// Dikarang Judan Bungap //

NAMA RITA: Tiong (dua kiba) berandau enggau mensia mayuh ti bisi datai ba Taman Selera Harmoni ditu, malam kilah ensana.

SIBU: Taman Selera Harmoni ditu udah berengkah dibuka baru sepengudah projek ngemanah palan nya tembu digaga.

Projek nya belabuh digaga bulan Februari tu tadi ti ngena ungkus sepenyampau RM2.5 juta.

Ungkus ke dikena ngaga projek nya diberi perintah besai enggau perintah nengeri ti sama bela meri RM1 juta.

Kelimpah ari nya, Turu Pemansang ari Opis Kaunsil Sibu (SMC) bela nambahka ungkus sepenyampau RM500,000.

Chairman SMC Datuk Tiong Thai King maya ke nemuai ngagai palan tu kilah ensana, madahka iya berasai temegah ati meda pemanah palan nya diatu.

“Ngarapka orang ke bedaja ditu ulih ngintu pemeresi ngambika ulih matak mayuh agi mensia mayuh datai kitu,” pia ku iya maya berandau enggau pengarang berita.

Iya ti mega Kaban Kunsil Nengeri (ADUN) Dudong madah, saup ke diberi SMC nya endang ngembuan tuju deka nyaup orang ke bedaja dia nambahka penatai pemisi.

Chairman Komiti Pengawa Daja Mit SMC Kunsilor Wong Hii Ping ti bela nyempulang penatai Tiong maya tu ngarapka orang ke bedaja dia ulih muka kedai sida abis nadai 25 hari dalam sebulan.

“Kitai minta orang bedaja ditu landik nyediaka pemakai dikena matak penatai mensia mayuh seraya kitai bela besaup nambahka agi penyampau temuai datai ngelawa Sibu,” ku iya sambil ngelalau orang bedaja dia bela ngintu palan nya baikka ngintu pemeresi tauka kereban ke udah disediaka dia.

Kelimpah ari nya, SMC mega nyaup nyediaka lebih 200 iti mija.

Palan tu diatu dibuka 24 jam ninting hari lalu bisi 50 buah kedai ti nyediaka pemakai (30 buah), ai irup (15 buah) enggau iya ke bukai (lima buah).

Ari penyampau nya, 13 iku ari sida orang ke baru bedaja dia.

Dikena meri pengelantang ngagai mensia mayuh, diatu palan nya udah bisi lebih 80 iti palan alai paking kerita.

Maya projek ngemanah palan nya digaga suba, sida dia diberi awak bedaja ba Jalai Tapang, Sungai Antu.

NYULUT: (enam ari kiba) Abdul Karim, Dr. Chin enggau Razali begambar bebala mayuh enggau 10 iku penerima setipikit Productivity Champion ari MPC, kemari.

KUCHING: ‘Sistem Pengurusan Lean’ mantu ngemanahka agi prosedur enggau chara kerja ninting hari ke ulih meri pangka positif ngagai produk sereta servis lalu ngenyampatka agi proses meri servis dikena nangkup peminta rayat.

Berindika ari pekara nya, Ketuai Direktor Kaunsil Produktiviti Malaysia (MPC) Dato Mohd Razali Hussain minta sereta ngansak semua organisasyen di Malaysia ngemeranka sistem nya.

Pengurusan Lean ku iya endang dikearapka ulih meri aspirasyen ngagai pengereja pengawa organisasyen ngambika landik agi nengkebang tauka kreatif enggau inovatif, laban asil ukai semina diasaika organisasyen tang mungkur rayat.

“Ngemeranka Pengurusan Lean ulih ngurangka ‘lead time’ dalam sesebengkah aktiviti; ngurangka penanggul ba proses; madamka proses ke enda diguna; nempa penemu landik nengkebang enggau inovasyen; ngenegapka moral sereta ngangkatka penampak proses ngagai rayat dalam enggau luar.

“Aku arap bendar nilai enggau impak ke disebut aku nya tadi, ukai semina ungkup kompeni ti bejalaika pengawa begaga tang mega beguna ngagai ejensi perintah.

“Tu dikena ngenukuka rayat ti bisi utai diadu ulih ngasaika servis ke betul, jampat enggau kemerah,” ku iya.

Razali mansutka pekara nya lebuh bejaku seraya bejadika ‘Seminar Pengurusan Lean Wilayah Sarawak & Sabah’ 2016 ke diatur Kaunsil Produktiviti Malaysia Pelilih Sarawak nengah kerejasama Opis Pengerai Nengeri Sarawak ba sebuah hotel ditu, kemari.

“Ke bendar iya penyikar meri servis tu nyadi batang pekara besai dalam juluk servis opis perintah iya nya ngemuntangka atur chara ngaduka servis dikena ngamatka ‘piagam pelanggan’ ngagai mensia mayuh, lalu ngemudahka piak peribit bejalaika dagang ke ulih nempa penumbuh ekonomi menua.

“Semua organisasyen sekalika perintah tauka peribit, dipinta nganyanka penyulut kereja ti bekualiti, ke lalu ngasilka servis tauka produk ti bekualiti ungkup  rayat,” ku iya.

Bejaku baru iya madahka, dalam Pengurusan Lean mega patut bisi dikemeranka teknik Kaizen baka ngelala bansa pengawa ti masau enggau kebuah ti ngeruga sistem meri servis ngagai pelanggan.

Kelimpah ari nya MPC mega keterubah endar ngelala 10 iku ari mayuh bengkah sektor ke bisi penemu enggau pemandai ba pengawa bejalaika inisiatif ngangkatka produktiviti enggau kualiti ba organisasyen, ti nerima setipikit Productiviti Champion ari MPC.

Ba seminar nya bisi empat keretas kereja dipejuraika ti dibantaika pengari Kaunsil Pemansang Dagang Kayu Sarawak (PUSAKA) Dayang Masmolydiza Abang Dawi; KPJ Kuching Specialist Hospital (Mohamad Hafiz Zaini); Hospital Sultan Ismail, Johor Bahru (Dr. Khursiah Daud) enggau Hospital Tengku Ampuan Rahimah, Klang ti diarika Dr. Ahmad Tajuddin Mohamad Nor.

Sama bisi datai ba pengerami nya kemari, Kaban Kaunsil Direktor MPC Datuk Abang Abdul Karim Tun Openg; Direktor Sepital Besai Sarawak Dr. Chin Zin Hing; direktor MPC Pelilih Sarawak YM Tengku Azmi Tengku Majid enggau kebukai.

NGARAPKA BULIH PEMUJUR: Adenan disempulang bini iya, Datin Patinggi Datuk Amar Jamilah Anu (tengah) begambar enggau kontinjen Yayasan Sarawak ke deka ngagaiPESAYA ke-12 di Kota Kinabalu berengkah kena 10-19 November tu ila.

KUCHING: Kontinjen Yayasan Sarawak ngarapka nasit sida iya manah agi dibanding enggau dua taun ke udah lebuh sida iya sama enggau besemekih enggau (yayasan) menua bukai ari serata Malaysia, ba Pesta Sukan Yayasan SeMalaysia (PESAYA) di Kota Kinabalu, Sabah belabuh ari 10 nyentuk 19 November tu ila.

Chairman Kelab Gerempung Yayasan Sarawak, Ismawi Razak madah, kontinjen Yayasan Sarawak ngarapka sekali tu sida ulih nyapai tagit 5 iti midul emas enti sema deka nyadi champion ba pekit lumba enggau main PESAYA, tauka pengabis kurang pan, 3 iti midul emas.

Kontinjen Yayasan Sarawak kala nyapai pemujur ke pemadu manah, iya nya ba penuduk lumur dua PESAYA 2003, maya Yayasan Sarawak nyadi tuai pengatur lumba enggau main PESAYA.

Kontinjen Yayasan Sarawak deka angkat enggau ba PESAYA ke-12 di Yayasan Sabah lalu diau di palan lumba enggau main ti bisi di sediaka di Komplek Yayasan Sabah berengkah ari 10 nyentuk 19 November tu ila.

