam ba palan berumah nya nyengkaum peranak bukai ke ngelingi.

“Aku ngarapka enti projekudah tembu enda lama aginya ulih dikena bala nembiak ba kandang endur nya ngatur main baka Futsal, enggau basketball enggau ke bukai.

“Ukai semina nya aja, gelanggang tu mega manah endur ngatur mayuh bengkah aktiviti bukai laban bisi perabung,” ku iya.

Harden ke mega Menteri Muda Ekonomi Menua Pesisir enggau Kebun Bedandang Besai Sarawak madah,gelanggang nya berengkah digaga pun taun tu tadi lalu disadang tembu enda lama agi.

“Terima kasih ngagai perintah nengeri kelebih agi Kepala Menteri laban udah ngemendarka belanja ti besai dikena ngaga gelanggang tu,” ku iya.

Dikarang Judan Bungap//

SIBU: Baka mensia mayuh ke bukai ba nengeri tu, Gerempung Tuai Rumah (PTR) Meradong bela ngasaika pengirau nyema Palan Pematih Pengajar (IPG) di Sarawak deka ditutup tauka ditukar ngagai palan pelajar ke bukai.

Chairman gerempung tu, Tuai Rumah Rantie Ayai madah, baka di Meradong, pelilih tu udah tebilang nama ketegal bisi IPG Kampus Rajang lalu nyema pekara nya dipenyadika ila tu ukai semina mai empas ngagai pekara ti bekaul enggau ngasilka mayuh agi pengajar tang mega deka mai ubah ngagai nama menua Meradong.

“Meradong endang ari suba temegah ati laban bisi IPG tu.

“Tang nyema ditutup tauka nyau diubah ngagai nama palan pelajar ke bukai, Meradong nadai utai dikemegah agi laban semina tu aja palan pelajar ke pemadu tinggi ditu.

“Iya ke bukai baka palan pelajar vokasional tauka palan pematih pengelandik empai bisi rita deka digaga ditu,” pia ku iya maya berandau enggau pengarang berita, kemari.

TR Rantie mantaika penemu tu bepun ari jaku perintah besai ti deka nutup IPG di menua tu.

Tang taja pan baka nya, empai lama tu tadi bisi penerang ke dibantai nengah surat berita madahka mensia mayuh saru sentang penemu ti madah IPG deka ditutup sepengudah Bajet 2017 dibantai.

Penerang nya mega madah, menua tu bisi 27 buah kampus IPG enggau semilan ari nya deka ditukar ngagai Kolej Vokasional tauka Politeknik seriris enggau ubah sereta peminta Latih Teknikal enggau Vokasional (TVET).

Nandu penemu iya baru, TR Rantie ti ngarika gerempung sida madah, sida bela ngenggaika pekara nya laban nya deka ngemuntanka juluk ati nengeri tu deka bisi 90 peratus iku pengajar ari nengeri tu empu.

“IPG Rajang baka IPG ba nengeri Sarawak ke bukai nyadi pelasar alai nempa rayat ditu nyadi pengajar.

“Kitai rayat Sarawak bela enda lantang beratika pekara tu,” ku iya madah baru.

Iya madah, nadai salah perintah deka ngemansangka agi pekara pelajar pengelandik tauka teknikal ba nengeri tu tang ukai ngaga pemutus nukar IPG.

“Kitai ngarapka sebarang pemutus deka digaga perintah besai ulih dikerandau manah dulu enggau perintah nengeri.

“Pia mega, ba pekara ti sama kami di Meradong andal amat perintah besai ulih numbuhka sebuah palan pematih Teknikal enggau Vokasional di Meradong ditu ngambika bala nembiak enda jauh nampung pelajar sida sepengudah tembu pelajar ba tikas sekondari,” ku iya madah.

KUCHING: Lembaga Air Kuching (LAK) bisi dua buah Loji Bekal Air pemadu besai di Sarawak ti digaga ulih nampung Kapasiti sepenyampau 780 Juta Liter Sehari, lebuh manggai ba tengah taun 2017.

Menijar Besar LAK, Mohamad Sabari Shakeran madah, LAK ngarapka nengah penyampau kapasiti nya kededua loji bekal air nya ulih nangkup peminta guna ti majak nambah ari peranak di mengeri Kuching enggau ke dibungkur loji nya.

Nitih ku iya, diatu bisi 165,000 akaun penguna tauka urung 850,000 iku ti dibekal ai beresi ke disediaka LAK ngena sistem paip ti semanjai urung 2,400 km.

“Bekal ai beresi ke diasilka dua buah loji ai besai nya, iya nya Loji ai Batu Kitang ulih ngasilka 764 JLS enti projek ngemanahka agi loji nya tembu semua dalam bulan Jun 2017, tang kami arap bendar projek nya ulih tembu dulu ari ke ditimpuh. Sebuah agi iya nya Loji Bekal Ai Matang ti digaga ulih nampung Kapasiti sepenyampau 16 Juta Liter Sehari.

“Entara projek ke meri pangka besai ti benung dipejalaika nyengkaum projek ngemesaika Loji Ai Batu Kitang ke disebut aku tadi, ngemesaika paip besai ti ngembuan pemesai 1,000 mm garispusat (40”) ari Loji Ai Batu Kitang nuju ke Samarahan enggau kandang endur ngelingi.

“Kelimpah ari nya nambahka penyampau tangki endur nyimpan ai beresi ke digaga ba atas bukit di Batu 9 3/4, Jalai Kuching-Serian enggau ba Bukit Entingan, Samarahan,” ku iya seraya madahka semua nya dipejalaika berindika ari peminta ba ai beresi ti majak nambah.

Sabari mansutka pekara nya dalam jaku pengelalu pengerami bejadika ‘Makmal Pelan Persediaan Tindakan Kecemasan Empangan Bengoh’ ke diatur opis LAK ba sebuah hotel ditu, kemari.

Makmal nya ke diatur dua hari disereta lebih ari 40 iku pengari genturung pendiau tauka Ketuai Kampung, 11 buah sekula ke diarika Kepala Pengajar, pengari ari Opis Residen Kuching, Opis Pelilih Menua Kuching enggau Bengoh Pelilih Mit enggau sekeda ejensi ti bekaul, udah mujur dipenyadika Menteri Perengka Guna Mensia Mayuh Dato Sri Dr. Stephen Rundi Utom.

Ngenang pasal Loji Air Batu Kitang nya baru, Sabari madahka ai mata ke diambi ngagai Loji Ai Batu Kitang iya nya ari Sungai Sarawak Kiba, ke lalu mantu Loji Air Matang nangkup peminta bekal ai beresi ti majak nambah di Matang/Rambungan enggau Sempadi, Lundu.