“Pemujur pemadu manah kami, iya nya nyadi ba penuduk lumur dua PESAYA 2003 maya Yayasan Sarawak nyadi tuai pengatur ba taun 2003 suba,” ku Ismawi.

Ku iya baru, PESAYA ke sekali tu disereta 13 tim Yayasan nyengkaum ari Wilayah Persekutuan enggau Labuan empu, lalu ari Kontinjen Yayasan Sarawak bisi 63 iku.

Kontinjen ke pemadu mayuh datai ari Johor,lalu ditangkan Sabah enggau Sarawak.

Antara lumba enggau main ti deka dipekitka ba PESAYA ke-12 tu ila bisi 13 bengkah main, baka futsal, main bol, bola tampar, karum, dart, 10-pin bowling, bola jaring, golf, petanque, pingpong, badminton, enggau kem motivasyen.

Iya nandu baru madahka Kontinjen Yayasan Sarawak deka masuk ke semua 13 lumba enggau main nya, nyengaum dua it lumba enggau main bukai baka Golf VIP enggau Lumba enggau Main Rakyat.

“Kami sigi bisi tagit, laban maya bepekit di Johor dua taun ke udah, bisi sekeda lumba enggau main ti dipelabaka ulih dimenang kami baka main bol (kala bulih midul emas), petanque (lumur dua) enggau Karum (lumur dua),” ku iya.

Semua atlit tu sigi datai ari Yayasan Sarawak nyengkaum subsidiari kami nitihka atur undang-undang ti digaga PESAYA, Yayasan Nengeri sereta anak kompeni.

“Nya alai, kami ngarapka bulih mayuh agi midul taun tu dibanding enggau semina teulihka pirak enggau engkeraju,” ku iya

Pagi kemari, atur pengawa nya dipenyadi Kepala Menteri ti mega chairman Yayasan Sarawak, Datuk Patinggi Tan Sri Adenan Satem, udah nyerahka tambai kontinjen Yayasan Sarawak ngagai Pesta Sukan antara yayasan negeri seMalaysia  ba Palan pemansang Pelajar Yayasan Sarawak di Jalai Sultan Tengah semak ditu.

// Dikarang Rengenyan Labang //

KUCHING: Inisiatif Sistem Pengurusan Lean Healthcare  ti dikemeranka Sepital Besai Sarawak (HUS) deka dikerembaika ngagai opis bukai dalam sepital nya awakka kualiti servis ulih dikemanahka agi ke pengelantang pesakit.

Direktor HUS, Dr. Chin Zin Hing madahka nya berindik ari penyulut HUS ke udah mujur ngurangka pukul rata timpuh dischaj enggau timpuh pesakit nganti maya betemu enggau lutur ba zon gadung sepital nya, ngena inisiatif Lean Healthcare.

HUS ku iya, sepital perintah keterubah di nengeri Sarawak ti berengkah ngemeranka inisiatif Lean enggau sukung sereta komitmen ari PEMANDU (Performance Management and Delivery Unit) enggau Universiti Kuala Lumpur kenyau bulan April 2015.

“Inisiatif Lean Healthcare ba Sepital Besai Sarawak udah mujur ngurangka pukul rata timpuh dischaj ari enam (6) jam iya  nya sebedau Lean Healthcare (Mac 2015) ngagai tiga (3) jam pengudah Lean Healthcare dikemeranka (bulan Disember 2015) ba OpisPerubat.

“Opis Penusah Ngenyit & Trauma  ba HUS mega udah mujur ngurang pukul rata timpuh nganti betemu enggau lutur di zon gadung sepenyampau 30-40 peratus pengudah ngemeranka Lean Healthcare.

“Berindik ari pemujur ba kededua opis nya, HUS ngambi inisiatif ngemeranka Lean Healthcare ngagai opis bukai ngambika kualiti servis ulih dikemanahka agi ke pengelantang pesakit,” ku iya.

Dr. Chin mansutka pekara nya dalam jaku pengelalu program ‘Seminar Pengurusan Lean’ Pelilih Sarawak & Sabah 2016 ke diatur Kaunsil Produktiviti Malaysia begulai enggau Opis Pengerai Nengeri Sarawak ba sebuah hotel ditu, kemari.

Bejaku baru iya madahka pemujur projek Lean Healthcare ba sepital nya beduduk ari bisi sukung, komitmen enggau kerejasama ari piak opis.

“Pun taun tu tadi, Sepital Miri mega udah berengkah bejalaika projek Lean Healthcare ke alai pemujur nya nyadi sebengkah KPI (petunjuk prestasi utama) Opis Pengerai Nengeri Sarawak,” ku iya.

Kelimpah ari nya, ba aum pengarang berita lebuh ditanya bekaul timpuh pesakit ke lama nganti maya betemu enggau lutur ba Poliklinik di mengeri tu, iya madahka, piak iya deka beratika agi pekara nya.

“Pesakit ke datai betemu enggau lutur nya ke bendar udah ditimpuhka opis tauka Poliklinik maya, tang pesakit nya tumu datai ari jam ke udah ditimpuhka ngagai sida iya ke ngujungka sida berasai lama maya nganti gintir diri,” ku iya.

Laban bidang tu ulih nempa sida nyadi pengereja pengawa ti landik setipak enggau peminta kereja ba dunya diatu

SRI AMAN: Menteri Muda Ekonomi Menua Pesisir enggau Ulu sereta Kebun Bedandang Besai Sarawak, Datuk Francis Harden Hollis ngelalau bala nembiak sekula anang nyeliahka bidang pelajar teknik enggau vokasional ti bisi dipejalai di menua tu diatu.

Kebuah pia, bidang tu ulih nempa sida nyadi modal mensia bepengelandik tinggi, inovatif sereta bisi penau betapi enggau dunya kemaya hari ti setipak enggau peminta diatu ditu, ku iya.

Taja pia ku Harden, pengawa nempa modal mensia bansa tu begunaka penambah ba penyampau tubuh bala nembiak dalam bidang teknik enggau vokasional ti diaku nyadi sebengkah alternatif ke baru nuju pengawa belajar ke bisi diatu.

“Ketegal nya bidang tu mansang ngagai konsep Pelajar Ungkup Semua ke alai pelajar ‘hands-on’sereta bepelasarka kereja ti nyadi pilih alternatif ngagai sida,” ku iya.

Harden ke mega Kaban Kunsil Nengeri (ADUN) Simanggang mansutka jaku nya lebuh bejaku bejadi Lukean Legacy Ceremony,ti diatur ba di Dewan Stonton Sekula Sekondari (SMK) Saint Luke, kemari.

Beserimbai enggau nya, Harden mega ngemendarka belanja RM50,000 ungkup Serakup Apai Indai Enggau Pengajar (PIBG) SMK Saint Luke dikena ngemanahka perengka guna sekula enggau ngatur aktiviti.

Harden pechaya pengawa nempa modal mensia bepelasarka bidang nya ulih nangkup peminta orang landik  gawa menua tu dudi hari.

“Sistem latih pengelandik enggau kaul pengawa begulai enggau piak industri udah ditegap ngambika ulih nempa mayuh agi orang ke landik gawa enggau jelan pengelandik nangkup peminta dalam pemansang Projek Koridor Kuasa Ulih Dikena Baru Sarawak (SCORE),” ku iya.

Sama bisi datai Ketuai Kunsil Opis Pelilih Menua Sri Aman (MDSA) Richard Tawan Sedu enggau Prinsipal SMK Saint Luke, Limok Shem.

KUCHING: Palan  Amphitheater di Jalai Budaya ditu nyadi seiti agi palan diining raban Bersih Sarawak endur ngadu ‘Bersih 5 Rally’ kena 19 November  tu.

Palan nya diining tajapan Opis Sekretari Perintah Nengeri bisi ngeluarka surat pemendar kena 25 Oktober 2016, Stadium Nengeri  tau dikena endur ngadu gempuru bala mayuh pengudah pinta nguna Padang Merdeka ditulak.

Sapit Mandal Bersih Sarawak ke mega koordinator ‘Bersih 5 Rally’ Ann Teo madah pinta ngatur gempuru di Padang Song Kheng Hai bela ditulak Majlis Bandaraya Kuching Selatan (MBKS) nengah surat 2 November 2016.

Bejaku ngagai pengarang berita di Amphitheater kemari, iya madah kededua palan ke diining udah ditulak enggau nadai kebuah ke nyemetak.

“Ketegal nya kitai ngasai pinta ngadu gempuru bala mayuh enggau likun ti dekaka perintah ke lurus, pengawa bepilih ke enda bechiping ba menua diri ti dikesayau baka di Kuching ditu, udah enda diterima.

“Kitai diatu bisi seiti agi palan, iya nya  Amphitheater di Jalai Budaya endur ngatur Bersih 5.

“Kitai pechaya palan tu chukup manah ungkup bala mayuh enggau pengatur pengawa ke alai mayuh pengerami udah diadu enggau mujur ditu.

“Dewan Suarah ke besemak ulih endur ngengkah entukar lalu bisi mega bas mansa kandang endur tu,’ku iya.

Ann mega madah deka nganjung notis ngagai indu opis polis pelilih Kuching tembu aum pengarang berita.

Notis deka madah ngagai polis dia Amphitheater deka nyadi palan Bersih 5 lalu deka diadu nitihka Akta Gempuru Likun 2012.

Ku iya, urung 5,000 iku disadang datai ngulu gempuru nya ti sama bela bisi diatur di Kuala Lumpur enggau Kota Kinabalu ba maya ke sama.

Nyaut tanya kebuah Bersih Sarawak enggai nguna Stadium Nengeri, iya madah sida nadai ngenataika pinta nguna palan nya ketegal ti enda engkeman endur ngadu gempuru ke baka nya.

Mensia mayuh ku iya, mar ngenataika diri ngagai Stadium Nengeri ketegal nadai perengka pengangkut nuju palan nya.

Bersih 5 Sarawak ku Ann dekaka hak ba tanah NCR, ngelaban ulah politik duit, ngemansang kandang menua pesisir kelimpah pinta bukai ke dikenatai ba renggat menua ke diatur di Kuala Lumpur.

Ba kaul ke sama, Datuk Bandar Dewan Bandaraya Kuching Utara (DBKU) Datuk Abang Abdul Wahap Abang Julai enda ulih dikerandau kemari.

Palan  Amphitheater, nyemaka Padang Merdeka iya nya bela dalam kuasa DBKU.

KUCHING: Perintah nengeri deka berundingka berapa pekara ke udah dipejuraika Cuepacs Sarawak ti pulaika pemanah ngagai orang gawa perintah di nengeri tu.

Ku Chairman Cuepacs Sarawak Ahmad Malie, pekara tu udah dipadah Kepala Menteri Datuk Patinggi Tan Sri Adenan Satem lebuh penemuai meri basa ari raban Cuepacs Sarawak ba opis iya di Wisma Bapa Malaysia ba ditu, bedau lama.

Nerang enggau silik, iya madahka entara pekara ti bisi dipejuraika iya nya hal rasionalisasi 252 skim gawa ti ngaul orang gawa perintah nengeri enggau hal elawin Bayar Insentif Wilayah.

Kelimpah ari nya, ku iya nyengkaum pekara rega bayar rumah ti majak niki kelebih agi ba mengeri besai, ngulihka palan ungkup Opis Cuepacs Sarawak sereta peminta geran ninting taun dikena nyaup Cuepacs Sarawak bejalaika program nyintal kaul semua orang gawa perintah di nengeri tu.

“Cuepacs Sarawak chukup puas ati enggau penemuai ngagai Kepala Menteri sereta mantaika pengaga ati enggau meri besai terima kasih laban iya (KM) udah nyambut penatai kami.

“Kami mega andal ke perintah ti deka berundingka berapa pekara ti udah ditandu dalam penemuai tu,” ku iya.

Sebansa ari utai tumbuh diberi nama Begonia jamilahanuiana, ngangkatka nama bini Kepala Menteri

// Dikarang Rengenyan Labang //

KUCHING: Sarawak bisi tetemuka 12 bansa utai tumbuh  baru, ti ditemu ba dua bengkah kampung galau di nengeri tu, ti dibantai tauka diberikelala ngagai dunya kemari.

Ketuai Pemesai Eksekutif Sarawak Forestry, Wong Ting Chung madahka 12 bansa utai tumbuh nya ditemu seraban saintis ari Sarawak Forestry Corporation (SFC)  enggau Singpore Botanical Gardens ti bejalaika pengawa mansik begulai.

Dua belas bansa utai tumbuh kampung baru nya ditemu nengah projek RIMBA Sarawak udah mujur dipenyadika Kepala Menteri Datuk Patinggi Tan Sri Adenan Satem, kemari.

“Kitai bisi tetemuka 12 bansa utai tumbuh kampung  baru iya nya sebansa orkid, lia, Marantaceae enggau semilan bansa begonia, ke ditemu ba Taman Jelu Siga Lanjak Entimau enggau Taman Negara Batang Ai.

“Berindik ari bini Kepala Menteri, Datin Patinggi Datuk Amar Jamilah Anu ti udah setuju, sehari tu kitai deka madah ngagai dunya iya nya seiti ari semilan bansa Begonia ngangkatka nama iya (Jamilah), iya nya Begonia jamilahanuiana,” ku iya lebuh dikerandau raban pengarang berita seraya madahka 12 bansa nya digiga dalam timpuh dua ngagai tiga bulan.

Dulu ari nya Wong mega bisi mansutka pekara ke sama dalam jaku pengelalu ba pengerami RIMBA Rumbling ke diatur Sarawak Forestry ba sebuah hotel ditu, kemari.

Lebuh ditanya bekaul enggau nama ke deka diberi ngagai bansa utai tumbuh kampung  baru ke bukai, Wong madahka sida iya deka merambu sereta milih nama ke patut lalu dianjung ngagai Opis Kepala Menteri ngambika opis nya milih sereta ngaga pemutus.

Iya madahka projek nya dipejalaika dalam timpuh lima taun, ti berengkah dipejalaika kenyau ari taun 2015, lalu udah dipenyadika Kepala Menteri.

Bejaku baru, iya arap endar dalam kampung di nengeri tu agi mayuh utai tumbuh ke bedau ditemu lalu patut digiga enggau dipansik sereta diberikelala ngagai dunya.

“Agi mayuh utai tumbuh di kampung ti deka digiga sereta dipansik, seraban nya aja ulih ngiga 12 bansa utai tumbuh, tang tentu deka mayuh agi ulih digiga enti pakar ari menua tasik baka Amerika enggau UK sereta ke bukai datai ila.

“Kitai nyendiaka platform ngagai raban pemansik tauka saintis datai ngaga pansik, tang sida patut nganjung perambu ngambika ulih diperati sereta diterima nyema bisi meri penguntung ngagai Sarawak,” ku iya.

Ba pengerami ke sama Sarawak Forestry bejadika dua iti bup iya nya Sarawak PLANT RED LIST – Dipterocarpaceace-Series I enggau Sarawak PLANT RED LIST – Dipterocarpaceace-Series II kelimpah ari bejadika Conservation Intenship Programme, ti dipenyadika Kepala menteri.

Wong lebuh ke ngenang pasal bup nya madah, asil pansik ke dipejalaika raban pemansik projek RIMBA madahka 35 peratus bansa dipterocarp ba renggat dunya dalam IUCN Red List nyau deka punas tang enda tau disebut punas di Sarawak.

“Sebansa  ti benama Shora cuspidata diliska nyau deka punas tang ke sebansa agi ulih ditembu ba sekeda endur di Lundu, Sematan enggau Baram.

“IUCN Red List madahka 64 peratus ari 249 bansa dipterocarp kitai dikumbai ‘nyauka punas’, nya nyengkaum sekeda ke suah ditemu kitai baka meranti binatoh, meranti langgai, selangan batu hitam enggau ke bukai,” ku iya seraya madahka IUCN Red List patut dipansik baru kelebih agi bekaul enggau status dipterocarp di Sarawak.