“Langgur ke disebut aku nya tadi ulih dipejalaika laban bisi Tekat Ai Bengoh, ti nyendiaka lebih mayuh ai mata ke lalu mantu ai beresi ke lebih ari Loji Batu Kitang ulih disambung nengah paip besai ngagai tangki endur nyimpan ai beresi atas di kandang endur Loji Air Matang,” ku iya.

LAK ditumbuhka kenyau 1 Januari 1959 lalu diatu udah genap 57 taun, pengudah LAK nyilih tanggungpengawa Bekal Air Bandar Kuching ari Opis Kereja Raya Sarawak maya nya suba.

Berengkah enggau semina bisi kapasiti 44.8 km persegi (km2) ba taun 1959, bererenggat kandang endur bekal ai beresi LAK majak besai iya nya nambah ari 44.8 km2 (1959) ngagai 90.7 km2 (1963); 225 km2 (1973) enggau 730 km2 (gazet).

Taja pan tanggungpengawa LAK semina ngenukuka penegap bekal ai ti meruan dikena nyendiaka bekal ai beresi ngagai peranak ba kandang mengeri Kuching, tang kenyau ari beberapa taun ke udah LAK diberi tanggungpengawa nyendiaka bekal ai beresi alternatif ngagai kandang menua pesisir.

“Beberapa taun ke udah, LAK diberi tanggungpengawa nyendiaka bekal ai beresi alternatif ngagai kandang menua pesisir ke semak enggau sistem agih paip besai di luar mengeri Kuching nyengkaum bagi menua Samarahan.

“Tuju iya dikena napi peminta guna ai beresi ke majak nambah ketegal pemansang sosio-ekonomi enggau penyampau tubuh mensia ke majak nambah,” ku iya.

Sama bisi datai, Menteri Muda Pengerai Mensia Mayuh ti mega Kaban Kunsil Nengeri (ADUN) Mambong, Datuk Dr. Jerip Susil, Menteri Muda Perengkaguna Mensia Mayuh Datuk Roland Sagah Wee Inn, Sekretari Mendam Opis Menteri Perengka Guna Mensia Mayuh Datu Ubaidillah Abdul Latip enggau ke bukai.

KE PENGINGAT: Othman (kiba) nyuaka tepa ngagai Len bejadika seminar nya seraya Dr Abdul Rahman (kanan) ngemata.

Laban tu deka nentuka nengeri ulih nyapai pemansang manggai ba taun 2030

BINTULU: Pengawa nambahka pengelandik enggau matih baru bala pengereja pengawa ke diatu patut nyadi agenda ti beguna ngagai semua kompeni di Sarawak.

“Kapasiti enggau penau pengereja pengawa di nengeri tu deka nentuka juluk Sarawak nyadi menua mansang enggau nengeri bepenatai pemisi tinggi manggai ba taun 2030,” ku Menteri Muda ba Opis Kepala Menteri (Pemansang Pengereja Pengawa enggau Latih) enggau Menteri Muda Rampa Menua, Datu Len Talif Salleh.

Ku iya, kualiti pengereja pengawa di nengeri tu sebagi ari batang pekara ti meri pangka ke besai ngagai menua Malaysia enggau Sarawak ngambi ulih nyapai juluk.

Pia mega, iya madah, tu deka nentu sekalika puku diperanak enggau pengawa ngubah infrastruktur, matak pemeranak puku ari menua luar, ngulihka makit ke besai agi enggau ke bukai deka ngemai asil ti diranda.

“Makin mayuh pengereja pengawa kita nyadi inovatif enggau produktif, majak menyana agi pengidup diasaika kitai,” ku iya lebuh bejadika seminar ‘Pengawa Nambahka Pengelandik Enggau Latih Baru di Nengeri – Nama Pekara Ti Patut Ditemu Kita’ diatur begulai Federation of Malaysian Manufacturers (FMM) enggau Unit Pemansang Pengereja Pengawa (WDU) ba Hotel Promenade Bintulu kemari.

Kededua perintah nengeri enggau besai ku iya udah ngemansang sereta nempa mayuh program enggau skim ke bisi dikena ngemansangka bala pengereja pengawa.

“Mayuh ari skim enggau program semina ulih nyapai pemujur nyema bisi pemereti ati enggau penyereta ari piak industri,” ku Len.

Ku iya, nya kebuah batang tuju seminar tu diatur dikena meri penyedar ngagai bala pemain industri enggau piak ti ngaji orang gawa ba polisi ke baru, skim wang enggau inisiatif dipejalaika perintah nengeri enggau perintah besai dalam ngemansangka pengereja pengawa di nengeri tu.

Seiti ari program ti dikemerat dalam seminar tu iya nya Graduate Enhancement Training Sarawak (GETS).

“GETS tu program nambahka penau pengereja pengawa dibuka perintah Sarawak bekerejasama enggau bakih dalam industri.

“Bala graduet ti bedau gawa deka dikumbai pematih GETS enggau kaling kompeni GETS dalam timpuh 12 bulan,” ku iya.

Kompeni deka ngagih ‘mentor’ ti ransing ati sereta nyerahka pangku pengawa enggau tanggungpengawa ke patut dikena mantu bala pematih GETS ngulihka pengelandik bekaul enggau industri enggau peneleba ti deka nambahka makit pengawa sida.

Ku Len, maya latih praktikal iya nya 12 bulan, bala pematih GETS mega deka disikap enggau kus dalam Jaku Inggeris, pengelandik dalam diri enggau pengelandik ngelakuka diri empu.

Maya latih tu, perintah deka mayar elawin penyampau RM1,000 ngagai bala pematih ke belatih ti bisi degree lalu RM8,00 ungkup diploma.

“Dikena ngemujurka program GETS tu, kitai begunaka mayuh kompeni ti ulih nyadi pesereta nyadi kaban GETS,” ku iya seraya ngansak kompeni berundingka program tu enggau berat laban tu mega deka pulaika penguntung ngagai kompeni dalam betapi enggau gaya ekonomi ke diatu.

Ku iya, enggau nyadi kaban GETS, kompeni ulih ngemeranka dagang sida ke diatu tauka ngerembaika iya agi enggau mantu pematih GETS enggau nadai penambah ba ungkus orang gawa.

“Enti sema kita dekaka penatai kompeni nambah, kita meseti mega nambahka kapasiti pengereja pengawa lalu tu pekara nambahka pengelandik ngagai bala pengereja pengawa kita beguna endar,” ku iya.