Sama bisi datai ngagai pengerami nya kemari Jamilah, Menteri Muda Rampa Menua Datuk Len Talif Salleh; Penyanding Penemu Pemansik Sains ke Perintah Nengeri Sarawak Datuk Patinggi Tan Sri (Dr) Alfred Jabu Numpang enggau ke bukai.

KUCHING: Tropical Peat Research Laboratory (TPRL) ti digaga nengah belanja RM40 juta deka dipenyadi kena Hari Satu, 7 November 2016.

Pengawa deka dikemujur Tuai Megai Menua (TYT) Tun Pehin Sri Abdul Taib Mahmud lalu bela digulu Kepala Menteri Datuk Patinggi Tan Sri Adenan Satem.

Didirika besemak enggau Pusat Jantung Sarawak Kota Samarahan, TPRL nyadi sebuah palan pemansik tanah kerapa tropika keterubah di menua tu.

Bejaku ba aum pengarang berita kemari, Direktor TPRL Dr Lulie Melling madah palan ngembuan makmal ke pemadu komprehensif di nengeri tu.

“Pansik ba tanah kerapa tebal agi ungkup pemaik ekonomi menua tu ketegal kitai ngembuan mayuh kebun sawit bedandang besai.

“Sawit ba penuduk lumur dua nangkanka minyak enggau gis dalam atur ngenataika pemisi belanja ngagai menua tu,”ku iya.

Iya nambah tanah kerapa ngarika 30 peratus tanah di Sarawak lalu nyendiaka peluang gawa ba kebun sawit ngagai peranak nengeri tu.

Ngenang kaul ke sama, Dr Lulie madah kerejasama begulai enggau Universiti Hokkaido, Jepun nyaup TPRL nempa mayuh pemujur kenyau ditumbuh.

Nitihka penerang ari iya, TPRL bisi nerima agih belanja ungkup pekara pansik enggau pemansang ari Perintah Besai ba penyampau RM16 juta ungkup timpuh 5 taun.

“Ba taun tu, agih belanja RM16 juta udah mega dikemendar diberi ngagai TPRL ungkup pengawa pansik enggau pemansang ungkup timpuh lima taun agi,”ku iya.

Berindik ari nya Perintah Nengeri udah neritka atur enda ngemendarka pengawa berimba kampung agi

// Dikarang Rengenyan Labang //

KEREJASAMA: Wong besilih MoU enggau Lau (kanan), ti deka bekerejasama nengah Conservation Intership Programme for Forest Management Certification,seraya diperatika Adenan.

KUCHING: Perintah Sarawak netapka pengawa nyaga rampa menua endang pekara ke chukup dikemeratka di nengeri tu.

Berindik ari pekara nya, Kepala Menteri Datuk Patinggi Tan Sri Adenan Satem sekali agi nandu madahka pengawa merimba kampung enda dikemendarka agi di nengeri tu.

Iya berasai temegah ati laban pengawa merimba kampung di nengeri tu udah ulih dikurangka, beduduk ari bisi kerejasama enggau opis penerit adat baka polis, Opis Marin sereta Gerempung Penagang Makai Suap kelimpah ari Opis Kampung.

“Ba pengawa kitai nyaga tauka ngintu rampa menua, aku enggai agi meda kampung kitai diperimba. Udah chukup nya, nadai agi lisin baru sereta nadai agi lisin suwa sementara (PL) ungkup kebun bedandang besai.

“Kimpin kitai ngelaban pengawa ngambi kayu nengah chara belalai, aku enggau gaga ati madahka kitai udah datai ba sekeda tikas penyulut.

“Kitai deka ngetanka Sarawak enggau pemanah rampa menua ti asal baka jeman kelia. Kitai enggaika rayat Sarawak meda Sarawak enggau tanda ringgit aja. Kitai deka ke sida ngemeratka biodiversiti sereta pemanah nya,” ku iya.

Adenan mansutka pekara nya lebuh bejaku bejadika RIMBA Rumblings ke diatur Sarawak Forestry ba sebuah hotel ditu, kemari.

Nambahka nya lebuh ke ngenang Sarawak Forestry begulai enggau Singapore Botanical Gardens ke mujur ngiga 12 bansa utai tumbuh kampung baru ba Taman Jelu Siga Lanjak Entimau enggau Taman Negara Batang Ai, iya arap endar tentu agi bisi mayuh bansa utai tumbuh bukai ke ulih digiga.

Iya madahka Kampung Tropika di nengeri tu kaya ba pengeraja asal enggau utai tumbuh ke patut dipansik lalu dipandang ngagai dunya ngambika ulih dikelala sereta ditanka.

“Tu seiti polisi tebuka lalu asil iya, dalam timpuh ke chukup pandak, kitai bisi tetemuka bansa utai tumbuh kampung baru lalu aku arap endar tentu mayuh agi bansa utai tumbuh bukai deka ditemu.

“Lebuh kitai bisi bekunsi nama utai ti dikemisika enggau dunya, kitai ulih nyaga, ngintu sereta ngetanka nama utai ti dikemisika kitai  enggau dunya,” ku iya seraya beterima kasih laban sebansa ari semilan Begonia baru ke ditemu diberi nama ngangkatka nama bini iya Datin Patinggi Datuk Amar Jamilah Anu iya nya Begonia jamilahanuiana.

Kelimpah ari nya Adenan madahka penyampau Taman Negara di nengeri tu deka ditambahka dikena nyaga rampa menua ke dikembuan nengeri tu.

Ambis nadai satu persepuluh ari jisim tanah di Sarawak, iya nya kampung diintu, ku iya.

Ba pengerami RIMBA Rumblings nya Adenan bejadika tiga pekara iya nya bejadika Conservation Intership Programme  for Forest Management Certification pengawa besilih MoU ke udah disain; bejadika dua bup iya Sarawak PLANT RED LIST – Dipterocarpaceace-Series I enggau Sarawak PLANT RED LIST – Dipterocarpaceace-Series II sereta bejadika 12 bansa utai tumbuh kampung baru.

Maya bejadika Conservation Intership Programme  for Forest Management Certification pengawa besilih MoU ke udah disain bisi diatur entara Sarawak Forestry Corporation ti diarika Ketuai Pemesai Eksekutif Sarawak Forestry, Wong Ting Chung nengah kerejasama enggau Sarawak Timber Association (STA) ti diarika Skretari ti Dipebasaka Dato Henry Lau Lee Kong; Serakup Ngintu Jelu Siga (WCS) Malaysia (Direktor Malaysia Programme, Dr. Melvin Gumal) enggau Zedtee Sdn Bhd (Direktor Zedtee Sdn Bhd, Wong Ing Yung).

Tuju Conservation Intership Programme dikena betapi enggau penanggul suntuk pakar ba pengawa nyaga utai idup enggau utai tumbuh di Sarawak;  nempa kapasiti ti diguna dikena ngisi peminta Criteria and Indicators (C&I) dalam setipikit ngintu kampung sereta dikena ngemudahka penumbuh opis pengintu ba pengawa bejalaika meri Setipikit Ngintu Kampung ti tebilang.

Sama bisi datai ngagai pengerami nya kemari bini Kepala Menteri Datin Patinggi Datuk Amar Jamilah Anu, Menteri Muda Rampa Menua Datuk Len Talif Salleh; Penyanding Penemu Pemansik Sains ke Perintah Nengeri Sarawak Datuk Patinggi Tan Sri (Dr) Alfred Jabu Numpang enggau ke bukai.

KUCHING: Pengawa bejuraika Bajet 2017 bedau lama, ke deka ngurangka agih belanja ungkup Palan Pelajar Tinggi Perintah (IPTA) sereta deka nutup sekeda Palan Pematih Pengajar (IPG) ngirauka sekeda piak, kelebih agi ba sitak Kota Samarahan, ke mega dikelala enggau ‘Mengeri Penemu Sarawak’.

Tuai Kunsil Opis Kaunsil Pelilih Samarahan Dato Peter Minos madahka semua tu ukai berita ti manah laban Universiti Malaysia Sarawak (Unimas) enggau Palan Pematih Pengajar Tun Abdul Razak bepalan ba sitak Kota Samarahan.

Ku iya nambah universiti bukai, iya nya Universiti Teknologi Mara (UiTM) mega bisi pampang palan belajar dia, lalu iya mega irau nyema pekara ngurangka agih belanja ungkup pelajar deka meri empas ngagai bala nembiak sekula ditu.

“Semua tu ukai berita ti manah didinga sereta enda ngenyamaika. Tang ke bendar iya, tu ngirauka kami. Laban Unimas enggau sebuah ari IPG ba Kota Samarahan, nya ke ngasuh kami ibuhka pekara tu.

“Kami enggaika gelar palan pelajar tauka mengeri penemu kitai (Samarahan) rugi ketegal pangka penanggul belanja,” ku iya.

Nitihka pejurai Bajet 2017 ari Menteri Besai Datuk Seri Najib Tun Razak bedau lama, sebelas IPG serata menua deka ditutup tang semilan buah deka diganti ngagai politeknik, empat buah deka nyadi kolej vokasional lalu sebuah deka nyadi Palan Latih Teknik enggau Vokasional.

Lalu bisi sekeda berita madah engka tiga ari empat IPG ba Sarawak nyengkaum Kota Samarahan bisi kena rampit.

Opis Menteri Pelajar udah madahka iya nya semilan ari 27 IPG ke deka diganti nyadi kolej vokasional tuaka politeknik, tang bedau temu agi ni bagi IPG ke dipilih nya.

Perintah nengeri Sarawak agi dalam tanda tanya lalu nasit bala direktor, pengelicha sereta pengajar latih dalam IPG nya bedau temu sereta sida udah nulis surat ngagai opis menteri bekaul ngambika ulih nemu cherita ti betul.

Perintah nengeri kebendar randaka mayuh agi pengajar ti asal penatai ari nengeri tu empu dilatih ngambika ulih nyapai nisbah 90:10 pengajar asal ari Sarawak enggau pengajar ari Semenanjung Malaysia ti ngajar ditu.

Minos madah, menua tu endang begunaka bala nembiak ti udah graduet ari bemacham sukut pelajar kena ngajar di sekula.

“Kitai suah nyebut kitai begunaka orang gawa ti ngembuan pengelandik enggau chukup latih dikena program pemansang tang kitai udah ngaga penanggul dalam belanja ngagai universiti menua tu enggau palan pematih pengajar pia mega sekula. Tu ukai seiti pekara ti manah dipeda. Meseti bisi utai enda ngena tu.

“Pekara bukai ke bedau dipadah iya nya penanggul standard sentang kededua pekara nulis enggau bejaku dalam Jaku Inggeris ba nembiak graduet kitai, perengkaguna sereta infrastruktur ke bedau chukup ba mayuh sekula kelebih agi ba kandang menua pesisir sereta mayuh agi penanggul deka dipeda bekaul enggau sistem pelajar ke enda kreatif sereta inovatif tauka pengelandik bepikir enggau silik. Kitai endang irau lalu tu ukai pekara ti betul.

Iya pechaya tu engka nyadi kebuah bedau lama udah ditumbuhka Kaunsil Runding Pelajar Sarawak, ke ngemai batang tuju deka meda enggau silik baka ni deka ngangkatka sistem pelajar Sarawak lalu nama utai ti ulih digaga Sarawak kena madah ngagai Putrajaya ngambika ulih ngemanahka pekara ari semua sukut.

“Kaunsil tu udah ditumbuhka perintah Sarawak laban Sarawak amat begunaka orang ti landik sereta nemu dalam pengawa pemansang kelebih agi deka ngangkatka kandang menua pesisir. Kami begunaka nembiak ti udah graduet ke landik dalam jaku Inggeris lalu sida ke ulih berunding enggau manah dalam pangku pengawa sida.

Pengelandik enggau penemu sida dalam pekara kediri empu endang patut dalam langkar pemansang kitai. Nadai runding bukai bekaul pekara tu,” ku Minos, ti ngetuaika Opis Kaunsil Pelilih Samarahan ke deka diangkat nyadi Majlis Perbandaran kena 11 November tu ila.

BEJADI: Saftuyah (kiba) nyempulang Menteri Pengintu Pengelantang, Orang Indu enggau Pengelantang Raban Bansa, Datuk Fatimah Abdullah malu tawak tiga kali kelai bejadika Graduasi Tingkatan 6 & Anugerah Kecemerlangan Pelajar Tahun 2016 SMK Batu Lintang, kemari.

KUCHING: Sekolah Menengah Kebangsaan Batu Lintang (SMKBL) beguna sereta minta saup belanja ari perintah enggau Gerempung Ukai Dikuasa Perintah (NGO), dikena ngaga projek gelanggang beperabung sekula nya, ti beungkus RM250,000.

Prinsipal Cemerlang SMK Batu Lintang Saftuyah Adenan madah, deka ngembuan gelanggang beperabung endang juluk lama sekula nya.

Gelanggang beperabung nya deka meri penguntung enggau pengelantang ngagai piak sekula sereta nembiak lebuh ngatur pengawa kelimpah ari aktiviti ko-kurikulum.

“Kami SMKBL enggau Kaban Komiti Gerempung Apai Indai enggau Pengajar (IPG SMKBL) enggau baruh ati minta bantu perintah dikena ngepunka projek ngaga gelanggang beperabung, ti udah lama dikeinginka sekula.

“Penyampau semua ungkus ngaga projek gelanggang beperabung tu dipelabaka RM250,000,” ku iya.

Saftuyah mansutka pekara nya dalam jaku pengelalu pengerami Graduasi Form 6 & Anugerah Kecemerlangan Pelajar Tahun 2016 SMK Batu Lintang ke diatur ba Dewan Seri Lintang sekula nya ditu, kemari.

Pengerami nya udah mujur dipenyadika Menteri Pengintu Pengelantang, Orang Indu enggau Pengelantang Raban Bansa, Datuk Fatimah Abdullah. Iya nyuaka setipikit ngagai 360 iku penerima sekalika dalam bidang akademik, ko-akademik enggau ko-kurikulum  sereta 126 iku nembiak Form 6.

Lebuh ke ngenang pasal pelajar nembiak sekula nya, iya ngarapka bala nembiak ke ngambi peresa SPM enggau STPM taun tu enda lama agi, deka teulihka penyulut ke lalu ngangkatka nama sekula.

Berebak enggau tu iya madahka diri temegah ati enggau penyulut nembiak PT3, SPM enggau STPM taun 2015, ti lebih nyulut ari taun kesebedau tu.

“Kitai ngarapka nembiak Form 5 taun ke bisi 268 iku ke deka ngambi peresa SPM kena 7 November minggu baru, ti mega raban keterubah asil ari PT3 2014 deka ngenyit sereta ngemegahka kitai lalu tejapaika tagit sekula enggau PPD Kuching, ti nambah manah ari Raban Band 3 ngagai Band 2,” ku iya seraya madahka bisi 126 iku nembiak Form 6 taun ngambi STPM 2016.

Penyulut sesebuah sekula ukai semina bepanggai ba penyulut akademik, kokurikulum enggau nembiak aja tang mega patut bisi  kerejasama enggau kaul entara piak sekula enggau apai indai, raban bansa, polis, bomba sereta opis pengerai.

Nya dikena ngenukuka nembiak nyadi modal mensia ti bisi pengelandik, ulih besemekih renggat antarabansa sereta tetap ngemeratka jalai pengidup enggau jalai pengarap, ku iya.

Kelimpah ari nya iya madahka piak sekula sereta apai indai temegah ati ngagai penyulut kokurikulum nembiak sekula nya ke ulih datai ngagai renggat antarabansa dalam aktiviti tauka program ke dipekitka.