Taja pia ku Len, nadai mayuh kompeni udah bejalaika pengawa sida ngagai Wang Turu Pemansang Orang Gawa (HRDF) meri latih enggau ngemansangka bala staf lalu tu ngayan alai tikas aktiviti nambahka pengelandik di Sarawak agi kurang.

Ba lansa ke bukai, Chairman FMM Sarawak, Othman Abdul Rani madahka Institut FMM Sarawak nyediaka program latih teknikal enggau kompetensi ti engkeman enggau peminta industri Sarawak.

“Program Injinir, pengawa meresa, kualiti enggau pengelikun nyadi teras besai ngagai program teknikal Institut FMM,” ku iya.

Nitih ku Othman, program setipikit baka Setipikit Pemesai Pengerai Enggau Pengelikun, latih forklif, setipikit dalam Boilerman, Setipikit dalam Injinir Steam enggau Kompetensi dalam pengelandik perubat keterubah ti suah agi diatur Institut FMM Sarawak.

Ku iya, Institut FMM diperibitka nyadi kompeni kediri ari FMM kena 12 Januari 1999.

Pekara tu ku iya ke bendar dikena ngerembai sereta meri pemerat ba pekara latih iya, seriris enggau juluk FMM ngemansangka potensial enggau nambahka pengelandik bala stag ba tiap tikas dalam industri.

“Tu deka nempa orang gawa bisi latih dalam semua pekara pengelandik indsutri enggau penau pengereja pengawa betapi enggau pejalai menua ngagai status bansa industri,” ku Othman.

Pengari FMM Sarawak ti ditumbuh dalam bulan Oktober 2003 udah diangkat nyadi pampang FMM Sarawak dalam bulan Julai 2016.

Sama bisi datai rambau seminar nya Direktor Unit Pemansang Pengereja Pengawa ba Opis Kepala Menteri, Dr Abdul Rahman Deen.

BEJADI: Dr. Rundi nyain plak kelai bejadika ‘Makmal Pelan Persediaan Tindakan Kecemasan Empangan Bengoh’, seraya diperatika (ari kanan) Mohamad Sabari, Dr. Jerip, Sagah enggau ke bukai.

KUCHING: Lembaga Air Kuching (LAK), Opis Bekal Ai Menua Pesisir (JBALB) sereta Opis Menteri Perengka Guna Mensia Mayuh enda agi bebatak asur ba pengawa ngenukuka pengelikun enggau pemeresi Tekad Ai Bengoh.

Menteri Perengka Guna Mensia Mayuh, Dato Sri Dr. Stephen Rundi Utom madah, ketetiga piak nya LAK, JBALB enggau opis menteri iya deka ngiga chara engkeman dikena mutarka sekeda penanggul ke agi bisi nyadi di ulu Tekad Ai Bengoh.

Baka ke dipadahka ngagai iya, Dr Rundi madahka ba ulu Tekat Ai Bengoh agi bisi peranak ke mengkang bejalaika pengawa baka betanam betupi, ti dikeirauka ulih ngeruga pemeresi ai ke ditekat ba tekat nya.

“Aku ngasaika tu bebida ari tekat ai hidro, tu (Tekat Ai Bengoh) nyendiaka bekal ai beresi ke diguna sereta diirup kitai ninting hari. Nya alai enda patut agi bisi aktiviti di atas din enggaika ngeruga pemeresi sungai sereta ai ke ditekat nya.

“Kitai ngarapka piak ke bekaul baka JBALB, LAK sereta opis menteri aku ulih bejalaika atur ke patut sereta matau lalu nerang enggau silik ngagai komuniti nama utai ke ulih nyadi enti nyema ai nya kamah.

“Aku arap endar LAK ulih ngiga chara ti pemadu engkeman enggau enda agi bebatak asur ngenukuka pengelikun enggau pemeresi tekat ai nya,” ku iya.

Dr. Rundi mansutka pekara nya lebuh bejaku seraya bejadika ‘Makmal Pelan Persediaan Tindakan Kecemasan Empangan’ Bengoh, ke diatur ba LAK di sebuah hotel ditu, kemari.

Bisi lebih ari 40 buah genturung pendiau ke diarika ketuai kampung, 11 sekula ke diarika kepala pengajar, pengari Opis Residen Kuching, Opis Pelilih Menua Kuching enggau Bengoh Pelilih Mit sereta sekeda ejensi baka NREB, Sarawak Reservoir Board (SRB), Opis Parit enggau Entali Ai ke nyereta Makmal Pelan Persediaan Tindakan Kecemasan Empangan Bengoh ke diatur pengelama dua hari berunggu ba sebuah hotel di tu.

Ngenang pasal Makmal Pelan Persediaan Tindakan Kecemasan Empangan Bengoh iya ngarapka pesereta ulih ngiga chara sereta pemutus ti manah dikena mutarka penanggul lalu madah ngagai perintah, dikena nyaga pengelikun enggau pemeresi ai tauka sungai enggau kualiti pengidup.

LAK ku iya, numbuhka Komiti Pengelikun Tekat Ai Bengoh sereta bejalaika Makmal Pelan Persediaan Tindakan Kecemasan Empangan Bengoh dua hari berunggu dikena ngerapitka kaul peranak genturung pendiau ke kena bungkur projek Tekat Ai Bengoh enggau sekeda ejensi, kelimpah ari ngiga chara ngenukuka pengelikun enggau pemeresi tekat ai nya.

“Batang Juluk Makmal Pelan Persediaan Tindakan Kecemasan Empangan Bengoh tu dikena ngemansangka rurun komunikasyen ke betul sereta nentuka kandang endur ke selamat alai peranak diau nyema bisi penusah ngenyit nyadi.

“Aku mega ngarapka LAK sereta JBALB ulih berati enggau numbuhka ‘early warning system’ ungkup genturung pendiau ti semak enggau tekat ai nya,” ku iya seraya minta LAK ngemanahka agi servis kelebih agi bekaul enggau nyendiaka bekal ai beresi di mengeri tu.

Nitihku iya, di nengeri Sarawak naka ke diatu bisi urung 80.5 peratus udah dibungkur bekal ai beresi,enda nyengkaum bagi menua Kuching, Limbang enggau Miri ke bedau nganjung ripot bekaul pekara nya.

Perintah lebih agi Kepala Menteri Datuk Patinggi Tan Sri Adenan Satem ku iya chukup beratka peranak menua tu kelebih agi ke diau di menua pesisir dibungkur bekal ai beresi.

Iya madahka perintah nengeri deka terus minta belanja ari perintah besai dikena nyapai juluk deka nyerapka serata menua kelebih agi menua pesisir di nengeri tu dibungkur enggau bekal ai beresi.

Sama bisi datai ngagai pengerami nya kemari, Menteri Muda Perengka Guna Mensia Mayuh (Bekal Ai) Datuk Roland Sagah Wee Inn; Menteri Muda Pengerai Mensia Mayuh ti mega Kaban Kunsil Nengeri (ADUN) Mambong Datuk Dr. Jerip Susil; Sekretari Mendam Opis Menteri Perengka Guna Mensia Mayuh Datuk Ubaidillah Abdul Latip, Menijar Besar LAK Mohamad Sabari Shakeran enggau ke bukai.

KUCHING: Perintah Nengeri diatu ngeluarka pas tama khas nengah Padang Bilun Miri enggau Kompleks Kastam, Imigresyen sereta Kuarantin (CIQ) Sungai Tujuh dikena mai tama temuai ari menua luar kelebih agi ari China ke bagi menua adap utara Sarawak.

Sapit Kepala Menteri Datuk Amar Abang Johari Tun Openg madah, nya dipejalaika ari baruh kuasa autonomi imigresyen Sarawak, pengudah peminta deka ngazet kededua pintu penama nya ba pengawa nyendiaka ‘Visa Semasa Ketibaan (VOA)’ ngagai temuai ari menua luar ke bedau agi nerima timbal ari perintah besai.

Ku iya, ke diatu pengawa ngeluarka VOA di Sarawak semina dibisi dipejalaika ba Padang Bilun Antarabansa Kuching (LTAK).

“Diatu, temuai ari menua luar ke datai nengah Padang Bilun Miri enggau CIQ Sungai Tujuh ulih tama ke Miri ngena pas tama khas enggau timpuh sah pengelama 120 jam sereta ulih dilanjarka.

“Tuju tu dikena mai tama mayuh agi temuai ari menua luar ke Miri senipak enggau juluk kitai deka ngangkat tauka ngelakuka utara Sarawak,” ku iya ba aum pengarang berita ba opis iya di Wisma Sultan Tengah ditu, kemari.

Sama bisi datai Menteri Muda Dagang Temuai Datuk Lee Kim Shin enggau Sekretari Mendam Opis Menteri Dagang Temuai, Seni enggau Main Asal Datuk Ik Pahon Joyik.

Nambahka nya Abang Johari ti mega Menteri Dagang Temuai, Seni enggau Main asal madahka beserimbai enggau pengawa ngeluarka pas tama khas nya, perintah nengeri mega mai tama penerebai suwa khas ari China terus ke Miri.

Ku iya, nya dikena narit tama temuai ari menua China kelebih agi ke Miri sereta Sarawak, ke alai nengeri tu udah nyadi entara palan dagang temuai ke dipilih raban ‘kelas petengan baru’ menua nya, ti manggai urung 400 juta ari sepenyampau 1.2 bilion pemayuh tubuh rayat China.

“Kitai deka nerima 10 penerebai lalu tetiap penerebai bisi kapasiti 160 endur duduk lalu nya dipelabaka berengkah ujung September taun tu dalam timpuh dua bulan.

“Udah nya, kitai deka meda baka ni timbal ari orang tambang sebedau neruska penerebai nya tauka nyema bisi nerima timbal ke manah, kitai engka deka ngatur penerebai nitihka penetap,” ku iya.

Berebak enggau tu, Abang Johari madahka iya mega deka ngelakuka pas tama khas ke Miri ngagai menua Taiwan.

“Aku deka ke menua Taiwan pagila (sehari tu) ngemataka pengawa nyain sempekat penerebai suwa khas din lalu aku deka madahka iya nya rayat Taiwan ulih ke Miri diatu lalu enda ibuh ngena VOA laban kitai meri pas tama khas ngagai sida,” ku iya.

Naka semilan bulan keterubah taun tu (Januari ngagai September), Sarawak udah ngerikod sepenyampau 28,000 iku temuai ari menua tasik iya nya niki 12 peratus dibandingka enggau penyampau semua taun nyin kemari ke bisi 24,000 iku.

KUCHING: Raban Soldadu Malaysia (ATM) dilalau enda nerima pengawa ekstrimis tauka atur ke terit enggau nadai bebatak asur deka dipejalaika, nyema bisi bukti penyereta soldadu enggau raban nya.

Nitihku Panglima 3 Bridedier Jeneral Mohd Bustaman Mat Zin, baka ke ditemu orang mayuh, tebal agi raban soldadu ke ditagit nyereta dalam propaganda nya laban ti landik ngena senyata api.

“Bekaul enggau ektrimis sereta jalai pengarap baka Daesh enggau Isis, mayuh raban ATM ditemu bisi kaul sechara terus tauka enda sechara terus.

“Tang aku ngarapka pengerembai ideologi tu enda mungkur 3 Briged ari propaganda ‘mati syahid’ sereta jalai muntang ke serega,” ku iya.

Iya mansutka pekara nya lebuh bejaku bejadi ‘Perbarisan Hari Ulang Tahun’ Briged Ketiga Infantri Malaysia Ke-59 di Padang Kawad Kem semenggo ditu, kemari.

Bustaman madah, sukung enggau pengawa dikereja raban ATM deka mai penyulut ti enda ngetu, formasyen nya dikena ngangkatka integriti pengawa ngetanka menua.

Iya minta semua raban formasyen Briged Ketiga Infantri Malaysia ngangkatka agi profesionalisme sereta ngemajuka organisasyen ngagai tikas ke lebih tinggi agi.

“Anang ngetu meri servis ti pemadu manah sereta ngemeratka servis ari utai bukai laban kitai terabai menua enggau rayat lalu kitai penyanding besai menua ke pemanah tauka penguntung rebak dudi,” ku iya.

Ngenang pasal nya, Ketuai Staf Markas 3 Briged Leftenan Kolonel Adenin Wan Mahsin madah, nya pekara ke patut dikeingatka 3 Briged ngambika enda malut diri enggau pengawa baka Daesh enggau ISIS.

Ku iya, piak iya deka seruran matau ngena beberapa chara dikena nentuka raban soldadu 3 Briged enda malutka diri enggau aktiviti ekstrimis.

“Chara ti proaktif enggau muntanka ari tumu endang dikemeranka kitai kenyau bisi pengawa ekstrimis tu laban kitai nemu pangka nya chukup besai enti bisi dikemeranka raban soldadu.

“Lalu endang dikemeratka tetiap iku pemesai pemerintah nyentuk ke sehari tu iya nya nyeliahka raban ari nyereta enggau nagang pengawa ekstrimis semak enggau raban kitai,” ku iya.