“SMKBL amat sinonim enggau penyulut nembiak dalam bidang kokurikulum, ukai semina renggat nengeri enggau kebangsaan tang udah nempa nama ba renggat antarabansa kelebih agi dalam projek inovasyen sains dan kejuruteraan sereta bidang lumba enggau main.

“Nembiak nyelai pendiau kami iya nya nembiak ke bisi penanggul meda udah nempa nama seantero dunya dalam lumba enggau main Paralimpiad. Udah nyadi nyada iya nya dalam Sukan Paralimpiad Malaysia bisi 3 iku atlet olahraga teulihka dua midul emas, tiga midul perak enggau empat midul engkeraju,” ku iya seraya madahka mayuh penyulut bukai ke diulih nembiak sekula nya.

Dikarang Rengenyan Labang//

BEBENDAR AGI: Fatimah nyuaka setipikit ngagai seiku ari 126 iku nembiak Form 6 SMKBL disempulang Saftuyah (kiba).

KUCHING: Kaul enggau kerejasama entara apai indai enggau pengajar, pekara ti beguna amat dikena nentuka penyulut pelajar nembiak enggau sekula, pia ku Menteri Pengintu Pengelantang Pendiau, Orang Indu enggau Pengelantang Raban Bansa, Datuk Fatimah Abdullah.

“Kaul ti manah entara pengajar enggau apai indai, pekara ti beguna amat dikena nentuka penyulut nembiak jemah ila.

“Mayuh pekara sereta pemar ulih ditapi tauka diputarka begulai sekalika bekaul enggau pengelantang nembaik tauka pengurang fizikal, laban nadai sekula ti ngembuan penyukup,” ku iya.

Fatimah mansutka pekara nya lebuh bejaku seraya bejadika Graduasi Form 6 & Anugerah Kecemerlangan Pelajar Tahun 2016 Sekolah Menengah Kebangsaan Batu Lintang (SMKBL) ke diatur ba Dewan Seri Lintang sekula nya ditu, kemari.

Ba pengerami nya Fatimah nyuaka setipikit ngagai 126 iku nembiak Form 6 enggau 360 iku penerima anugerah dalam mayuh bidang.

Bejaku baru iya madahka, pekara ke amat dikearapka bala pengajar enggau apai indai ba bala nembiak iya nya sida  teulihka penyulut dalam akademik tauka kereja.

“Apai indai enggau pengajar deka meda bala nembiak jemah ila ulih ngatika diri sereta mujur dalam pengawa ti dikereja sereta mai penguntung enggau penyulut ngagai raban bansa, nengeri enggau menua,” ku iya.

Kelimpah ari nya lebuh ke ngenang, Hari Orang Indu Renggat Nengeri Sarawak 2016, ti berambaika jaku ‘Sarawak Women in Education : Shaping Mind, Body and Spirit’ ke diatur sehari tu ba Stadium Perpaduan, iya madahka senipak bendar enggau orang indu ke nyulut nyadi pengajar.

“Hari Orang Indu taun tu dikena kitai meri gelar ngagai orang indu di nengeri tu ke nyulut dalam bidang  pelajar,” ku iya.

Nitihku iya, di Sarawak ke diatu penyampau semua pengajar indu ba sekula sekondari bisi 9,933 iku tauka 63.4 peratus, lalu ba sekula primari bisi 16,396 iku pengajar indu.

Ba renggat pelajar tumu anak mit, penyampau pengajar enggau pembantu endang tebal agi raban orang indu ti manggai urung lebih 90 peratus, ku iya.

“Penyampau tadika perintah enggau peribit di nengeri tu bisi 2,769 buah ke mungkur 74,233 iku nembiak sereta 5,233 iku pengajar ti tebal agi pengajar enggau pembantu nya orang indu.

“Berindik ari pekara nya, kitai meri gelar ngagai bala pengajar lebih agi raban orang indu,” ku iya.

Ba pengerami nya Fatimah meri bantu belanja RM10,000 dikena mantu SMK Batu Lintang ngepunka projek ngaga gelanggang beperabung ti begunaka ungkus belanja sepenyampau RM250,000.

Sama bisi datai ba pengerami nya Prinsipal Cemerlang, SMK Batu Lintang Saftuyah Adenan sereta apai indai.

Dikarang Rengenyan Labang//

GENAP 15 TAUN: Uggah enggau Rentap melah kek genap 15 taun biro indu nya udah ditumbuhka. — Gambar Banto Sabang

KUCHING: Biro Indu Rumah Panjai Gensurai, Layar, di Betong ti ditumbuhka kenyau 15 taun ke udah, mujur dipenyadika Sapit Kepala Menteri Datuk Amar Douglas Uggah Embas ba rumah panjai nya, apin lama.

Dipelabaka bisi urung  2,200 iku peranak ke diau ngelingi rumah panjai nya bisi datai ngulu, nyaup sereta nyukung pengerami bejadika Biro Indu Rumah Panjai Gensurai nya.

Entara temuai ke dipebasa ti sama bisi datai iya nya bini Uggah, Datin Amar Doreen Mayang, Menteri Muda Pelajar Tumu Nembiak Mit enggau Pemansang Ruang Bilik Sharifah Hasidah Sayeed Aman Ghazali enggau Direktor Opis Orang Indu enggau Ruang Bilik Sarawak (JWKS) Noriah Ahmad.

Penatai bala temuai disambut Kaban Kunsil Nengeri (ADUN) Layar Gerald Rentap; Penyanding Penemu Sains Nengeri Sarawak Datuk Patinggi Tan Sri (Dr) Alfred Jabu Numpang enggau Penyanding Penemu Biro Indu Rumah Panjai Gensurai, Layar, Betong Tan Sri Empiang Jabu.

Ba pengerami nya ke ngena rambai jaku ‘Sejaku, Sepenemu, Sama-sama Mansang’, Biro Orang Indu Rumah Panjai Gensurai, Layar nya bisi ngangauka 121 buah rumah panjai dalam DUN Layar ke bisi numbuhka biro indu.

Nambahka raban biro indu dalam sitak DUN Layar, biro indu nya mega bisi ngagauka Biro Indu Rumah Panjai Henry Nuni, Sungai Gelam, Sebauh Bintulu ti betuaika Datin Angelina Ujang.

Tuju pengerami bejadika biro orang indu rumah panjai nya dikena meransang raban orang indu ngereja pengawa nitihka ungkup diri ba pengelandik dikena nyungkak penatai pemisi ruang bilik.

Nambahka nya, tuju pengerami nya mega dikena meri peluang ngagai  raban biro orang indu dalam Sitak Kunsil Nengeri (DUN) Layar berandau, besilih sereta bekunsi penemu.

Dalam jaku pengelalu pengerami nya, Ketuai Biro Indu Rumah Panjai Gensurai, Layar, Betong, Kathleen Lemai Jali madahka biro indu rumah panjai nya endang chakah dalam semua pengawa kelebih agi aktiviti main enggau jalai pengidup asal Iban.

“Sekumbang Biro Indu kami udah ditumbuhka, kami chukup chakah dalam semua pengawa kelebih agi pengawa ngetanka jalai pengidup asal kitai baka nenun pua kumbu, nganyam raga ari wi, nusuk leka marik, ngelatih nembiak mit belajar ngajat kelimpah ari nyereta kus ke diatur opis perintah.

“Semua pengawa nya endang ulih mantu kami nyungkak penatai pemisi ruang bilik kelimpah ngetanka main enggau jalai pengidup asal bansa kitai,” ku iya seraya ngarika Biro Orang Gensurai madahka diri temegah ati enggau penumbuh biro nya 15 taun ke udah.

Ku iya, nambahka nya Biro Indu Gensurai apin lama bisi ngatur penemuai ngagai rumah panjai Henry Nuni, Sungai Gelam, Sebauh Bintulu.

“Asil ari penemuai nya kami ngasaika bisi penguntung laban kami bisi bulih penemu baka ni chara ulih nyungkak penatai pemisi ruang bilik,” ku iya.