SHELL ARAPKA BROOKE DOCKYARD: Adenan (tengah) nyadi saksi, pengawa nyain MoU antara Shell (di sain ulih Ong), Chieng (kanan), lalu ngarika Brooke Dockyard, iya nya Norhizan (dua kiba) enggau Lubau (kiba).

KUCHING: Brooke Dockyard Engineering Works and Construction (Brooke Dockyard) sekali ari dikearapka  Shell Malaysia ngaga pelantar minyak ba luar pesisir  E6 ungkup kompeni Sarawak Shell Berhad (SSB).

Pengawa nyain Sempekat Pemereti Ati (MoU) entara Brooke Dockyard enggau SSB dikemataka Kepala Menteri Datuk Patinggi Tan Sri Adenan Satem ba sebuah hotel ditu, kemari.

“Pengawa nyain MoU sehari tu, ngelaika siti agi sejarah nyendiaka servis minyak enggau gis ti diempu nengeri Sarawak,” ku Kepala Menteri Datuk Patinggi Tan Sri Adenan Satem.

Nya mega ku iya mandangka Brooke Dockyard ulih besemekih enggau pemain industri bukai ba pengawa  nyendiaka servis minyak enggau gis ti diaku ba renggat global.

Kemari, ngarika Shell nyain MoU nya, (Managing Director), Shell Global Solutions Malaysia, Simon Ong, Menijar Besai SSB Jill Chieng, lalu ngarika Brooke Dockyard, iya nya Menijar Besai Norhizan Sazali, Menijar Kanan Front End Unit, Lubau Genam.

Sama bisi enggau ngulu atur pengawa nya kemari, Sekretari Perintah Menua Sarawak Tan Sri Datuk Amar Mohamad Morshidi Abdul Ghani, Chairman Shell Malaysia, Datuk Iain Lo, (Managing Director) SSB Simon Durkin, chairman Brooke Dockyard, Datuk Abang Abdul Karim Tun Openg enggau Mandal Presiden, Malaysia Petroleum Management, Petronas, Zamri Jusoh.

Dalam jaku chairman Shell Malaysia, Datuk Iain Lo madahka Shell udah ngembuan kaul ke lama enggau Brooke Dockyard.

Ku Lo, E6 sebagi ari kunterik pengeluar SK308 ti diberi PETRONAS ngagai Sarawak Shell Berhad (Operator 50 peratus) dan PETRONAS Cari Gali Sdn Bhd (50 peratus)

“Kami berasai temegah ati laban udah masuk ngagai renggat pemungkal kerejasama kami enggau ngaga pelantar ba E6. Aku mega berasai temegah ati beratika opis tu udah mansang lalu ulih ngambi projek ke besai dalam berapa taun tu ke udah, lalu aku pechaya Brooke Dockyard Engineering Works deka nyendiaka servis ke bekualiti ke palan tu,” ku iya.

Nangkan nya, chairman Brooke Dockyard Datuk Abang Abdul Karim Tun Openg dalam jaku iya madah, projek E6 nya datai ari 1,450 tan pelantar minyak (Topside) enggau 1,500 tan ‘Jacket’,(sukung pelantar minyak).

“Projek tu dipelaba deka dipejalaika dalam timpuh 860,000 jam gawa (main hours) enggau timpuh nembuka projek tu 12 bulan ungkup Topside sereta 10 bulan ungkup Jacket.

“Ari sepiak kami, Brooke Dockyard, beterima kasih ngagai Sarawak Shell enggau Petroans laban terus meri sukung sereta arapka kami, sebuah ejensi ke bisi kaul enggau Petronas.

Sekumbang 20 taun tu ke udah, Brooke Dockyard udah mujur nembuka empat kuater endur diau, empat struktur sukung, enam Topside, siti template baruh tasik sereta dua bengkah pengawa ngemanahka agi perengka guna ungkup Sarawak Shell,” ku iya.

PAKAN: Pesta Pakan 2016 deka diatur berengkah ari 4 ngagai 13 November ti enggau jelan pemesai.

Mansutka pekara tu, Pemangku Pemesai Pelilih Pakan, Yalin Asan madah, taja berebak enggau pengerami bukai, sida ngarapka pengerami ti digaga sepengelama 10 hari nya ulih matak penatai mensia mayuh.

“Enggau belanja nyauka setengah penyampau ari taun ke udah, kami deka ngurangka pemesai pengerami,” ku iya.

Taja Pesta Pakan 2016 diatur 10 hari berunggu, batang pengerami deka digaga kena 10, 11 enggau 12 November, ku iya, seraya nambah, pengawa bejadi muka pengerami deka diatur lemai 10 November lalu dipelaba deka dipenyadika Kaban Parlimen (MP) Julau, Datuk Joseph Salang Gandum lalu nutup pengerami tu ila deka dipenyadi Kaban Kunsil Nengeri (ADUN) Pakan, Tan Sri William Mawan Ikom ke lalu nyadi MP Saratok kena lemai 12 November.

Kelimpah ari berengkah enggau Pengawa Mandangka Pemansang enggau muka kaunter penerang ari mayuh bengkah ejensi, batang pengerami ke dirintai kena 10 November iya nya ‘Consumer Amazing Race’ diatur Opis Menteri Dagang Dalam Menua, Koperasi enggau Orang Bebelika Barang (KPDNKK), Pekit Karaoke, Main Bol, Renggat Kepenudi Main Bol Trofi Pesta Pakan, Pekit Ngajat enggau Betabuh.

Kena 11 November dipun enggau program ‘Offroad Adventure’ ti deka berengkah urung pukul 7 pagi, Pekit Karoke (Renggat Kepenudi) enggau Main Badminton.

Program ungkup 12 November iya nya Pekit Futsal, Pekit Batak Tali enggau penatai bala pesereta ‘Offroad Adventure’ disempulang enggau pengawa nutup pengerami iya nya Pekit Pemajik Gamal Pesta Pakan (Renggat Kepenudi) enggau pengawa nyuaka perais ngagai champion pekit karaoke enggau pekit Ngajat.

Aktiviti tambah berengkah ari 4 ngagai 9 November iya nya Pekit Nyura Nembiak Mit, Pekit Ngias Bungai, Pekit Ngasilka Produk Betanam Betupi, Pekit Berapi enggau Pekit Nyumpit.

Bangsal bejual sereta ngelakuka produk deka dibuka sepemanjai 10 hari pengerami alai program pemerindang enggau main asal deka diatur muak ke malam, ku iya, seraya nambah, bala sida mega deka ngagauka bala artis menua tu merindang mensia mayuh.

Dulu agi ari nya, Yalin rambau ngetuaika aum komiti pengatur ngelalau bala kaban ngambika bebendar bejalaika pengawa dikena nentuka pengerami 10 hari berunggu tu mujur diatur.

Sekeda bala ke bisi datai ngulu aum nya pengari kaban pengatur pengerami, Top Event Management (TEM), Edward Henry Mut enggau Michelle Chan sereta pengari aru mayuh bengkah ejensi ti ngaul diri dalam pengerami nya.

Ngambi ulih mutarka penusah angus seraya ti nganti bomba

MIRI: Peranak menua pesisir kelebih agi sida ti mar dilawa Opis Pengerara Api Enggau Penyah Penusah (Bomba) Malaysia patut ngembuan penemu ba pekara bomba sereta chara ngerara api.

Kaban Kunsil Nengeri (ADUN) Mulu, Dato Gerawat Gala madah beguna endar ke penyedar nagang penusah nya ari ke nyadi sereta nemu chara mutarka ba renggat tumu.

Ku iya, piak bomba engka enda ulih datai ba endur penusah nyadi enggau jampat ketegal timpuh pejalai ke jauh sereta akses jalai ti mar endur perengka pengangkut bomba tama meri bantu.

“Dalam pekara tu, pengawa ngerara api patut dikereja peranak genturung pendiau dulu ngambika api enda nyerarai seraya nganti penatai raban bomba.

“Pekara ti beguna endar, sida ke ngempu rumah nemu pengawa ke patut ngambika nyeliah bala bukai tepekul kelimpah ari lenyau reta ke besai agi,” ku iya.

Gerawat ke mega nyadi Sapit Speaker DUN Sarawak mansutka pekara tu rambau pengawa Nutup Program Summer Camp Taun 2016 diatur begulai Opis Pengerara Api enggau Penyah Penusah (Bomba) Malaysia Zon 6 Sarawak enggau Petronas Carigali Sdn. Bhd kemari.

Nengah program tu ku iya, bala pesereta diberi penemu pemun ba teori enggau mega pratikal bekaul chara nagang penusah angus sereta pekara ti patut digaga nyema bisi penusah angus nyadi.

“Bala pesereta dikearap ulih bejalaika tanggungpengawa ngerembaika penemu enggau pelajar ti diiri dalam program tu ngagai semua peranak rumah panjai tauka peranak tumpuk pendiau sida empu,” ku iya.

Gerawat madah alai bisi sekeda pesereta udah mujur nagang api ti nyerarai dalam penusah angus ke nyadi ba rumah panjai sida enggau perengka pengerara api sereta pengelandik ke udah diiri dalam siri Program Summer Camp sebedau tu.

Sekeda ari nya Rumah Johnson anak Jangu ke angus mimit kena bulan November 2014, Rumah Jarek anak Kelambu mega mujur diselamat ba penusah angus kena taun 2014 enggau taun 2015 sereta Rumah Linggi anak Belajak dalam bulan Mei 2015 nyin tadi.

“Tu ngayanka alai program Summer Camp enggau program ke sebaka udah meri empas ke manah dalam ngurangka risiko penusah angus kelimpah ulih nambahka penyedar pengelikun ari penusah angus ba renggat pun dalam raban bansa,” ku iya nerang.

Bisi 40 iku pesereta ari pengari rayat, tuai raban bansa enggau tuai rumah ngulu kus pengelama tiga hari berunggu tu berengkah ari 31 Oktober nyentuk 2 November.

Batang tuju program tu diatur dikena ngiri penemu enggau meri penyedar ngagai bala komuniti pasal keruga penusah angus kelebih agi peranak ba tumpuk pendiau enggau rumah panjai.

Ku Gerawat perintah nengeri meri terima kasih ngagai kededua ejensi bekaul kelebih agi Petronas Carigali Sdn. Bhd. Ti udah ngemujurka program tu ba taun ketiga bejurut ari baruh program Tanggungpengawa Rama Korporat (CSR) kompeni.

“Perintah endang nyukung endar pengawa ke bansa tu lalu dikearap ulih dipejalai enggau besai kelebih agi ngagai kandang menua ke jauh ari opis polis,” ku iya.

Sama bisi datai iya nya ADUN Telang Usan, Dennis Ngau, Sapit Direktor Opis Bomba Enggau Penyah Penusah Malaysia Sarawak, Penulung Kepala Bomba Mohd Ali bin Bahudin, Residen Bagi Menua Miri, Antonio Katigalis enggau Menijar Besai Kanan, Sarawak Oil Aset Petronas Carigali Sdn. Bhd, Mohd Nazori Janor enggau Ketuai Zon, Opis Bomba Enggau Penyah Penusah Malaysia Zon 6 Sarawak, Penguasa Kanan Bomba I Law Poh Kiong.

KUCHING: Perintah Nengeri merambu deka neritka atur Pengawa nyadung enggau retikulasyen gis (LPG) ungkup penguna di Sarawak.

Kepala Menteri Datuk Patinggi Tan Sri Adenan Satem madah, nya ke tuju perambu ungkup undang-undang ti manah agi ke deka dipejuraika ba Aum Kunsil Nengeri kena bulan November tu ila.

“Diatu, Pengawa nyadung enggau retikulasyen semina bisi di Miri aja lalu deka di kerembaika ngagai Bintulu. Tu pekara ke bekaul enggau lisin nyadung gis, ordinan sereta pekara bukai ke bisi bekaul enggau pekara tu.

“Kuasa Sarawak, iya nya  meri lisin ba Pengawa nyadung enggau retikulasyen gis (LPG) nyengkaum ruang bilik, ngaga paip gis enggau nyadung nitih lisin nya atas kuasa Perintah Nengeri,” ku iya.

Nya alai ku iya nandu baru, sebengkah perambu ke silik  mungkur tetiap sukut pasal hak Sarawak nyengkaum Akta Garis Entara Kandang Tasik 2012 deka dipejuraika ba Aum Kunsil Nengeri dalam bulan November tu (21 Nov ngagai 30 Nov).

“Tu perambu ke silik nyengkaum Akta Garis Entara Kandang Tasik ti enda ulih dikena agi ketegal ordinan (emergency) ke diambi pulai baru, lalu penuduk Sabah enggau Sarawak enda sebaka enggau menua di Semenanjung Malaysia,” ku Adenan.

Iya madah munyi nya ba aum media pengudah bejadika atur pengawa Shell Meri Fabrikasyen Palan E6 ngagai Brooke Dockyard ba sebuah hotel ditu, kemari.

Ku iya, konstitusyen nya madahka menua dalam Malaysia, baka Semenanjung Malaysia, Sabah enggau Sarawak lalu maya nya Singapura sigi nadai agi, laban udah pansut ari Malaysia.