Nyerumba pengerami bejadika Biro Indu Rumah Panjai Gensurai, Layar, entara program bukai ke bisi diatur baka penerang pasal ngintu pengerai ari Sepital Betong ke diarika Dr. Johnny Pangkas sereta penerang pasal insuran nyawa ari IAA.

Kelimpah ari nya Biro Indu Gensurai nya mantaika pengelandik ngajat indu enggau tanda poco-poco sereta tiket benasit bisi disediaka ungkup mensia mayuh ke datai nyaup pengerami nya.

KUCHING: Jemah ila, nembiak sekula di menua pesisir Sarawak ke nadai arus internet ulih macha e-books sereta ensiklopedia nengah sebengkah perengka ke dikumbai ‘Raspberry pi’.

Perengka pemesai kuchik tanchut nya dijual enggau rega enda lebih ari RM200 ba makit ke diatu, lalu ulih dikunsi 300 iti telefon pintar tauka tablet nengah sambung arus WiFi dalam kandang 20 meter.

“Pengudah mujur nyambung arus WiFi telefon pintar ngagai Raspberry pi, nembiak ulih ngiga pekara pelajar tauka bup ti dikedeka nengah  internet browser,”ku Dekan Fakulti Komputer, Sains enggau Teknologi Pemadah Unimas Johari Abdullah.

Ketegal nya ku iya,Unimas enggau Pustaka Negeri deka nempa kerejasama ba atur ngemansang Raspberry pi ba sepuluh kandang endur nyentuk ngagai ujung taun 2016.

Memorandum pemereti ati mega disain Unimas enggau Pustaka Negeri kemari dikena nentuka universiti ulih ngempuru lalu mindahka e-bup pekara pelajar sereta isi bukai ngagai perengka nya.

Kandang endur keterubah di Sarawak ti udah nguji nguna perengka Raspberry pi iya nya Telok Melano lalu projek udah nempa pemujur ba raban ke ditagit.

“Mungkal projek, perengka nya deka disedia ba librari (genturung pendiau) tauka ba Palan Internet 1Malaysia nyentuk ngagai ujung taun tu,”ku iya nambah.

Berengkah taun 2017, Unimas enggau Pustaka ku iya deka nguji ngaga projek ke sama ngagai semua 222 buah librari ba genturung pendiau sereta 2,000 sekula di serata Sarawak.

Tajapia, semua nya bepanggai enggau belanja ke bisi disedia, tandu Johari.

Dikarang Chris Bishop//

OPERASYEN: Hafidz (dua kanan) meresa minyak sumai paket 1KG di sebuah gudang pemekal barang nya di Jalai Pending, Kuching kemari.

KUCHING: Bekal minyak sumai chukup ungkup Sarawak tajapan rega udah ditiki berengkah 1 November 2016.

Perintah netap pemutus nengah Skim Ngenegap Rega Minyak Sumai ke alai sabsidi ungkup barang nya dikinsil, tang rega ungkup minyak sumai paket 1KG mengkang RM2.50.

Kemari, Opis Menteri Dalam Nengeri, Koperasi enggau Pekara Bebeli Barang (KPDNKK) Sarawak bisi meresa sekeda gudang (pemekal) minyak sumai di Kuching.

Pengawa diuluka Sapit Direktor Ketuai Pemesai Penerit Adat Abdul Hafidz Abdul Rahim.

“Operasyen meresa gudang, pemekal enggau penyual minyak sumai dipejalai di serata Sarawak kenyau perintah mutuska rega baru barang tu.

“Bisi 490 palan ti mungkur 12 kandang endur di nengeri tu nyengkaum di menua pesisir udah diperesa dalam timpuh 3 hari.

“Operasyen dipejalai ngambi ulih nentu bekal minyak sumai di Sarawak chukup lalu bisi dijual di kedai,’ku iya bejaku ngagai pengarang berita kemari.

Nitihka pansik ke digaga KPDNKK ku iya, naka ke diatu bisi 246,118 KG minyak sumai dijual di serata nengeri.

Kelimpah ari nya, stok minyak sumai diatu manggai ba ikas 201,32 metrik tan, tandu iya.

Ngenang kaul ke sama, Hafidz madah operasi mega dikena nentu rega minyak sumai enda ditiki sengapa.

“Rega minyak dalam butul 1Kg tauka lebih patut dijual nitihka rega baru ke udah ditetap lalu rega minyak sumai sekilogram  sepaket mengkang RM2.50.

“Tu dikena nentuka rayat ke patut ngasaika sabsidi perintah, teulihka pemaik ari atur nya,”ku iya nambah.

Iya mega madah KPDNKK Sarawak bisi ngadu kerejasama enggau ijinsi penerit adat baka ke Kastam di adan menua ngambi ulih nentu barang nya enda dibai keluar.

MIRI: Saup raban bansa Orang Ulu ulih dikerembaika agi ba serata Sarawak berindik ari pemujur sida ngangkatka tikas pengidup enggau ngintu pengelantang bansa diri.

Tuai Pemegai Menua (TYT) Nengeri Sarawak, Tun Pehin Sri Abdul Taib Mahmud pechaya enggau pejalai polisi pemansang semua bansa, Orang Ulu bisi penau bejalaika pangku pengawa ngemansangka nengeri sebaka enggau raban bansa Bumiputera ke bukai.

“Naka ke diatu, genap iku Orang Ulu niri negika nasit sida empu dipeda nyata udah mujur endar nitihka peminta sida.

“Dudi hari deka mayih agi ngangkatka sida ti pintar, gawa dalam ngemansangka nengeri Sarawak,” ku iya rambau bejadika pengerami Ngintu Genap Taun Ke-50 Serakup Orang Ulu Nasional (OUNA) ditu malam kemari.

Taib madah, pemujur Orang Ulu diatu berindik ari pemanjai runding niang Dato Sri Temenggong Oyong Lawai Jau ti dekaka bansa Orang Ulu bisi pelajar sereta pengelandik ke tinggi.

Kelimpah nyadi bakih, niang diaku nyadi ketuai raban bansa Bumiputera tebilang di Sarawak ti semampai ngiga jalai ngemansangka Orang Ulu.

“Nya kebuah diatu kitai tau madah, penyampau tubuh bala graduet ari bansa Orang Ulu nyangka mayuh mimit ari tebal agi raban Bumiputera, tang tu asil ari pengawa dipejalaika niang Dato Sri (Temenggung) Oyo Lawai Jau.

“Aku deka kitai ngingatka nama niang tu bujang berani kelebih agi ngagai peranak Orang Ulu. Niang seruran deka berunding enggau perintah ngiga jalai ngemansangka Orang Ulu.

“Nya alai, Orang Ulu bisi taba ke manah di Kuching ungkup rumah serakup sida,” ku Taib nerang.

Taib madah, penau Orang Ulu diatu tampak agi ba bagi menua Miri lalu dikearap kaul sida dalam mayuh bengkah bidang enggau pengawa deka ngerembaika penyulut pengawa sida ba bagi menua bukai.

Nitih ku Taib, rayat Sarawak benasit endar laban diberi mayuh awak begulai ngemansutka pengaya pemansut-pemansut ekonomi iya.

“Orang Ulu endang deka berubah baka orang bukai. Sida enggai tinggal laban ari perati aku sehari tu, kita patut berunding, dini alai Orang Ulu bisi mengeri sida empu ti ngayanka penyulut pengawa Orang Ulu maya jeman moden,” ku iya nerang.

Ngelansa pasal OUNA, iya temegah ati enggau penyulut pengawa serakup dalam ngempung sereta ngemansang raban bansa Orang Ulu dalam timpuh lima dekad ke udah.

Iya ngarapka bida etnik Orang Ulu enda nyadi penekul ngenegapka semangat kerejasama ungkup pemansang enggau pemaik raban nembiak rebak baru.

“Sehari tu Orang Ulu enda kurang ari sida ke bukai laban sida ransing gawa lalu ketuai sida lurus ati ngagai sida.