“Nya ke diubah dalam taun 1976, ke alai  Sabah enggau Sarawak ke nyadi menua ke-12 enggau ke-13 ba penuduk ke sebaka.

“Nya ke deka diubah kitai, ngagai asal. Nya alai, Aum Kunsil Nengeri sekali tu (November tu ila), siti perambu ke silik deka dipejuraika, ngangkatka kitai ngagai penuduk asal dalam taun 1963,” ku iya.

Aum Kunsil Nengeri deka berngkah kena 21 nyentuk 30 November tu ila deka beratika sebegnkah perambu ti mungkur semua sukut pasal hak Sarawak nengah Sempekat Malaysia ari baruh ‘Malaysia Act inter-governmental committee report’ sereta ‘Cobbold Commission’, ku iya.

Ba tanya pengarang berita bekaul enggau raban parti politik ari Sabah deka nyukung Sarawak enti pekara tu dibantaika ba Dewan Rakyat, saut Adenan:

“Nya barang ku sida iya (raban politik Sabah) laban aku semina bejaku pasal Sarawak, aku nadai hak bejaku pasal Sabah,” ku iya.

Ba sebengkah agi tanya pasal penemu Ketuai Penyakal Parti Tindakan Demokratik (DAP) Chong Chieng Jien ti madahka enti sema Perintah Besai enda ulih ngisi peminta Sarawak, Barisan Nasional Sarawak tau pansut ari BN (nitihka penemu Chong), ku Adenan baru:

“Nya penemu Chong, penemu iya enda sebaka enggau engkitai…Ukai utai ke baru disebut iya nya,” ku Adenan.

Presiden PDP udah berandau enggau Mawan lalu nerima pemulai Mawan enggau penyukung ngagai parti nya

KUCHING: Parti Progressif Demokratik (PDP) enggau Kaban Kunsil Nengeri Pakan ti mengkang nadai parti, Tan Sri William Mawan Ikom sereta penyukung iya diatu benung dalam proses begempung, pia ku kaban kaunsil besai PDP Alexander Asing.

Ku iya, presiden PDP Datuk Seri Tiong King Sing enggau Mawan udah berandau pasal pematut begempung nya apin lama ke udah.

“Seduai udah betemu apin lama lalu setuju nerima pemulai Tan Sri William Mawan ngagai parti lama nya,” ku Asing madah ngagai The Borneo Post.

Lebuh ditanya silik agi, Asing madahka parti nya nerima Mawan enti iya minta mulaika diri ngagai parti nya.

“Pekara ke beguna amat iya nya PDP udah nelengaka pintu ngagai Tan Sri William Mawan mulaika diri diatu. Nya alai diatu, iya semina minta diri pulai ngambika kaunsil besai PDP ulih baum lalu nerima iya ngagai parti,” ku Asing.

Asing ti mega sekretari politik kepala menteri madahka PDP nadai pengirau ati nerima baru ex-kaban ti udah ninggalka parti nya nitihka Mawan.

“Kami ngarapka proses begempung tu mujur laban nya ulih nyaup ngenegapka kami enggau BN,” ku Asing.

Iya pechaya randau nya beguna amat ke PDP enggau Mawan laban iya (Mawan) diatu MP Saratok, penuduk ti asal nya diungkupka ngagai PDP.

Ungkup Mawan, iya mengkang chalun ke ulih  dikearap menang ngenanka penuduk nya ke BN ba Pengawa Bepilh Besai (PRU) Ke-14 tu ila.

Ku iya, dikena nentuka pekara nya nyadi nyata, sekeda kaban ari Teras enggau PDP patut berunding ngatur ‘feel good’ aktiviti ungkup kaban ti rinduka buah runding nya.

“Siti ari nya parti mantar Krismas seriris enggau pengangkun meri sereta nerima ke mega ngampun lalu nerima. Parti mantar Krismas ke diatu diperambu diatur tengah bulan Disember di Kuching,” ku iya.

Ku iya baru, sekeda kaban udah majak ngansak nuju ‘penaluk berakup’ lebuh sida mansutka penerang pematut begempung ti deka pulaika pemaik ngagai penyerakup BN.

Mawan lalu nadai parti udah bekau iya menang ba sitak Pakan maya PRN tu tadi nyadi chalun terus BN.

Iya enggau penyukung sebedau tu kala nguji minta nyadi kaban PBB tang peminta sida enda diterima.

Taja pia, dua iku kaban ke sama ari PDP enggau TERAS iya nya Rosey Yunus (Bekenu) enggau Paulus Palu Gumbang (Batu Danau) udah diterima nyadi kaban PBB.

Berebak enggau nya, presiden TERAS lebuh ke ditanya pengarang berita, madahka diri enda nemu pasal randau ketuai PDP enggau Mawan.

SRI AMAN: Kemaya hari tu, pekara pelajar nyata udah berubah ari guna asal iya. Bala nembiak sekula ukai semina ngagai sekula belajar aja tang diseridi nyadi raban ti deka nampung ngintu menua ngambika nyadi modal mensia ke bepenemu sereta ulah ti manah.

Pekara tu seriris enggau seiti ari Palan Pemujur Besai Menua (NKRA), iya nya ngerembaika akses ngagai pelajar ke bekualiti enggau bisi pengulih, pia ku Menteri Muda Ekonomi Menua Pesisir (Kandang Menua Ulu) enggau Kebun Bedandang Besai Sarawak, Datuk Francis Harden Hollis.

Dalam pekara tu ku iya, NKRA nya empu nyadi sebengkah inovasyen polisi enggau strategi ke menyana dikena nyapai juluk ngenegapka kualiti pelajar menua.

“Kitai patut seruran sedia ngaga ubah ke baru dalam sistem pelajar nengah inovasyen polisi enggau strategi. Polisi enggau strategi ke udah mujur dulu suba, ukai reti ulih dikena diatu enggau dudi hari,” ku iya.

Harden ke mega nyadi Kaban Kunsil Nengeri (ADUN) Simanggang mansutka jaku nya lebuh bejadi Program Lukean Legacy Ceremony, Sekula Sekondari (SMK) Saint Luke semak ditu pagi kemari.

Ku iya, sistem pelajar kemaya hari patut regas enggau seruran bisi sereta sedia nengah ubah enggau ngemaru seriris enggau ubah menua.

Dalam jaku ke bukai, kitai patut ngadaka bala nembiak sekula ke nyulut enggau kompeten iya nya nyapai standard kualiti dikena nampung pelajar ngagai Institut Pelajar Tinggi Perintah tauka Peribit.

Ku iya, juluk ngemai menua nyapai standard pelajar ke menyana ba renggat antarabansa patut dipejalaika semua piak.

Nya kebuah mayuh macham program dipejalai Opis Menteri Pelajar Malaysia baka ‘Sarana Ibu Bapa’ enggau ‘Sarana Sekolah’ nyadi pelasar apai indai mayuh agi ngaul diri ba pelajar bala anak sida sereta meransang kaul bala komuniti enggau sekula.

“Inisiatif tu baka ke udah ditetap dalam Pelin Pemansang Pelajar Malaysia (PPPM) 2013-2025, nyadi sebagi ari 11 ansat (anjakan) strategik enggau operasyen nyediaka pelajar ti menyana enggau kerejasama apai indai, komuniti sereta sektor peribit enggau besai agi,” ku iya nerang.

Berebak enggau nya ku iya, pengawa ngadaka bala nembiak sekula nyadi penyerungkai penemu beguna endar dikena nyikap raban nembiak rebak baru enggau peminta ba abad ke-21.

Nya alai, Opis Menteri Pelajar Malaysia udah ngelala sekeda pengelandik dikena nyediaka bala nembiak sekula ngambika ulih besemekih ba renggat dunya.

“Ba abad ke-21 tu ngemeratka pekara baka pengelandik pelajar enggau inovasyen, pengelandik penerang enggau pemadah sereta pengelandik dalam diri enggau arah kendiri. Pengelandik-pengelandik tu tentu ulih nempa nembiak sekula bisi penau ba komunikasyen, bekereja dalam tim, mutarka penanggul, nempa enggau ngaga inovasi sereta landik dalam mayuh macham bidang,” ku iya nambah.

Ku Harden nerang, Opis Menteri Pelajar Malaysia mega deka ransing agi gawa nambahka pengelandik bepikir tikas tinggi (KBAT) dalam pengawa ngajar enggau belajar dalam kelas.

Tambah mega ku iya, KBAT mega bisi dalam tanya peresa perintah baka PT3 enggau Sijil Pelajaran Malaysia (SPM) dikena nguji pengelandik nembiak berunding.

“KBAT nyadi pekara ti beguna endar dikena nambah penau ke bisi dikembuan bala nembiak. Penau tu deka nempa sida nyadi produktif agi sereta ulih besemekih laban bala nembiak ulih ngena penemu, mutarka penanggul, ngaga pemutus enggau nempa sekeda pekara. Lalu tu deka nambahka pemereti enggau ngenegap pelajar ba sebarang pekara ti dipelajar sida ila. Sekeda inisiatif udah dipejalai dikena nambahka KBAT baka Program I-Think ke diatu udah dipejalai ba semua sekula di serata menua,” ku iya nerang silik.

Ku iya nampung, pemujur pengawa nempa modal mensia ti bepenau nyerungkai bidang-bidang baru begunaka penyampau tubuh bala nembiak nambah agi dalam bidang teknik enggau vokasional nyadi alternatif baru ngagai aliran ke bisi diatu.

“Pelajar vokasional di Malaysia ke diatu benung mansang ngagai konsep pelajar ungkup semua ti meri pilih alternatif ngagai bala nembiak ba pelajar hands-on sereta bepelasarka kereja ari renggat menengah rendah nyentuk tikas kolej vokasional. Pelajar teknik enggau vokasional pejalai ke beguna endar ngagai pengawa nempa modal mensia bepengelandik tinggi, bisi inovatif sereta bisi penau napi dunya kemaya hari ti relevan enggau peminta maya dia,” ku iya.

Ba pekara tu ku iya, pemerat ba pengawa ngemanahka kualiti Pelajar Teknik enggau Vokasional endang beguna endar.

Berindik ari nya, sistem latih pengelandik enggau kaul pengawa begulai enggau piak industri udah ditegap nentuka ulih nempa mayuh agi orang gawa landik enggau jelan pengelandik nangkup peminta dalam pemansang Projek Koridor Kuasa Ulih Dikena Baru Sarawak (SCORE).

Sama bisi datai Prinsipal Sekula Limok Shem, Ketuai Kunsil Opis Pelilih Menua Sri Aman (MDSA) Richard Tawan Sedu, Direktor Dewan Suarah Sri Aman Nelson Jin Imam sereta bala pengajar kanan enggau apai indai sereta bala nembiak sekula tu.

Berebak enggau nya, lebih 250 iku nembiak sekula tu nerima mayuh macham gelar ari mayuh bengkah kategori.

Sida sedia bekerejasama ngerembaika peluang sida nampung pelajar taja pan napi penanggul suntuk belanja

// Disalin Ari Nick Fletcher //

KUCHING: Yayasan Destini Anak Bangsa (YDAB) sedia bekerEjasama enggau Tabung Ekonomi Gagasan Anak Bumiputera Sarawak (TEGAS) sereta sekeda ejensi perintah nengeri ke bukai ngerembaika peluang kelebih agi ngagai ba nembiak di menua pesisir nampung pelajar taja pan betapi enggau pemar ari sukut belanja.

Chairman gerempung nya Tan Sri Datuk Seri Dr Sahol Hamid Abu Bakar madah nya nya chara dikena mantu mayuh agi raban nembiak di Sarawak mansang sereta  bisi pengulih ba bidang teknikal.

“Sarawak udah ngerembai enggau manah  dalam latih teknikal lalu pengawa dikereja perintah nengeri nya udah nyadi chunto ti pemadu manah, laban mayuh program Latih, Teknikal enggau Vokasional (TVET) ditu,” ku iya.

Iya bejaku munyi nya lebuh dikerandau  pengudah nemuai meri basa ngagai Kepala Menteri Datuk Patinggi Tan Sri Adenan Satem di Wisma Bapa Malaysia, Petra Jaya ditu kemari.

Bela bisi enggau Rektor Universiti Teknologi MARA (UiTM) Profesor Datuk Dr Jamil Hamali sereta Keuai Sekretari Politik Kepala Menteri Abdullah Saidol.

Berebak enggau nya, Sahol madahka iya udah minta langgur penemu enggau bantu ari Adenan dikena ng emujurka juluk nya.

“Aku udah minta penemu ari Kepala Menteri baka ni kami (YDAB) ulih bekerejasama ngereja mayuh bengkah pekara ungkup Sarawak,” ku iya.

Nithka juku iya, sida beratika mayuh peranak Sarawak ari ruang bilik ke seranta ulih nampung pelajar ngagai institusyen pelajar tinggi tetapi tang betapi enggau penanggul belanja datai ke Kuching kitu nampung pelajar sida.

Ku iya naka ke diatu, YDAB udah mantu ngulihka endur ngagai urung 37,000 iku di serata menua ngambika ulih nampung pelajr ba institusi pelajar tinggi.