“Aku berasai lantang OUNA ulih idup sereta gawa datai ba 50 taun,” ku Taib.

Taib mega ngemendarka pemeri penyampau RM250,000 ungkup belanja OUNA bejalaika pangku pengawa sida ngemansangka Orang Ulu.

Sama bisi datai Toh Puan Datuk Patinggi Ragad Kurdi Taib, Menteri Pengatur Pengeraja Asal enggau Rampa Menua Kedua, Datuk Amar Awang Tengah Ali Hasan enggau Presiden OUNA, Datuk Dr Abu Bakar Abdullah.

KUCHING: Kepala Menteri Datuk Patinggi Tan Sri Adenan Satem minta Perintah Besai merundingka baru pemutus nganti dua bengkah palan pematih pengajar (IPG) di Sarawak nyadi kolej teknikal.

Seraya ngasai pemutus nya beli, iya madah kolej teknikal ke diperambu ditumbuh patut nguna fasiliti bukai lalu ukai nutup IPG ke udah bejalaika operasyen ditu.

“Kitai bela nemu pekara pelajar teknikal chukup diguna tang anang sampai kitai nutup palan pematih pengajar,” ku iya.

Adenan mansutka jaku nya rambau bejadi Pengerami Hari Orang Indu 2016 Renggat Nengeri ke diatur di Stadium Perpaduan Petra Jaya ditu, kemari.

Ngenang kaul ke sama, Adenan pechaya enti pemutus nya enda diperundingka baru, juluk nempa bala pengajar di nengeri tu ti 90 peratus diarika peranak asal Sarawak deka puntan.

“Ketegal nya, aku minta Perintah Besai ngubah pemutus nutup dua palan pematih pengajar ditu,” tandu iya.

Sarawak bisi empat IPG maya ke diatu, iya nya IPG Miri, IPG Rejang, IPG Tun Abdul Razak, Samarahan enggau IPG Batu Lintang.

Dulu agi ari nya Adenan madah diri bisi betemu enggau Menteri Besai Datuk Seri Najib Tun Razak lalu madahka 2 pemutus ti diasaika beli.

Pekara ke dua ti bela dipadah iya ngagai Najib iya nya ba sentang pemutus ngangkatka jaku Malaysia nyadi jaku lumur satu lalu ngemelakangka jaku English.

Pemutus nya ku Adenan entara kebuah ti ngujungka raban graduate nadai kereja ketegal ti enda nemu nusun jaku dalam Bahasa English

“Tajapia, bedau laun kitai mutarka pemutus ke udah digaga urung 30–40 taun menya tu.

“Nya mih kebuah aku ngangkatka Jaku English nyadi jaku lumur dua di Sarawak,” ku iya.

Empas ekonomi enda nanggul perintah nangkup peminta rayat

KUCHING: Taja mayuh jaku pejah, tang perintah kemaya hari tu tetap enda kala puntan ngamatka semaya sida ngagai bala rayat, pia ku Sapit Menteri Bumai enggau Industri Betanam Betupi, Datuk Anthony Nogeh Gumbek.

Ku iya, taja bisi sekeda tejanggal, tang bala rayat agi nerima baka ti udah disemaya.

“Taja betapi enggau empas ekonomi dunya ti enda tegap, tang perintah kitai agi ulih nangkup peminta rayat.

“Perintah udah ngamatka semaya meri bantu ngagai ruang bilik ke tasah laban penusah bah ba pun taun tu tadi.

“Lalu sehari tu, semaya tu udah nyadi nyata,” ku iya rambau pengawa nyuaka bantu ngagai sida ke dituntung penusah bah ungkup sitak parlimen Mas Gading.

Urung 952 ruang bilik ari 50 bengkah tumpuk pendiau di Mas Gading ke dituntung penusah bah, alai 871 iku udah nerima bantu nya kemari kelimpah ari 81 iku sida ke udah nerima bantu ari Sapit Kepala Menteri Datuk Amar Abang Johari Tun Openg dalam sebengkah program di Buso mingu nyin tadi.

Genap iku penerima bela nerima bantu mata duit RM500.

Nogeh, ke lalu nyadi Kaban Parlimen (MP) Mas Gading mega ngansak bala rayat meretika perintah endang bejalaika projek besemak enggau sida.

Ku iya, bala rayat patut mereti nadai perintah di dunya tu ulih bejalai sereta nembuka projek enggau jampat pengudah dikemendar.

“Perintah ke diatu nadai kala nejuka rayat pia aja. Lebuh sida besemaya alai iya endang deka dikeamat.

“Nya alai, besaup mih enggau kami, taja sekeda nya bisi tejanggal,” ku iya.

Iya mega muji Opis Penyaga Mensia Mayuh Malaysia (APM) ke udah bebendar sereta enda mantul minta belanja ari perintah dikena mantu sida ke tasah dituntung penusah bah di Sarawak.

KELAI BASA: Adenan (tiga kanan) nyuaka Anugerah Pencapaian Khas ba pekara pelajar ngagai Prof Madya Dr Madeline Berma ba Pengerami Hari Orang Indu 2016 Renggat Nengeri Sarawak di Kuching kemari.

Agih belanja tu dikena sida ngetanka hak diri baka ngambi servis luyar enggau pekara bukai

Dikarang Chris Bishop //

KUCHING: Wang Turu sepenyampau RM2 juta disedia Perintah Nengeri dikena mantu raban orang indu ti bisi napi pemar tauka diayah ngambi tau diintu enggau adil, ku Kepala Menteri Datuk Patinggi Tan Sri Adenan Satem.

“Kes orang indu enggau nembiak dipenyati majak nambah maya ke diatu lalu patut diketu.

“Nambahka nya mayuh orang indu enda diintu enggau adil ari pekara undang-undang kelebih agi ba kes sarak, sida ti jadi enggau laki peranak luar.

“Ambika chunto, orang indu kitai ti jadika peranak Inggeris enggai nyadi enda ngadu kes sarak di England lalu tu enda adil ungkup sida,” ku iya.

Adenan mansutka jaku nya rambau bejadi Hari Orang Indu 2016 Renggat Nengeri Sarawak ke diatur di Stadium Perpaduan Petra Jaya ditu, kemari.

Ngenang kaul ke sama, Adenan madah atur nguji ngubah undang-undang ukai pekara ke muntang ketegal tetiap menua ngembuan undang-undang diri empu.

Dikena nyaup mutarka pemar nya ku iya, Perintah Nengeri nyendia RM2 juta ungkup orang indu ti dipenyati ngambi ulih dikena ngambi servis luyar tauka pekara bukai.

Ba pengerami ti nungkatka rambai jaku ‘Orang Indu ba Pekara Pelajar’ nya, Adenan bisi nyuaka lima Anugerah Tokoh Wanita 2016.

Anugerah pemadu tinggi iya nya Anugerah Datuk Patinggi Laila Taib diberi ngagai Dato Ursula Goh Dumpangol lalu iya nerima setipikit, plak enggau chek RM5,000.

Anugerah Ketua Menteri Usahawan Wanita pulai ngagai Dayang Azizah Abang Zaidan lalu Anugerah Ketua Menteri Kepimpinan Wanita diempu Serina Sauni.

Seduai bela nerima setipikit, plak enggau chek RM3,000.

Gerempung Pengintu Pengelantang Nembiak Berejista Sarawak dipilih nyadi penerima Anugerah Pertubuhan Wanita Cemerlang lalu nerima setipikit, plak sereta chek RM10,000.

Prof Madya Dr Madeline Berma dipilih nerima Anugerah Pencapaian Khas ba pekara pelajar lalu nerima setipikit, plak enggau chek RM3,000.

Bela datai bini Kepala menteri, Datin Patinggi Datuk Amar Jamilah Anu, Menteri Pengintu Pengelantang, Orang Indu enggau Komuniti Datuk Fatimah Abdullah, Menteri Ba Opis Menteri Besai Datuk Nancy Shukeri, Menteri Orang Indu, Ruang Bilik enggau Komuniti Dato Sri Rohani Abdul Karim enggau orang bukai.